म. टा. प्रतिनिधी, कोल्हापूर
जिल्हा परिषदेच्या निवडणुकीसाठी २०, तर पंचायत समितीच्या निवडणुकीसाठी २१ उमेदवारी अर्ज दाखल झाले आहेत. हातकणंगले तालुक्यात सर्वाधिक सात अर्ज जिल्हा परिषदेसाठी, तर पंचायत समितीसाठी तीन अर्ज इच्छुक उमेदवारांनी भरले आहेत. जिल्हा परिषद सदस्या शौमिका महाडिक यानी पुलाची शिरोली, अरुण इंगवले यांनी हातकणंगले, राहुल आवाडे यांनी रेंदाळ, तर अशोक चराटी यांनी आजरा जिल्हा परिषद मतदारसंघातून उमेदवारी अर्ज दाखल केले आहेत. गगनबावडा, भुदरगड, चंदगड तालुक्यांत एकही उमेदवारी अर्ज दाखल झालेला नाही. करवीर तालुक्यात फक्त पंचायत समितीसाठी एकमेव अर्ज दाखल झाला. सोमवारी (ता.६) अर्ज भरण्याचा शेवटचा दिवस आहे.
बुधवारी अर्ज भरण्यास प्रारंभ झाला. काँग्रेस, शिवसेना, स्वाभिमानी या पक्षांनी अद्याप उमेदवारी जाहीर केलेल्या नाहीत. भाजप, ताराराणी आघाडी व राष्ट्रवादी काँग्रेस पक्षाने काही जागांवर उमेदवारांची घोषणा केली आहे. उमेदवारी जाहीर झाली नसल्याने इच्छुकांनी ऑनलाइन अर्जात माहिती भरुन ठेवली आहे पण उमेदवारी अर्जाची प्रत सादर केलेली नाही. पक्षांकडून उमेदवारी अर्ज भरल्यानंतर अर्ज भरण्याच्या प्रक्रियेला गती येणार आहे. जिल्हा परिषद सदस्य शौमिका महाडिक, अरुण इंगवले, माजी आमदार प्रकाश आवाडे यांचा मुलगा राहुल आवाडे, अशोक चराटी या प्रमुख उमेदवारांनी अर्ज दाखल केले आहेत.
हातकणंगलेतून जि.प.साठी ७, पं.स.साठी ५ अर्ज
हातकणंगले ः हातकणंगले तालुक्यातून जिल्हा परिषदेसाठी सात, तर पंचायत समिती निवडणुकीसाठी पाच उमेदवारी अर्ज दाखल केले. अर्ज दाखल करण्यासाठी मातब्बर उमेदवारांनी शक्तिप्रदर्शन करत गुरुवारी अर्ज दाखल केले. यामध्ये राहुल आवाडे, अरुण इंगवले, संदीप कारंडे, अरविंद खोत, शौमिका महाडिक, आदींचा समावेश आहे. अर्ज दाखल करण्यासाठी उमेदवार व त्यांच्या कार्यकर्त्यांनी मोठी गर्दी केली होती.
अर्ज दाखल करण्याचा आजचा दुसरा होता. सकाळी अकरा वाजता तहसीलदार कार्यालयासमोर कार्यकर्त्यांनी मोठी गर्दी केली. हातकणंगले जिल्हा परिषदेसाठी राष्ट्रीय काँग्रेसच्यावतीने संदीप कारंडे यांचा अर्ज दाखल करताना युवा नेते राजूबाबा आवळे, पोपटराव इंगवले, तर भाजपच्यावतीने अरुण इंगवले यांच्यासोबत आमदार सुरेश हाळवणकर, माजी आमदार राजीव आवळे, हिंदुराव शेळके, अजितमामा जाधव, शिवसेनेच्यावतीने अरविंद खोत यांच्यासोबत आमदार सुजित मिणचेकर, महेश चव्हाण, तर रेंदाळ जिल्हा परिषदेसाठी कोल्हापूर जिल्हा ताराराणी आघाडीच्यावतीने राहुल आवाडे यांचा अर्ज दाखल करताना माजी मंत्री प्रकाश आवाडे, उत्तम आवाडे, प्रकाश मोरे, विलास गाताडे उपस्थित होत. पुलाची शिरोली जिल्हा परिषद मतदारसंघासाठी ताराराणी आघाडीच्या शौमिका महाडिक, पट्टणकोडोली जिल्हा परिषदेसाठी वंदना मगदूम, टोप पंचायत समितीसाठी राष्ट्रवादी काँग्रेसमधून संजय शिंदे, चंदूर पंचायत समितीसाठी ताराराणी आघाडीतून दरगोंडा पाटील, आदींसह सुधीर पाटील (नागाव) यांनी अपक्ष व भाजपच्यावतीने राजेंद्र यादव या सर्वांनी उमेदवारी अर्ज मोठे शक्तिप्रदर्शन करत दाखल केले. उद्या (शुक्रवार) अर्ज दाखल करण्याचा तिसरा दिवस असल्याने उमेदवारी अर्ज दाखल करणाऱ्यांची संख्या वाढण्याची शक्यता आहे.
