संजय घाटगेंच्या भूमिकेबाबत उत्सुकता

August 18, 2016, 2:30 pm

≫ Next: इचलकरंजीत एटीएमफोडण्याचा प्रयत्न

≪ Previous: बिंदू कुलकर्णींची मनपाकडून दखल

$

0

0

कागल

कागल येथील श्री छत्रपती शाहू सहकारी साखर कारखान्याचा २०१६ ते २०२१ या पंचवार्षिक कालावधीसाठी निवडणूक कार्यक्रम जाहीर झाला आहे. २० सप्टेंबर रोजी १५ जागांसाठी मतदान होत आहे. २१ रोजी दुपारपर्यंत मतमोजणी होणार असून एकूण १६ हजार ३०० सभासद या निवडणुकीत आपला मतदानाचा हक्क बजावतील. कारखान्याचे संस्थापक विक्रमसिंह घाटगे यांच्या पश्‍चात कारखान्याची ही पहिलीच निवडणूक होत आहे. यावेळी घाटगे गटाची धुरा समरजितसिंह घाटगे यांच्यावर राहणार आहे. निवडणूक निर्णय अधिकारी म्हणून विजयसिंह देशमुख काम पाहणार आहेत. या निवडणुकीत माजी आमदार संजय घाटगे यांची भूमिका निर्णायक ठरणार आहे.

एकूण १५ जागांसाठी ही निवडणूक होत असून, कच्ची मतदारयादी १८ ऑगस्ट रोजी प्रसिद्ध केली जाणार आहे. अर्ज भरण्याची मुदत २६ ऑगस्टपर्यंत असून, अर्ज मागे घेण्याची मुदत सात सप्टेंबर आहे. याच दिवशी निवडणूक लागणार की बिनविरोध होणार, हे समजणार आहे. सध्या आमदार हसन मुश्रीफ यांनी विनाअट पाठींबा जाहीर केला आहे. तर ज्यांची भूमिका या निवडणुकीत महत्वाची आहे, त्या माजी आमदार संजय घाटगे यांनी अद्याप आपली भूमिका जाहीर केलेली नाही. मात्र निवडणूक लढविण्यासाठीची कोणतीही तयारी सुरु असल्याचे अजून तरी या गटाकडून दिसत नाही.

संचालक मंडळात उत्पादक सभासदांमधून १४, तर बिगर उत्पादक सभासदांतून एक असे एकूण १५ संचालक निवडून दिले जाणार आहेत. कच्ची मतदारयादी गुरुवारी (ता. १८) प्रसिद्ध करण्यात येणार आहे. या मतदारयादीवर १८ ते २० ऑगस्ट या काळात हरकती घेण्यात येणार आहेत. शनिवारी (ता.२०) पक्‍की मतदारयादी प्रसिद्ध केली जाणार आहे. २० सप्टेंबर रोजी मतदान घेतले जाणार असून, मतमोजणी २१ सप्टेंबर रोजी घेतली जाणार आहे. कारखान्याचे कार्यक्षेत्र कागल, करवीर आणि कर्नाटक असे आहे.

निवडणूक कार्यालयाचे कामकाज कारखान्याच्या कागल येथील मुख्य कार्यालयातून सरकारी सुटी आणि रविवार हे दिवस सोडून उर्वरित दिवशी सुरू राहणार आहे. उमेदवाराने तो अन्य कोणत्याही साखर कारखान्याचा संचालक नसल्याबाबतचे प्रतिज्ञापत्र उमेदवारी अर्जासोबत जोडणे आवश्यक आहे.

बिनविरोधची शक्यता अधिक

राजे विक्रमसिंह घाटगे दिवंगत झाल्यानंतर दहाव्या दिवशी कारखान्याच्या मल्टीस्टेटला विरोध असणारी फाईल प्रविणसिंह घाटगे यांच्याकडे संजय घाटगे यांनी सुपूर्द करून याचवेळी 'शाहू'ची निवडणूक लढवणार नसल्याचे सांगितले असल्याचे सूत्रांकडून सांगण्यात आले. शिवाय संजय घाटगे गटाकडून निवडणुकीची कोणतीच तयारी दिसून येत नसल्याने ही निवडणूक बिनविरोध होण्याचीच शक्यता अधिक आहे.

संजय घाटगेंच्या भूमिकेबाबत तर्कवितर्क

या निवडणुकीत आमदार हसन मुश्रीफ यांचा हमीदवाडा कारखान्यासारखा संबंध येत नाही, परंतु त्यांनी अगोदरच विनाअट पाठिंबा देऊन भविष्यातल्या निवडणुकांमधील धोका कमी करण्याचा प्रयत्न केला आहे. तर सगळे ठरल्यासारखे असूनही संजय घाटगेनी आपली भूमिका संदिग्ध ठेवल्याने तालुक्यात यावरून तर्कवितर्क लढवले जात आहेत. घाटगे यांनी २००६ च्या निवडणुकीत सुमारे तीन हजार पाचशे मते घेतली होती.

मोबाइल अॅप डाउनलोड करा आणि राहा अपडेट

---

इचलकरंजीत एटीएमफोडण्याचा प्रयत्न

August 18, 2016, 2:30 pm

≫ Next: कळंब्यात भरदिवसा फ्लॅट फोडला

≪ Previous: संजय घाटगेंच्या भूमिकेबाबत उत्सुकता

$

0

0

म. टा. वृत्तसेवा, इचलकरंजी

येथील जय सांगली नाका परिसरात बँक ऑफ महाराष्ट्रचे एटीएम फोडण्याचा चोरट्याचा प्रयत्न नागरिकांच्या सतर्कतेमुळे फसला. आवाजामुळे नागरिक जागे झाल्याने चोरट्याने तेथून पळ काढला. याबाबतची नोंद शहापूर पोलिसांत झाली आहे.

इचलकरंजी-सांगली रोडवर होंडा शोरुमच्या समोरील बाजूस बँक ऑफ महाराष्ट्रचे एटीएम केंद्र आहे. मध्यरात्रीच्या सुमारास या एटीएम केंद्रामधून काहीतरी आवाज येऊ लागल्याने शेजारील नागरिकांना जाग आली. नागरिक एटीएमकडे येत असल्याची चाहूल लागल्याने चोरट्याने तेथून पळ काढला. मात्र त्याने चोरीसाठी आणलेले साहित्य लोखंडी गज, कटावणी आदी घटनास्थळीच पडले होते. चोरट्याने मशिनचा समोरील भाग उचकटण्याचा प्रयत्न केला. मात्र काहीच रोकड चोरट्याच्या हाती लागली नाही. परंतु एटीएम मशिनचे नुकसान झाले आहे. चोरीपूर्वी चोरट्याने एटीएममधील सीसीटिव्ही कॅमेऱ्याच्या दिशा बदलल्या होत्या. त्यामुळे चोरटा माहितीगार असण्याची शक्यता वर्तविली जात आहे. याबाबतची माहिती मिळाल्यानंतर शहापूर पोलिसांनी घटनास्थळी भेट देऊन पाहणी केली. एटीएमच्याजवळच चप्पलसह चोरीसाठी आणलेले साहित्य मिळून आले. संशयिताचा माग काढण्यासाठी 'झेबा' या श्वानाला पाचारण करण्यात आले होते. श्वानाने एटीएमपासून जिल्हा सूत गिरणीच्या दिशेने काही अंतरापर्यंत माग दाखविला व तेथेच घुटमळले. त्यामुळे चोरटा वाहनाचा वापर करुन पसार झाल्याचा संशय व्यक्त होत आहे.

मोबाइल अॅप डाउनलोड करा आणि राहा अपडेट

कळंब्यात भरदिवसा फ्लॅट फोडला

August 19, 2016, 2:30 pm

≫ Next: नेसरी येथे किराणादुकानाला भीषण आग

≪ Previous: इचलकरंजीत एटीएमफोडण्याचा प्रयत्न

$

0

0

म. टा. प्रतिनिधी, कोल्हापूर

भरदिवसा बंद फ्लॅटचा कडी कोयंडा उचकटून अज्ञात चोरट्यांनी तीन तोळ्यांच्या दागिन्यांसह रोख सतरा हजार रुपये, असा सुमारे सव्वा लाखांचा मुद्देमाल लंपास केला. शुक्रवारी(ता. १९) दुपारी ११ ते २ या वेळेत ही घटना कळंबा येथील साई इस्टेट येथे घडली. याबाबतची फिर्याद देवेंद्र तुकाराम पाटील यांनी जुना राजवाडा पोलिस ठाण्यात दिली.

देवेंद्र पाटील हे कळंबा येथील साई इस्टेट या अपार्टमेंटमध्ये पत्नी व दोन मुलांसह राहतात. ते खासगी कंपनीत नोकरीस असून, त्यांच्या पत्नी उषा या देवकर पाणंद येथे अंगणवाडी सेविका म्हणून काम करतात. शुक्रवारी सकाळी अकरा वाजता उषा पाटील या अंगणवाडीमध्ये गेल्या होत्या, तर देवेंद्र पाटील हे लिंगनूर (ता. गडहिंग्लज) येथे नातेवाईकांकडे गेले होते. याच दरम्यान अज्ञात चोरट्यांनी पाटील यांच्या चौथ्या मजल्यावरील फ्लॅटचा कडी कोयंडा उचकटून आत प्रवेश केला. फ्लॅटमधील साहित्य विस्कटून कपाटातील साहित्य बाहेर फेकले. कपाटातील अडीच तोळ्यांचे मंगळसूत्र, अर्ध्या तोळ्याची कर्णफुले, रोख सतरा हजार रुपये असा सुमारे सव्वा लाखांचा मुद्देमाल चोरट्यांनी लंपास केला. उषा पाटील या दुपारी शाळेतून परतल्यानंतर त्यांना चोरीची घटना निदर्शनास आली. उषा पाटील यांनी जुना राजवाडा पोलिसात अज्ञात चोरट्याच्या विरोधात फिर्याद दाखल केली.

