gurubal.mali@timesgroup.com
कोल्हापूर: हद्दवाढ, विमानतळ, फाउंड्री क्लस्टर, आय. टी. पार्क, उदयोगांना सवलती, गूळ, चप्पल आणि गारमेंट क्लस्टर... किती वर्षे तरी कोल्हापूरची आंदोलने आणि चर्चा याच प्रश्नाभोवती फिरत आहे. पण तांबडा पांढरा रस्सा, दूध कट्टा, रंकाळा या पलिकडं जाणार कधी? असा सवालही यानिमित्तानं उपस्थित केला जातो. कोल्हापूरच्या विकासासाठी आता या पलिकडं जात संकुचित वृत्ती झटकून विकासाची नवी दृष्टी दिली ती 'मेक इन कोल्हापूर' अंतर्गत घेण्यात आलेल्या मटा कॉन्क्लेवमध्ये. विकासाची दृष्टी नेमकी कोणती, ती कशी असावी, त्यासाठी नेमके काय करायला हवे, त्यासाठी धोरण काय असावे, याबाबत या कॉन्क्लेवमध्ये सविस्तर चर्चा करण्यात आली आणि मार्गही शोधण्यात आले.
मेडिकल हब, टुरिझम हब, फाउंड्री हब, शैक्षणिक हब, गारमेंट हब अशा अनेक मागण्या कोल्हापुरात वर्षानुवर्षे सुरू आहेत. हद्दवाढ, विमानतळ यासह अनेक प्रश्नासाठी वर्षानुवर्षे आंदोलने सुरू आहेत. आंदोलनाची झालेली सवय आणि कोल्हापूरची निर्माण झालेली आंदोलननगरी म्हणून इमेज, यामुळे होत असलेले नुकसान याची जाणीव कुठेतरी होण्याची गरज आहे. संकुचित वृत्तीने विकासाचे तीन-तेरा वाजत आहेत. अशावेळी कोल्हापूरचा विकास का थांबला आहे, विकासाचे अडथळे नेमके कोण आहेत, राजकीय ताकद कमी का पडत आहे, या पार्श्वभूमीवर विकासासाठी नेमक काय करायला हवे 'मेक इन कोल्हापूर ' हा उपक्रम 'मटा' ने राबवला. कोल्हापूरच्या विकासात आणि निर्णयप्रक्रियेत जे जे मान्यवर आहेत, त्यांना एका व्यासपीठावर आणत संवादाची आणि वाटचालीची नवी दृष्टी दिली.
केवळ उद्योगच नव्हे तर जिल्ह्याचे जे जे प्रलंबित प्रश्न आहेत ते सुटण्यासाठी नेमके काय करायले हवे याबाबत आंदोलनाच्या पलिकडे जात निर्णय घेणाऱ्या समवेत चर्चा होणे अपेक्षित होते. यामुळे उद्योगमंत्री सुभाष देसाई आणि महसूलमंत्री चंद्रकांत पाटील या दोन्ही मंत्र्यांना 'मटा' ने आमंत्रित केले. केवळ उद्योजकच नव्हे तर डॉक्टर, बिल्डर, अनेक क्षेत्रातील व्यावसायिक, प्रशासनातील अधिकारी, राजकीय पक्षाचे प्रमुख पदाधिकारी यांना एका व्यासपीठावर आणून त्यांच्याशी संवाद साधण्यात आला. कोल्हापूरचे नेमके प्रश्न आणि कोल्हापूरकरांची ताकद या दोन्हीची या व्यासपीठावर चर्चा झाली. उपस्थितांनी प्रश्न मांडतानाच अपेक्षाही व्यक्त केल्या. आता चर्चा फार झाली, कृती करण्याचीच ही वेळ आहे हे ठासून सांगण्यात आलं. नेमक विकासात अडथळा कुणाचा याची जाहीर चर्चा झाली, ज्यामुळे काहींचे डोळे उघडायला मदत झाली.
