मुदतीत जातवैधता प्रमाणपत्र सादर न केलेल्या नगरसेवकांच्या याचिकेवर सुप्रीम कोर्टात शुक्रवारी सुनावणी झाली. प्रमाणपत्र सादर न केलेल्या वीस नगरसेवकांवर पद रद्द करण्याच्या राज्य सरकारच्या कारवाईला स्थगिती मिळावी ही सदस्यांची मागणी सुप्रीम कोर्टाने फेटाळली. मात्र, त्याचवेळी या नगरसेवकांच्या जात वैधता प्रमाणपत्रासंदर्भात दोन आठवड्यात म्हणणे मांडण्याचे आदेश राज्य सरकारला दिले. याप्रश्नी पंधरा दिवसांनी सुप्रीम कोर्टात सुनावणी होईल. दरम्यान, या निर्णयामुळे नगरसेवकांचे धाबे दणाणले आहे.
सुप्रीम कोर्टातील न्यायमूर्ती चल्लरामेश्वर व न्यायमूर्ती सप्रे यांच्यासमोर सुनावणी झाली. आरक्षित प्रभागातून निवडून आल्यानंतर सहा महिन्यांच्या आत जात वैधता प्रमाणपत्र सादर न केल्यास नगरसेवक पद रद्द होऊ शकते असा हायकोर्टाने आदेश दिला आहे. हायकोर्टाच्या आदेशानुसार राज्य निवडणूक आयोगाने राज्य सरकारच्या नगर विकास विभागाला मुदतीत जात वैधता प्रमाणपत्र सादर न केलेल्या नगरसेवकांवर कारवाईचे आदेश दिले आहेत. नगर विकास विभागाने महापालिकेकडून दोन वेळेला संबंधित नगरसेवकांचा अहवाल मागवून घेतला आहे. यामुळे वीस नगरसेवकांवर अपात्रतेची टांगती तलवार कायम आहे.
हायकोर्टाच्या निर्णयाला स्थगिती मिळावी आणि राज्य सरकारला कारवाईस मनाई करावी या संदर्भात वीस नगरसेवकांनी एकत्रितपणे महापौर हसीना फरास यांच्यावतीने सुप्रीम कोर्टात विशेष याचिका दाखल केली आहे. या याचिकेवर सुप्रीम कोर्टात गुरुवारी पहिल्यांदा सुनावणी झाली. याचिकाकर्त्यांच्यावतीने सिनीअर वकील के. व्ही. विश्वनाथ यांनी युक्तीवाद केली. विभागीय जात प्रमाणपत्र पडताळणी समितीने मुदतीत प्रमाणपत्र न दिल्यामुळे नगरसेवकांना सादर करण्यास विलंब झाला. जात प्रमाणपत्र पडताळणी समितीने तशी पत्रे दिली आहेत. एकीकडे सहा महिन्यांच्या आत प्रमाणपत्र सादर करणे आवश्यक असताना दुसरीकडे समितीकडून ती उपलब्ध होत नाहीत. यामुळे राज्य सरकारच्या कायद्यात विसंगती आढळते. कायद्यात सुधारणे करणे आवश्यक असल्याचा युक्तीवाद विश्वनाथ यांनी केला. त्यांना वकील मयांक पांडे यांनी सहाय केले. यानंतर सुप्रीम कोर्टाने राज्य सरकारला दोन आठवड्यात जात वैधता प्रमाणपत्राविषयी म्हणणे मांडण्याचे आदेश दिले. राज्य सरकारच्या म्हणण्यानंतर याप्रश्नी सुनावणी होणार आहे.
अडचणीत आलेले नगरसेवक
महापौर हसीना फरास, विरोधी पक्षनेते किरण शिराळे, अश्विनी रामाणे, शमा मुल्ला, वृषाली कदम, दीपा मगदूम, रिना कांबळे, स्वाती यवलुजे, सविता घोरपडे, मनीषा कुंभार, अश्विनी बारामते, संदीप नेजदार, सुभाष बुचडे, अफजल पिरजादे, निलेश देसाई, सचिन पाटील, संतोष गायकवाड, विजय खाडे, कमलाकर भोपळे, नियाज खान.
मोबाइल अॅप डाउनलोड करा आणि राहा अपडेट