सध्याच्या शिक्षणाचा खर्च परवडत नाही हा प्रश्न समोर असलेल्या गुणवंत मुलांच्या पालकांसाठी शैक्षणिक कर्ज सुविधा आर्थिक भार हलका करत आहे. केवळ आर्थिक बाजू भक्कम नाही म्हणून एखाद्या हुशार विद्यार्थ्यांचे शिक्षण थांबू नये, यासाठी राष्ट्रीयीकृत बँकांच्यावतीने शैक्षणिक कर्ज योजना आधार देत आहे. काही वर्षांपूर्वी शैक्षणिक कर्जासंदर्भात पालक व विद्यार्थ्यांमध्ये असलेली संभ्रमावस्था दूर करण्यासाठीही बँक व्यवस्थापनाची विशेष टीम काम करत आहे. यावर्षी एकट्या बँक ऑफ इंडियातून कोल्हापूर, सांगली आणि सातारा या तीन जिल्ह्यांत एप्रिल ते जून या तीन महिन्यात साडेपाच कोटी कर्ज वाटप केले आहे.
गेल्या वीस वर्षांत शिक्षण आणि करियर निवडीचा परीघ व्यापक झाल्यामुळे मुलांच्या शिक्षणासाठी पालकांना आर्थिक तरतूद करणे ही कसरत ठरत आहे. महत्त्वाचे म्हणजे याची सर्वाधिक झळ मध्यमवर्गीय पालकांच्या आर्थिक नियोजनाला बसत आहे. अशा परिस्थितीमध्ये राष्ट्रीयीकृत बँकांच्या माध्यमातून कर्ज घेण्याचा पर्याय आज पालक आणि विद्यार्थी यांच्यासाठी अतिशय उपयुक्त ठरत आहे. शैक्षणिक कर्ज घेण्यासाठी एप्रिल ते जून या महिन्यात बँकांमध्ये विशेष माहिती दालनही खुले केले जाते जेणेकरून पालक व विद्यार्थी यांच्यामध्ये शैक्षणिक कर्जाबाबतची भीती, शंका दूर होऊन योग्य माहिती मिळावी.
शैक्षणिक कर्जामध्ये समाविष्ट खर्च
कॉलेज हॉस्टेल फी
ग्रंथालय, प्रयोगशाळा, परीक्षा फी
पुस्तके व शैक्षणिक साधने व उपकरणे फी
परदेशातील शिक्षणाचा प्रवासखर्च
अभ्यासक्रमासाठी आवश्यक असल्यास संगणक खरेदी
अभ्यासक्रम पूर्ण करण्याकरता आवश्यक त्या संगणकाची खरेदी
शैक्षणिक कर्ज मिळण्याची प्रक्रिया
उच्च शिक्षणासह, ज्या अभ्यासक्रमाची फी खूप महाग आहे अशा अभ्यासक्रमाची निवड करणाऱ्या विद्यार्थ्यांना शैक्षणिक कर्ज मिळते. एज्युकेशन लोन घेऊन शिक्षण पूर्ण करणे आणि नोकरी लागल्यानंतर सहा महिन्यांनी ते फेडण्याचा पर्याय स्वीकारणे ही सध्या एक सोयीची सुविधा बनली आहे. ही सुविधा विद्यार्थी केंद्री असल्यामुळे हे कर्ज मंजूर होण्याची प्रक्रियाही सोपी आहे. विद्यार्थ्यांच्या नावावर कर्ज मंजूर होत असले तरी हमीदार किंवा सहकर्जदार म्हणून पालकांचे नाव लागते. त्यासाठी पालकांना त्यांच्या उत्पन्नाची माहिती द्यावी लागते. तर विवाहित विद्यार्थिनींसाठी पतीचे नाव हमीदार म्हणून लावले जाते. बारावीनंतर इंजिनीअरिंग, मेडिकलसह अन्य व्यावसायिक शिक्षण, उच्च शिक्षण तसेच संशोधनासाठी कर्ज मिळते. राष्ट्रीयीकृत, निम-सार्वजनिक, काही खाजगी तसेच नागरी बँक शैक्षणिक कर्ज सुविधा देतात. मात्र विद्यार्थी व पालक राष्ट्रीयीकृत बँकांमधून कर्ज घेण्याला प्राध्यान्य देत आहेत. विशेष म्हणजे चार लाखापर्यंतंच्या कर्जासाठी काहीही तारण ठेवण्याचे बंधन नसल्यामुळे या सुविधेचा उपयोग दरवर्षी हजारो विद्यार्थी घेतात.
शैक्षणिक कर्जासाठी आवश्यक कागदपत्रे
विद्यार्थ्याचे शैक्षणिक प्रमाणपत्र
प्रवेश परीक्षा उत्तीर्ण झाल्याचे पत्र
अभ्यासक्रम मान्यतेचा पुरावा
प्रवेश घेतल्याचे पत्र
अधिकृत ओळखपत्र
मोबाइल अॅप डाउनलोड करा आणि राहा अपडेट
