कोल्हापुरात आल्यानंतर मला लई भारी वाटलं. मी कोल्हापूरविषयी खूप ऐकलं आहे. इथली माणसं खूप प्रेम करणारी आहेत. कोल्हापुरातल्या महिला तर सगळ्या क्षेत्रांत पुढे असतात. महिला दिनानिमित्ताने महिला एवढ्या मोठ्या संख्येने एकत्र येतात हेच खूप चांगले आहे. एक दिवस आपल्यासाठी साजरा करताना महिला म्हणून मला तुमच्यासोबत अतिशय आनंद झाला...अशा मऱ्हाठमोळ्या शब्दांत अभिनेत्री डिंपल कपाडिया यांनी कोल्हापूरच्या महिलांशी संवाद साधला.
जागतिक महिला दिनानिमित्त महापालिका आणि डॉ. डी. वाय. पाटील कला, क्रीडा ट्रस्ट यांच्यावतीने आयोजित केलेल्या जागर महिला शक्तीचा या कार्यक्रमाच्या उदघाटनप्रसंगी त्या बोलत होत्या. या उपक्रमांतर्गत केशवराव भोसले नाट्यगृहात मंगळवारी सकाळी मिसेस कोल्हापूर आणि मिस युवती या स्पर्धाही डिंपल यांच्या प्रमुख उपस्थितीत सुरू झाल्या. त्यानंतर दिवसभर या स्पर्धांनी महिला दिनाचा दिवस गाजवला.
दरम्यान, सकाळी साडेनऊ वाजता गांधी मैदान येथून महिलांनी रॅली काढून या कार्यकमाला सुरुवात केली. यावेळी महापौर अश्विनी रामाणे, आमदार सतेज पाटील, प्रतिमा पाटील, उपमहापौर शमा मुल्ला, महिला व बालकल्याण समिती सभापती वृषाली कदम यांच्या प्रमुख उपस्थितीत तिरंगी रंगातील फुगे आकाशात सोडून रॅलीचे उदघाटन झाले. यावेळी महिला सुरक्षितता, लेक वाचवा, आम्हालाही स्वातंत्र्य द्या, आदींसह स्वच्छता, पर्यावरण, पाणी वाचवा अशा संदेश फलकांनी रॅलीला सामाजिक कोंदण मिळाले.
कोल्हापुरातील विविध संघटना, महिला संस्था, महिलांचे ग्रुप मोठ्या संख्येने रॅलीत उत्साहाने सहभागी झाले होते. यावेळी अनेक महिलांनी हिरव्या साड्या आणि कोल्हापुरी फेटे असा पारंपरिक पोशाख परिधान करून लक्ष वेधून घेतले. गांधी मैदान, बिनखांबी गणेशमंदिर, महाद्वार रोड यासह प्रमुख मार्गावरून फिरून रॅली केशवराव भोसले नाट्यगृह येथे आली. याठिकाणी विविध क्षेत्रांत उल्लेखनीय कार्य करणाऱ्या महिलांचा डिंपल कपाडिया यांच्या हस्ते सत्कार करण्यात आला.
मोबाइल अॅप डाउनलोड करा आणि राहा अपडेट