मोबाइल अॅप डाउनलोड करा आणि राहा अपडेट

नेसरी येथे किराणादुकानाला भीषण आग

August 19, 2016, 2:30 pm

≫ Next: हद्दवाढ अडकणार जि.प. निवडणुकीत

≪ Previous: कळंब्यात भरदिवसा फ्लॅट फोडला

$

0

0

म. टा.वृत्तसेवा, गडहिंग्लज

नेसरी (ता.गडहिंग्लज) येथील दस्तगीर उर्फ नन्हू म्हालदार यांच्या किराणा मालाच्या दुकानाला लागलेल्या भीषण आगीत फर्निचरसह दोन लाखांचे नुकसान झाले.

ही दुर्घटना शुक्रवारी पहाटे तीन ते पाच वाजण्याच्या दरमयान घडली.

नेसरी बाजारपेठेत पिंपळफाट्याजवळ म्हालदार यांचे 'म्हालदार किराणा स्टोअर्स' नावाचे किराणा मालाचे दुकान आहे. गुरुवारी रात्री नेहमीप्रमाणे रात्री दुकान बंद करून म्हालदार घरी गेले. रात्री अचानक दुकानाला आग लागली. आगीत जळलेल्या चिकट गुळ व तेलामुळे दुकानांची दोन्ही शटर्स जाम झाली. त्यामुळे आगीचा धूर बाहेर न आल्याने आग लागल्याचे समजलेच नाही. मात्र पहाटेच्या सुमारास शेजारी राहणाऱ्या महिलेला काही तरी जळल्याचा वास आला. वास कुठून येतो हे पाहण्यासाठी बाहेर आल्या असता त्यांना दुकानाचे शटर व भिंत गरम झाल्याचे जाणवले. दुकानात आग लागली असल्याचे कळताच त्यांनी तात्काळ म्हालदार यांना बोलावून घेतले. म्हालदार यांनी दुकानाचे शटर तोडून काढले. मात्र दुकानातील सर्व साहित्य आगीच्या भक्ष्यस्थानी पडले होते. नागरिकांनी आग विझविण्याचा प्रयत्न केला मात्र आग आटोक्यात आली नाही. या आगीत सुमारे दोन लाखांचे नुकसान झाले आहे.

मोबाइल अॅप डाउनलोड करा आणि राहा अपडेट

हद्दवाढ अडकणार जि.प. निवडणुकीत

August 19, 2016, 2:30 pm

≫ Next: गडहिंग्लजमध्ये चोरट्यांचा धुमाकूळ

≪ Previous: नेसरी येथे किराणादुकानाला भीषण आग

$

0

0

Gurubal.Mali@timesgroup.com

कोल्हापूर ः कोल्हापूरची हद्दवाढ तांत्रिक अडचणीत अडकू नये यासाठी सरकारकडूनच प्रयत्न सुरू झाले आहेत. जिल्हा परिषद निवडणुकीची प्रक्रिया ९ सप्टेंबरपासून सुरू होणार असल्याचे जाहीर झाल्याने हद्दवाढीच्या घोषणेत तांत्रिक अडचण येण्याची शक्यता आहे. मात्र हद्दवाढविरोधक आणि समर्थक या दोघांचे समाधान होईल आणि निवडणूक आयोग त्याला आक्षेप घेणार नाही, असा फॉर्म्युला सरकारने तयार केला असून लवकरच त्याची घोषणा करण्यात येणार आहे. पालकमंत्री चंद्रकांत पाटील यांनी याला दुजोरा दिल्याने हद्दवाढीची घोषणा निश्चित मानली जात असली तरी तांत्रिक अडचणीचा सामना कसा करणार हे मात्र स्पष्ट झालेले नाही.

हद्दवाढ करण्यासाठी गेले सहा महिने जोरदार हालचाली सुरू आहेत. पण विरोध होत असल्याने विरोधकांची समजूत काढून त्यांचे समाधान करण्यात पालकमंत्री पाटील यांनी पुढाकार घेतला आहे. मुख्यमंत्रीही हद्दवाढीसाठी सकारात्मक असल्याने प्रक्रियेला वेग आला. दोन्ही गटाशी त्यांनी चर्चाही केली. पण विरोधक आक्रमक होत असल्याने घोषणा लांबणीवर पडत आहे.

जिल्हा परिषद निवडणूक फेब्रुवारी २०१७ मध्ये होणार आहे. त्याची प्रक्रिया ९ सप्टेंबरपासून सुरू होणार आहे. याबाबत घोषणाही निवडणूक आयोगाने केली आहे. एकदा निवडणूक प्रक्रिया सुरू झाली की हद्दवाढीची घोषणा करण्यात तांत्रिक अडचणी येणार आहेत. प्रक्रिया ९ सप्टेंबरपासून होणार असली तरी त्याची घोषणा काल झाल्याने हद्दवाढ जाहीर करता येणार नाही, असे तज्ज्ञांचे मत आहे. पण निवडणूक आयोगाचा आक्षेप नसेल तर अडचण येणार नाही असा दावा केला जात असल्याने सरकार पातळीवर अजूनही हद्दवाढीची आशा आहे. जिल्हा परिषदेचे सध्या ६९ मतदारसंघ आहेत, नव्या रचनेनुसार ते ६७ मतदारसंघ झाले आहेत. हद्दवाढ झाली तर पाच ते आठ मतदारसंघ आणखी कमी होऊ शकतात. या पार्श्वभूमीवर मुख्यमंत्र्यांनी हद्दवाढीचा नवा फॉर्म्युला तयार केला आहे. अठरा गावे हद्दवाढीत न घेता आठ ते दहा गावे यामध्ये समावेश करण्याचा हा प्रस्ताव असल्याचे समजते.

===

टोल रद्द करून भा​जपने श्रेय घेतले, आता हद्दवाढ करून महत्वाच्या प्रश्नावर तोडगा काढण्याचे श्रेय भा​जपला घ्यायचे आहे. धाडसी निर्णय घेत भाजपला आपली लोकप्रियता वाढवायची आहे. त्यामुळे दोन वेळा दोन्ही गटाशी मुख्यमंत्र्यांनी चर्चा केली. पण त्यामध्ये समाधान झाले नाही. त्यामुळे दोन दिवसांत पुन्हा दोन्ही गटाशी मुख्यमंत्री स्वतंत्र चर्चा करणार आहेत. दोन्ही गटाचे समाधान होईल असा प्रस्ताव तयार केला आहे. तो त्यांच्यासमोर ठेवण्यात येणार आहे. त्यांच्या मंजुरीनंतर तातडीने हद्दवाढीची घोषणा करण्यात येणार आहे. याला निवडणूक आयोग आक्षेप घेणार नाही, अशी ही व्यवस्था आहे.

==

हद्दवाढीसाठी मुख्यमंत्र्यांनी दोन्ही गटाचे समाधान होईल असा प्रस्ताव तयार केला आहे. दोघांशी दोन दिवसात स्वतंत्र चर्चा करून सहमतीनंतरच हद्दवाढीची घोषणा करण्यात येईल. शहराचा विकास आणि विरोधकांचे समाधान या दोन्ही बाबी पाहूनच हद्दवाढ केली जाईल.

चंद्रकांत पाटील, पालकमंत्री

मोबाइल अॅप डाउनलोड करा आणि राहा अपडेट

गडहिंग्लजमध्ये चोरट्यांचा धुमाकूळ

August 19, 2016, 2:30 pm

≫ Next: जि.प. निवडणूक प्रक्रिया ९ सप्टेंबरपासून

≪ Previous: हद्दवाढ अडकणार जि.प. निवडणुकीत

$

0

0

म. टा. वृत्तसेवा, गडहिंग्लज

गडहिंग्लज तालुक्यात गेल्या वर्षभरात चोरीचे व घरफोडीचे अनेक प्रकार घडले. गेल्या चार महिन्यात शहरात दिवसाढवळ्या झालेली घरफोडी व ज्येष्ठ नागरिकांना चाकूचा धाक दाखवून झालेली लूट यामुळे शहर परिसरात भीतीचे वातावरण निर्माण झाले असतानाच रक्षणकर्त्या पोलिसांच्या घरासह पाटबंधारे कार्यालयातच चोरट्यांनी हातसफाई केल्याने सर्वत्र खळबळ माजली.

शहरातील पाटबंधारे कार्यालयाच्या मागील बाजूस पोलिसांचे सरकारी निवासस्थान असून हा परिसर शहरात पोलिस लाईन म्हणून परिचित आहे. याच पोलिस लाईनमधील तीन घरांवर गुरूवारी रात्री चोरट्यांनी डल्ला मारल्याची चर्चा आहे. शुक्रवारी सकाळपासून शहरात याबाबत उलटसुलट चर्चा सुरु असून पोलिस प्रशासनाने मात्र याचे खंडन करीत चोरीचा प्रयत्न झाल्याचे सांगितले.

