Maharashtra Times

म. टा. प्रतिनिधी, कोल्हापूर

महापालिकेच्या स्थायी समिती सभेतील आठ सदस्यांच्या नव्याने निवडी होणार असल्याने नगरसेवकांच्या हालचाली गतिमान झाल्या आहेत. येत्या आठवड्यात चिठठ्या टाकून आठ सदस्यांची नावे बाजूला काढण्यात येणार आहेत. त्या जागेवर नवीन सदस्यांची निवडीची प्रक्रिया येत्या सर्वसाधारण सभेत होणार आहे. ‘स्थायी’त संधी मिळावी म्हणून अनेकजण प्रयत्नशील आहेत. त्याचवेळी आठ जणांना ‘स्थायी’तून बाहेर पडावे लागत असल्याने समितीतील अनेक सदस्यांची धाकधूक वाढली आहे.

महापालिकेत आर्थिक मंजुरीचे अधिकार असल्याने स्थायी समिती सभेला महत्त्व आहे. १६ सदस्यीय स्थायी समिती असून यामध्ये काँग्रेस, राष्ट्रवादी काँग्रेसच्या नगरसेवकांची संख्या आठ तर विरोधी भाजप, ताराराणी आघाडीची सदस्य संख्या सात इतकी आहे. शिवसेनेचा एक सदस्य स्थायी समितीत आहे. गेल्या वर्षी स्थायी समिती सभापती निवडीत शिवसेनेने सत्तारूढ काँग्रेस, राष्ट्रवादी काँग्रेसला पाठिंबा दिला होता. पहिल्या वर्षी आठ सदस्य कोण बाहेर पडणार यावरही स्थायीतील गणिते अवलंबून असणार आहेत. सत्तारूढ दोन्ही काँग्रेसमध्ये आठपैकी सहा महिला सदस्या आहेत. दुसरीकडे काँग्रेसमध्ये स्थायी सभापती पदासाठी इच्छुकांची संख्या मोठी आहे. चिठ्ठीद्वारे विद्यमानापैकी काहीजण बाजूला झाले तर नव्यांना संधी मिळणार आहे. सध्याची नावे राहिली तर काही जणांना राजीनामा द्यावा लागणार आहे.

काँग्रेसमध्ये रस्सीखेच

पहिल्या वर्षी आठ सदस्यांची मुदत संपत आल्याने रिक्त जागेसाठी नव्याने निवड प्रक्रिया राबवावी लागणार आहे. महापालिकेतील सत्तासूत्रानुसार स्थायी समिती सभापत‌िपद आता काँग्रेसला मिळणार आहे. काँग्रेसमध्ये या पदासाठी नगरसेवक राहुल माने, संदीप नेजदार, भूपाल शेटे, संजय मोहिते इच्छुक आहेत. फेब्रुवारी महिन्याच्या पहिल्या आठवड्यात स्थायी समिती सभापतीपदासाठी निवडणूक होणार आहे. विरोधी भाजप, ताराराणी आघाडीने यापूर्वीच स्थायी समिती सभापती निवडणूक लढविणार असल्याचे घोषित केले आहे. यामुळे शिवसेनेच्या एका सदस्याला महत्त्व प्राप्त होणार आहे. शिवसेनेने गेल्यावर्षी प्रमाणे सत्तारूढ गटाला पाठिंबा दिला तर दोन्ही काँग्रेसचे पारडे जड राहील. याउलट भाजप, ताराराणी आघाडीला शिवसेनेने पाठिंबा दिला तर स्थायीत दोन्ही बाजूनी आठ आठ इतकी समान संख्या होणार आहे. यामुळे सभापती निवड चिठ्ठीद्वारे होऊ शकेल.

Latest Images