म. टा. प्रतिनिधी, कोल्हापूर
गणेशोत्सव साजरा करणाऱ्या सार्वजनिक गणेश मंडळांनी डॉल्बीची नाही, तर उत्सवकाळात केलेल्या सामाजिक उपक्रमांची फुशारकी मारा, असे आवाहन पालकमंत्री चंद्रकांत पाटील यांनी केले. ते जिल्हा पोलिस दलाच्यावतीने आयोजित केलेल्या गणराय अवॉर्ड वितरण कार्यक्रमात बोलत होते. २०१५ मधील गणेशोत्सवातील तुकाराम माळी तालीम गणेश मंडळाला सर्वसाधारण विजेतेपद देऊन गौरविण्यात आले.
जिल्हा पोलिस दलाच्या वतीने केशवराव भोसले नाट्यगृहात शुक्रवारी गणराया अवॉर्ड वितरण सोहळ्याचे आयोजन करण्यात आले होते. कार्यक्रमाच्या अध्यक्षस्थानी श्रीमंत छत्रपती शाहू महाराज होते. त विशेष पोलिस महानिरीक्षक विश्वास नांगरे-पाटील प्रमुख उपस्थित होते.
यावेळी बोलताना पालकमंत्री पाटील म्हणाले, 'उत्सव अथवा सणांमधील भक्तीचा उपयोग हा समाजाच्या हितासाठी होणे आवश्यक आहे. मंडळांनी गणेश उत्सवामध्ये अंधश्रद्धा निर्मूलन, शिक्षण यासारखे सामाजिक उपक्रम राबवले तरच खऱ्या अर्थाने गणेशोत्सव सार्थकी लागेल. कायद्याचे उल्लंघन करणाऱ्यांवर पोलिसांनी कडक कारवाई करावी', असेही त्यांनी सांगितले.
छत्रपती शाहू महाराज म्हणाले, 'गणेश मंडळांनी उत्सवामध्ये अतिउत्साहाच्या भरात चुकीचे काम करू नये. मंडळांनी डॉल्बी न लावता गणेश उत्सव साजरा करावा.'
महानिरीक्षक विश्वास नांगरे-पाटील म्हणाले, 'समाज प्रबोधन हा उत्सवाचा मुख्य उद्देश आहे. डॉल्बीनेच उत्सव साजरा होतो असे नाही. डॉल्बी आणि उत्तेजक द्रव्यांमुळे तरुण पिढी वाया जात आहे. सर्वानी मिळून डॉल्बीमुक्त गणेश उत्सव साजरा करावा.'
उपस्थित मान्यवरांच्या हस्ते तुकाराम माळी तालीम मंडळाच्या पदाधिकाऱ्यांना सर्वसाधारण विजेतेपद देऊन गौरविण्यात आले. यासह शिस्तबद्ध मंडळ, समाज प्रबोधन करणारे मंडळ, देखावे, उत्कृष्ट गणेशमूर्ती या विभागांमध्येही २५ मंडळांना पारितोषिके देण्यात आली. कार्यक्रमाचे सूत्रसंचालन पद्माकर कापसे यांनी केले.
यावेळी महापौर अश्विनी रामाणे, आयुक्त पी. शिवशंकर, मुख्य कार्यकारी अधिकारी कुणाल खेमणार, अप्पर पोलिस अधीक्षक सोहेल शर्मा, शहर पोलिस उपाधीक्षक भरतकुमार राणे, यांच्यासह सार्वजनिक गणेश मंडळाचे कार्यकार्ते, शांतता समितीचे पदाधिकारी उपस्थित होते.
सर्वसाधारण विजेते: तुकाराम माळी तालीम मंडळ, मंगळवार पेठ
शिस्तबद्द मिरवणूक: लेटेस्ट तरुण मंडळ आणि तुकाराम माळी तरूण मंडळ, मंगळवार पेठ
समाज प्रबोधन
प्रथम: भारतवीर मित्र मंडळ, चौगले गल्ली कसबा बावडा
द्वितीय: सोल्जर्स तरुण मंडळ, तोरस्कर चौक
तृतीय: हायकमांड फ्रेंड सर्कल, जुना बुधवार पेठ
उत्तेजनार्थ :क्रांतीवीर राजगुरू, जुना बुधवार पेठ
उत्तेजनार्थ : स्वयंभू गणेश मित्र मंडळ, लक्ष्मीपुरी, कोंडाओळ
विधायक उपक्रम
प्रथम: प्रिन्स क्लब, मंगळवार पेठ
द्वितीय: जयभवानी तालीम मंडळ, माळ गल्ली, कसबा बावडा
तृतीय : सम्राट मित्र मंडळ, चव्हाण गल्ली, कसबा बावडा
उत्कृष्ट देखावा(सजीव)
प्रथम विभागून: छत्रपती शिवाजीराजे तरुण मंडळ, मेन रोड कसबा बावडा
मनोरंजन तरुण मंडळ, वाडकर गल्ली
व्दितीय :कै. उमेश कांदेकर युवा मंच, रंकाळा टॉवर
तृतीय विभागून:डांगे गल्ली तरुण मंडळ, जुना बुधवार
शिपुगडे तालीम मंडळ : केसापूर पेठ
उत्कृष्ट देखावा(तांत्रिक)
प्रथम: जय शिवराय मित्र मंडळ, उद्यमनगर
द्वितीय:शाहूपुरी युवक मित्र मंडळ, व्यापारी पेठ शाहूपुरी
तृतीय : पाच बंगला मित्र मंडळ, साहूपुरी चौथी गल्ली
उत्तेजनार्थ : नंदी तरुण मंडळ, रंकाळा टॉवर
उत्कृष्ट गणेशमूर्ती
प्रथम: मृत्युंजय मित्र मंडळ, ज्ञानेश्वर मंडप, शनिवार पेठ
द्वितीय: एकदंती गणेश मित्र मंडळ
तृतीय: न्यू अमर मित्र मंडळ, नष्टे गल्ली, शनिवार पेठ
उत्तेजनार्थ : आत्मविश्वास मित्र मंडळ, द्रविड बोळ, महाद्वार रोड
उत्तेजनार्थ : सिद्धीविनायक मित्र मंडळ, शिवाजी उद्यमनगर
मोबाइल अॅप डाउनलोड करा आणि राहा अपडेट
