'शहरातील कचऱ्याच्या समस्येवर मात करण्यासाठी प्रत्येक प्रभागात कचऱ्यापासून खत निर्मिती प्रकल्प सुरू करावेत' अशी सूचना पालकमंत्री चंद्रकांत पाटील यांनी केली. एकटी व अवनि संस्थेच्यावतीने लक्ष्मीपुरीतील दलाल मार्केट परिसरातील कचरा वेचक महिलांना ओळखपत्र व पर्यापूरणपूरक साहित्याच्या वाटपाचा कार्यक्रम झाला. यावेळी पालकमंत्र्यांनी आपली भूमिका स्पष्ट केली.
पालकमंत्री पाटील म्हणाले, 'कचरा वेचक महिला या स्वच्छतेच्या दूत आहेत. शहराची स्वच्छता राखणाऱ्या महिलांना आरोग्य विषयक सुविधा पुरवाव्यात. प्रत्येक प्रभागात कचऱ्यापासून खत निर्मितीचा प्रकल्प सुरू केला तर रोजगार निर्मिती होईल. नगरसेवकांनी प्रत्येक प्रभागात विकेंद्रित घनकचरा केंद्रे उभी केल्यास महिलांना रोजगार मिळू शकेल. महापालिकेने प्रत्येक प्रभागात घनकचरा केंद्रे उभी करण्यासाठी पुढाकार घ्यावा. कचऱ्यापासून खत निर्मितीचा प्रकल्प यशस्वी झाल्यास शेकडो महिलांना रोजगाराच्या संधी मिळतील.'
एकटी संस्थेकडील रात्र निवारा शेड अपुरे असल्याच्या प्रश्नाकडे संस्थेच्या पदाधिकाऱ्यांनी लक्ष वेधले होते. यासंदर्भात पालकमंत्री म्हणाले, 'रात्र निवारासाठी महापालिकेने एखादा भूखंड उपलब्ध करून द्यावा. त्या जागेवर बांधण्यात येणाऱ्या रात्र निवाऱ्यासाठी आमदार निधीतून रक्कम उपलब्ध केली जाईल. वीटभट्टीवरील मुलांच्या शिक्षणाकडे लक्ष देण्याची आवश्यकता आहे. या मुलांना शाळेत जाण्या-येण्यासाठी चाळीस बस देण्यासाठी प्रयत्न सुरू आहेत. शैक्षणिक वर्षाच्या प्रारंभी या बस उपलब्ध होतील.'
यावेळी पालकमंत्री पाटील यांच्या हस्ते कचरा वेचक महिलांना हातमोजे, गमबूट, बकेटसह सुरक्षेच्या साहित्याचे वाटप करण्यात आले. जिल्हाधिकारी अमितकुमार सैनी, आयुक्त पी.शिवशंकर, डॉ. सूरज पवार, रेश्मा पवार आदींच्या उपस्थितीत कार्यक्रम झाला. 'अवनि' संस्थेच्या अध्यक्षा अनुराधा भोसले, सचिव संजय पाटील, नगरसेविका अश्विनी बारामते, तनुजा शिपूरकर आदी उपस्थित होते.
मोबाइल अॅप डाउनलोड करा आणि राहा अपडेट
