काँग्रेस, राष्ट्रवादी काँग्रेसमधील कारभारी नगरसेवकांचा कामकाजातील हस्तक्षेप, इतर नगरसेवकांना निर्णय प्रक्रियेत सामावून न घेणे यामुळे गेले काही दिवस सत्ताधाऱ्यांत सुरु असलेला संघर्ष पार्टी मिटींगमध्यफे उफाळला. नगरोत्थान योजना व महापालिका निधीतून २२ कोटी रुपयांची विकास कामे कारभाऱ्यांच्या प्रभागात मंजूर केल्याचा आरोप पार्टी मिटींगमध्ये झाला.
ठराविक नगरसेवकांनी निधी पळवून नेण्याच्या प्रकाराने वैतागलेल्या राष्ट्रवादी काँग्रेसच्या माजी नगरसेवकाने काँग्रेस पक्षामधील कारभारी नगरसेवकाला याप्रश्नी जाब विचारला. काँग्रेसचे पदाधिकारी राष्ट्रवादीच्या नगरसेवकांना सामावून घेत नाहीत असा आरोपच यावेळी झाला. दोन्ही पक्षातील कारभारी नगरसेवकावर थेट आरोप झाल्यामुळे सभेत तणावपूर्ण वातावरण होते. थेट आरोप झाल्यामुळे संतप्त झालेल्या काँग्रेसचे कारभारी नगरसेवक व राष्ट्रवादीच्या माजी नगरसेवकात जोरदार वादावादी झाली. शाब्दिक वाद वाढत गेल्याने प्रकरण हमरीतुमरीपर्यंत गेले. पार्टी मिटींगमध्ये अन्य एका सदस्यांनी गेल्या वर्षभरात दोन्ही काँग्रेसच्या व विरोधी पक्षाच्या प्रमुख नगरसेवकांनी स्वतच्या प्रभागात इतरांचा निधी कसा पळविला याचा पाढाच वाचला. निधी वाटपात पक्षपात करणाऱ्या दोन्ही काँग्रेसच्या प्रमुख नगरसेवकांची नावेच वाचून दाखवली. यामुळे पार्टी मिटींगमधील वाद चांगलाच वाढला. अखेर उपलब्ध २२ कोटी निधीचे समान वाटप करण्याचे ठरले.
स्थायीसाठी जोरदार फिल्डिंग
महापालिकेची सर्वसाधारण सभा गुरुवारी (ता.१९) होत आहे. या सभेत स्थायी समितीत रिक्त झालेल्या आठ जागेसाठी नव्याने नियुक्ती होणार आहेत. चारही आघाडीतून स्थायीवर वर्णी लागावी याकरिता नगरसेवकांचे प्रयत्न सुरु आहेत. काँग्रेसकडे सभापतिपद असल्याने मोठी रस्सीखेच आहे. काँग्रेसकडून डॉ संदीप नेजदार, राहुल माने, प्रताप जाधव, भूपाल शेटे, संजय मोहिते हे सभापतिपदासाठी इच्छुक आहेत. राष्ट्रवादीकडून सचिन पाटील, संदीप कवाळ यांना तर भाजप, ताराराणी आघाडीकडून राजू दिंडोर्ले, भाग्यश्री शेटके, ईश्वर परमार, विलास वास्कर, पूजा नाईकनवरे यांच्या नावाची चर्चा आहे.
मोबाइल अॅप डाउनलोड करा आणि राहा अपडेट