tweet : @sachinyadavMT
पाल्याच्या उज्ज्वल भविष्यासाठी पालकांचा ओढा इंग्रजी माध्यमाच्या शाळांकडे असतो. किंबहुना अशा शाळांत घातले तरच मुले हुशार होतात, असा एक समज आहे. हा समज खोटा ठरवित कोल्हापूर जिल्ह्यात इंग्रजी माध्यमांच्या आणि खासगी प्राथमिक शाळांतून पहिली ते आठवी पर्यंतचे तब्बल ७६७ विद्यार्थी जिल्हा परिषदेच्या प्राथमिक शाळांत दाखल झाले आहेत. यामध्ये इंग्रजी माध्यमाचे ६३१ आणि खासगी प्राथमिक शाळांतून १३६ विद्यार्थी आहेत.
मुंबईसह राज्यातील मराठी माध्यमांच्या शाळांतील विद्यार्थी संख्या कमी झाल्याचे चित्र शिक्षण विभागाला जाणवले. या शैक्षणिक वर्षापासून जिल्हा परिषदेच्या शिक्षण विभागाने प्रगत शिक्षण महाराष्ट्र, ज्ञान रचनावाद, शिक्षण समृद्धीसह, पहिल्याच दिवशी शाळेत विद्यार्थ्यांचे स्वागत आणि गुणवत्तापूर्ण अध्यपनाची जोड दिली. त्याचा परिणाम म्हणून जिल्ह्यातील २३५ इंग्रजी आणि मराठी माध्यमांच्या शाळांतून ७६७ विद्यार्थी जिल्हा परिषदेच्या प्राथमिक शाळेत दाखल झाले. सर्वांधिक १५२ विद्यार्थी शिरोळ तालुक्यातून दाखल झाले. मुलांना इंग्रजी शाळाच हवी, असा अट्टाहास करणाऱ्या पालकांनी या वर्षी आपल्या पाल्यांना जिल्हा परिषदेच्या शाळांत प्रवेश घेतला. इंग्रजी आणि खासगी प्राथमिक शाळांतील शिक्षणाचा दर्जा सुमार असल्याने अनेक पालक पुन्हा मराठी माध्यमाच्या शाळांकडे वळले आहेत. १२ तालुक्यातील २३५ शाळांतील ४१६ शिक्षकांनी केलेल्या प्रयत्नामुळे अनेक पालकांनी इंग्रजी माध्यम सोडण्याचा निर्णय घेतला. इंग्रजी माध्यमातून ६३१ आणि खासगी माध्यमातून १३६ विद्यार्थी जिल्हा परिषदेच्या शाळेत दाखल झाले. जिल्हा परिषदेच्या मराठी माध्यमांच्या शाळांकडून विविध प्रयोग आणि शिक्षणाचा दर्जा सुधारण्यासाठी केलेल्या प्रयत्नांचे यश आहे.
००
जिल्हा परिषदेच्या प्राथमिक शिक्षण विभागाने राबविलेल्या संयुक्त प्रयत्नामुळे विद्यार्थ्यांच्या पटसंख्येत वाढ झाली आहे. या शैक्षणिक वर्षात मुले दाखल झाल्याने जिल्हा परिषदेच्या शाळांतील दर्जेदार शिक्षण आणि गुणवत्तेचे महत्त्व पटले आहे. भविष्यात पालकांचे मेळावे घेण्याचे नियोजन आहे.
डॉ. कुणाल खेमणार, सीईओ, जिल्हा परिषद
००
राज्यात १४ हजार ६४७ विद्यार्थ्यांनी मराठी शाळेत स्थलांतर केले आहे. यात सर्वाधिक विद्यार्थी पुणे विभागातील आहेत. त्याची संख्या ३५०० हजारांहून अधिक आहे. नावीन्यपूर्ण उपक्रमामुळेच शक्य झाले.
शरद गोसावी, राज्य प्राथमिक शिक्षण उपसंचालक
०००
इंग्रजी आणि खासगी प्राथमिक शाळांचा सुमार दर्जा असल्याचे स्पष्ट होत आहे. एका वर्गात पाचहून अधिक विद्यार्थी दाखल झालेल्या एकूण १५ प्राथमिक शिक्षकांचा सत्कार करण्यात येणार आहे.
सुभाष चौगुले, प्राथमिक शिक्षणाधिकारी, जिल्हा परिषद
०००
या धडपडी शिक्षकांच्यामुळेच..
पांडुरंग पाटील, संजय कांबळे, माधुरी यादव (विद्यामंदिर मुदाळ, ता. भुदरगड), राजेंद्र शेटे ( वि. मं. टिक्केवाडी, ता. भुदरगड) अशोक ढेकळे ( वि. मं निळपण, ता. भुदरगड), धनाजी पाटील ( वि. मं. मजरे कारवे, ता. चंदगड), मधुकर नागरगोजे ( वि. मं. चंदगड), नेताजी पोवार, बाळकृष्ण खोत ( वि. मं. नेर्ली , ता. करवीर), वैशाली पंधारे ( केंद्रशाळा कणेरी, ता. करवीर), अर्चना भटते, राजश्री पाटील (वि. मं. म्हाकवे, ता. कागल), प्रिया खोत (वि. मं. येळाणे, ता. शाहूवाडी), म. च. पाटील ( वि. मं. नं. ३, कुरुंदवाद, ता. शिरोळ), अरुण सुतार ( वि. मं. तमदलगे, ता. शिरोळ)
मोबाइल अॅप डाउनलोड करा आणि राहा अपडेट