कॉम्रेड गोविंद पानसरे यांच्या हत्येप्रकरणात आणखी दोघे संशियत पोलिसांच्या रडारवर आहेत. तपासात विनय पवार हा तिसरा, तर सारंग आकोळकर हा चौथा संशयित म्हणून नोंद करण्यात आली आहे. विनय पवार यानेच पानसरे यांच्या घराच्या परिसरात रेकी केली होती. साक्षीदारानेही त्याचा फोटो ओळखल्याचे पोलिसांनी कोर्टात सांगितले. दरम्यान, संशयित वीरेंद्र तावडेला आणखी नऊ दिवस पोलिस कोठडी सुनावण्यात आली. गुरुवारी (ता. ८) प्रथमवर्ग न्यायदंडाधिकारी (कनिष्ठ स्तर) यू. बी. काळपगार यांच्यासमोर सुनावणी झाली.
एसआयटीने सीबीआयच्या ताब्यातून घेतलेला संशयित आरोपी डॉ. वीरेंद्र तावडे याच्या चौकशीतून धक्कादायक माहिती पुढे येत आहे. पहिला संशयित समीर विष्णू गायकवाड याच्यानंतर वीरेंद्र तावडेची दुसरा आरोपी म्हणून नोंद झाली आहे. तावडेच्या तपासात आणखी दोघांची नावे पुढे आली. विनय बाबूराव पवार (रा. उंब्रज, ता. कराड, जि. सातारा) आणि सारंग आकोळकर हे अन्य दोन आरोपी असल्याचे पोलिसांनी कोर्टात सांगितले. विनय पवारनेच १६ फेब्रुवारी २०१५ पूर्वी दोन दिवस कॉम्रेड पानसरे यांच्या घराच्या परिसरात रेकी केली होती. काही साक्षीदारांनीही त्याचा फोटो ओळखला आहे. शस्त्रे मिळवण्यासाठी पवार आणि आकोळकर यांचा सहभाग असल्याचे पोलिसांनी कोर्टात सांगितले. तावडेच्या चौकशीतील माहितीच्या आधारे पवार, आकोळकर यांना ताब्यात घेण्यास मदत होईल. त्यामुळे तावडेची पोलिस कोठडी वाढवून मिळावी, असा युक्तीवाद विशेष सरकारी वकील अॅड. शिवाजीराव राणे यांनी केला.
पोलिसांनी २ सप्टेंबरला तावडेचा ताबा घेतला होता. पाच दिवसांच्या कोठडीत तावडेचे पनवेलचे घर आणि सनातन संस्थेच्या आश्रमातील झडतीत एसआयटीला संशयास्पद औषधांचा साठा मिळाला आहे. एच आणि एच वन या औषधांमुळे माणसाच्या चेतासंस्थेवर परिणाम होऊन तो विशिष्ट अवस्थेत पोहोचतो. साठा करण्यास परवानगी नसलेली ही औषधे आहेत. या औषधांचा उल्लेख सनातनचे प्रमुख जयंत आठवले यांच्या 'क्लिनक हिप्नॉसिस' या पुस्तकातही आहे. या औषधांचा वापर नेमका कशासाठी, कोणी आणि कोणावर केला?, त्यातून काय साध्य झाले याचा शोध घेण्यासाठी तपास अधिकारी सुहेल शर्मा यांनी तावडेची पोलिस कोठडी वाढवून मागितली. तावडेची गायब मोटारसाकल, ट्रॅक्स, संशयित पवार आणि आकोळकर यांचा शोध घेण्यासाठी कोठडी आवश्यक असल्याचे विशेष सरकारी वकील अॅड. राणे यांनी कोर्टात सांगितले.
तावडेंचे वकील अॅड. वीरेंद्र इचलकरंजीकर यांनी बाजू मांडताना, एसआयटीच्या छाप्यांवर आक्षेप घेतला. पनवेल कोर्टाची परवानगी न घेतचा छापे टाकले गेले. सीबीआयच्या छापेमारीनंतर एसआयटीने छापे टाकण्याची गरज नव्हती. समीर गायकवाडच्या बाबतीत झालेली पुनरावृत्ती तावडेच्या बाबतीत होत असल्याचा आरोप इचलकरंजीकर यांनी केली. तावडेच्या घरात सापडलेली औषधे घरगुती वापरासाठीची होती. त्यामुळे त्याचे रजिस्टर नव्हते. तावडेच्या मालकीच्या गाड्या विकल्या आहेत. त्यामुळे त्याचा गुन्ह्याशी संबंध नसल्याचे सांगत अॅड. इचलकरंजीकर यांनी त्याच्या जामिनाची मागणी केली. कोर्टाने दोन्ही बाजुंचा युक्तीवाद ऐकल्यानंतर तावडेला १६ सप्टेंबरपर्यंत पोलिस कोठडी सुनावली.
विशेष सरकारी वकीलपदी अॅड. राणे
कॉम्रेड पानसरे यांच्या हत्येचा खटला चालवण्यासाठी पोलिस अधीक्षक प्रदीप देशपांडे यांनी अॅड. शिवाजीराव राणे यांची विशेष सरकारी वकीलपदी नियुक्ती केली. गुरुवारी (ता. ८) सकाळी राणे यांना नियुक्तीपत्र देऊन अधीक्षक देशपांडे यांनी त्यांच्याशी तपासाबाबत चर्चा केली.
मोबाइल अॅप डाउनलोड करा आणि राहा अपडेट