खासदार शेट्टींची तक्रार आश्चर्यकारक

January 15, 2016, 11:32 am

≫ Next: सतरा ठिकाणी खास वॉच

≪ Previous: शहर हागणदारीमुक्त होणार

$

0

0

आमदार हसन मुश्रीफ यांनी लगावला टोला

म. टा. प्रतिनिधी, कोल्हापूर

'साखरेचे दर गेल्या महिन्यापासून वाढत असताना खासदार राजू शेट्टी यांनी केंद्रीय अर्थमंत्री अरुण जेटली आणि सेबीकडे वायदेबाजाराची पारदर्शकता तपासण्याची केलेली मागणी आश्चर्यकारक आहे. अठरा महिने साखरचे दर कमी असताना मूग गिळून गप्प राहणारे शेतकरी नेते दर वाढत असताना अशा प्रकारची मागणी करत आहेत, याचा गंभीरपणे विचार करण्याची आवश्यकता आहे,' असे प्रसिद्धीपत्रक आमदार हसन मुश्रीफ यांनी दिले आहे.

पत्रकात म्हटले आहे की, काही साखर व्यापाऱ्यांनी फ्युचर मार्केटमध्ये हजारो कोटींची साखर विक्री केली आहे. साखर विक्रीनंतर दरात वाढ होत असल्याने व्यापारी तोट्यात जाण्याचा धोका निर्माण झाला आहे. तोट्यात जाणाऱ्या व्यापाऱ्यांनी काही नेत्यांना हाताशी धरून देशाचे केंद्रीय अर्थमंत्री, राज्याचे मुख्यमंत्री आणि सेबीकडे तक्रार करण्यासाठी मिलीभगत झाली आहे. व्यापाऱ्यांनी साठेबाजार केला असून, त्यांच्यावर छापे घालण्याबाबत व्यक्तव्ये केली गेल्याने साखरेचे दर वाढणे बंद झाले आहेत. तोट्यात जाणाऱ्या व्यापाऱ्यांचे हित जपण्यासाठी काहीजण कार्यरत झाले आहेत.

साखरेचे दर ३२ रुपये किलो झाल्याशिवाय शंभर टक्के एफआरपी देणे शक्य नसताना शेट्टी यांनी अशी मागणी केल्याने ते शेतकऱ्यांचे नेते आहेत, की व्यापाऱ्यांचे असाही प्रश्न उपस्थित केला आहे. वायदेबाजार व फ्युचर ट्रेडिंगबाबत खासदार शेट्टी यांना संशय होता, तर त्यांनी १८०० रुपये दर असताना असा पवित्रा का घेतला नाही?, साठेबाजांवर छापे टाकण्यासाठी का प्रयत्न केले नाहीत? साखरेचे दर वाढत असताना व्यापाऱ्यांना भीती दाखवून दर वाढू नयेत अशी कृती का ? आदी प्रश्न उपस्थित केले आहेत.

मोबाइल अॅप डाउनलोड करा आणि राहा अपडेट

---

सतरा ठिकाणी खास वॉच

January 15, 2016, 11:34 am

≫ Next: गारगोटीतील डोंगरकपारी तहानल्या

≪ Previous: खासदार शेट्टींची तक्रार आश्चर्यकारक

$

0

0

म. टा. प्रतिनिधी, कोल्हापूर

सेफ सिटी योजनेंतर्गत कोल्हापूर शहरात १७ ठिकाणी वॉच असणार आहे. यामध्ये शहरातील महत्त्वाचे चौक, गर्दीचे परिसर, सरकारी कार्यालये, मध्यवर्ती बसस्थानक परिसर आणि रेल्वे स्टेशन परिसराचा समावेश असणार आहे. सुरक्षिततेला प्राधान्यक्रम देत या ठिकाणी ३६० अंशाच्या कोनातून फिरणारे पीटीझेड कॅमेरे कार्यान्वित केले जाणार आहेत. या कॅमेऱ्यांच्या माध्यमातून परिसरातील शंभर मीटर अंतरावरील हालचाली टिपणे शक्य होणार आहे. जिल्हा पोलिस मुख्यालयात नियंत्रण कक्ष असणार आहे.

