अंबाबाई मंदिराच्या गाभाऱ्यातील प्रवेशावेळी भूमाता ब्रिगेडच्या अध्यक्षा तृप्ती देसाई यांच्यासह इतर महिलांना बुधवारी (ता. १३) मारहाण आणि धक्काबुक्की करणाऱ्या सातजणांवर शनिवारी (ता. १६) जुना राजवाडा पोलिसांनी गुन्हे दाखल केले. यामध्ये पाच श्रीपूजकांसह इतर दोघांचा समावेश आहे. गुन्हे दाखल केलेल्यांमध्ये केदार मुनीश्वर, श्रीश मुनीश्वर, चैतन्य अष्टेकर, मयूर मुनीश्वर, निखिल शानभाग या श्रीपूजकांसह किसन कल्याणकर आणि जयकुमार शिंदे या दोघांचा समावेश आहे. सीसीटीव्ही फुटेजमध्ये देसाई यांना मारहाण केल्याचे स्पष्ट दिसून आले आहे.
दरम्यान, या प्रकरणाचा तपास करणारे तपास अधिकारी डॉ. दिनेश बारी यांचा अहवाल अद्याप आलेला नाही. पोलिसांनीच स्वतःहून फिर्यादी होऊन गुन्हे दाखल केले आहेत. लवकरच या प्रकरणातील संशयितांची चौकशी होणार आहे.
भूमाता ब्रिगेडच्या अध्यक्षा तृप्ती देसाई यांना अंबाबाई मंदिराच्या गाभाऱ्यात प्रवेश देण्यावरून बुधवारी (ता. १३) मंदिरात मोठा गोंधळ उडाला होता. देसाई यांना रोखून मारहाण करण्याबरोबरच अश्लील शिवीगाळही करण्यात आली होती. याबाबत पोलिसांनी तातडीने पावले उचलत संबंधितांवर गुन्हे दाखल केले. गाभारा प्रवेशासाठी विरोध करणे, हळदी-कुंकू आणि शाई फेकणे, जीवितास धोका निर्माण करणे, बंदोबस्ताला असलेल्या पोलिसांना धक्काबुक्की करून कामात अडथळा निर्माण करणे असे आरोप संबंधितांवर लावले आहेत. पोलिस उपनिरीक्षक अमित मस्के यांनी याबाबतची फिर्याद दाखल केली.
तृप्ती देसाई यांनी साडी परिधान करूनच गाभाऱ्यात प्रवेश करावा, असा आग्रह श्रीपूजकांसह काही संघटनांच्या कार्यकर्त्यांनी धरला होता. देसाई या पोलिस बंदोबस्तात गाभारा प्रवेश करताना श्रीपूजकांसह काहीजणांनी त्यांना प्रवेश करण्यापासून रोखण्याचा प्रयत्न केला होता. यावेळी त्यांना धक्काबुक्की करून मारहाण झाली. तसेच त्यांच्यावर तिखटही फेकण्यात आले. काहीजणांनी बंदोबस्तास असलेल्या पोलिस कर्मचाऱ्यांना रोखण्याचा प्रयत्न केला होता. या सर्व गदारोळात देसाई बेशुद्ध पडल्याने त्यांना तातडीने उपचारासाठी खासगी हॉस्पिटलमध्ये दाखल करावे लागले होते.
महिलांना मंदिराच्या गाभाऱ्यात प्रवेश देण्याचा निर्णय उच्च न्यायालयाने देऊनही प्रवेश करणाऱ्या महिलांना मारहाण झाल्याने पोलिसांनी स्वतःहून संबंधितांवर गुन्हे दाखल करून कारवाई करावी, असा आग्रह देसाई यांनी धरला होता. पोलिसांनी कारवाई न केल्यास स्वतः गुन्हे दाखल करण्याबरोबरच मंत्रालयासमोर उपोषणाचा इशाराही दिला होता. या प्रकरणाच्या तपासासाठी पोलिस अधीक्षक प्रदीप देशपांडे यांनी अतिरिक्त पोलिस अधीक्षक डॉ. बारी यांची नियुक्ती केली होती. बारी यांच्याकडून सीसीटीव्ही फुटेजची तपासणी सुरू आहे. दरम्यान, जुना राजवाडा पोलिसांनी घटनेचे गाभीर्य लक्षात घेऊन तातडीने शनिवारी सकाळीच संशयितांवर गुन्हे दाखल केले.
दोषींवर कडक कारवाई
तपास अधिकारी बारी यांच्याकडून सीसीटीव्ही फुटेजची तपासणी सुरू आहे. हा अहवाल लवकरच मिळेल. या प्रकरणाची गंभीर दखल पोलिस प्रशासनाने घेतली आहे. दोषींवर कडक कारवाई करण्यात येणार आहे.
मोबाइल अॅप डाउनलोड करा आणि राहा अपडेट
