म. टा. प्रतिनिधी, कोल्हापूर
श्री अंबाबाई मंदिराच्या गाभाऱ्यात जाऊन दर्शन घेण्यासाठी येणाऱ्या भूमाता बिग्रेडच्या संस्थापक, अध्यक्षा तृप्ती देसाई यांच्या विजयी रॅलीला हिंदुत्ववादी संघटना व अंबाबाई भाविक प्रतिरॅली काढून प्रत्युत्तर देणार आहेत. यामुळे संघर्षाची चिन्हे आहेत. सोमवारी गाभारा दर्शनाचा पायंडा पाडला असताना देसाई विजयी रॅली काढून स्टंट करत आहेत, असा आरोप भाविकांनी केला आहे. दरम्यान हिंदुत्वावादी संघटना व अंबाबाई भाविकांच्या रॅलीला पोलिसांनी परवानगी नाकारली आहे. पोलिसांनी जमावबंदीचा आदेश लागू केला आहे. देसाई बुधवारी दुपारी चार वाजता कोल्हापुरात येणार आहेत.
मंदिराच्या गाभारा प्रश्नांवर गेले पंधरा दिवस शहर ढवळून निघाले आहे. सामाजिक कार्यकर्त्या अनुराधा भोसले यांच्यासह महिला गाभाऱ्यात प्रवेश घेण्यासाठी गेल्या असता त्यांना प्रवेश रोखला होता. दरम्यान देसाई १३ एप्रिलला दर्शन घेण्यासाठी येत असल्याचे जिल्हा प्रशासनाला कळवले होते. या पार्श्वभूमीवर सोमवारी येथील विठ्ठल मंदिरात बैठक आयोजित केली होती. यावेळी दोन गटांत आरोप-प्रत्यारोपाच्या फैरी झडल्या होत्या. गाभाऱ्यात स्त्री-पुरूष भेदभाव मानता येणार नाही, असे जिल्हा प्रशासनाने स्पष्ट केल्याने सायंकाळी सोमवारी दोन्ही गटांनी प्रवेशाचा निर्णय सामोपाचाराने घेतला.
सोमवारी सायंकाळी सात महिलांनी गाभाऱ्यात दर्शन घेऊन पायंडा पाडला. त्याचे सर्वत्र स्वागत होत आहे. या पार्श्वभूमीवर बुधवारी देसाई यांच्या नेतृत्वाखाली भूमाता ब्रिगेडच्या महिला ताराराणी चौकातून रॅली काढणार आहे. रॅलीनेच त्या गाभाऱ्यात जाऊन दर्शन घेणार आहेत. दरम्यान, हा प्रश्न सामोपचाराने घेतला असताना देसाई रॅली काढून कसला विजयोत्सव साजरा करणार आहेत? असा सवाल भाविकांकडून केला जात आहे. या पार्श्वभूमीवर जुना राजवाडा पोलिस ठाण्यात हिंदूत्ववादी कार्यकर्ते व अंबाबाई भाविकांनी प्रतिरॅली काढण्यासाठी परवानगी मागितली आहे. याला शहर पोलिस उप अधीक्षक भारतकुमार राणे यांनी परवानगी नाकारली. देसाई यांनी विजयी रॅली काढल्यास त्याला विरोध करण्यासाठी ताराराणी चौकातूनच रॅली काढली जाईल, असा इशारा निवास साळोखे, रामभाऊ चव्हाण, महेश उरसाल यांनी दिला आहे.
भूमाता बिग्रेडच्या महिला कार्यकर्त्या ताराराणी पुतळ्याला अभिवादन करून अंबाबाई दर्शनाला जाणार आहेत. आम्ही महिला एकत्रित जाणार आहोत. ही रॅली नाही. त्यासाठी पोलिसांच्या परवानगीची आवश्यकता नाही.
तृप्ती देसाई, अध्यक्ष, भूमाता
दर्शनासाठी विशिष्ट वेळ....
गाभाऱ्यामध्ये कायद्याने स्त्री पुरूष समानता तत्व लागू करण्यासाठी अंबाबाई मंदिरातील गाभाऱ्यात दिवसातून विशिष्ट वेळेत दर्शन देण्यासंबधी जिल्हा प्रशासन अनुकूल आहे, अशी माहिती जिल्हाधिकारी अमित सैनी यांनी पत्रकारांशी बोलताना देणार आहे. दरम्यान भूमाता ब्रिगेडचा संस्थापक अध्यक्षा तृप्ती देसाई गाभाऱ्यात विजय रॅलीने दर्शन घेणार असल्याने मंदिर परिसरात तंग झाले आहे. कायदा व सुव्यवस्था बिघडू नये म्हणून पोलिस अधिकाऱ्यांच्यात रात्री उशिरापर्यंत बैठका सुरू होत्या.