पोलिसांतून मिळालेल्या माहितीनुसार, पोलिस लाईनच्या मागील बाजूस असलेल्या सुरेश मल्लापा मस्ती यांच्या बंद घराचा दरवाजा तोडून चोरट्यांनी सोळा हजार रुपयांचा मुद्देमाल लंपास केला. यामध्ये सोन्याचे कर्णफुले, चांदीचा मुखवटा व रोख रक्कम यांचा समावेश आहे. तसेच पोलिस लाईनमधील मोहन अनंत चिपकर यांच्या घरी चोरी झाल्याची घटनास्थळी चर्चा होती. मात्र पोलीस दफ्तरी बंद घराचा कडीकोयंडा उचकटून चोरी असा मोघम उल्लेख आहे. त्याचवेळी हवालदार अशोक शेळके व विलास देसाई यांच्या घरीही चोरीचा प्रयत्न झाला. त्यावेळी ते दोघेही घराला कुलूप लावून नाईट राउंडला गेले होते. मात्र चोरट्यांनी घरात प्रवेश करताच नातेवाईक गाढ झोपेत असल्याचे पाहून चोरटे आल्या पावली निघून गेले.

कॉलनीच्या मागील बाजूस लघु पाटबंधारे विभागाचे कार्यालय आहे. या कार्यालयाचा कडीकोयंडा तोडून चोरट्यांनी कागदपत्रे विस्कटून टाकली. मात्र रात्री उशिरापर्यंत यासंदर्भात फिर्याद दाखल नव्हती. काजू बाग परिसरातील जितेंद्र कांबळे यांच्या घरीही चोरीचा अयशस्वी प्रयत्न झाल्याची चर्चा सुरु होती. पोलिसांच्या श्वानपथकाने पोलिस लाईन तसेच परिसरात चोरट्यांचा माग घेतला. मात्र तेथून ते काजू बागेपर्यंत जाऊन तेथेच घुटमळले.

मोबाइल अॅप डाउनलोड करा आणि राहा अपडेट

जि.प. निवडणूक प्रक्रिया ९ सप्टेंबरपासून

August 19, 2016, 2:30 pm

≫ Next: कोल्हापुरी भडंग सातासमुद्रापार

≪ Previous: गडहिंग्लजमध्ये चोरट्यांचा धुमाकूळ

$

0

0

म. टा. प्रतिनिधी, कोल्हापूर

कोल्हापूरसह राज्यातील २६ जिल्ह्यातील जिल्हा परिषद, पंचायत समिती निवडणुकीसाठी ९ सप्टेंबरपासून प्रभाग रचना आणि आरक्षण नि‌‌श्चितीची प्रक्रिया सुरू होणार आहे. यासंबंधिचा अधिकृत आदेश राज्य निवडणूक आयोगाचे अवर सचिव नि. ज. वागळे यांनी शुक्रवारी काढला. आदेश प्राप्त झाल्यानंतर त्वरीत जिल्हा निवडणूक प्रशासन कामाला लागले आहे.

कोल्हापूर आणि राज्यातील २६ जिल्हा परिषद आणि २९७ पंचायत समित्यांची मुदत मार्च २०१७ मध्ये संपणार आहे. मुदत संपण्याच्या सहा महिने आधी निवडणूक प्रक्रिया सुरू होते. प्रक्रिया राबवण्यासाठी आयोगाने २०११ च्या जणगनणेनुसार कालबद्ध कार्यक्रम दिला आहे. प्रभाग रचना, आरक्षण सोडतीची अंमलबजावणी जिल्हाधिकाऱ्यांच्या मार्गदर्शनाखाली होणार आहे. जिल्हाधिकारी प्रारूप प्रभाग रचनेचा पस्ताव तयार करून विभागीय आयुक्तांना सादर करतील. आरक्षणासह प्रारूप प्रभाग रचनेस आयुक्त मान्यता देतील. त्यानंतर जिल्हाधिकारी नागरिकांचा मागास प्रवर्ग, अनुसूचित जाती, अनुसूचित जमाती, मागासवर्गीय प्रवर्ग, सर्वसाधारण महिला यांच्या आरक्षणाची सोडत काढतील. जिल्हा परिषदांची सोडत जिल्हा स्तरावर तर पंचायत समितीत्यांचे तालुका पातळीवर तहसिलदार काढतील.

......

==

कार्यक्रम असा

प्रभाग रचना व आरक्षणाचा कार्यक्रम असा - प्रारूप प्रभाग रचनेचा प्रस्ताव घेणे - ९ सप्टेंबर, प्रस्तावांना मंजुरी देणे- २३ सप्टेंबर, आरक्षण सोडतीची सूचना प्रसिध्द करणे- २८, आरक्षण सोडत काढणे- ५ ऑक्टोबर, प्रारूप प्रभाग रचनेची ‌अधिसूचना प्रसिध्द करणे- १०, जिल्हाधिकाऱ्यांकडे हरकती, सूचना सादर करणे-२० रोजीपर्यंत, मतरासंघ अंतिम करणे-१७ नोव्हेंबर, अंतिम प्रभाग रचना व आरक्षण शासन राजपत्रात प्रसिध्द करणे- २५ नोव्हेंबर.

महिला आरक्षण कसे ?

जिल्हा परिषद, पंचायत समिती येथे ५० टक्के महिला आरक्षण आहे. त्यामुळे महिला आरक्षणाबद्दल प्रचंड कुतूहल असते. महिला आरक्षण काढताना पूर्वी आरक्षित असलेले मतदारसंघ वगळण्यात येणार आहेत. यामुळे गेल्या निवडणुकीत महिला आरक्षण असल्यास यावेळी पुरूष सर्वसाधारण व अन्य प्रवर्गासाठी राखीव होईल, असे आयोगाच्या आदेशात म्हटले आहे.

इतर प्रवर्गातील आरक्षण

अनुसूचित जाती व अनुसूचित जमातीची लोकसंख्या जास्त असलेल्या जिल्हा परिषद व पंचायत समिती मतदारसंघ नि‌‌श्चित केले जातील. गेल्यावेळी या प्रवर्गाचे आरक्षित मतदारसंघ वगळून आरक्षण सोडत काढण्यात येणार आहे. इतर प्रवर्गातील आरक्षणही अशाच पध्दतीचे काढण्यात येणार आहे. सलग एकच मतदारसंघ विशिष्ट प्रवर्गासाठी राखीव होवू नये, यासाठी फिरत्या पध्दतीने आरक्षण कार्यक्रम काढण्यात येईल.

==

जानेवारीच्या पहिल्या

आठवड्यात आचारसंहिता

निवडणूक कार्यक्रमाची अधिसूचना जाहीर झाल्यानंतर आचारसंहिता लागू होते. पहिल्या टप्यातील प्रभाग रचना, आरक्षण प्रक्रिया झाल्यानंतर जानेवारी २०१७ मध्ये प्रत्यक्षात निवडणूक कार्यक्रमाची अधिसूचना निघेल. त्यानंतर त्वरित आचारसंहिता लागू होईल, असे निवडणूक प्रशासनाचे सूत्राकडून सांगण्यात आले.

.........

मोबाइल अॅप डाउनलोड करा आणि राहा अपडेट

कोल्हापुरी भडंग सातासमुद्रापार

August 19, 2016, 10:57 pm

≫ Next: खंडपीठासाठी प्रसंगी जेलमध्ये जाऊ

≪ Previous: जि.प. निवडणूक प्रक्रिया ९ सप्टेंबरपासून

$

0

0

Raviraj.gaikwad@timesgroup.com

कोल्हापूरः कोंडा ओळ चोकातून दसरा चौकाकडे जाताना जनता भुवन नावाचं छोटं हॉटेल लागतं. जेमतेम चार टेबलांच्या या हॉटेलात इडली, वड्यापासून मिसळ, कटवडा असे विविध प्रकार मिळतात. या पदार्थांची चव तर चांगली आहेच, पण दुपारी चार ते रात्री आठपर्यंत मिळणाऱ्या भडंगमुळे हॉटेलला वेगळी ओळख आहे. या भडंगचे महालक्ष्मी भडंग असे ब्रॅँड नामकरण करण्यात आलं असून, हा भडंग तिच्या चाहत्यांनीच सातासमुद्रापार पोहोचवली आहे.

भूषण शिंदे यांनी जनता भुवन हे हॉटेल १९७६ ला सुरू केलं. वडील मुरलीधर भाऊसाहेब यांचं पद्मा टॉकीजजवळ लक्ष्मी-विलास हॉटेल होतं. आयटीआय आणि बीएपर्यंत शिक्षण घेऊनही भूषण यांना नोकरी नव्हती. त्यामुळे वडिलांचाच हॉटेल व्यवसायातील वारसा पुढे नेत जनता भुवन सुरू झालं. केवळ नाष्ट्याचे ठिकाण असलेल्या हॉटेलात व्यवसाय वाढावा म्हणून भडंग सुरू केली. सुरुवातीला प्रतिसाद न मिळालेल्या भडंगला १९९५ नंतर खऱ्या अर्थाने लोकप्रियता मिळू लागली. वैशिष्ट्य म्हणजे सायकलवरचा कामगार ते आलीशान मोटारीतून फिरणारा कार्पोरेट ऑफिसर सगळेच हॉटेलमध्ये चहा आणि भडंगसाठी येतात. रेडिओची गाणी ऐकत चटपटीत भडंग आणि गरमागरम चहाचा आस्वाद घेणे अनेकांना आवडते. बाहेर हलका पाऊस पडत असेल तर भडंग आणि चहाची लज्जत आणखीनच वाढते.

भूषण शिंदे यांची मुलं सोमनाथ आणि अमित यांनी भडंगला व्यवसायिक स्वरूप देण्याचा निर्णय घेतला. सोमनाथनं हॉटेल मॅनेजमेंटचं शिक्षणही घेतलं आणि दोघांनी मिळून वाय. पी. पोवार नगरात भाड्याची जागा घेऊन व्यवसाय वाढविला. कढईत भडंग तयार करून हाताने पॅक केली जात होती. व्यवसाय आणखी पुढं नेण्यासाठी सोमनाथ आणि अमितने मशिन्स विकत घेतली. आता ती महालक्ष्मी भडंग नावाने मशीनमध्ये तयार होते आणि त्याला उत्तम दर्जाचे पॅकिंगही असते. भडंगचे पॅकिंग केवळ व्यवसायिक न करता त्यावर फूड लायसन्सची माहिती, पॅकिंगची तारीख, किती दिवस टिकणार, पदार्थांमधील घटक याची सगळी माहिती पॅकेटवर छापील स्वरूपात देण्यात येत आहे.

