वंचित समाजाच्या समकालीन समस्यांचा संशोधनाच्या माध्यमातून वेध घेणारे व त्यावर उपाय शोधू पाहणारे 'कास्ट डिस्क्रीमिनेशन' आणि 'कास्ट-बेस्ड एक्स्क्लुजन' या दोन महत्त्वपूर्ण इंग्रजी ग्रंथांचा प्रकाशन समारंभ शनिवारी (दि. ५ मार्च) सायंकाळी ५ वाजता येथील दसरा चौकातील शाहू स्मारक भवन येथे होणार आहे. समाजशास्त्रज्ञ डॉ. जगन कराडे यांनी हे ग्रंथ संपादित केले आहेत. जी. बी. अंबपकर यांनी पत्रकार परिषदेत ही माहिती दिली. दोन्ही ग्रंथ नवी दिल्लीच्या रावत प्रकाशनने प्रकाशित केले आहेत. डॉ. कराडे सध्या शिवाजी विद्यापीठाच्या समाजशास्त्र अधिविभागात कार्यरत आहेत.
शनिवारी दिल्लीच्या भारतीय सामाजिक शास्त्रे सोसायटीचे माजी अध्यक्ष आणि माजी कुलगुरू, समाजशास्त्रज्ञ डॉ. उत्तमराव भोईटे यांच्यासह शिवाजी विद्यापीठाचे कुलगुरू डॉ. देवानंद शिंदे यांच्या हस्ते दोन्ही संपादित ग्रंथांचे प्रकाशन होईल. मुंबई विद्यापीठाचे प्रा. डॉ. पी. जी. जोगदंड अध्यक्षस्थानी असतील. यावेळी नागपूरच्या राष्ट्रसंत तुकडोजी महाराज विद्यापीठाचे प्रा. डॉ. विकास जांभूळकर, कोल्हापूरच्या नाईट कॉलेजचे माजी प्राचार्य डॉ. हरिष भालेराव आणि कोल्हापूर जिल्ह्याचे समाजकल्याण अधिकारी विजय गायकवाड यांचे व्याख्यान होईल. कोल्हापुरातील फुले-आंबेडकर विचारधारा संघटना, डॉ. बाबासाहेब आंबेडकर संबोधिनी, सांगलीच्या दीपस्तंभ सांस्कृतिक संघ, श्रावस्ती विहार, डॉ. आंबेडकर नगर मित्र मंडळ आणि बारामतीच्या बहुजन शिक्षक संघटना यांच्या संयुक्त विद्यमाने कार्यक्रम होईल.
पत्रकार परिषदेस प्रा. सिद्धार्थ पद्माकर, अशोक चोकाककर, प्रा. विनय कांबळे, प्रकाश हुलस्वार, रघुनाथ मांडरे उपस्थित होते.
मोबाइल अॅप डाउनलोड करा आणि राहा अपडेट
