कोल्हापूर : गेल्या ३५ वर्षांपासून दररोज तंबाखूची मशेरी लावण्याच्या सवयीमुळे वयाच्या ७२ व्या वर्षी गंगुबाई घेवडे अन्ननलिकेच्या कॅन्सरने त्रस्त झाल्या. कॅन्सरमुळे झालेला हा त्रास सहनशक्तीच्या पलीकडचा होता. तीन महिन्यांपूर्वी यशस्वी उपचार झाल्यानंतर गंगुबाई यांनी आता गावात व्यसनमुक्तीची चळवळ सुरू केली असून, गावातील काही महिलांनी मशेरी लावणे सोडले आहे. गंगुबाई घेवडे यांची कॅन्सरनंतर गाव व्यसनमुक्त करण्यासाठी उभारलेल्या चळवळीची ही कहाणी इतरांसाठीही विचार करायला लावणारी आहे.
कागलच्या गंगुबाई याचं जीवनच खेड्यात गेलेलं. रोज सकाळी, संध्याकाळी तसेच आजूबाजूच्या महिलांबरोबर गप्पा मारताना तर कधी तलफ आली की, तंबाखूची मशेरी लावण्याची सवय त्यांना वयाच्या ३७ व्या वर्षापासून लागली. मुलगा, सून नेहमीच हे व्यसन सोडण्यासाठी प्रयत्न करत, पण सवय इतकी जडलेली की, ती सोडणे त्यांना कठीण झाले. दररोज मशेरी लावल्यामुळे वयाच्या ७२ व्या वर्षी अचानक अन्न गिळणे अशक्य होऊ लागले. काही दिवसांनंतर तर पाणीही गिळणे कठीण झाले. त्यावेळी डॉक्टरांनी तपासणी केली, काही चाचण्या केल्यानंतर त्यांना अन्ननलिकेचा कॅन्सर झाल्याचे निदान आले. व्यसनामुळे जीवन-मरणाच्या उंबरठ्यावर आणून ठेवल्याचं भान आलं. त्यानंतर सुरू झाले औषधोपचार. आजारामुळे त्यांचं वजन तब्बल पंधरा किलोनं कमी झालं. अखेर शस्त्रक्रिया करण्याचा निर्णय घेतला. मात्र, शस्त्रक्रिया करणे जीवाला धोक्याचे होते. डॉ. सूरज पवार यांच्या सल्ल्यानुसार प्रथम किमोथेरपी आणि रेडिओथेरपी करण्यात आली. त्यानंतर ओपन सर्जरी न करता दुर्बिनीच्या माध्यमातून शस्त्रक्रिया करण्यात आली. यामध्ये कॅन्सर झालेली अन्ननलिका काढून नवीन अन्ननलिका बसविण्यात आली. नव्या तंत्रज्ञानाचा वापर करत अवघ्या तीन तासांत ही शस्त्रक्रिया केली.
अवघ्या तीन-चार महिन्यांपूर्वी केलेल्या शस्त्रक्रियेनंतर गंगुबाईंची तब्येत आता सुधारली आहे. त्यांनी गावातील आसपासच्या महिलांना मशेरीची सवय सोडवायला भाग पाडले असून, सध्या त्या आणि त्यांचा मुलगा गावातील महिलांच्या व्यसनमुक्तीसाठी चळवळ उभारत आहेत. मशेरी लावणाऱ्या गावातील महिलांना त्या कॅन्सरमुळे होणाऱ्या शारीरिक आणि मानसिक वेदना किती भयंकर असतात ते पटवून देण्याचा प्रयत्न करतात. ह्या आजारापेक्षा हे व्यसन सोडलेले चांगले असे त्या आवर्जून सांगतात.
पवार टेक्निक
अन्ननलिकेच्या कॅन्सरवर आधुनिक व नवीन पद्धतीने दुर्बिनीद्वारे शस्त्रक्रिया करण्यात येत असल्यामुळे त्याचा रुग्णांचा फायदा होत आहे. 'थोरॅकोस्कोपिक इसोफॅजेक्टॉमी इन डॉरसोलॅटरल पोझिशन -द पवार टेक्निक' हे त्यांचे विकसित टेक्निक जगभर मान्यप्राप्त झाले आहे. अन्ननलिकेच्या कॅन्सरवर आधुनिक शस्त्रक्रिया जगात प्रथमच डॉ. सूरज पवार यांनी विकसित केली असून, जगभरात याच पद्धतीने शस्त्रक्रिया होत आहेत.
कॅन्सर झाल्यानंतर खूप त्रास सहन करावा लागला. हा त्रास पाहूनच मुलीसह गल्लीतील अनेक महिलांनी मशेरी लावणे सोडले आहे. प्रत्येकाला हे व्यसन सोडण्यासाठी समजून सांगण्याचा प्रयत्न करत आहे.
गंगुबाई घेवडे, रुग्ण
मोबाइल अॅप डाउनलोड करा आणि राहा अपडेट
