चारही दरवाजात भाविक प्रवेश करताना मेटल डिटेक्टरचा आवाज होतो. एखादा पोलिस भाविकांच्या पिशवीकडे पाहतो. दोघी तिघी महिला पोलिस कर्मचारी हसत खिदळत असतात. त्यांच्याजवळ ना काठी ना कार्बाइड गन. दहशतवाद्यांच्या हिटलिस्टवर असलेल्या अंबाबाई मंदिराच्या चारही दरवाजावर पाट्या टाकणारा असा हा ठिय्या बंदोबस्त आहे. या ठिय्या बंदोबस्ताची ना कुठल्या वरिष्ठाला काळजी ना कर्मचाऱ्यांना. मंदिराचा बंदोबस्त नशिबावर हवाला ठेवून सुरू आहे.
मंगळवार हा देवीचा वार. दुपारी पावणेदोन ते अडीच या वेळेत भाविकांची मंदिरात बऱ्यापैकी गर्दी होती. मंदिराच्या सुरक्षेसाठी महाद्वार, घाटी, पूर्व, दक्षिण या दरवाजावर पोलिस बंदोबस्त ठेवला आहे. दोन पुरूष आणि एक महिला पोलिस कर्मचारी अशा तीन शिफ्टमध्ये प्रत्येक दरवाजावर बंदोबस्त असतो. पण काही दरवाजावर निम्मे कर्मचारीही बंदोबस्तास उपस्थित नव्हते.
महाव्दार रोडवरून सर्वांत जास्त भाविक येतात. या दरवाजावर एकच पुरूष पोलिस कर्मचारी ड्युटीवर. एक महिला व एक पुरूष कर्मचारी या दरवाजावर गैरहजर होते. महिलांची तपासणी करणारी केबिन या दरवाजात नव्हती. ही केबिन गरूड मंडपाजवळ ठेवली आहे. विद्यापीठ हायस्कूलजवळ गरूड मंडपाजवळ मात्र दोन पोलिस आणि तीन महिला कर्मचारी बंदोबस्तास होत्या. दोघी महिला कर्मचारी गप्पा मारत होत्या. एक पोलिस उभा होता तर दुसरा पोलिस खुर्चीवर बसून. कुणाचीही तपासणी केली जात नव्हती.
पूर्व दरवाजावर मेटल डिटेक्टरच्या दोन्ही बाजूला चपलांचे ढीग होते. या ठिकाणीही एक महिला व दोन पुरूष कर्मचारी बसून होते. दरवाजाच्या दोन्ही बाजूला असलेल्या सिमेंटच्या बंकरमध्ये पिशव्या ठेवल्या आहेत. यापूर्वी पोलिसांकडे कार्बाइडसारखी गन असायची. पण आता कोणत्याच कर्मचाऱ्यांकडे अशी गन दिसत नाही. घाटी दरवाजाजवळ बंदोबस्तासाठी एकमेव पोलिस होता.
चारही दरवाजावर कोणत्याही भाविकांच्या पिशव्यांची तपासणी केली जात नव्हती. कुणावरही संशय व्यक्त केला जात नव्हता. केवळ ड्युटीवर आहे हे दाखवण्यासाठी पोलिस बंदोबस्त असल्याचे चित्र होते. काही वेळा पोलिस मोबाइलवर गेम खेळत बसतात. सलग आठ तासांच्या ड्युटीमुळे पोलिस कंटाळत असल्याने व नियमित तेच काम असल्याने बंदोबस्तात शैथिल्य निर्माण झाले आहे.
मोबाइल अॅप डाउनलोड करा आणि राहा अपडेट
