म. टा. वृत्तसेवा, कुपवाड
सांगली जिल्ह्याच्या ब्रँडिंगसाठी अनेक नावीन्यपूर्ण उपक्रम हाती घेण्यात आले आहेत. या माध्यमातून जिल्ह्याला आधुनिक चेहरा देण्यासाठी प्रयत्नशील आहोत, ग्वाही जिल्हाधिकारी शेखर गायकवाड यांनी प्रजासत्ताक दिनाच्या सोहळ्यात दिली. ६६व्या भारतीय प्रजासत्ताक दिनानिमित्त पोलिस कवायत मैदानावर सरकारी ध्वजारोहण सोहळा झाला. या वेळी आमदार सुधीर गाडगीळ, पोलिस अधीक्षक सुनील फुलारी, मुख्य कार्यकारी अधिकारी दिलीप पाटील, महानगरपालिका आयुक्त अजीज कारचे, अपर जिल्हाधिकारी संजयसिंह चव्हाण, निवासी उपजिल्हाधिकारी त्रिगुण कुलकर्णी आदी उपस्थित होते.
जिल्हाधिकारी गायकवाड म्हणाले, देशभक्ती, क्रांती, कला, क्रीडा, साहित्य, संस्कृती, सहकार अशा विविध क्षेत्रात जगभर नावलौकिक असणारा सांगली जिल्हा आहे. सांगलीची ओळख बनू पाहतील, अशा पारंपरिक कृषी संस्कृती, खाद्य संस्कृती, कला संस्कृती, उल्लेखनीय व प्रेक्षणीय पर्यटन स्थळे या सगळ्यांचे डिजिटल इंडियाच्या निमित्ताने ब्रँडिंग करण्याचा प्रयत्न प्रशासनामार्फत सुरू आहे. संचलनामध्ये पोलिस दल, गृहरक्षक दल, अग्निशमन दल, वनरक्षक दल, नॅशनल कॅडेट कोअर पथक अशा एकूण ३८ पथकांनी सहभाग घेतला. ज्युबिली कन्या शाळा मिरज, श्रीमती सुंदराबाई दडगे गर्ल्स हायस्कूल सांगली, ईम्यॅन्युअल स्कूल सांगली, पोद्दार इंग्लिश स्कूल सांगली या शाळेच्या विद्यार्थ्यांनी सांस्कृतिक कार्यक्रम सादर केला.
सांगली महापालिकेत महापौर विवेक कांबळे, सांगली जिल्हा मध्यवर्ती बँकेत अध्यक्ष दिलीप पाटील, जिल्हा परिषदेत अध्यक्षा रेश्माक्का होर्तीकर यांच्याहस्ते ध्वाजारोहण करण्यात आले. नवभारत शिक्षण मंडळाच्या शांतिनिकेतन लोक विद्यापीठात खासदार राजू शेट्टी, रणधीर नाईक आणि शांतिनिकेतनचे संचालक गौतम पाटील यांच्या उपस्थितीत तर सुंदराबाई दडगे गर्ल्स हायस्कूलमध्ये आभाळमाया फाउंडेशनचे प्रमोद चौगुले यांच्या हस्ते ध्वजारोहण झाले.
गुणवंतांचा सन्मान
राष्ट्रपती पदक विजेते पोलिस हवालदार विठ्ठल पाटील, नक्षलग्रस्त क्षेत्रात खडतर सेवेसाठी दहा पोलिस उपनिरीक्षकांना विशेष सेवा पदक, राष्ट्रीय इन्स्पायर अवॉर्ड विज्ञान प्रदर्शन व प्रकल्प स्पर्धा २०१५मध्ये सहभागी बालवैज्ञानिक शुभम गोरे, १२ हजार फळ बियाणे संकलनाबद्दल सानिया बिलाल बुबनाळे यांचा सन्मान करण्यात आला. अल्पबचत भवनमध्ये जिल्हाधिकाऱ्यांच्या हस्ते महात्मा फुले मागास वर्ग विकास महामंडळाकडून विविध योजनेंतर्गत सरकारी कर्जमाफी योजनेचा लाभ न घेता विहित मुदतीत कर्जाची व्याजासह परतफेड केलेल्या प्रमोद धनसरे (मिरज), शरद रणखांबे (सांगली), जनाबाई कांबळे (इनाम धामणी), जयश्री कांबळे (इनाम धामणी), शांताबाई कांबळे (इनाम धामणी), रेणुका कांबळे (इनाम धामणी) अशा लाभार्थींचा प्रोत्साहनपर प्रशस्तीपत्र देऊन सन्मान करण्यात आला. कबड्डी खेळाडू नितीन मदने, वेटलिफ्टिंग खेळाडू मोहिनी चव्हाण, ऋत्विक चिवटे, विजया दुधाणी हे गुणवंत खेळाडू, मार्गदर्शक जीवन मोहिते, क्रीडा संघटक महावीर कुंभोजे यांना सन्मानित करण्यात आले.
मोबाइल अॅप डाउनलोड करा आणि राहा अपडेट