विशेष म्हणजे हा व्यवसाय भडंग पुरता मर्यादीत न ठेवता आता शिंदे कुटुबांने त्यात चटपटीत चणाडाळपासून लेमन भडंगपर्यंत व्हरायटीही आणली आहे. व्यवसायाच्या मार्केटिंगपासून वितरणापर्यंत संपूर्ण प्रोसेसमध्ये शिंदे कुटुंबातीलच व्यक्ती असतात. सोमनाथ आणि अमितचे चुलत भाऊ त्यांची मदत करतात. सध्या कोल्हापूर जिल्ह्यासह कोकण, उत्तर कर्नाटक, मुंबई, पुणे, नाशिक इथं महालक्ष्मी भडंग वितरीत केली जाते.

विदेशातही डिस्ट्रिब्युटर

जनता भुवनच्या भडंगला चाहत्यांनी विदेशात पोहचिले. पाहुणे, मित्र परिवार यांना पाठविण्यासाठी किंवा विदेशात जाताना अनेकजण येथील भडंग घेऊन जातात. पण, विदेशात अद्याप महालक्ष्मी भडंगचा स्वतंत्र वितरक नाही. या संदर्भात दुबई आणि अमेरिकेत वितरक नेमण्याचे प्रयत्न सुरू असल्याचे भूषण शिंदे यांनी सांगितले.

भडंगला मागणी होती. पण, त्याला खऱ्या अर्थाने व्यवसायिक स्वरूप दिले मुलांनी. या व्यवसायातील त्यांची धडपड आणि हुरूप पाहून माझाही उत्साह वाढतो. त्याचवेळी त्यांना साथ देताना माझे वय होत चालले आहे, याची जाणीव झाल्यावर थोडे वाईटही वाटते.

-भूषण शिंदे, मालक, जनता भुवन

कोल्हापुरी ब्रॅँडची उत्पादने

स्पाइसी भडंग

जैन भडंग (लसणाशिवाय)

लेमन भडंग

मसाला व्हिल्स

बेसन शेंगदाणे

चणाडाळ

क्रँची कर्ल्स

चिली चीज आणि चिली टोमॅटो

क्रस्टी मून्स

स्नॅपी पास्ता

मोबाइल अॅप डाउनलोड करा आणि राहा अपडेट

---

खंडपीठासाठी प्रसंगी जेलमध्ये जाऊ

August 19, 2016, 2:30 pm

≫ Next: तरुणीचा रंकाळ्यात आत्महत्येचा प्रयत्न

≪ Previous: कोल्हापुरी भडंग सातासमुद्रापार

$

0

0

म. टा. प्रतिनिधी, कोल्हापूर

कोल्हापूरसह सहा जिल्ह्यांसाठी उच्च न्यायालयाचे खंडपीठ(सर्किट बेंच) सुरू व्हावे या मागणीसाठी खंडपीठ कृती समितीने पुन्हा एकदा एल्गार पुकारला आहे. शुक्रवारी(ता. १९) सहा जिल्ह्यात लाक्षणिक उपोषण करण्यात आले. खंडपीठासाठी वेळप्रसंगी सनद त्यागून जेलमध्ये जाऊ, असा निर्धार खंडपीठ कृती समितीने केला

गेल्या २७ वर्षांपासून सुरू असलेले आंदोलन राज्य सरकारच्या ठरावानंतर पूर्णत्वास येणार, असा आशावाद खंडपीठ कृती समितीला होता. सरकारच्या ठरावातील त्रुटींमुळे खंडपीठाच्या निर्णयाची सरकार आणि कोर्टाकडून टोलवाटोलवी सुरू आहे, त्यामुळे खंडपीठ कृती समितीकडून पुन्हा आंदोलन तीव्र केले जात आहे. शुक्रवारी लाक्षणिक उपोषणामध्ये सहा जिल्ह्यातील १७ हजार वकील सहभागी झाले होते. शहरातील न्यायसंकुलाच्या इमारतीसमोरील आंदोलनात दोन हजारहून अधिक वकिलांचा सहभाग होता. वकिलांच्या या आंदोलनाला विविध संस्था, संघटना, नगरसेवक, खासदार, आमदार यांनी पाठिंबा दिला. तर सिटीझन फोरमच्या वतीने शहरातून बाइक रॅली काढून खंडपीठाच्या मागणीकडे लक्ष वेधण्यात आले.

यावेळी बोलताना खंडपीठ कृती समितीचे अध्यक्ष अॅड. प्रकाश मोरे यांनी आंदोलनाची दिशा स्पष्ट केली. ते म्हणाले, 'मुख्यमंत्र्यांनी गेल्या महिन्याभरात खंडपीठ कृती समितीची भेट दोन वेळा टाळली. सरकारची टाळाटाळ आणि न्याय यंत्रणेकडून नव्या अटी लादल्या जात आहेत. यातून आमच्या मागणीची टोलवाटोलवी सुरू असल्याचे स्पष्ट होते. न्याय यंत्रणेनेच कोल्हापुरातील खंडपीठासाठी सकारात्मक अहवाल दिला आहे, तर सरकारने कॅबिनेटमध्ये ठरावही केला आहे. यानंतरही दुर्लक्ष कायम राहिल्यास खंडपीठ कृती समितीला रस्त्यावर उतरावे लागेल. वेळप्रसंगी सनद त्यागून जेलमध्येही जाण्याची तयारी आहे', असा इशारा त्यांनी सरकारला दिला. विविध संघटनांच्या वकिलांनीही बोलताना आंदोलन तीव्र करण्याचा इशारा देत राजकीय दबाव वाढवण्याची गरज व्यक्त केली.

खंडपीठ कृती समितीच्या लाक्षणिक उपोषणाला जिल्ह्यातील विविध संघटना, राजकीय पक्ष, सामाजिक संस्थांनीही भेट देऊन पाठिंबा दर्शवला. महापौर अश्विनी रामाणे, श्रीमंत शाहू महाराज, खासदार धनंजय महाडिक, खासदार संभाजीराजे, आमदार चंद्रदीप नरके, आमदार राजेश क्षीरसागर आदींनी आंदोलनस्थळी भेट देऊन पाठिंबा व्यक्त केला. दुपारी चारनंतर आमदार प्रकाश आबिटकर यांच्या हस्ते सरबत घेऊन वकिलांनी उपोषण सोडले.

पंधरा हजार खटले ठप्प

खंडपीठ कृती समितीच्या लाक्षणिक उपोषणामुळे कोल्हापूरसह आसपासच्या सहा जिल्ह्यातील कोर्टाचे कामकाज होऊ शकले नाही. सर्व कोर्टातील किमान १५ हजार खटले ठप्प राहिले. तालुका पातळीवरही वकिलांनी दिवसभर कोर्टाच्या बाहेर उपोषण केले. सर्व वकील संघटना आंदोलनात सहभागी झाल्याने कोर्ट रुम रिकाम्याच होत्या.

सिटिझन फोरमची लक्षवेधी रॅली

खंडपीठाच्या मागणीकडे लक्ष वेधण्यासाठी सिटिझन फोरमच्या वतीने शहरातून बाइक रॅली काढण्यात आली. सकाळी साडे अकराच्या सुमारास जुन्या कोर्टाच्या इमारतीसमोरून रॅलीला सुरूवात झाली. शहरातील प्रमुख मार्गांवरून फिरून न्यायसंकुलासमोरील उपोषण स्थळी रॅली दाखल झाली. खंडपीठ झालेच पाहिजे, खंडपीठ आमच्या हक्काचे..., आदी घोषणांनी परिसर दणाणून निघाला. अनेक पक्षकारही या रॅलीत सहभागी झाले होते.

मोबाइल अॅप डाउनलोड करा आणि राहा अपडेट

तरुणीचा रंकाळ्यात आत्महत्येचा प्रयत्न

August 19, 2016, 2:30 pm

≫ Next: आजपासून पाणी पुरवठा सुरळीत, टँकरही उपलब्ध

≪ Previous: खंडपीठासाठी प्रसंगी जेलमध्ये जाऊ

$

0

0

म. टा. प्रतिनिधी, कोल्हापूर

नियोजित वराशी झालेल्या वादातून इस्लामपूर येथील एका तरुणीने रंकाळा तलावात उडी घेऊन आत्महत्या करण्याचा प्रयत्न केला. नागरिकांच्या सतर्कतेमुळे युवतीचे प्राण वाचले, मात्र या प्रकारामुळे नागरिकांसह पोलिसांचीही तारांबळ उडाली. शुक्रवारी (ता. १९) दुपारी एकच्या सुमारास ही घटना घडली.

