‘प्रत्येक गळीत हंगाम वेगळी आव्हाने घेवून येत असतो. त्यातच यावर्षी पाऊस कमी पडल्याने उसाची कमतरता भासणार आहे. कर्नाटकातील कारखाने लवकर सुरु होत आहेत. त्यामुळे तेथेही ऊस जाण्याची शक्यता आहे. कारखाने आणि शेतकरी संघटना हे दोघेही शेतकऱ्याचेच हित पहातात. ते पहाता किमान चांगले कारखाने तरी संघटनेमुळे थांबता कामा नयेत. आम्ही २५०० रुपये निघालेली एफआरपी पहिल्या टप्प्यातच देणार आहोत,’अशी घोषणा शाहू साखर कारखान्याचे चेअरमन समरजितसिंह घाटगे यांनी केली. महाराष्ट्र ऊस दर निश्चिती अधिनियमानुसार ७० ३० सूत्रानुसार ऊर्वरित रक्कम देण्यासही ‘शाहू’ बांधील असल्याचेही घाटगे यांनी यावेळी सांगितले.
ते शाहू कारखान्याच्या ३७ व्या बॉयलर अग्निप्रदिपन कार्यक्रमात बोलत होते. यावेळी सुहासिनीदेवी घाटगे यांची प्रमुख उपस्थिती होती. कार्यक्रमापूर्वी नवोदिता घाटगे आणि समरजितसिंह घाटगे यांच्या हस्ते बॉयलर अग्निप्रदिपन करण्यात आले.
घाटगे म्हणाले,‘मागील वर्षी आम्ही सर्व योजना यशस्वी राबवून उशीरा उसाचे अनुदान व व्हरायटी अनुदानही पोहच केले आहे. त्यामुळे चांगले कारखाने सुरु व्हायलाच पाहीजेत. यावर्षी आमचे सात लाख टनाचे उद्दिष्ट आहे. त्यातच खोडव्याची नोंद जास्त असल्याने टनेज कमी येणार आहे. याशिवाय कापशी खोऱ्यातील दरवर्षीप्रमाणे उसाच्या अडचणी आहेत. म्हणून गेटकेनचे करार वाढवल्याशिवाय पर्यायच नाही. येणाऱ्या दोन वर्षात ८० कोटी रुपये कारखान्याच्या विस्तारीकरणासाठी खर्च होणार आहेत. हे देखील आव्हान आपल्याला या कठीण परिस्थितीत पेलायचे आहे.’
कार्यकारी संचालक विजय औताडे म्हणाले,‘ सात नोव्हेंबरला हंगाम सुरु करुन १५ मार्चपर्यंत संपवायचा असे आपले धोरण आहे. १४० ते १४५ दिवसांचा हंगाम चालेल. मागील वर्षी ऊस लागणच कमी झाल्याने यावर्षी उसाची कमतरता आहे. त्यामुळे उशीरा ऊस गेल्याची तक्रार यंदा येणार नाही. देशाच्या ३५ टक्के साखर महाराष्ट्रात उत्पादित होते. परंतु तेदेखील यावर्षी घटणार आहे.’
यावेळी ज्येष्ठ संचालक वीरकुमार पाटील, उपाध्यक्ष अमरसिंह घोरपडे, उपनराध्यक्षा उषाताई सोनुले, नगरसेविका नम्रता कुलकर्णी, वसंतराव पाटील, संजय पाटील, प.सं. सदस्या उल्का तेलवेकर, डी.एस.पाटील यांच्यासह संचालक व कार्यकर्ते मोठ्या संख्येने उपस्थित होते. संचालक युवराज पाटील यांनी आभार मानले.
-----------------------------------------------------------
चौकट
कारखान्याकडे दुर्लक्ष नाही
‘शाहू कारखाना आणि त्याच्या सभासदांमुळेच आपल्याला मान मिळाला आहे. त्यामुळे राजकारणात कितीही व्यस्त असलो तरी कारखाना केंद्रबिंदू मानूनच काम करणार आहे. कारखान्याचे काम सुरळीत रहाण्यासाठी प्रसंगी रात्री बारा वाजताही अधिकाऱ्यांसमवेत बैठक घेवू. परंतु कोणतेही काम थांबता कामा नये,’ असेही चेअरमन समरजितसिंह घाटगे म्हणाले.
मोबाइल अॅप डाउनलोड करा आणि राहा अपडेट
