म. टा. वृत्तसेवा, पंढरपूर
प्राप्तिकर विभागाने मागील दोन दिवसांपासून पंढरपूर अर्बन बँकेची कसून तपासणी केली. नोटाबंदीच्या निर्णयानंतर नागरी बँकांतील पैसे राष्ट्रीयकृत बँक स्वीकारण्यास तयार नसल्याने कोट्यवधींच्या १००० आणि ५००च्या नोटांनी या बँकांच्या तिजोऱ्या भरल्या होत्या. या नागरी बँकात नेमका कोणी आणि किती पैसे जमा केला याची तपासणी करण्यासाठी गुरुवार व शुक्रवारी प्रप्तिकर खात्याच्या पथकाने पंढरपूर अर्बन बँकेत अचानक तपासणी सुरू केली. बँकांच्या बाहेर पोलिस बंदोबस्त लावून तपासणी केली जात होती. कोणत्या खातेदारांनी नोटाबंदीनंतर बँकात पैसे भरले याची कसून तपासणी केली. प्राप्तिकर अधिकाऱ्यांनी दहा तारखेपासून खात्यांमध्ये जमा झालेल्या रक्कमांची माहिती घेतली. या आ तपासणीत बँकात जमा झालेल्या प्रत्येक रुपयाचा हिशोब बँकेकडून घेण्यात आला. या तपासणी बाबत प्राप्तिकर विभागाकडून कोणतीच अधिकृत माहिती देण्यात आली नाही. पंढरपूर अर्बन बँकेची स्थापना १९१२मध्ये झाली असून, बँकेच्या राज्यात अनेक ठिकाणी शाखा आहेत. जवळपास २ हजार कोटींची उलाढाल करणाऱ्या या बँकेचे अध्यक्ष सोलापूर विधान परिषदेचे आमदार प्रशांत परिचारक आहेत. पंढरपूर अर्बन बँकेचे व्यवस्थापक उमेश विरधे म्हणाले, प्राप्तिकर विभागाकडून होणारी ही रुटीन तपासणी होती. प्राप्तिकर विभागाने मागितलेली सर्व माहिती बँकेकडून देण्यात आली.
मोबाइल अॅप डाउनलोड करा आणि राहा अपडेट