इस्लामपूर येथील एका तरुणीचा वाळवा तालुक्यातील खेड येथील तरुणाशी विवाह निश्चित केला आहे. संबंधित तरुणी रक्षाबंधनाच्या निमित्ताने कोल्हापुरातील मावसभावाकडे आली होती. शुक्रवारी ती नियोजित वराला भेटण्यासाठी रंकाळा येथे आली. काही काळ गप्पा मारल्यानंतर दोघांमध्ये शाब्दिक वाद झाला. रागाच्या भरात तरुणीने थेट रंकाळा तलावात उडी घेऊन आत्महत्या करण्याचा प्रयत्न केला. परिसरातील नागरिकांच्या सतर्कतेमुळे तिला तातडीने पाण्याबाहेर काढून उपचारासाठी सीपीआरमध्ये दाखल करण्यात आले. या घटनेची माहिती मिळताच पोलिसही घटनास्थळी दाखल झाले. त्यांनी दोघांच्याही नातेवाईकांना कल्पना देऊन बोलवून घेतले. प्राथमिक उपचारानंतर तरुणीला सोडण्यात आले. दोघांनीही चूक कबूल केल्याने पोलिसांनी त्यांना नातेवाईकांच्या समक्ष समज देऊन सोडल्यानंतर या प्रकरणावर पडदा पडला.

मोबाइल अॅप डाउनलोड करा आणि राहा अपडेट

आजपासून पाणी पुरवठा सुरळीत, टँकरही उपलब्ध

August 19, 2016, 2:30 pm

≫ Next: पोळ डॉक्टर नव्हताच!

≪ Previous: तरुणीचा रंकाळ्यात आत्महत्येचा प्रयत्न

$

0

0

म. टा. प्रतिनिधी, कोल्हापूर

तीन दिवस अपुऱ्या पाणी पुरवठ्याला सामोरे जाणाऱ्या निम्म्या शहराला शनिवारपासून सुरळीत पाणी पुरवठा होणार आहे. चंबुखडी पाण्याच्या टाकीजवळील फुटलेली पाइपलाइन बदलल्यानंतर शुक्रवारी पहाटेपासून पाणी उपसा करण्यास सुरूवात केली. शुक्रवारी दुपारी संभाजीनगर, जरनगनगर, रामानंदनगर, हनुमाननगर, देवकर पाणंद या परिसरातील काही भागांना अपुरा पाणी पुरवठा झाला.

पाइपलाइन दुरूस्तीच्या दरम्यान ए, बी आणि ई वॉर्डात पाणी पुरवठा पूर्ण बंद होता. गेले दोन दिवस महापालिकेच्या आठ व १६ खासगी टँकरने पाणी पुरवठा करण्यात येत होता. शुक्रवारी २४ टँकरच्या दिवसभर ९० फेऱ्या झाल्या. मंगळवार पेठ, राजेंद्रनगर, आपटेनगर, क्रांतीसिंह नाना पाटीलनगर, जवाहरनगर, जरगनगर, देवकर पाणंद अशा विविध भागात टँकर उपलब्ध करण्यात आले. पाणी भरण्यासाठी टँकरभोवती झुंबड उडाली होती. शनिवारपासून पाणी पुरवठा सुरळीत होणार असला तरी प्रशासनाने टँकरही उपलब्ध ठेवले आहेत. महापालिकेचे आठ टँकर व भाड्याचे सात टँकर शनिवारी उपलब्ध असणार आहे.

नि​यमित पाणी पुरवठ्याचा आज निर्णय

कोल्हापूर शहराला सध्या एक दिवसा आड पाणी पुरवठा सुरू आहे. धरणात मुबलक पाणी साठा असल्याने नि​यमित पाणी पुरवठा सुरू करावा या मागणीने जोर धरली आहे. महापालिकेची सर्वसाधारण सभा शनिवारी होत असून यामध्ये नियमित पाणी पुरवठा सुरू करण्याचा निर्णय होण्याची शक्यता आहे. शहरात १ एप्रिलपासून एक दिवसाआड पाणी पुरवठा सुरू आहे.

मोबाइल अॅप डाउनलोड करा आणि राहा अपडेट

पोळ डॉक्टर नव्हताच!

August 20, 2016, 2:14 pm

≫ Next: सॉकर लिगमध्ये सुखदेव पाटील

≪ Previous: आजपासून पाणी पुरवठा सुरळीत, टँकरही उपलब्ध

$

0

0

म. टा. वृत्तसेवा, सातारा

सहा जणांचा बळी घेणारा संतोष पोळ डॉक्टर नव्हताच, अशी माहिती आता समोर येत आहे. पोळ हा डॉक्टर नसल्याचे अनेक डॉक्टर सांगत आहेत. पण, संतोष खुनी असल्याचे कळल्यानंतर तो डॉक्टर नसल्याचे सांगणारी मंडळी इतकी वर्षे गप्प का होती, असा प्रश्न उपस्थित होत आहे.

'संतोष पोळ हा आपल्या घोटवडेकर हॉस्पिटलमध्ये कर्मचारी म्हणून कार्यरत होता. डॉक्टर म्हणून तो आपल्याकडे काम करीतच नव्हता,' असे आता पोटतिडकीने सांगणाऱ्या डॉ. विद्याधर घोटवडेकर याचा दावा धादांत खोटा असल्याचे समोर आले आहे. 'संतोष पोळ हा डॉक्टर म्हणूनच हॉस्पिटलमध्ये कामाला होता, आयसीयूतील सर्व रुग्णांवर तोच उपचार करीत होता,' असे स्वत: डॉ. घोटवडेकर यांनी अवघ्या काही महिन्यांपूर्वी एका प्रकरणात पोलिसांना दिलेल्या जबाबात म्हटले आहे. विशेष म्हणजे, हा जबाब पोलिस निरीक्षकाने नोंदवला आहे. जबाबात, '२००६मध्ये घोटवडेकर हॉस्पिटलमध्ये संचित आयसीयू विभाग सुरू केला. त्या विभागावर मी वाई येथील डॉ. संतोष गुलाबराव पोळ यांना कामासाठी ठेवले आहे. या आयसीयूमध्ये अॅडमिट झालेल्या सर्व पेशंटवर उपचार डॉ. पोळ करतात. संचित आयसीयू विभागाचे जनसंपर्क अधिकारी तसेच या विभागातील सर्व आर्थिक व्यवहाराचे काम करण्यासाठी मी डॉ. पोळ यांनाच नेमले आहे,' असे म्हटले होते.

संतोष घोटवडेकर हॉस्पिटलमध्येच पोसला गेला, अशी भावना निर्माण झाली आहे. मात्र 'संतोष हा डॉक्टर म्हणून आपल्याकडे कामाला नव्हता तर मदतनीस म्हणून कामाला होता, आपण केलेल्या तक्रारीमुळेच तो पोलिसांच्या जाळ्यात सापडला आहे,' असा दावा आता घोटवडेकर हॉस्पिटलचे संचालक डॉ. विद्याधर घोटवडेकर यांनी केला आहे.

मोबाइल अॅप डाउनलोड करा आणि राहा अपडेट

सॉकर लिगमध्ये सुखदेव पाटील

August 20, 2016, 2:30 pm

≫ Next: ‘भाजपकडून बनवेगिरी’

≪ Previous: पोळ डॉक्टर नव्हताच!

$

0

0

सॉकर लिगमध्ये सुखदेव पाटील

कोल्हापूर : कोल्हापूरचा उदयोन्मुख फुटबॉलपटू सुखदेव पाटील याची इंडियन सॉकर लिगसाठी (आयएसएल) गोवा एफसी संघात निवड झाली आहे. 'आयएसएल'मध्ये खेळणारा सुखदेव कोल्हापूरचा पहिला खेळाडू ठरला आहे. गोलकिपर असलेल्या सुखदेवने १९ वर्षांखालील भारतीय फुटबॉल संघात महत्त्वाची भूमिका बजावली होती. पुण्यातील क्रीडा प्रबोधिनीत फुटबॉल शिकलेल्या सुखदेवची पेनल्टी स्पेशालिस्ट म्हणून ओळख आहे. ऑक्टोबरपासून 'आयएसएल'चा सिझन सुरू होणार आहे. तत्पूर्वी संघाचा सराव ब्राझीलमध्ये होणार आहे. त्यासाठी सुखदेव लवकरच ब्राझीलला रवाना होणार आहे. या निवडीमुळे खूप आनंद झाला असून, संघाने दिलेली जबाबदारी उत्तमरित्या सांभाळण्याचा प्रयत्न करणार असल्याचे त्याने सांगितले.

मोबाइल अॅप डाउनलोड करा आणि राहा अपडेट

‘भाजपकडून बनवेगिरी’

August 20, 2016, 2:30 pm

≫ Next: केएमटीला सव्वाचार कोटीचा बुस्टर

≪ Previous: सॉकर लिगमध्ये सुखदेव पाटील

$

0

0

म. टा. प्रतिनिधी, कोल्हापूर

'सध्याचे भाजप सरकार रोज एक नवी घोषणा करून 'अशीही बनवाबनवी' करत आहे. स्वातंत्र्यलढ्यात आणि नंतरही भाजप किंवा आरएसएसच्या कोणीही देशासाठी बलिदान दिले नाहीत. देशासाठी बलिदानाची परंपरा काँग्रेसचीच आहे,' असे प्रतिपादन माजी महसूलमंत्री बाळासाहेब थोरात यांनी केले.

राजीव गांधी यांच्या ७२ व्या जयंतीनिमित्त दिंडनेर्ली येथील राजीवजी सूतगिरणीच्या कार्यस्थळावर शनिवारी झालेल्या शेतकरी मेळाव्यात ते बोलत होते. अध्यक्षस्थानी काँग्रेसचे जिल्हाध्यक्ष पी. एन. पाटील होते. यावेळी मान्यवरांच्या हस्ते ज्येष्ठ पत्रकार कुमार केतकर व त्यांच्या पत्नी शारदा यांना 'भारतरत्न राजीव गांधी सद्भावना पुरस्कार' देऊन गौरविण्यात आले.

