म. टा. वृत्तसेवा, सातारा
‘निवडणुका आल्या की, त्याच-त्या लोकांना संधी द्यायची. सर्वसामान्य लोकांनी मोठे व्हायचे नाही का? का मीच पाहिजे खासदार, आमदार, अध्यक्ष, असे कुठे होते का? लोकांनी आम्हाला निवडून दिले आहे. त्यांच्यासाठी काही मागितले, हे आमचे चुकल काय? एकच सांगतो कोणी काहीही म्हणो, या निवडणुकीत ४०-० शून्य असा निकाल लावून पुन्हा इतिहास घडविणार आहे. असे नाही झाले तर खासदारकीचा राजीनामा देईन,’ असा विश्वास खासदार उदयनराजे भोसले यांनी पत्रकारांशी बोलताना व्यक्त केला.
सातारा विकास आघाडीच्या ४० उमेदवारांचे अर्ज दाखल करण्यासाठी खासदार उदयनराजे भोसले मिरवणुकीने पालिकेत आले होते. अर्ज दाखल करून झाल्यानंतर ते पत्रकारांशी बोलताना म्हणाले, ‘मी आडमुठेपणा केला असता तर २२ महिने तुरुंगात बसावे लागले नसते. हे कोणामुळे घडते आहे, हे जनतेला सर्वश्रुत आहे. मी आमच्या काकांवर खूप प्रेम करतो. ते ही वेदांतिकाराजेंचा अध्यक्षपदाचा उमेदवारी अर्ज भरण्यासाठी आले होते. त्यांना डावलून मी निर्णय घेतला आहे. कोणाला उमेदवारी अर्ज भरायचे ते भरू द्या.’
दोघांमधील संघर्षाचे नेमके कारण काय, असे पत्रकरांनी विचारले असता खासदार उदयनराजे म्हणाले, ‘संघर्ष हा बरोबरींच्या लोकांमध्ये केला जातो. राजघराणे हे राजघराणे आहे.’ पाच वर्षांत केलेल्या कामांचे मूल्यमापन कसे करणार असास प्रश्न विचारला असता राजे म्हणाले, कामाचे मूल्यमापन करायचे झाले तर वेळ पुरणार नाही. आमचे लाडके बंधुराज आमदार शिवेंद्रसिंहराजे यांनी कोणती योजना आणली हे त्यांनी सांगावे. माझा दृष्टिकोन व्यापक असतो, मी संकुचित बुद्धीचा नाही. पालिकेत भ्र्रष्टाचार कोणी केला मला माहित नाही. याचे उत्तर जनता मतपेटीतून देईल. सातारकरांना एकच सांगतो, जे केले त्याची पोच पावती नाही मिळाली, तसेच नगराध्यक्षांना मतदान झाले नाही तर अनर्थ होईल.’
नगराध्यक्ष जनता ठरवेल : वेदांतिकाराजे
‘कोण जिंकणार आणि कोण हरणार, लोक ठरवतात. कोण एक जण ठरवत नाही. साताऱ्याची तमाम जनता ठरविणार आहे, त्यांना स्वत:चे निर्णय घेणारा नगराध्यक्ष पाहिजे कि, ‘कटपुतली’ भावली पाहिजे,’ असे मत नगराध्यक्षपदाच्या उमेदवार वेदांतिकाराजे भोसले यांनी व्यक्त केले. दरम्यान, मराठा समाज महाराष्ट्रात एकवटला पण, पालिका निवडणुकीत सातारचे राजघराणे दुभंगल ही दुर्देवाची बाब आहे. खासदारांनी आमच्या थोरल्या वहिनीसाहेबांना उमेदवारी दिली असती तर आम्ही उमेदवारच उभा केला नसता असा टोलाही आमदार शिवेंद्रसिंहराजेंनी लगावला. शिंवेंद्रराजे म्हणाले, मनोमिलनाची पहिली बैठक झाली, त्या बैठकीत मागचे विषय काढालचे नाहीत. ते विषय विसरून मनोमिलन केले. भाऊसाहेब महाराज असताना लेवे खून घटना घडली. खासदार उदयनराजेंनी सांगावे हा विषय माझ्या डोक्यात आहे. आम्ही त्यांच्या खासदारकीला, जिल्हा बँकेच्या निवडणुकीत मदत केली ते चालते. मार्केट कमिटी, तालुका व जिल्हा खरेदी-विक्री संघात तुमच्या लोकांना सामावून घेतले, का तर मनोमिलन होते म्हणून. टाळी एका हाताने वाजत नाही. काही चुका कौटुंबीक अथवा अन्य असतील, ते सांगू शकत नाही. जिल्हा बँकेत त्यांनी माझ्या विरोधात उमेदवार उभे केले व मागे घेतले त्यापासून त्यांच्याविषयी माझ्या मनात कटुता निर्माण झाली, असे म्हटले तर वावगे ठरणार नाही. मनोमिलनाचे तंतोतंत काटेकोरपणे पालन करता येईल तेवढे केले आहे.’
मोबाइल अॅप डाउनलोड करा आणि राहा अपडेट
