Maharashtra Times

म. टा. प्रतिनिधी, कोल्हापूर

सहकारी बँकांमध्ये ठणठणाट असताना राष्ट्रीयीकृत बँकांच्या शाखेत पैसे दिले जात आहेत. त्यामुळे ग्रामीण भागातील नागरिकांकडून राष्ट्रीयीकृत बँकांमध्ये खाती उघडण्याचा प्रयत्न केला जात आहे. अशा कोंडीमध्ये जिल्हा बँकेबरोबर इतर सहकारी बँकांसमोर खातेधारकांना आपल्यासोबत ठेवण्याचे आव्हान पेलावे लागत आहेत. त्यासाठी राष्ट्रीयीकृत बँकांमध्येही पैसे मिळत नसल्याने तिकडे खाती उघडून काय साध्य होणार असे खातेधारकांना समजावण्यात येत आहे.

महिना होत आलेला असताना सहकारी बँकांना पैसे दिले जात नाहीत. जिल्हा बँकेलाही अतिशय तुटपुंजी रक्कम देण्यात आली. त्यातून शाखांना पैसे देण्याचे रोटेशन करण्यात आले. यातूनही दोन ते चार लाखापेक्षा मोठी रक्कम काही मोजक्याच मोठ्या शाखांना मिळाली. अशा परिस्थितीत राष्ट्रीयीकृत बँकांमध्ये खाते असलेल्यांना सहकारी बँकांच्या तुलनेत जादा पैसे मिळत असल्याचे चित्र होते. यावरुन अनेक ठिकाणी राष्ट्रीयीकृत बँकेत खाते उघडा व सहकारी बँकेतील रक्कम त्या खात्यावर वर्ग करा असे सांगितले जात होते. त्यानुसार पैसे मिळतील अशी आशा होती. मात्र गेल्या आठवड्यात राष्ट्रीयीकृत बँकांकडीलही पैसे संपत आले. अनेक ठिकाणी एकावेळी जास्तीत जास्त पाच हजार रुपयेच देण्यात आले.

आरबीआयकडून जिल्ह्यात पैसेच येत नसल्याने राष्ट्रीयीकृत असो वा सहकारी बँकांची परिस्थिती सारखीच झाली आहे. पण या प्रकारातून जास्तीत जास्त खाती राष्ट्रीयीकृत बँकेकडे वर्ग करण्याचा प्रकार सुरू आहे. दर दहा दिवसांनी शेतकऱ्यांना करोडो रुपये देणाऱ्या गोकुळ सारख्या संघानेही राष्ट्रीयीकृत बँकेत खाते उघडण्याचे आवाहन केले. या खात्यासाठी राष्ट्रीयीकृत बँकांचे नियम पाळावे लागत असल्याने बॅलेन्सची मर्यादा आहे. हा प्रकार लक्षात येताच सहकारी बँकांनी खातेधारकांची समजूत काढण्यास सुरुवात केली आहे. जिल्हा बँकेने तर राष्ट्रीयीकृत बँकेकडे निधीची कमतरता आहे, सहकारी संस्था व खातेधारकांनी अन्यत्र खाती उघडू नयेत असे जाहीर आवाहनच केले आहे.

Latest Images