महापौरपदाच्या निवडणुकीतील पराभवाचा वचपा काढण्यासाठी भारतीय जनता पक्ष, ताराराणी आघाडीने स्थायी, परिवहन समिती सभापतिपदाच्या निवडणुकीसाठी प्रचंड फिल्डींग लावली. शिवसेनेच्या नगरसेवकांना आपल्या बाजूने वळविण्यासाठी भाजपच्या नेत्यांनी सेनेच्या वरिष्ठांशी संपर्क साधला.
विरोधकांच्या ताकतीचा अंदाज आल्याने सत्तारूढच्या नेत्यांनीही यामध्ये लक्ष घालत सेनेचा विरोधी भाजप, ताराराणी आघाडीला फायदा होणार नाही या पद्धतीने राजकीय खेळी केल्या. दुसरीकडे भाजप आघाडीने प्रयत्न सोडले नाहीत. सेनेच्या सदस्यांकडे शेवटपर्यंत पाठपुरावा करत पाठिंब्यासाठी रात्र जागवली. पण सेनेकडून विरोधी आघाडीला पाठिंबा देण्याचा साक्षात्कार घडला नाही, परिणामी चमत्काराविनाच निवडणुका पार पडल्या. काँग्रेस, राष्ट्रवादीच्या कारभाऱ्यांची गर्दी
समिती आणि प्रभाग समिती सभापतिपदाच्या निवडणुका सत्ताधारी घटकांनी प्रतिष्ठेची बनवली होती. विरोध गट प्रबळ असल्याने शेवटपर्यंत सदस्यांवर लक्ष होते. सर्किट हाऊस येथे बैठक झाल्यानंतर कारभारी मोटारीमधूनच सर्व सदस्यांसहित महापालिकेत दाखल झाले. प्रत्येक सदस्याला शेवटपर्यंत सूचना देणे सुरू आहे. शहराध्यक्ष राजू लाटकर, प्रा. जयंत पाटील, शारंगधर देशमुख, सुभाष बुचडे, आदिल फरास, मधुकर रामाणे ही सारी मंडळी संपूर्ण प्रक्रियेवर लक्ष ठेवून होती.
सकाळपर्यंत सत्ताधाऱ्यांची अस्वस्थता
काँग्रेसचे शहराध्यक्ष प्रल्हाद चव्हाण यांनी 'जनता बझार'प्रकरणावरून थेट निशाणा साधत मुरलीधर जाधव यांच्या विरोधात भूमिका घेतली. यामुळे काँग्रेस, राष्ट्रवादीत अस्वस्थता होती. जयश्री चव्हाण या 'स्थायी' सदस्या आहेत. चव्हाण यांची समजूत काढण्यासाठी प्रा. जयंत पाटील, मुरलीधर जाधव यांनी गुरूवारी रात्री त्यांची भेट घेतली. पण चव्हाण यांचा राग मावळला नव्हता. शुक्रवारी सकाळी हसन मुश्रीफ, आमदार सतेज पाटील यांनी चव्हाण यांंंची समजूत काढली.
मोबाइल अॅप डाउनलोड करा आणि राहा अपडेट
