'भक्तांनी दिलेले दागिने, साड्या घेऊन स्वत:चे धन जमवणाऱ्या पुजाऱ्यांनी धर्माच्या नावावर दुकानदारी मांडली आहे. ज्यांना धर्माचा अर्थच माहीत नाही, ते धर्माच्या गोष्टी करत आहेत. ही विसंगती हाणून पाडण्यासाठी पुजाऱ्यांनाच गाभाऱ्यातून बाहेर काढण्याची गरज आहे' असे प्रतिपादन अॅड. निलिमा वर्तक यांनी केले. गाभाऱ्यात समानता असावी या आशयाच्या कायद्याची अंमलबजावणी करावी या याचिकेसंदर्भात युक्तिवाद करणाऱ्या अॅड. वर्तक यांनी गाभाऱ्यातील महिला प्रवेशाचा वाद आणि पुजाऱ्यांचा धार्मिक देखावा यावर रोखठोक मत व्यक्त केले. 'आई अंबाबाई मंदिर पुजारी हटाव संघर्ष समितीच्यावतीने पुजारी हटाव' या मोहिमेतंर्गत आयोजित करण्यात आलेल्या व्याख्यानात त्या बोलत होत्या. अध्यक्षस्थानी उमा पानसरे होत्या.
अॅड. वर्तक म्हणाल्या, 'अंधश्रद्धा निर्मूलनाबाबत ज्यांनी आयुष्य वेचले त्यांच्या अभिव्यती स्वातंत्र्यावर गदा आणणारी परिस्थिती निर्माण झाली आहे. धर्म म्हणजे काय हेच ज्यांना माहिती नाही त्यांच्या हातात धर्माचे अधिकार देणे योग्य नाही. एकीकडे लोकांच्या मनात अंधश्रद्धा निर्माण करायची आणि दुसरीकडे ध र्माची दुकानदारी मांडायची हा पुजाऱ्यांचा कावेबाजपणा आहे. भारतीय स्त्री ही कणखर, बुद्धीमान आहे. तिच्या चाणाक्षपणाचे अनेक दाखले इतिहासाच्या पानापानात आहेत. स्वातंत्रलढ्यात स्त्री पुरूषांच्या बरोबरीने लढली आहे. पौराणिक कथांमध्ये स्त्रीच्या सक्षमपणाची अनेक उदाहरणे दिसतात. मात्र स्त्री ही कपटी, घर फोडणारी, कलह करणारी अशीच प्रतिमा जाणीवपूर्वक रंगवली जाते. सोशल मीडियावरही स्त्रीचे चारित्र्यहनन केले जाते. मालिकांमध्ये स्त्रीच्या व्यक्तिमत्वाची काळी बाजू दाखवली जाते. हे पुरूषप्रधान मक्तेदारीचे अपत्य आहे.'
अॅड. वर्तक म्हणाल्या, 'आपल्या संविधानाचे मूळ हे विचारात आहे. समानतेचा विचार संविधानातून दिला आहे. मात्र संविधानातील नियम आपल्या सोयीने वापरणाऱ्यांची संख्या वाढत आहे. शाहू महाराजांनी संविधानातील समानतेच्या विचाराला कोल्हापुरात अर्थ दिला. समानतेचे बीज असलेल्या कोल्हापुरातच महिलांना मंदिरातील गाभाराप्रवेशासाठी संघर्ष करायला लागावा हे चुकीचे आहे.'
यावेळी डॉ. सुभाष देसाई म्हणाले, 'आजच्या सामाजिक विषमतेबाबत तरूणाईमध्ये असलेली जाणीव प्रगल्भ होत आहे. त्यामुळे भविष्यात तरूणपिढी या विरोधात नक्कीच आवाज उठवेल.'
अंबाबाई मूर्तीचे मूळ स्वरूप महापालिका प्रशासन व देवस्थान यांनी तातडीने घडवावे, दिशादर्शक फलकांवर अंबाबाई असा उल्लेख करावा, गाभाऱ्यात समानता जपावी आणि कोल्हापूर मुंबई मार्गावरील महालक्ष्मी एक्स्प्रेस या रेल्वेचे नाव अंबाबाई एक्स्प्रेस असे करावे असे ठराव यावेळी मांडण्यात आले. यावेळी सीमा पाटील, सुनीता पाटील, डॉ. जयश्री चव्हाण, शैलजा भोसले, सुनीता तळेकर आदी उपस्थित होत्या.
मोबाइल अॅप डाउनलोड करा आणि राहा अपडेट
