कोल्हापूर टाइम्स टीम
नोटाबंदीविरोधात राष्ट्रवादी काँग्रेस पक्षाच्यावतीने सोमवारी सुमारे तासभर हायवे रोखून नोटाबंदीच्या विरोधात तीव्र संताप व्यक्त केला. तावडे हॉटेल येथे पंचगंगा पुलाजवळ हे आंदोलन करण्यात आले. खासदार धनंजय महाडिक, आमदार हसन मुश्रीफ, महापौर हसिना फरास यांच्यासह कार्यकर्ते दोन्ही बाजूच्या रस्त्यावर ठिय्या मारला. परिणामी दोन्ही बाजूला सुमारे १५ ते २० किलोमीटर वाहनांच्या रांगा लागल्या होत्या. नोटाबंदीमुळे विस्कटलेली घडी आणि सरकारविरोधात खासदार महाडिक यांच्यासह कार्यकर्त्यांनी आंदोलनस्थळी भजन करीत लक्ष वेधले.
पंतप्रधान नरेंद्र मोदी यांनी ८ नोव्हेंबर २०१६ रोजी ५०० आणि १००० रूपयांच्या नोटा चलनातून रद्द केल्या. त्यानंतर आजतागायत नवे चलन पुरेशा प्रमाणात उपलब्ध झाले नाही. निर्णयाच्या ५० दिवसानंतर परिस्थिती सुधारेल, असे आश्वासन पंतप्रधान मोदी यांनी दिले होते. प्रत्यक्षात ५० दिवस होऊन गेले तरी परिस्थिती ‘जैसे थै’च आहे. यामुळे नोटा बंदीविरोधासाठी आणि पंतप्रधान मोदी, सरकारच्या निषेधार्थ राष्ट्रवादीने राज्यस्तरीय रास्ता रोको आंदोलन पुकारले होते. त्यानंतर सोमवारी सकाळी ११.३० वाजता जिल्ह्यातून राष्ट्रवादीचे नेते आणि कार्यकर्ते वाहनांनी तावडे हॉटेलजवळ आले. तेथून खासदार महाडिक, आमदार मुश्रीफ यांच्या नेतृत्वाखाली मोर्चाने हायवेवर बारा वाजता एकाचवेळी दोन्ही बाजूकडील हायवे रोखण्यात आला. एका बाजूच्या रस्त्यावर आमदार मुश्रीफ, महापौर फरास, माजी खासदार निवेदिता माने यांच्यासह कार्यकर्ते तर दुसऱ्या बाजूला खासदार महाडिक, जिल्हाध्यक्ष ए. वाय. पाटील, राजू लाटकर यांच्यासह कार्यकर्त्यांनी ठिय्या मारला. दोन्ही बाजूकडील कार्यकर्त्यांनी मुख्यमंत्री देवेंद्र फडणवीस, पंतप्रधान मोदी यांच्याविरोधात सुरू केलेल्या घोषणाबाजीने परिसर दणाणू लागला. वाहनांच्या रांगा वाढत गेल्या. शक्य त्या ठिकाणी पोलिसांनी पर्यायी मार्गाने वाहने वळवण्याचा प्रयत्न केला. तरीही कोल्हापुरात येणारे, जाणारे रस्ते, सांगली रोड, हायवेवरील वाहतूक ठप्प झाली.
शहर पोलिस उपअधीक्षक भारतकुमार राणे यांनी मुश्रीफ यांना आंदोलन मागे घेण्याची विनंती केली. मात्र मुश्रीफांनी ती धुडकावली. वारंवार राणे आंदोलन मागे घेण्याची विनंती करत राहिले. तरीही एक वाजेपर्यंत आम्ही उठणार नाही, असे मुश्रीफांनी ठामपणे सांगितले. दुसऱ्या बाजूला खासदार महाडिक, लाटकर, ए. वाय. पाटील यांनी सरकारविरोधात भजनाचा ठेका धरला. कार्यकर्ते टाळमृद्‍ंगात तल्लीन झाले. दुपारी एक वाजेपर्यंत असे चित्र राहिले. शेवटी पोलिसांनी मुश्रीफ, महाडिक, महापौर फरास यांच्यासह प्रमुख कार्यकर्त्यांना ताब्यात घेऊन वाहनातून अंलकार हॉलकडे नेले. एक तासानंतर आंदोलनाची सांगता झाली. वाहतूक सुरळीत झाली.
आंदोलनात माजी आमदार के. पी. पाटील, नगरसेवक मुरलीधर जाधव, आदिल फरास, जयंत पाटील, सचिन पाटील, अनिल साळोखे, ज्येष्ठ कार्यकर्ते बी. एन. पाटील, जिल्हा बँकेचे संचालक संतोष पाटील यांच्यासह प्रमुख पदाधिकारी, कार्यकर्ते उपस्थित होते.
............
चौकट
तुम्हाला कोण देतंय का?
नोटाबंदीमुळे आमचे पैसे पुरेशा प्रमाणात आम्ही काढू शकत नाही. पोलिसांनाही याची झळ बसत आहे. त्यांनाही आपला पगार काढता येत नाही. यामुळे पोलिसांनो पैसे तुम्हाला कोणी देतय का? त्रास तुम्हालाही होत आहे, आमच्या आंदोलनाला तुम्हीही पाठिंबा द्या, असा मुश्रीफांनी सल्ला दिल्यानंतर एकच हंशा पिकला.
एटीएमसमोर म्हैशी
नोटाबंदीमुळे एटीएमसमोर रांगा लागत आहेत. रांगेत थांबूनही पुरेशा प्रमाणात पैसे मिळत नाहीत. त्याचा निषेध करण्यासाठी प्रातिनिधिक स्वरूपात राष्ट्रवादीच्या कार्यकर्त्यांनी लक्ष्मीपुरीतील एटीएमसमोर काहीवेळ म्हैशी थांबवल्या. त्यामुळे तेथे बघ्याची गर्दी झाली.
लक्षवेधी फलक
‘मोदीने केला थाट, जनतेची लावली वाट’, ‘हेच का अच्छे दिन’, ‘पेटीएम म्हणजे पे टू मोदी’, ‘मोदीजी किती फेकणार अजून?, जनता मारेल एकेक फटका मोजून’, ‘अबकी बार, बस कर यार’, ‘केंद्रात नरेंद्र राज्यात देवेंद्र जनता झाली दरिद्र्य’, ‘नोटाबंदी करून बँका-एटीएम समोर रांगाच रांगा, हेच का अच्छे दिन तुम्हीच आता सांगा’, ‘अब की बार, झूठ मत बोल यार’ असे आशय लिहिलेले फलक घेऊन कार्यकर्त्यांनी घोषणाबाजी केली.
मोबाइल अॅप डाउनलोड करा आणि राहा अपडेट