००गडहिंग्लजला जि.प. साठी एक अर्ज दाखल
गडहिंग्लज ः गडहिंग्लज तालुक्यातून जिल्हा परिषद व पंचायत समिती निवडणुकीसाठी गुरुवारी एकच अर्ज दाखल झाला, तर एकूण ६२ अर्जांची विक्री झाल्याची माहिती निवडणूक निर्णय अधिकारी तथा प्रांताधिकारी संगीता चौगुले व सहायक निवडणूक निर्णय अधिकारी तथा तहसीलदार राजेश चव्हाण यांनी दिली. तालुक्यात पाच जिल्हा परिषद, तर दहा पंचायत समिती मतदारसंघ आहेत. आज ऐनापूरचे सरपंच अॅड. दिग्विजय कुराडे यांनी शक्तिप्रदर्शनाने जिल्हा परिषदेसाठी अर्ज दाखल केला. दरम्यान, आज ऐनापूरचे सरपंच अॅ. दिग्विजय कुराडे यांनी गिजवणे गटातून शक्तिप्रदर्शनाने अर्ज दाखल केला. शहरातील मुख्य मार्गावरून भव्य रॅलीद्वारे ते तहसील कार्यालयात कार्यकर्त्यांसह दाखल झाले. त्यानंतर त्यांनी गिजवणे गटातून अर्ज दाखल केला, तर अनेक इच्छुकांची अर्ज घेण्यासाठी कार्यकर्त्यांसह तहसील परिसरात गर्दी केली.
००
राधानगरीत पं. स.साठी दोन अर्ज दाखल
राधानगरी ः राधानगरी पंचायत समितीसाठी कौलव गणातून राविश पाटील-कौलवकर यांनी व युवराज पाटील यांचे अर्ज दाखल केले, तर जिल्हा परिषद गठासाठी अद्याप अर्ज दाखल झालेले नाहीत.
तालुक्यात पंचायत समितीसाठी दहा गण आहेत. कौलव गणातून काँग्रेसमार्फत राविश पाटील कौलवकर यांनी आपला अर्ज प्रांताधिकारी कुंभार, तहसीलदार सचिन लंगोटे यांच्याकडे दाखल केला. तालुक्यात गुरुवारी काँग्रेसमार्फत उमेदवार राविश पाटील यांच्या नावे दोन अर्ज दाखल झाले आहेत, तर युवराज पाटील यांच्या नावे दोन अर्ज असे निवडणूक कार्यालयात चार अर्ज दाखल झाले. यावेळी उदयसिंह पाटील-कौलवकर, रणजित पाटील भोगावती कारखान्याचे माजी उपाध्यक्ष विश्वनाथ पाटील, माजी संचालक धीरज डोंगळे, प्रकाश हुजरे आदींसह कार्यकर्ते उपस्थित होते.
००शिरोळमध्ये जि.प.साठी २, पं.स.साठी ३ अर्ज
जयसिंगपूर ः शिरोळ तालुक्यात जिल्हा परिषद आणि पंचायत समितीच्या निवडणुकीसाठी गुरुवारी पाच अर्ज दाखल झाले. यामध्ये जिल्हा परिषदेसाठी दोन, तर पंचायत समितीसाठी तीन अर्ज दाखल झाले आहेत.
दत्तवाड जिल्हा परिषद मतदारसंघातून पंचायत समितीचे माजी सभापती हरिचंद्र खंडू पाटील यांनी काँग्रेस व अपक्ष असे दोन अर्ज दाखल केले आहेत. दानोळी जिल्हा परिषद मतदारसंघातून प्रिया महेश पाटील (अपक्ष), कोथळी पंचायत समिती मतदारसंघातून सन्मती रावसाहेब पाटील (अपक्ष), शिरढोण पंचायत समिती मतदारसंघातून सुनीता उदय झुटाळ (शिवसेना), अर्जुनवाड पंचायत समिती मतदारसंघातून कविता भागवत चौगुले-कर्नाळे (शिवसेना) यांनी अर्ज दाखल केले. शिवसेनेच्या उमेदवारांनी शक्तिप्रदर्शन करीत निवडणूक निर्णय अधिकारी विजयसिंह देशमुख, सहायक निवडणूक निर्णय अधिकारी किरणकुमार काकडे यांच्याकडे अर्ज दाखल केले.