कोल्हापुरात प्रलंबित असलेल्या साधारणता ऐंशीपेक्षा अधिक छोट्यामोठ्या प्रश्नांचा उहापोह मंत्र्यांसमोर झाला. विमानसेवा, फाउंड्री हब, फाउंड्री क्लस्टरसाठी जादा निधी, गूळ, चप्पल गारमेंट, ज्वलेरी क्लस्टर, मुंबई बेंगळुरू कॉरिडॉरमध्ये कोल्हापूरचा समावेश, आय टी पार्कसाठी नवीन योजना, कर्नाटकात सुरू असलेले उद्योजकांचे स्थलांतर, समान वीज दर, लघू व मध्यम उद्योग विस्तारात काही सवलती, कृषी पुरक उद्योगांना चालना, गुळ, साखर व कृषी उत्पादनासाठी कोल्ड स्टोअरेज, पर्यटन विकास, स्कील इंडिया योजनेत कोल्हापूरचा समावेश असे अनेक प्रश्न मंत्र‌िमहोदयासमोर मांडण्यात आले यामध्ये उद्योग संदर्भातील अतिशय महत्त्वाचे १५ पेक्षा अधिक प्रश्न होते. विशेष म्हणजे यातील सर्व प्रश्नांना उद्योगमंत्री देसाई यांनी आपल्या भाषणात स्पर्श केला. केवळ स्पर्श नव्हे तर काही प्रश्नांची तड लावण्यासाठी आवश्यक त्या घोषणा केल्या. जे जे तातडीने करता येणे शक्य आहे, ते सर्व करण्याची ग्वाही त्यांनी दिली. कोल्हापूरचे प्रश्न मार्गी लावण्यात आपण निश्चित प्रयत्न करू, असे आश्वासन देताना यासाठी १५ दिवसांत मंत्रालयात खास संयुक्त बैठक घेण्याची घोषणा केली. सार काही सरकार देणार नाही, ती अपेक्षाही करू नका पण जे जे देता येणे शक्य आहे, त्यामध्ये सरकार कुठेच कमी पडणार नाही, असे म्हणत उद्योगांना बळ देण्याची ग्वाही तर दिलीच शिवाय नवी दृष्टीदेखील.
कोल्हापूरच्या संकुचित विचारांना महसूलमंत्री चंद्रकांत पाटील यांनी चांगलाच चिमटा घेतला. किती दिवस तांबडा आणि पांढरा रस्सा, दूध कट्टा याबाबत सांगत बसणार? यातून बाहेर कधी पडणार, प्रत्येक सकारात्मक बाबीला विरोध किती दिवस करणार, आंदोलकांचे शहर ही कोल्हापूरची इमेज कधी बदलणार? असा थेट सवाल या कार्यक्रमात करण्यात आला. शहराचा विकास व्हायचा असेल तर संकुचित वृत्ती सोडून दयायलाच हवी, असे खडेबोल सुनावले. विकासाची नवी दृष्टी आता शोधायला हवी ही अपेक्षा व्यक्त करण्यात आली. 'मेक इन कोल्हापूर' म्हणत असताना विकासाची हीच नवी दृष्टी अपेक्षित होती. जी या कार्यक्रमाने मिळाली. त्याच त्या प्रश्नावर आंदोलन आणि चर्चा करत बसण्यापेक्षा मार्ग काढत विकासाचा नवा पूल बांधण्याचा मंत्र या कार्यक्रमाने दिला.
राजकीय इच्छाशक्ती आणि जनतेची सामूहिक ताकद एकवटली, संकुचित वृत्ती सोडली तर प्रश्न सुटण्यास फार काळ लागणार नाही हे 'मेक इन कोल्हापूर 'ने दाखवून दिले. 'मेड इन कोल्हापूर'ला योग्य मार्केटिंग केल्यास हे सहज शक्य आहे याबाबत उहापोह झाला. प्रश्नावर केवळ चर्चा न करता ते सोडवण्यासाठी एक नवे व्यासपीठ मटाने कोल्हापूरकरांना दिले. मंत्र्यांच्या आणि उपस्थितांच्या सकारात्मक दृष्टीने विकासाची नवी दिशा देण्याचे काम केले आहे.
मोबाइल अॅप डाउनलोड करा आणि राहा अपडेट
