पिण्यासाठी पाण्याची कमतरता भासू नये यासाठी शेतीसाठी उपसा बंदी करण्याचे कठोर निर्णय घेतले जात आहेत. अनेक ठिकाणी टंचाई आराखड्यातील उपाययोजना तयार केल्या जात आहेत. तर अनेक भागात तीन-तीन दिवसानंतर पाणीपुरवठा होत आहे. सर्वच ठिकाणी पाण्याची काटकसर सुरू असताना महापालिकेच्या पाणीपुरवठा योजनेतून मात्र रोज लाखो लिटर पिण्याचे पाणी वाया जात आहे. पुईखडीजवळ, आपटेनगर कळंबा रोडवर असलेल्या गळतींमधून पाणी वाहून जाण्यासाठी महापालिकेनेच पाइप तसेच पाण्याचे पाट काढले आहेत. दुरुस्तीऐवजी अवलंबलेल्या तकलादू पर्यायांबाबत नागरिकांतून संताप व्यक्त होत आहे.
शहरातील पाणी समस्या सोडवण्यासाठी शिंगणापूर योजना राबवण्यात आली. २००० साली ११०० मिलीमीटर व्यासाची सिमेंटची प्रिस्टेड पाइप टाकली. मात्र त्या वारंवार फुटू लागल्या. त्यातीलच जुन्या लाइन पुईखडीच्या पायथ्यापासून साळोखेनगर टाकीपर्यंत आहेत. पुईखडीजवळील बाबूराव गॅरेजच्या दारातील गळती इतकी मोठी झाली आहे की पाइपलाइनजवळ मोठा खड्डाच काढून ठेवला आहे. तो ओव्हरफ्लो होत असतो. या पाण्याने रस्ता खराब होऊ नये म्हणून रस्त्याखाली पाइप टाकून पलिकडे पाणी नेले आहे. हे पाणी परिसरातील गटारीतून तसेच पुढे वाहून जाते. हीच स्थिती आपटेनगर जुन्या नाक्याजवळ आहे. मुख्य रस्त्याशेजारीच खड्डा काढला आहे. तिथेही गळतीचे पाणी वाहून नेण्यासाठी पाट काढला आहे. येथील पाणी नव्या पाइपमध्ये सोडले आहे. हे पाणी वाहत जाऊन बुदिहाळकरनगरजवळील ओढ्याजवळ जाते. तिथेही पाइप टाकल्या आहेत.
शिंगणापूर योजनेचे पाणी पुईखडीपासून कावळा नाक्यापर्यंत नेले जाते. दिवस, रात्र पाणी वाहत असते. दुपारी तीन वाजता साळोखेनगर टाकीचा व्हॉल्व्ह बंद केल्यानंतर पाणी पुईखडीच्या दिशेने असलेल्या पाइपमध्ये मोठ्या प्रमाणात राहते आणि ही गळती सुरू होते. सहा ते सात वाजेपर्यंत ही गळती सुरू असते. इतरवेळी त्याचे प्रमाण कमी होते. यामुळे दररोज लाखो लिटर पाणी वाया जात असते. जेव्हा साळोखेनगरपासून पुढील पाइपलाइनचे पाणी काही कारणात्सव बंद केले जाते, त्यावेळीही गळती वाढत असणारच. सध्या अनेक भागात कमी दाबाने पाणीपुरवठा होत आहे. या परिस्थितीत महापालिकेकडून या गळती गांभीर्याने घेतलेल्या नाहीत. या गळती तातडीने दुरुस्त करुन शहरवासियांना पाण्याची टंचाई जाणवू देऊ नये अशा भावना व्यक्त होत आहेत.
क्रॉस कनेक्शन करण्याचे नियोजन
सरकारच्या सुजल भारत योजनेमधून शिंगणापूर योजनेच्या पाइपलाइन नवीन टाकण्याचे काम करण्यात आले. आपटेनगर ते फुलेवाडी रिंगरोडवरील नवीन पाइपलाइन कार्यान्वित केल्या आहेत. पुईखडीपासून साळोखेनगर टाकीपर्यंत एक किलोमीटरची नवीन लाइन टाकून तयार आहे. फक्त त्याचे क्रॉस कनेक्शन करण्यासाठीचे साहित्य मागवले आहे. त्यासाठी दोन ते तीन दिवस पाणीपुरवठा बंद ठेवावा लागतो. त्याचे नियोजन केले जात आहे. मार्चमध्ये हे काम हाती घेण्यात येईल. त्यानंतर गळतीचा प्रश्न राहणार नाही.
मनीष पवार, जलअभियंता
मोबाइल अॅप डाउनलोड करा आणि राहा अपडेट