थोरात म्हणाले, 'आम्ही सत्तेवर असताना मंत्रिमंडळाच्या बैठकीत शेतकरी, कष्टकरी, ग्रामीण जनतेच्या हिताची चर्चा होत होती. आताचे सरकार मंत्रिमंडळाच्या बैठकीत शहरी लोकांच्या हितावर अधिक चर्चा करताना दिसते. राजीव गांधी आणि काँगेसवर अतिशय निष्ठा ठेवून पी. एन. पाटील गेली २३ वर्षे सद्भावना दौडचे आयोजन करतात, हे कौतुकास्पद होते. राज्यात केवळ कोल्हापुरातच एवढ्या उत्साही वातावरणात राजीव गांधींची जयंती साजरा केली जाते.'

केतकर म्हणाले, 'हिंदू सहिष्ण आहेत, हे खोटे आहे. हिंदुत्व प्रखर करत सत्तेवर आलेले पंतप्रधान नरेंद्र मोदी 'मेक इन इंडिया'ची घोषणा करून अमेरिकेतील कंपन्यांना निमंत्रित करत आहेत. अलीकडे भारतातील अमेरिकन कंपन्या आपल्या उद्योगाचे युनिट बंद करत आहेत. आपली लोकप्रियता कमी होत आहे, असे वाटल्यानंतर मोदी नव्या घोषणा करतात. आता लोकप्रियता टिकवण्यासाठी ते देशातील मुस्लिम आणि पाकिस्तानविरोधी बोलून हिंदुत्वाचा उमाळा निर्माण करतील.'

पी. एन. पाटील म्हणाले, 'अनेकांनी अनेक आमिषे दाखवली; परंतु त्याला बळी न पडता काँग्रेसशी एकनिष्ठ राहिलो. यापुढेही राहणार आहे.' आमदार सतेज पाटील यांचेही भाषण झाले. यावेळी सभापती जयस‌िंग खामकर, अॅड. दिगंबर पाटील, बाजीराव देसाई, सौरभ पाटील, रोहन भोसले, सदाशिव निकम, आनंदा पाटील यांचा सत्कार करण्यात आला. मेळाव्यास 'गोकुळ'चे अध्यक्ष विश्वास पाटील, जि.प. अध्यक्ष विमल पाटील, अंजना रेडेकर, उदयानीदेवी साळोखे, अप्पी पाटील, राजेश पाटील, आदी उपस्थित होते. सूतगरिणीचे अध्यक्ष राहुल पाटील यांनी प्रास्ताव‌िक केले.

मोबाइल अॅप डाउनलोड करा आणि राहा अपडेट

केएमटीला सव्वाचार कोटीचा बुस्टर

August 20, 2016, 2:30 pm

≫ Next: ‘हिंदुत्वविरोधात जनआंदोलन एकमेव हत्यार’

≪ Previous: ‘भाजपकडून बनवेगिरी’

$

0

0

म. टा. प्रतिनिधी, कोल्हापूर

केएमटी कर्मचाऱ्यांचा प्रॉव्हिडंड फंड आ​णि विम्याच्या थकीत रकमेचा भरणा करण्यासाठी चार कोटी ३० लाखाचा निधी देण्याच्या ठरावाला महापालिकेच्या सर्वसाधारण सभेत मंजुरी देण्यात आली. मात्र सातत्याने तोट्यात धावणाऱ्या केएमटीवरून नगरसेवकांनी प्रशासनाचे वाभाडे काढले. त्यांना उत्तरे देताना अधिकाऱ्यांची भंबेरी उडाली. नगररचना विभागाची मान्यता न घेता केएमटीची जागा भाड्याने देणाऱ्या अतिरिक्त व्यवस्थापक संजय भोसले यांच्यावर निलंबनाची कारवाई करावी, अशी मागणी सुनील कदम केली. महापौर अश्विनी रामाणे सभेच्या अध्यक्षस्थानी होत्या.

कदम यांचा प्रश्नांचा सपाटा, सातत्याने पॉइंट ऑफ ऑर्डर घेऊन बोलण्याचा प्रयत्न आणि महापौरांनी त्यांना हळू बोलण्याचा दिलेला सल्ला यामुळे सभागृहात काही वेळ गोंधळ झाला. २००५ पासून केएमटीचा तोटा १२ कोटीपर्यंत पोहचल्याचे सभागृहाच्या निदर्शनास आणले. या तोट्याला प्रशासन कारणीभूत असल्याचा ठपका सदस्यांनी ठेवला. चुकीच्या कामकाजामुळेच २९ नव्या बसेस आ​णि अन्य कामासाठीचे मंजूर सहा कोटी रुपये परत गेल्याचा आरोप करत संबंधित अधिकाऱ्यांवर जबाबदारी निश्चित करण्याची सूचना केली. केएमटी कर्मचारी संघाने थकीत रकमेसाठी बेमुदत काम बंद आंदोलनाचा इशारा दिल्यानंतर विशेष सभा घेऊन तरतूद करण्याचे ठरले होते. केएमटीच्या प्रश्नावर तब्बल दोन तास वादळी चर्चा झाली.

आठ महिन्याच्या संघर्षानंतर सभागृहात प्रवेश केलेल्या ताराराणी आघाडीचे नेते नगरसेवक सुनील कदम यांनी केएमटी प्रश्नावरून सभा गाजवली. डिझेल घोटाळ्यातील एक कोटी ६४ लाखांची भरपाई कुणावर निश्चित करणार? पगाराअभावी कर्मचाऱ्यांच्या मुलांच्या शिक्षणाचा प्रश्न निर्माण झाला आहे. अयोध्या पार्कमधील केएमटीची जागा नगररचना विभागाची मान्यता न घेता भाड्याने दिली. डीपी रोड भाड्याने देण्याचा प्रकार घडला. त्या जागेचा व्ही. बी. पाटील यांनी टीडीआर घेतला. भाड्यापोटी महापालिकेच इमारतही भाड्याने देणार का? अशी विचारणाही त्यांनी केली.

राष्ट्रवादीचे प्रा. जयंत पाटील यांनी केएमटी कर्मचाऱ्यांच्या व्यथा मांडल्या. केएमटीचा आस्थापना खर्च ६० लाखापर्यंत पोहचला असून तो कमी कसा करणार? अनेक अधिकाऱ्यांची वृत्ती सरंजमशाही बनली आहे. आयुक्तांनी लक्ष घालण्याची गरज असल्याचे पाटील यांनी सांगितले. परिवहन सभापती लाला भोसले यांनी कर्मचाऱ्यांच्या जिव्हाळ्याचा प्रश्न असून महापालिकेने निधी मंजूर करावा, अशी मागणी केली. भूपाल शेटे यांनी उत्पन्नाचे नवे मार्ग शोधताना तिकिटाच्या मागील बाजूस जाहिराती छापण्याची सूचना केली. मुरलीधर जाधव, प्रविण केसरकर, संभाजी जाधव, नियाज खान, रुपाराणी निकम शेखर कुसाळे, आशिष ढवळे, अफजल पिरजादे, सूरमंजिरी लाटकर, रिना कांबळे, दिलीप पोवार, विजय खाडे, किरण शिराळे यांनी चर्चेत सहभाग घेतला.

००००००००

शहराला रोज पाणी पुरवठा होणार
दरम्यान, शहराला पाच महिन्यानंतर आता रोज पाणी पुरवठा होणार आहे. सभेने दैनंदिन पाणी पुरवठा करण्याला मंजुरी दिली. सभेने मंजुरी दिल्याने प्रशासनाने आता पाणी पुरवठा​ वितरण प्रक्रियेला सुरूवात केली आहे. येत्या चार दिवसात नियमित पाणी पुरवठ्याला सुरूवात होईल. कोल्हापूर शहरात एक एप्रिलपासून दिवसाआड पाणी पुरवठा करण्यात येत आहे. महापौर रामाणे म्हणाले, 'पाणी टंचाईच्या काळात नागरिकांनी प्रशासनाला सहकार्य केले. आता मुबलक पाणीसाठा असल्याने नियमित पाणी पुरवठा करण्याचा निर्णय घेण्यात येत आहे.'

०००००००००

मोबाइल अॅप डाउनलोड करा आणि राहा अपडेट

---

‘हिंदुत्वविरोधात जनआंदोलन एकमेव हत्यार’

August 20, 2016, 2:30 pm

≫ Next: जागाभाडेचा प्रस्ताव फेटाळला

≪ Previous: केएमटीला सव्वाचार कोटीचा बुस्टर

$

0

0

म. टा. प्रतिनिधी, कोल्हापूर

'डॉ. नरेंद्र दाभोलकर, गोविंद पानसरे व एम. एम. कलबुर्गी या घटना ठरवून घडवल्या आहेत, यातून समाजात दहशतवाद निर्माण केला जात आहे. या सर्व घटनांमागे हिंदुत्ववादी विचारसरणी असून, त्याविरोधात लढण्यासाठी जनआंदोलन एकमेव हत्यार आहे. जनशक्ती आणि लोकशाहीच्या जोरावर घटनेच्या माध्यमातून आलेली सार्वत्रिक सत्ता कायम राहील,' असा आशावाद भारतीय बहुजन पक्षाचे अध्यक्ष डॉ. प्रकाश आंबेडकर यांनी व्यक्त केला.

