शहरातील वाहतुकीला शिस्त आणि चौक अतिक्रमणमुक्त करण्यासाठी प्रशासन एकीकडे फेरीवाला धोरण आणि पार्किंग पॉलिसीची अंमलबजावणीच्या प्रयत्नात असताना दुसरीकडे शहरात दररोज अनधिकृत खोक्यांची भर पडत आहे. शहर स्वच्छ आणि सुंदर बनविण्यासाठी प्रशासनाला सहकार्य करण्याची भूमिका असणाऱ्या नगरसेवक, माजी लोकप्रतिनिधींनी अनधिकृत खोकीधारकांना पाठीशी घातले आहे. आजी-माजी नगरसेवकांच्या आशिर्वादाने शहरात बेकायदेशीर खोकी, टपऱ्या वाढत आहेत. कायदेशीर खोक्यांच्या संख्येत बेसुमार वाढ होत असताना अतिक्रमण निर्मूलन पथकाची कारवाई मात्र ढिम्म आहे.
दसरा चौक, महाराणा प्रताप चौक, बिंदू चौक, ताराबाई रोड, मिरजकर तिकटी परिसर, रंकाळा तलाव परिसर, खाऊ गल्ली, कसबा बावडा मुख्य रोड, महावीर कॉलेज परिसर, महावीर उद्यान, शिवाजी पेठ, मंगळवार पेठ, सायबर चौक, राजारामपुरी, लक्ष्मीपुरी, शाहूपुरी, आयर्विन ख्रिश्चन हायस्कूल परिसरात महापालिकेच्या नियमांना फाट्यावर बसवून अनधिकृत खोकी सुरू होत आहेत. यावर कारवाई करायला अतिक्रमण निर्मूलन पथकावर मर्यादा आहेत. अतिक्रमण निर्मूलन पथकाचे अधिकारी कारवाईला पुढे सरसावल्यानंतर बहुतांश ठिकाणी आजी-माजी नगरसेवकांकडून आडकाठी आणली जाते.
बेकायदेशीर खोकीधारकांना लगाम घालण्याऐवजी नगरसेवक उलटा पवित्रा घेत अधिकाऱ्यांनाच दमदाटी करतात. दोन दिवसांपूर्वी महावीर उद्यान परिसरात दोन खोकी बसवण्याचे काम बेकायदेशीररित्या सुरू होते हे पथकाच्या निदर्शनास आल्यावर कारवाईसाठी कर्मचारी गेले. मात्र या भागातील नगरसेवकांनी कर्मचाऱ्यांनाच दमदाटी करत कारवाई रोखली.
फूटपाथवरही केबीन
पादचाऱ्यांच्या सोयीसाठी फूटपाथ बांधण्यात आले. शहरातील विविध भागातील फूटपाथवर केबिन थाटून फूटपाथ अडवले आहेत. फूटथावरच केबिन थाटून व्यवसाय सुरू आहेत. दसरा चौक, स्वयंभू गणेश मंदिर चौक, बिंदू चौक येथे तर फुल विक्रेते, नारळ विक्रेते, चायनिज सेंटर विक्रेत्यांनी फूटपाथवर अतिक्रमण केले आहे. खाऊ गल्लीत तर अनधिकृत खोकी वाढल्या आहेत. या ठिकाणी खोकीधारकांना व्यवसाय सुरू करताना कसलेही नियम पाळले नाहीत. वाढती खोकी, वाहनांचे पार्किंग आणि नागरिकांची गर्दी यामुळे संध्याकाळी सात नंतर या परिसरात वाहतुकीचा फज्जा उडतो. अनेकजण रस्त्यावर वाहने पार्क करतात. यामुळे वाहतुकीला अडथळा निर्माण होऊन वाहतुकीच्या कोंडीची समस्या निर्माण होत आहे.
फेरीवाला संघटनांची दुटप्पी भूमिका
शहरात फेरीवाल्यांच्या विविध संघटना कार्यरत आहेत. फेरीवाल्यांच्या पुनर्वसनासाठी संघटना प्रयत्नशील आहेत. महापालिका प्रशासनाने, सुरळीत वाहतूक आणि पार्किंगची कोंडी टाळण्यासाठी गर्दीचे आणि रहदारीचे मार्ग 'नो हॉकर्स झोन'म्हणून निश्चित केले आहेत. मात्र याच ठिकाणी व्यवसाय करण्यास परवानगी मिळावी असा फेरीवाला संघटनांचा आग्रह आहे. फेरीवाल्यांच्या पुनर्वसनासाठी आग्रही असणाऱ्या संघटना मात्र शहरातील अनधिकृत खोकीबद्दल बोलायला तयार नाही. रस्त्यावर काम करण्याचा प्रत्येकाला अधिकार आहे अशी भूमिका मांडत नेते मंडळी अनधिकृत खोकीधारकप्रश्नी अंग झटकत आहेत.
आयुक्तांकडे अहवाल
अनधिकृत केबिन, फेरीवाले, खोकीधारक यांची यादी प्रशासनाने तयार केली आहे. पोलिस बंदोबस्तात कारवाईचे नियोजन आहे. कारवाईचा बडगा उगारला नाही तर खोकी बेसुमार वाढतील असा अहवाल अधिकाऱ्यांनी शहर अभियंता कार्यालयाकडे सादर केला आहे. या आठवड्यात आयुक्तांशी चर्चा करून कारवाईचा निर्णय होणार आहे.
मोबाइल अॅप डाउनलोड करा आणि राहा अपडेट
