मराठा क्रांती मोर्चाच्या नियोजनासाठी तरुणाई पुढे सरसावली आहे. कोण स्वयंसेवकाची जबाबदारी पार पाडत आहे. तर कोण कॉलेजमध्ये जाऊन विद्यार्थ्यांमध्ये प्रबोधन करत आहेत. विद्यार्थी, विद्यार्थिनींची खास पथके तयार केली आहेत. रोज सकाळपासून सायंकाळपर्यंत पायाला भिंगरी बांधल्यासारखे कॉलेज पिंजून काढत आहेत. मराठा आरक्षण, समाजाच्या मागण्यांचे महत्त्व पटवून देत मोर्चात सामील होण्याचे आवाहन करत आहेत. मावळा आणि रणरागिणी बनून हे तरूण, तरुणी मोर्चाच्या नियोजनासाठी परिश्रम घेत आहेत. मराठा क्रांती मोर्चासाठी विविध संघटनेतील तरुण, तरुणी एकत्र आले आहेत. साथी हाथ बढानाची साद घालत पुढचं पाऊल टाकले आहे.
मराठा क्रांती मोर्चासाठी विविध विद्यार्थी संघटनेचे कार्यकर्ते एकत्र आले आहेत. पक्ष, संघटना बाजूला ठेवून साऱ्यांनी मोर्चासाठी वज्रमूठ आवळली आहे. युवक टीम, मावळा व रणरागिणी पथक तयार केले आहेत. हे युवा मराठा शिलेदार स्वत:हून जबाबदारी स्वीकारून मोर्चासाठी योगदान देत आहेत. युवा टीम प्रत्येक कॉलेजवर जाऊन मुला, मुलींचे प्रबोधन करत आहेत. सकाळी कॉलेजला भेट द्यायची, प्राचार्यांची परवानगी घेऊन विद्यार्थ्यांशी संवाद साधायचा असा त्यांचा नित्यक्रम बनला आहे. प्रत्येक कॉलेजमध्ये मराठा क्रांती मोर्चा आयोजनामागील उद्देश सांगितला जातो. माहितीपत्रकांचे वाटप केले जाते.
कॉलेजमधील विद्यार्थ्यांशी संवाद साधण्यासाठी दहा जणांचे पथकाची निर्मिती केली आहे. यामध्ये पाच तरूण आणि पाच तरुणी आहेत. काही जण कॉलेज शिक्षण घेत आहेत. कुणी पदव्युत्तर पदवी घेतली आहे. एरव्ही विविध संघटनेत कार्यरत असणारी ही तरुणाई मराठा क्रांती मोर्चासाठी एकवटली आहे. कोल्हापूर शहरातील बहुतांश कॉलेजमधील विद्यार्थ्यापर्यंत हे तरूण शिलेदार पोहचले आहेत. कुडित्रे, गडहिंग्लज, आजरा या ठिकाणी जाऊन कॉलेज विद्यार्थ्याना मराठा क्रांती मोर्चात सामील होण्यासाठी साद घालत आहेत.
दहा हजार तरुण, तरुणी बनणार स्वयंसेवक
मराठा क्रांती मोर्चा दिनी सात हजार तरुण व तीन हजार तरुणी स्वयंसेवक म्हणून जबाबदारी पार पाडणार आहेत. मोर्चा संदर्भातील आचारसंहिता, पाळावयाची शिस्त आणि मोर्चा दरम्यान कुणी गैरकृत्य करताना निदर्शनास आल्यावर तातडीने त्यासंदर्भात करावयाची कार्यवाही विषयी प्रशिक्षण दिले आहे. आतापर्यंत दोन वेळेच्या प्रशिक्षणात सहा हजार स्वयंसेवकांनी सहभाग घेतला होता. बारा ऑक्टोबर रोजी आणखी एक प्रशिक्षण सत्र होणार आहे. संदीप पाटील व उमेश पोवार हे पथक प्रमुख आहेत.
युवक टीममधील सहभागी
हर्षल सुर्वे, अवधूत अपराध, संदीप पाटील, अवधूत पाटील, साक्षी पन्हाळकर, कपिल चव्हाण, जयदीप खराडे, ऋषीकेश पाटील, सागर जाधव, मंदार पाटील, निलेश यादव, दीपक थोरात, कपिल सरनाईक, कोमल मिठारी, प्राजक्ता बागल, अंकिता मोरे, शिवानी सासने, स्नेहल दुर्गुळे आदींचा युवक टीममध्ये समावेश आहे .
मोबाइल अॅप डाउनलोड करा आणि राहा अपडेट