डॉ. नरेंद्र दाभोलकर यांच्या तृतीय स्मृतिदिनानिमित्त कॉ. गोविंद पानसरे समता संघर्ष समितीच्यावतीने आयोजित परिवर्तन मेळाव्यात ते बोलत होते. अध्यक्षस्थानी ज्येष्ठ विचारवंतर डॉ. एन. डी. पाटील होते. डॉ. आंबेडकर म्हणाले, 'डॉ. दाभोलकर यांच्या स्मृतिदिनानिमित्त कार्यक्रम सुरू असताना दुसऱ्या बाजूला सनातन संस्थेचाही कार्यक्रम सुरू होता. अशा कार्यक्रमातून ते खुल्या मैदानात आले आहेत. त्यामुळे सनातनने हिंसेचा मार्ग सोडणार नसल्याचे दाखवून दिले आहे. अशा संघटनांच्या माध्यमातून बहुमताच्या जोरावर लोकशाहीच्या माध्यमातून व्यवस्था बदलण्याचा प्रयत्न सुरू आहे, त्यामुळे आता आणखी सजग राहून जनआंदोलनलाचा रेटा वाढविण्याची गरज आहे.'

यावेळी मेघा पानसरे यांनी मनोगत व्यक्त केले. मेळाव्यास उमा पानसरे, अतुल दिघे, व्यंकप्पा भोसले, अॅड. शिवाजीराव परुळेकर, चंद्रकांत यादव, बाबूराव कदम, दिलीप पोवार आदी उपस्थित होते. उदय नारकर यांनी प्रास्ताविक केले. सुजाता म्हेत्रे यांनी सूत्रसंचालन केले. एस. डी. पाटील यांनी आभार मानले.

मोबाइल अॅप डाउनलोड करा आणि राहा अपडेट

जागाभाडेचा प्रस्ताव फेटाळला

August 20, 2016, 2:30 pm

≫ Next: हद्दवाढीसाठी उद्या लोक रस्त्यावर येणार

≪ Previous: ‘हिंदुत्वविरोधात जनआंदोलन एकमेव हत्यार’

$

0

0

म. टा. प्रतिनिधी, कोल्हापूर

खुल्या जागा रेडीरेकनर दराने भाड्याने देऊन उत्पन्न वाढविण्याच्या प्रस्तावात असंख्य त्रुटी असून, यामुळे शहरात आणखी अतिक्रमण वाढण्याची शक्यता आहे. एकदा भाड्याने दिलेल्या जागा दहा वर्षांनी परत घेण्यासाठी महापालिकेची काय तरतूद आहे? जागा भाड्याने देऊन अधिकारी अतिक्रमणाला पाठीशी घालत आहेत, असा आरोप करत सभागृहाने खुल्या जागा भाड्याने देण्याचा प्रस्ताव फेटाळला. अध्यक्षस्थानी महापौर अश्विनी रामाणे होत्या. शहरातील बेकायदेशीर केबीनवरून अधिकाऱ्यांना धारेवर धरल्यानंतर आठ दिवसात मोहीम राबविण्यात येईल, असे प्रशासनातर्फे स्पष्ट केले.

महापालिकेच्या मालकीच्या छत्रपती राजाराम विद्यामंदिरची इमारत पुणे येथील विजय उत्तुरे यांच्या ​विनाअनुदानित शैक्षणिक संस्थेला भाडेतत्त्वावर देण्याचा प्रस्ताव सभागृहाने नामंजूर केला. जयंत पाटील, शारंगधर देशमुख, प्रज्ञिता उत्तुरे यांनी इस्टेट विभाग नियम डावलून करार करत असल्याचा आरोप केला. इस्टेट विभागाकडून शहराच्या विविध भागातील ५०० चौरस फुटांपर्यंतच्या जागा रेडीरेकनर दराने दहा वर्षे मुदतीने भाड्याने देण्याचे आठ प्रस्ताव सभागृहाने फेटाळले. नगरसेवक विजय सूर्यवंशी यांनी प्रस्ताव बेकायदेशीर असून प्रशासनाने पूर्ण अभ्यास करून सादर करावेत अशा सूचना केल्या. दिलीप पोवार यांनी जागा भाड्याने देण्याची गरज काय ? असा सवाल केला. सत्यजित कदम यांनी अधिकाऱ्यांना झोपडपट्टीधारकांना प्रॉपर्टी कार्ड द्यायला वेळ नाही, पण अशा विषयात खूप इंटरेस्ट असल्याचा टोला लगावला. नगरसेवक प्रताप जाधव यांनी प्रशासनाच्या दुर्लक्षामुळे आणि चुकीच्या नियोजनामुळे महापालिकेच्या मालकीच्या एक एकर जागा विनावापर आहे. या जागेवर वाहनतळ विकसित करता आले असते हे सभागृहाच्या निदर्शनास आणले. राहुल माने यांनी फुलेवाडीतील केबीनच्या अतिक्रमणाकडे लक्ष वेधले. जागा भाड्याने देण्याच्या धोरणात सुधारणा करण्यात येईल, असे उत्तर आयुक्तांनी दिले.

९० केबीन, तीन कायदेशीर

मध्यवर्ती बसस्थानक परिसर, खाऊ गल्ली, महावीर गार्डन परिसर, आरटीओ कार्यालय परिसरातील अनधिकृत केबीनवरून आशिष ढवळे, राहुल चव्हाण, अजित ठाणेकर, अर्जुन माने यांनी ​अधिकाऱ्यांना लक्ष्य केले. महावीर गार्डन परिसरात ९० केबीन असून त्यापैकी केवळ तीन केबीन अधिकृत आहेत. अधिकारी झोपा काढतात काय ? अशी विचारणा राहुल चव्हाण यांनी केली. संतोष गायकवाड यांनी कचरा उठाव ठप्प झाल्याने आरोग्यविषयक समस्या निर्माण झाल्याचे सांगितले. शहर अभियंता नेत्रदीप सरनोबत यांनी आठ दिवसात बेकायदेशीर केबीन हटविण्यात येतील अशी ग्वाही दिली.

मंजूर प्रस्ताव

केएमसी कॉलेजमधील प्रा. पी.डी. तोरस्कर, प्रा. एच.डी.पाटील, प्रा.पी. एस. कांबळे यांची पूर्णवेळ नियुक्तीचा प्रस्ताव

सुभाषनगर येथील सुन्नत मुस्लिम जमाअत संस्थेला सांस्कृतिक हॉल बांधणीसाठी दहा टक्के जागा देणे

शहरात बहुउद्देशीय क्रीडा सभागृह बांधणे

मोबाइल अॅप डाउनलोड करा आणि राहा अपडेट

हद्दवाढीसाठी उद्या लोक रस्त्यावर येणार

August 20, 2016, 2:30 pm

≫ Next: ​ केएमटीला सव्वाचार कोटींचा बुस्टर

≪ Previous: जागाभाडेचा प्रस्ताव फेटाळला

$

0

0

म. टा. प्रतिनिधी, कोल्हापूर

कोल्हापूर शहराच्या हद्दवाढीच्या समर्थनार्थ सोमवारी (ता.२२) तब्बल दहा हजारहून अधिक लोक रस्त्यावर उतरणार आहेत. दसरा चौकातील राजर्षी शाहू महाराज यांच्या पुतळ्यासमोर सकाळी दहा ते दुपारी बारा या वेळेत धरणे आंदोलन होईल. यावेळी हद्दवाढीसंदर्भात शपथ घेतली जाणार आहे. आंदोलनात तरुण मंडळे, संस्था, विद्यार्थी सहभागी होणार आहेत.

आमदार राजेश क्षीरसागर यांच्या अध्यक्षतेखाली सर्वपक्षीय हद्दवाढ कृती समितीची शिवाजी पेठेतील शिवाजी मंदिर येथे बैठक झाली. आमदार क्षीरसागर यांनी हद्दवाढीला विरोध करणाऱ्या तीनही आमदारांचा खरपूस समाचार घेतला. कोल्हापूरच्या सुविधा घ्यायच्या आणि हद्दवाढीला विरोध करायचा, शहरात येऊन चिथावणीखोर भाषणे करायची असला प्रकार खपवून घेतला जाणार नाही असे ठणकावून सांगितले. राष्ट्रवादीचे शहराध्यक्ष राजू लाटकर यांनी, हद्दवाढीची प्रक्रिया नैसर्गिक आहे. हद्दवाढीसाठी राज्य सरकार अनुकूल आहे. मात्र, ​काही मंडळी स्वतःची राजकीय पोळी भाजून घेण्यासाठी विरोध करत असल्याची टीका केली. कृती समितीचे निमंत्रक आर. के. पोवार, बाबा पार्टे, भाजपचे महेश जाधव, कॉम्रेड सतीश कांबळे, माजी नगरसेवक उत्तम कोराणे, रविकिरण इंगवले, लाला गायकवाड, किरण दरवान, अनिल कदम, सुरेश जरग यांची भाषणे झाली.


हद्दवाढ विरोधकांच्या आंदोलनाला परवानगी नको

हद्दवाढीला विरोध करणारी मंडळी शहरात येऊन चिथावणीखोर वक्तव्ये करत आहेत. यामुळे कायदा व सुव्यवस्थेचा प्रश्न निर्माण होत आहे. महापालिका, जिल्हा प्रशासनाने हद्दवाढ विरोधकांच्या आंदोलनाला जागा व परवानगी देऊ नये असे पत्र महापौर अश्विनी रामाणे, उपमहापौर शमा मुल्ला यांच्यासह सर्व पदाधिकाऱ्यांनी जिल्हाधिकारी व जिल्हा पोलिसप्रमुखांना दिले आहे. आमदार राजेश क्षीरसागर यांच्यासह हद्दवाढ कृती समितीच्या पदाधिकाऱ्यांनी जिल्हाधिकाऱ्यांची भेट घेऊन तशी मागणी केली.