सोमवारी कोल्हापुरातील महिलांसाठी अंबाबाईचा गाभारा खुला करण्यात आल्यावर सात महिलांनी दर्शन घेतले. या घटनेनंतर यापुढे मंदिरातील गाभाऱ्यात कोणत्याही प्रकारचा स्त्री पुरूष भेदभाव पाळता येणार नाही असे जिल्हा प्रशासनाने स्पष्ट केले आहे. मंदिरात दर्शन घेण्यासाठी येणाऱ्या महिलांना ड्रेसकोड असावा याबाबत माहिती नसल्याचे जिल्हाधिकाऱ्यांनी सांगितले. सोमवारी महिलांनी दर्शन घेतले असल्याने तृप्ती देसाई यांना दर्शनासाठी कोणतीही आडकाठी होणार नसल्याचे त्यांनी सांगितले.
महिला भाविकांच्या आग्रहावरून गाभाऱ्यात दर्शनासाठी जिल्हा प्रशासन प्रयत्नशील आहे. गाभाऱ्यातील स्त्री पुरूष समानतेच्या तत्वाला श्रीपूजकांनी संमती दर्शवली आहे. मंदिरातील आर्द्रता, मौल्यवान दागिन्यांची सुरक्षितता व होणारी गर्दी लक्षात घेऊन महिलांना दर्शनासाठी विशिष्ट वेळ ठेवण्याबाबत जिल्हा प्रशासन विचार करत आहे. ही वेळ सकाळच्या सत्रात ठेवायची की सायंकाळच्या सत्रात ठेवायची याबाबत श्रीपूजक, पोलिस प्रशासनांशी चर्चा करून निश्चित केली जाणार आहे. महिला दर्शनाबाबत कोल्हापुरची प्रतिमा चांगली रहावी. चुकीचा संदेश जाऊ नये याबाबत प्रशासन प्रयत्नशील आहे.
दरम्यान तृप्ती देसाई यांच्या गाभाऱ्यातील दर्शनाच्यावेळी कायदा व सुव्यवस्थेची परिस्थिती उद्भवू नये म्हणून मंगळवारी सकाळी जिल्हाधिकारी सैनी, पोलिस अधीक्षक प्रदीप देशपांडे व श्रीपूजक प्रतिनिधींशी स्वतंत्रपणे चर्चा केली. देसाई या विजयी रॅलीने कोल्हापुरात येणार असल्याने गाभारा प्रवेश विरोधी कृती समितीने विरोध करण्याचा निर्णय घेतला आहे. त्यादृष्टीने मंगळवारी रात्री कृती समिती, हिंदू जनजागरण समिती, बजरंग दलाचे कार्यकर्ते जुना राजवाडा पोलिस ठाण्यात पोलिस कर्मचाऱ्यांशी चर्चा करण्यासाठी थांबले होते.
तृप्ती देसाई यांच्या ड्रेसकोडमध्ये वादंग
अंबाबाई दर्शनासाठी तृप्ती देसाई यांच्याशी जुना राजवाडा पोलिस ठाण्याचे निरीक्षक अनिल देशमुख यांच्याशी संपर्क साधला. देवीच्या दर्शनासाठी साडी परिधान करून येण्याची विनंती केली. पण दर्शनासाठी आपण ड्रेसकोड पाळणार नसल्याचे त्यांनी स्पष्ट केले. आम्ही भाविक म्हणून दर्शनासाठी येणार आहे. अतिशय पवित्र मनाने दर्शन घेणार आहे. त्यामुळे साडी हा ड्रेसकोड न पाळता सलवार कमीज या भारतीय वेषात येणार असल्याचे त्यांनी पोलिसांना सांगितले. मी जीन्स घालून आले असते तर अडवू शकता पण मी भारतीय पेहरावात येणार असल्याचे त्यांनी सांगितले.
महिलांना सकाळची वेळ?
आर्द्रता, दागिन्यांची सुरक्षितता व गर्दी लक्षात घेऊन महिलांना दर्शनासाठी सकाळची वेळ निश्चित होण्याची शक्यता आहे. सकाळी वातावरण थंड असल्याने आर्द्रता कमी असते. सकाळी देवीला मौल्यवान दागिने नसल्याने सुरक्षिततेचा प्रश्नही मागे पडणार आहे. सकाळी गर्दी कमी असल्याने चेंगराचेंगरीचा होण्याची शक्यता कमी आहे. आरती, अभिषेक, विधी यांचा विचार करून सकाळची वेळ निश्चित होण्याची शक्यता आहे.
मोबाइल अॅप डाउनलोड करा आणि राहा अपडेट
