अनैतिक संबधातून बाप-लेकाने भररस्त्यात युवकाचा खून केला. सुनील बाबूराव मगदूम (वय ३६, रा.चंदूर, ता. हातकणंगले) असे मृत युवकाचे नाव असून संशयित भीमराव रामू मगदूम व रोहित भीमराव मगदूम (रा.बहिरेवाडी, ता.आजरा) यांना पोलिसांनी ताब्यात घेतले आहे.
पोलिसांतून व घटनास्थळावरून मिळालेल्या माहितीनुसार, मृत सुनील व संशयित हे नात्याने काका व पुतण्या आहेत. सुनील याने भीमराव यांच्या पत्नीस पळवून नेऊन आपल्या राहत्या घरी ठेवले होते. यासंदर्भात गडहिंग्लज कनिष्ठ न्यायालयात सुनीलवर अपहरणाचा दावा दाखल आहे. याकामी वॉरंट बजावल्याने ते रद्द करून घेण्यासाठी तो गडहिंग्लज न्यायालयात हजर झाला होता. न्यायालयातील काम आटोपून दुपारी साडेतीनच्या सुमारास दसरा चौकात अनिल टी स्टॉलसमोर सुनील उभा होता. दरम्यान संशयित भीमराव व रोहित दोघेही हातात कुऱ्हाड व जांबिया घेऊन तेथे आले.
क्षणार्धात कुणालाही काहीच कळण्यापूर्वी रोहितने सुनीलच्या डोळ्यात चटणी फेकली व जांबियाने पोटात वार केला. तर भीमराव यांनी सुनीलवर कुऱ्हाडीने डोक्यात व शरीरावर वार केले. अचानक झालेल्या या झटापटीत सुनील गंभीर जखमी झाला. दसरा चौक हे शहरातील गजबजलेले ठिकाण असून बसस्थानकासह प्रमुख प्रशासकीय कार्यालये या परिसरात आहेत. पोलिस निरीक्षक औदुंबर पाटील यांचे निवासस्थान येथेच आहे. हल्ल्यादरम्यान सुनीलने मदतीसाठी हाक दिली. मात्र या परिसरात शेकडो लोक असताना देखील त्याच्या मदतीला कुणीही आले नाही. दरम्यान, जेवणासाठी घरी आलेल्या पोलिस निरीक्षक पाटील यांनी हा प्रकार पहिला व ते तातडीने त्या दिशेने धावले. संशयित दोन्ही आरोपींना ताब्यात घेऊन जखमी सुनीलला रुग्णालयात दाखल करण्यात आले, मात्र उपचारादरम्यान त्याचा मृत्यू झाला.
अतिरिक्त जिल्हा पोलिस प्रमुख दिनेश बारी, पोलीस उपाधीक्षक डॉ.सागर पाटील यांनी घटनास्थळी भेट दिली. अक्रम मिट्टू सय्यद यांच्या फिर्यादीवरून गडहिंग्लज पोलिसात गुन्हा नोंद झाला असून अधिक तपास पोलीस निरीक्षक औदुंबर पाटील करीत आहेत.
सुसंकृत शहर म्हणून ओळख असलेल्या गडहिंग्लज शहरात दिवसेंदिवस गुन्हेगारीचे प्रमाण वाढत आहे. ३० जुलै रोजी गडहिंग्लज शहरात किरकोळ कारणावरून पतीने पत्नीचा खून केल्याची घटना घडली होती. या प्रकरणाने संपूर्ण तालुक्यात भीतीचे वातावरण निर्माण झाले होते. मात्र त्यानंतर मंगळवारी पुन्हा भरचौकात झालेल्या ह्या खुनी हल्ल्याने परिसरात घबराटीचे वातावरण निर्माण झाले आहे.
मोबाइल अॅप डाउनलोड करा आणि राहा अपडेट