मोबाइल अॅप डाउनलोड करा आणि राहा अपडेट

​ केएमटीला सव्वाचार कोटींचा बुस्टर

August 20, 2016, 9:39 pm

≫ Next: ग्रामीण लोकप्रतिनिधी आडमुठे

≪ Previous: हद्दवाढीसाठी उद्या लोक रस्त्यावर येणार

$

0

0

म. टा. प्रतिनिधी, कोल्हापूर

केएमटी कर्मचाऱ्यांचा प्रॉव्हिडंड फंड आ​णि विम्याच्या थकीत रकमेचा भरणा करण्यासाठी चार कोटी ३० लाखाचा निधी देण्याच्या ठरावाला महापालिकेच्या सर्वसाधारण सभेत मंजुरी देण्यात आली. मात्र सातत्याने तोट्यात धावणाऱ्या केएमटीवरून नगरसेवकांनी प्रशासनाचे वाभाडे काढले. त्यांना उत्तरे देताना अधिकाऱ्यांची भंबेरी उडाली. नगररचना विभागाची मान्यता न घेता केएमटीची जागा भाड्याने देणाऱ्या अतिरिक्त व्यवस्थापक संजय भोसले यांच्यावर निलंबनाची कारवाई करावी, अशी मागणी सुनील कदम केली. महापौर अश्विनी रामाणे सभेच्या अध्यक्षस्थानी होत्या.

कदम यांचा प्रश्नांचा सपाटा, सातत्याने पॉइंट ऑफ ऑर्डर घेऊन बोलण्याचा प्रयत्न आणि महापौरांनी त्यांना हळू बोलण्याचा दिलेला सल्ला यामुळे सभागृहात काही वेळ गोंधळ झाला. २००५ पासून केएमटीचा तोटा १२ कोटीपर्यंत पोहचल्याचे सभागृहाच्या निदर्शनास आणले. या तोट्याला प्रशासन कारणीभूत असल्याचा ठपका सदस्यांनी ठेवला. चुकीच्या कामकाजामुळेच २९ नव्या बसेस आ​णि अन्य कामासाठीचे मंजूर सहा कोटी रुपये परत गेल्याचा आरोप करत संबंधित अधिकाऱ्यांवर जबाबदारी निश्चित करण्याची सूचना केली. केएमटी कर्मचारी संघाने थकीत रकमेसाठी बेमुदत काम बंद आंदोलनाचा इशारा दिल्यानंतर विशेष सभा घेऊन तरतूद करण्याचे ठरले होते. केएमटीच्या प्रश्नावर तब्बल दोन तास वादळी चर्चा झाली.

राष्ट्रवादीचे प्रा. जयंत पाटील यांनी केएमटी कर्मचाऱ्यांच्या व्यथा मांडल्या. केएमटीचा आस्थापना खर्च ६० लाखापर्यंत पोहचला असून तो कमी कसा करणार? अनेक अधिकाऱ्यांची वृत्ती सरंजमशाही बनली आहे. आयुक्तांनी लक्ष घालण्याची गरज असल्याचे पाटील यांनी सांगितले. परिवहन सभापती लाला भोसले यांनी कर्मचाऱ्यांच्या जिव्हाळ्याचा प्रश्न असून महापालिकेने निधी मंजूर करावा, अशी मागणी केली.

भूपाल शेटे यांनी उत्पन्नाचे नवे मार्ग शोधताना तिकिटाच्या मागील बाजूस जाहिराती छापण्याची सूचना केली. मुरलीधर जाधव, प्रविण केसरकर, संभाजी जाधव, नियाज खान, रुपाराणी निकम शेखर कुसाळे, आशिष ढवळे, अफजल पिरजादे, सूरमंजिरी लाटकर, रिना कांबळे, दिलीप पोवार, विजय खाडे, किरण शिराळे यांनी चर्चेत सहभाग घेतला.

महापालिकेची इमारतही भाड्याने देणार का ?

आठ महिन्याच्या संघर्षानंतर सभागृहात प्रवेश केलेल्या ताराराणी आघाडीचे नेते नगरसेवक सुनील कदम यांनी केएमटी प्रश्नावरून सभा गाजवली. डिझेल घोटाळ्यातील एक कोटी ६४ लाखांची भरपाई कुणावर निश्चित करणार? पगाराअभावी कर्मचाऱ्यांच्या मुलांच्या शिक्षणाचा प्रश्न निर्माण झाला आहे. अयोध्या पार्कमधील केएमटीची जागा नगररचना विभागाची मान्यता न घेता भाड्याने दिली. डीपी रोड भाड्याने देण्याचा प्रकार घडला. भाड्यापोटी महापालिकेची इमारतही भाड्याने देणार का? अशी विचारणाही त्यांनी केली.

मोबाइल अॅप डाउनलोड करा आणि राहा अपडेट

ग्रामीण लोकप्रतिनिधी आडमुठे

August 21, 2016, 2:30 pm

≫ Next: अभियांत्रिकी विद्यार्थ्यांची संख्या घटली

≪ Previous: ​ केएमटीला सव्वाचार कोटींचा बुस्टर

$

0

0

म. टा. प्रतिनिधी, कोल्हापूर

ग्रामीण लोकप्रतिनिधी आडमुठेपणाची भूमिका घेऊन हद्दवाढीस‌‌विरोध करत आहेत. भाजप सरकार हद्दवाढीसाठी सकारात्मक आहे. हद्दवाढीची ३१ ऑगस्टपर्यंत अधिसूचना काढावी, अन्यथा नगरसेवकाही आमरण उपोषणात सहभागी होतील, असे प्रति‌पादन महापौर अश्विनी रामाणे यांनी रविवारी केले.

येथील बसस्थानक परिसरात भातर‌तीय कम्युनिष्ठ पक्ष, बस वाहतूकदार संघटनातर्फे हद्दवाढीसंबंधी जनजागृती करण्यासाठी आयोजित कॉर्नर सभेत त्या बोलत होत्या.

महापौर रामाणे म्हणाल्या, 'चांगले काम केल्यास कोल्हापूरची जनता डोक्यावर घेते. भाजपच्या चांगल्या कामाचे आम्ही अभिनंदन करतो. पालकमंत्री चंद्रकांत पाटील हद्दवाढीसाठी प्रयत्न करत आहेत. ते मुख्यमंत्र्यांना सांगून हद्दवाढीची अधिसूचना काढण्याची प्रक्रिया राबवली. पण ग्रामीण भागातील लोकप्रतिनिधींनी आडमुठेपणाची भूमिका घेत विरोध केला. परिणामी हद्दवाढ अधिसूचना रेंगाळली आहे. सरकारने विरोधी लोकप्रतिनिधींच्या दबावाला बळी न पडता १८ गावे व दोन एमआयडीसीसह हद्दवाढ करावी.

सर्वपक्षीय हद्दवाढ कृती समितीचे निमंत्रक आर. के. पोवार म्हणाले, 'हद्दवाढ व्हावी अशी प्रतिज्ञा करण्यासाठी उद्या सकाळी साडे नऊ वाजता दसरा चौकात आंदोलन होणार आहे. या आंदोलनात मोठ्या संख्येने उपस्थित राहावे. हद्दवाढ नैसर्गिकपणे होणे अपेक्षित आहे. परंतु, शहरातील सर्व सुविधा वापरणारे ग्रामीण भागातील आमदार विरोध करत आहेत. हद्दवाढ त्वरित न झाल्यास २४ पासून बेमुदत उपोषण करणार आहे.

भाजपचे महेश जाधव म्हणाले, 'अनेक वर्षांपासून रेंगाळलेल्या हद्दवाढचा प्रश्न सोडवण्यासाठी भाजप सरकार प्रयत्न करत आहे. भाजप सरकारचे कौतुक काँग्रेस, राष्ट्रवादी पक्षाचे लोकही करत आहे. शेतजमीनी जातील, घरफाळा वाढेल अशी भीती घालत केला जाणारा हद्दवाढीस विरोध चुकीचा आहे. शहराच्या विकासाठी पालकमंत्री, मुख्यमंत्री सकारात्मक आहे.'

राष्ट्रवादीचे शहर अध्यक्ष राजू लाटकर म्हणाले, 'हद्दवाढ नैसर्गिक आहे. गेल्या ४४ वर्षांत हद्दवाढ न करून शहरावर अन्याय झाला आहे. ग्रामीण भागातील आमदारांनी विरोध करू नये. अन्यथा आम्हालाही कोल्हापूर महापालिकेची नगरपालिका करा, राजारामपुरी, शिवाजी पेठ अशा प्रत्येक भागाची ग्रामपंचायत करावी, अशी उलटी मागणी करावी लागेल. भाजपच्या चांगल्या कामाचे कौतुक केले आहे. त्यामुळे भाजपने हद्दवाढीचा निर्णय घ्यावा.'

यावेळी अनिल चव्हाण यांचे भाषण झाले. नगरसेविका वृषाली कदम, जहिदा मुजावर, रेखा आवळे, बाबा पार्टे आदी उपस्थित होते.

चौकट

आम्ही मुर्ख कसे ?

ग्रामीण भागातील लोकप्रति‌निधी आम्ही मुर्ख आहे, असा आरोप करत आहे. आम्ही मुर्ख असतो तर या पदापर्यंत पोहचलो असतो का? असा सवालही महापौर रामाणे यांनी केले.


नरके, महाडिकांच्या घरासमोर आंदोलन करणार

आमदार अमल महा‌डिक यांच्या द‌क्षिण मतदारसंघात शहरातील भाग येतो. तरीही महाडिक हद्दवाढीस विरोध करून गद्दारी करत आहेत. शहरात राहून आमदार चंद्रदीप नरकेही विरोध करत आहेत. या आमदारांच्या घरासमोर बोंबाबोंब आंदोलन करू, असे 'भाकप'चे सतीश कांबळे यांनी सांगितले.

मोबाइल अॅप डाउनलोड करा आणि राहा अपडेट