शिक्षणाधिकाऱ्याकडून मुख्याध्यापक पदोन्नती प्रस्ताव मंजूर करून घेण्यासाठी ३५ हजारांची लाच स्वीकारताना जिल्हा परिषदेच्या माध्यमिक विभागातील वरिष्ठ सहायक लिपिक लाचलुचपत प्रतिबंधक पथकाच्या जाळ्यात सापडला. चंद्रकांत एकनाथ सावर्डेकर (वय-४५, रा. जुनी मोरे कॉलनी, संभाजीनगर) असे त्याचे नाव आहे. गजबजलेल्या दसरा चौकात सायंकाळी सहाच्या सुमारास ही कारवाई करण्यात आली.
याबाबत लाचलुचपत प्रतिबंधक विभागाकडून मिळालेली माहिती अशी की, कोल्हापुरातील शिवस्मारक शिक्षण मंडळातर्फे महाराणा प्रताप हायस्कूल (दुधाळी) चालवले जाते. त्याच हायस्कूलमधील मुख्याध्यापिका सय्यद सेवानिवृत्त झाल्याने त्याजागी पदोन्नतीने नाथाजी राजमाने यांची नियुक्ती झाली. त्यांच्या नियुक्तीस शासन मान्यतेचा प्रस्ताव नियमानुसार शिक्षण मंडळाने २ नोव्हेंबरला माध्यमिक शिक्षण विभागाकडे पाठवला. त्यासंबंधीची माहिती घेण्यासाठी हायस्कूलचे लिपिक व जिल्हा शिक्षकेतर संघटनेचे शहर सचिव मनोहर वसंतराव जाधव ‘माध्यमिक’मध्ये ७ नोव्हेंबर रोजी गेले.
त्यावेळी सावर्डेकर यांना भेटून प्रस्तावाबाबतची विचारणा केली. त्यावेळी सावर्डेकरने प्रस्ताव मंजुरीसाठी शिक्षणाधिकाऱ्यांची सही घेण्यासाठी टिप्पणी तयार केली आहे. मात्र सहीसह प्रस्ताव मंजुरीसाठी ४० हजारांच्या लाचेची मागणी सावर्डेकरने केली. पैसे घेऊन ९ तारखेला भेटायला सांगितले. यासंबंधीची तक्रार जाधव यांनी लाचलुचपत प्रतिबंधात्मक विभागाकडे केली. दरम्यान, जाधव यांनी ३५ हजारांवर तडजोड केली.
त्यानुसार जाधव नव्यानेच चलनात आलेल्या २ हजारांच्या १७ नोटा आणि १०० रूपयांच्या १० नोटा घेऊन दसरा चौकातील साधना कॅफेसमोर आले. तेथे सावर्डेकरला जाधव यांच्याकडून ३५ हजारांची लाच स्वीकारताना पकडण्यात आले. पथकाने सावर्डेकर यांच्याकडून ३५ हजाराची रक्कमही जप्त केली.
पोलिस अधीक्षक शिरीष सरदेशपांडे, अप्पर पोलिस अधीक्षक प्रसाद हसबनीस, उपअधीक्षक उदय आफळे, निरीक्षक प्रविण पाटील आदीच्या पथकाने पथकाने ही कारवाई केली.
............
वर्षात तिसरी कारवाई
माध्यमिक शिक्षण विभागातील दोन कर्मचारी सहा महिन्यांपूर्वी लाच घेताना सापडले होते. त्यानंतर पुन्हा सावर्डेकर रंगेहाथ सापडला. एक वर्षात तीन कर्मचारी सापडल्याने या विभागातील खाबूगिरी पुन्हा उघड झाली आहे.
..........................
नव्या नोटांची अट
सावर्डेकरने लाच म्हणून नव्या नोटाच देण्याची अट घातली होती. त्यासाठी जाधव यांनी नव्या नोटा मिळवून दिल्या. लाचेचा काळा पैसा व्हाइट करताना अडचण येऊ नये याचीही खबरदारी घेतल्याची चर्चा येथे होती.
..................
नव्या नोटा तरी...
१००० व ५०० रूपयांच्या नोटा चलनातून रद्द करताना भ्रष्टाचार कमी करणे हेही कारण सांगितले आहे. पण लाच म्हणून दोन हजारांच्याही नोटा घेता येता हे सावर्डेकर यांनी दाखवून दिले. ‘लाचलुपतने’ही नव्या नोटाचा पहिला बळी घेतला, अशा आशयाचे मेसेज शिक्षण क्षेत्रातील व्हॉटसअॅप ग्रुपवर फिरत राहिले.
मोबाइल अॅप डाउनलोड करा आणि राहा अपडेट