विमाच्या ३५ कोटींसाठी कामगाराचा खून करणाऱ्या अमोल जयवंत पोवार व त्यांचा भाऊ विनायक यांच्या आर्थिक व्यवहाराचा तपास पोलिसांनी सुरू केला आहे. अमोलकडे पैशासाठी तगादा लावलेल्या दोन नगरसेवकांसह आठ ते दहा खासगी सावकारांकडे चौकशी करण्यात येणार आहे. दरम्यान, अमोलकडून मलिदा मिळवलेल्या दोन नगरसेवकांचे धाबे दणाणले आहेत. महापालिका वर्तुळात याची जोरदार चर्चा सुरू आहे.
रमेश नाईक या सेंट्रिंग कामगाराचा खून करून त्याचा मृतदेह पेटवून दिल्याप्रकरणी स्थानिक गुन्हे अन्वेषण विभागाने या दोघा भावांना अटक केली आहे. साने गुरूजी परिसरात अमोलचे दोन गृहप्रकल्प सुरू होणार होते. एका प्रकल्पात ओढा असल्याने तो वळवण्यासाठी एका नगरसेवकाने ३५ लाखाची मागणी केली होती. त्याने अमोलला व्याजाने पैसेही दिले होते. दुसऱ्या नगरसेवकाने त्याच्या प्रकल्पांबाबत तक्रारी करून त्याच्याकडे पैशाची मागणी केली होती. या दोन्ही नगरसेवकांचे पैसे अमोलने चुकते केले होते. हे पैसे चुकते करण्यासाठी त्याने खासगी सावकारांकडून १५ दिवसांला दहा टक्के दराने व मासिक २० टक्के दराने लाखो रूपये व्याजाने घेतले होते. वार्षिक २४० टक्के व्याजाने पैसे घेतले असल्याने अमोलचा स्वतःच्याच मृत्युचा बनाव करून ३५ कोटी विमा मिळवण्याचा इरादा होता.
त्यातच खासगी सावकारांचा तगादा वाढला होता. मंगळवार पेठ, शिवाजी पेठ, रंकाळा टॉवर येथील खासगी सावकार त्याच्यामागे लागले होते. दोन नगरसेवकांना दिलेले पैसे, बांधकाम परवाना मंजूर करण्यासाठी महापालिका अधिकाऱ्यांची टक्केवारी या प्रकाराने अमोल त्रस्त झाला होता. अमोलचे आर्थिक गणित पूर्णपणे कोलमोडल्याने त्याने नाईकचा खून करून स्वतःच्या मृत्युचा बनाव रचला. अमोल व विनायकने खुनाची कबुली दिली असली तरी पुरावा गोळा करण्यासाठी बँका, पतसंस्था, खासगी सावकारांची किती देणी होती? याचा तपास पोलिस करणार आहेत. बँकांची पासबुके, कर्जाची कागदपत्रे, जमिनीचे व्यवहार व रोख रकमा कुणाला दिल्या याचे पुरावे गोळा करण्यासाठी पोलिसांनी कंबर कसली आहे.
दोघांना नऊ दिवस पोलिस कोठडी
आजरा ः दरम्यान या दोघा भावांना शुक्रवारी आजरा प्रथम वर्ग न्यायदंडाधिकारी एस. यू. महादार यांच्यासमोर हजर केले असता त्यांना १९ मार्चपर्यंत पोलिस कोठडी सुनावण्यात आली. या दोघांना कोल्हापूरहून दुपारी दोनच्या सुमारास आजरा पोलिस ठाण्यात व नंतर तीनच्या सुमारास येथील न्यायालयात हजर करण्यात आले. सरकारी पक्षातर्फे अर्चना पाटील यांनी तर आरोपींच्या वतीने धनंजय देसाई यांनी बाजू मांडली.
मोबाइल अॅप डाउनलोड करा आणि राहा अपडेट
