चैत्रांगणाच्या रांगोळीने अंगणे बहरली

April 11, 2016, 10:36 am

≪ Previous: पाण्याच्या गाडीला क्रॉसिंगचा अडथळा

म. टा. वृत्तसेवा, सातारा
चैत्रांगणाच्या सुंदर रांगोळीने सातारा शहरातील अंगणे बहरू लागली आहेत. चैत्र गौरीचे महिन्याभरासाठी घरोघरी आगमन होते. तिच्या स्वागतासाठी घरापुढील अंगण सारवून त्यावर रांगोळी काढली जाते. या वैशिष्ट्यपूर्ण रांगोळीला चैत्रांगण म्हणतात.
चैत्र महिना रखरखत्या उन्हात एक नवा बहार घेऊन येतो. पान गळती होऊन आलेली चैत्रपालवी मनाला सुखावते लाडक्या माहेरवाशि‍णीच्या रुपाने चैत्र गौरीचे महिन्याभरासाठी घरोघरी आगमन होते. पूजेमधील अन्नपूर्णा निराळ्या आसनावर बसवून तिची मनोभावे पूजा केली जाते. तिला गोड नैवेद्य दाखवून नातेवाईक, आप्तेष्ट, आजुबाजूच्या सुवासिनींना हळदीकुंकवासाठी निमंत्रण केले जाते. अन्नपूर्णेला पार्वतीचा अवतार मानले जाते. तिचा वास महिनाभर घरी असतो. त्यामुळे तिच्या स्वागतासाठी घरापुढील अंगण सारवून त्यावर रांगोळी काढली जाते. त्या वैशिष्ट्यपूर्ण रांगोळीला चैत्रांगण म्हणतात.
अशी शुभ चिन्हे
या रांगोळीत पार्वतीच्या रुपाला शोभेल, अशी तिची शस्त्रे, शंख, चक्र, गदा, पद्म. तिचे वाहने, गाय, हत्ती, कासव, नाग, गरूड. सौभाग्याची लेणी, फणी, करंडा, आरसा, मंगळसूत्र व सुवासिनींच्या ओटीचे ताट. तुळशी वृंदावन, स्वस्तिक, आंबा, श्रीफळ, उंबर-पिंपळ वगैरे पूजनीय वृक्ष ही हिंदू संस्कृतीची प्रतीके रांगोळीत काढली जातात यालाच चैत्रांगण म्हटले जाते. रांगोळीत गणपतीही काढला जातो. ही रांगोळी अतिशय सुरेख दिसते.

Latest Images