००कागलमध्ये पाच अर्ज दाखल
कागल : जिल्हा परिषद आणि पंचायत समिती निवडणुकीसाठी कागल तालुक्यातून आज चार उमेदवारांचे पाच अर्ज दाखल झाले. यामध्ये एका महिलेचा काँग्रेमधून आणि चार अपक्षांचे अर्ज दाखल झाले. जिल्हा परिषदेसाठी बापूसाहेब रामचंद्र शेट्ये (रा. सांगाव), बाजीराव धोंडिराम पाटील (सिध्दनेर्ली) यांनी, तर पंचायत समितीसाठी वर्षा बाजीराव पाटील (म्हाकवे), कृष्णात दत्तात्रय कुंभार (यमगे) यांनी अपक्ष अर्ज दाखल केले. याशिवाय वर्षा पाटील यांनी काँग्रेस पक्षातून आपला अर्ज दाखल केला आहे. निवडणूक निर्णय अधिकारी म्हणून उज्ज्वला गाडेकर, तर सहायक म्हणून तहसीलदार किशोर घाडगे काम पहात आहेत.
००शाहूवाडीतून दोन अर्ज
शाहूवाडी ः जिल्हा परिषद आणि पंचायत समिती निवडणुकीसाठी नामनिर्देशनपत्र दाखल करण्याच्या दुसऱ्या दिवशी गुरुवारी जिल्हा परिषद व पंचायत समितीसाठी प्रत्येकी एक-एक उमेदवारी अर्ज दाखल झाल्याची माहिती निवडणूक निर्णय अधिकारी डॉ. सुचिता शिंदे व निवडणूक सहाय्यक तथा तहसीलदार चंद्रशेखर सानप यांनी दिली.
शाहूवाडी पंचायत समितीच्या पणुंद्रे या अनुसूचित जाती स्त्री राखीव गणासाठी विमल ज्ञानदेव कांबळे यांनी अपक्ष म्हणून आपला अर्ज दाखल केला, तर नागरिकांचा मागास प्रवर्गासाठी आरक्षित सरूड जिल्हा परिषद मतदारसंघातून अक्षय अमरसिंह पाटील-चरणकर यांनीही अपक्ष म्हणून अर्ज भरला. चरणकर यांच्यासोबत अर्ज दाखल करण्यासाठी आलेल्या सुमारे अडीचशेहून अधिक मोटारसायकलच्या ताफ्याने लक्ष वेधून घेतले होते.
आजऱ्यात एक अर्ज दाखल
आजरा ः पंचायत समिती व जिल्हा परिषद सार्वत्रिक निवडणुकीसाठी अर्ज भरण्याच्या आजच्या दुसऱ्या दिवशी एकच अर्ज दाखल झाला. आजऱ्यामध्ये महाआघाडीतून आजरा जिल्हा परिषद मतदारसंघातून अशोक चराटी यांचा एकमेव अर्ज दाखल झाला.
००पन्हाळ्यात आठ अर्ज दाखल
पन्हाळा ः पन्हाळा तालुक्यात जिल्हा परिषद व पंचायत समिती निवडणुकीसाठी गुरुवारी दुसऱ्या दिवशी एकूण आठ उमेदवारी अर्ज दाखल झाले आहेत. यामध्ये जिल्हा परिषदेसाठी चार व पंचायत समितीसाठी चार अर्ज दाखल झाले आहेत. तालुक्याचे लक्ष लागून राहिलेल्या सातवे जिल्हा परिषद मतदारसंघातून शिवाजीराव मोरे यांनी जनसुराज्य शक्ती पक्षामधून एक आणि अपक्ष म्हणून एक असे दोन उमेदवारी अर्ज दाखल केले. पोर्ले जिल्हा परिषद मतदारसंघातून समृद्धी सचिन पाटील यांनी जनसुराज्यमधून उमेदवारी अर्ज दाखल केला, तर यवलूज जिल्हा परिषद मतदारसंघातून संजीवनी भारत मोरे यांनी जनसुराज्यकडून उमेदवारी अर्ज दाखल केले. पंचायत समितीसाठी वाडी रत्नागिरी गणातून शिवाजीराव सांगळे यांनी राष्ट्रवादीतर्फे, तर सातवे गणातून जनसुराज्यकडून उज्ज्वला उत्तम पाटील यांनी उमेदवारी अर्ज दाखल केले. वाघवे पंचायत समितीकडून भरत पांडुरंग मोरे यांनी अपक्ष म्हणून दोन उमेदवारी अर्ज दाखल केले. पन्हाळा तालुक्यात मोजक्यात जागांचा अपवाद वगळता उर्वरित उमेदवारांची निश्चिती अद्याप झाली नाही.
मोबाइल अॅप डाउनलोड करा आणि राहा अपडेट
