महापालिका शाळेत शिकणाऱ्या विद्यार्थ्यावर शिक्षण मंडळाकडून होणाऱ्या खर्चात यावर्षी तीन हजार रुपयांची वाढ करण्यात आली आहे. महापालिकेच्या शाळेत सेमी इंग्लिश, ई लर्निंग सुविधा, विद्यार्थ्यांसाठी गणवेश, निवासी शिबिर, आंतरशालेय क्रीडा स्पर्धा अशा विविध शैक्षणिक उपक्रमांसाठी जादा बजेट निश्चित करण्यात आले आहे.
गेल्या शैक्षणिक वर्षात शिक्षणावर होणारा खर्च हा ३७ हजार रुपेय होता. यंदा शैक्षणिक उपक्रम, शिक्षकांचे वेतन व भौतिक सुविधांसाठी मिळून ४२ कोटी ८३ लाख ६८ हजार ४७० रुपये खर्च अपेक्षित आहे. प्रति विद्यार्थ्यावर होणारा सरासरी खर्च ४० हजार रुपये अपेक्षित आहे. शैक्षणिक वर्षात २५ शाळेत ई लर्निग प्रोजेक्टर पुरविण्याचा तसेच चार ठिकाणी सेमी इंग्रजी स्कूल सुरू करण्याचे नियोजन आहे.
महापालिकेच्या प्राथमिक शिक्षण समितीतर्फे शहरात ५९ शाळा सुरू आहेत. एकुण विद्यार्थ्यांची संख्या ९ हजार ५५१ आहे. महापालिकेच्या नेहरूनगर, जरगनगर, वीर कक्कय विद्यालय, टेंबलाईवाडी विद्यालय, फुलेवाडी विद्याल. लोणार वसाहत विद्यालय, प्रिन्स शिवाजी विद्यालय येथे सेमी इंग्रजी शिक्षणाची सुविधा आहे. सहा शाळांत ई लर्निंग सुविधा आहे. येत्या शैक्षणिक वर्षात आणखी २५ शाळांत ई लर्निंग प्रोजेक्टर पुरविण्यात येणार आहेत. विविध शाळांत २५ कम्प्युटर देण्यात येतील. सामान्य कुटुंबांतील मुलांसह नोकरदार आणि उच्चभ्रू कुटुंबातील मुलांनाही शाळांकडे आकर्षित करण्यासाठी शिक्षण समिती प्रयत्नशील आहे.
शिक्षण खर्चात तीन हजारांनी वाढ
२०१५-१६ या आर्थिक वर्षामध्ये शिक्षणावर ३६ कोटी ७९ लाख ७ हजार ३०३ रुपये खर्च झाला होता. शिक्षणासाठी खर्ची पडलेली एकूण रक्कम आणि विद्यार्थी संख्या पाहता सरासरी प्रति विद्यार्थ्यावर ३७,००० रुपये खर्च झाला. यावर्षी प्रशासनाने शिक्षणावर होणाऱ्या खर्चासाठी ४२ कोटी ८३ लाख ६८ हजार ४७० रुपयांची तरतूद केली. शिक्षणासाठीचे बजेट आणि विद्यार्थीसंख्या पाहिली तर प्रत्येक विद्यार्थ्यासाठी सरासरी ४० हजार रुपये खर्च होणार आहे. दरम्यान, महापालिका शाळेतील विद्यार्थ्याचे एकत्रित सांस्कृतिक कार्यक्रम, चार दिवस निवासी शिबिराचे आयोजन होणार आहे. २६ जानेवारी २०१७ रोजी सांस्कृतिक कार्यक्रम होईल. विद्यार्थ्यांसाठी आंतरशालेय क्रीडा स्पर्धा भरविण्यात येणार आहे. शिक्षकांना तज्ज्ञ शिक्षकांमार्फत प्रशिक्षण देण्याचेही नियोजन आहे.
चार सेमी इंग्लिश स्कूल
येत्या जून महिन्यापासून महापालिकेच्या आणखी चार शाळेत सेमी इंग्रजी स्कूल सुरू होतील. यात भाऊसाहेब महागावकर विद्यालय, पद्माराजे विद्यालय, बॅरीस्टर बाळासाहेब खर्डेकर विद्यालय आणि संभाजी विद्यालय, संभाजीनगर येथे सेमी इंग्रजी सुरू करण्याच्या निर्णयावर शिक्कामोर्तब झाला आहे.
मुलांना अधिकाधिक सुविधा देण्याचा प्रयत्न असल्याने यंदा पहिलीचा पट निश्चित वाढेल. विद्यार्थ्याना वैयक्तिक मार्गदर्शन केले जाते. सर्व स्तरावर सकारात्मक प्रतिसाद मिळत आहे. शाळा सक्षम बनत आहेत. कमकुवत शाळांची संख्या मोजकी राहिली आहे. त्यांनाही सक्षम बनवून सर्वच शाळांचा दर्जा उंचाविण्याचे नियोजन आहे.
प्रतिभा सुर्वे, प्रशासनाधिकारी, प्राथमिक शिक्षण समिती
मोबाइल अॅप डाउनलोड करा आणि राहा अपडेट