महापालिका आणि जिल्हा पोलिस प्रशासनमार्फत सध्या शहरात सीसीटीव्ही यंत्रणा कार्यान्वित करण्याचे काम सुरू आहे. शहरातील ६५ ठिकाणे निश्चित केली आहेत. या ठिकाणी १६५ कॅमेरे बसविण्यात येणार आहेत. यापैकी ज्या ठिकाणी सर्वाधिक गर्दी, संवेदनक्षम ठरतील अशी केंद्रे आणि सरकारी कार्यालयांवर खास लक्ष ठेवले आहे. येथे उच्च दर्जाचे कॅमेरे असणार आहेत. हे कॅमेरे सर्व बाजूंनी फिरणारे आहेत. शंभर मीटर अंतरावरील हालचाली स्पष्टपणे टिपल्या जातील. सीसीटीव्ही कॅमेरे कार्यान्वित करण्यासाठी महापालिका आणि जिल्हा नियोजन समितीच्या माध्यमातून साडेसात कोटी रुपयांची तरतूद केली आहे. या निधीच्या माध्यमातून सध्या शहरात सीसीटीव्ही कॅमेऱ्यांसाठी केबल टाकण्याचे काम सुरू आहे. जिल्हा पोलिस मुख्यालयात नियंत्रण कक्षाचे काम सुरू आहे. जिल्हा पोलिस मुख्यालयातील नियंत्रण कक्षाशी सर्व भागांतील कॅमेरे संलग्न असतील. यामुळे घडामोडी समजणार आहेत.



येथे बसविणार पीटीझेड कॅमेरे

एसपी ऑफिस कार्यालय, रेल्वे स्टेशन परिसर, बागल चौक, हायवे कॉर्नर चौक, जनता बझार चौक, नवीन वाशी नाका परिसर, क्रशर चौक, निकम पार्क चौक (देवकर पाणंद परिसर), आरटीओ ऑफिस परिसर, जिल्हाधिकारी कार्यालय परिसर, महावीर कॉलेज चौक, तोरस्कर चौक परिसर, मध्यवर्ती बसस्थानक परिसर, शिये टोल नाका, शिवाजी चौक परिसर

सीसीटीव्ही कॅमेऱ्यांवर दृष्टिक्षेप

कॅमेऱ्यांची एकूण संख्या १६५, ठिकाणे ६५

स्थिर कॅमेरे ११६ (४० ते ५० मीटर अंतरापर्यंतच्या हालचाली नोंदणार)

पॅनोरेमिक कॅमेरे ३२ (समोर आणि डाव्या-उजव्या बाजूला फिरणारा कॅमेरा, १५ ते २० मीटर अंतरापर्यंतच्या हालचाली टिपल्या जातील)

पीटीझेड १७ (चारही बाजूंनी फिरणारे, १०० मीटर अंतरापर्यंतच्या हालचालीवर लक्ष)

६५ ठिकाणी बसविण्यात येणाऱ्या सीसीटीव्ही कॅमेऱ्यांसासाठी शहरात ६० किलोमीटर लांबीची केबल टाकली जाणार आहे. आतापर्यंत ८० टक्के काम पूर्ण झाले आहे. केबल आणि त्या अनुषंगाने इतर कामे पूर्ण झाल्यावर सीसीटीव्ही कॅमेरे ठिकठिकाणी निश्चित केले जातील.फायबर ऑप्टिकल नेटवर्कचा वापर करण्यात येणार आहे. सीसीटीव्ही यंत्रणा कार्यान्वित झाल्यानंतर चोवीस तास शहरावर लक्ष राहणार असून, सीसीटीव्ही कॅमेरे महापालिकेच्या ताब्यात आहेत.'

सुरेश पाटील, उपअभियंता

मोबाइल अॅप डाउनलोड करा आणि राहा अपडेट

गारगोटीतील डोंगरकपारी तहानल्या

January 15, 2016, 11:39 am

≫ Next: इचलकरंजीत दोघा चोरट्यांना अटक

≪ Previous: सतरा ठिकाणी खास वॉच

$

0

0

म. टा. वृत्तसेवा, गारगोटी

यंदाच्या पावसाळ्यात पडलेल्या अपुऱ्या पावसामुळे मोठया प्रमाणात खालावली आहे. त्यामुळे किल्ले भुदरगडच्या तटाकडील परिसरातील सर्व वाडयावस्त्या बारवे, दिंडेवाडी व पिंपळगाव परिसराला आतापासून पाण्याचा तुटवडा भासू लागल्याने आम जनतेची झोप उढाली आहे. चिकोत्रा प्रकल्पात फक्त ३७ टक्केच पाणी साठा झाला आहे. तर भूदरगड तालुक्यात एकुण पावसाच्या सरासरी पेक्षा ५० टक्केहून कमी म्हणजे ९६४ मि.मी. इतकाच पाऊस पडला आहे.

भुदरगड तालुक्याचा बहुतांशी भाग हा दुर्गम, डोंगराळ असल्याने या डोंगर कपारीतच बहुतांशी गावे वसली आहे. वेदगंगा नदीकाठाचा परिसर सोडता बाकी इतर गावांना पाण्याची कमतरता भासत आहे. भुदरगडच्या पश्चिम भागातील असी अनेक गावे असल्याने त्यानाही पाण्याचा तुटवडा भासत आहेत. ही परिस्थिती दिवसेनदिवस वाढत आसल्याने फेब्रुवारीच्या पहिल्या आठवड्यापासून या परिसरातील जनतेला पाणी वापरावर मर्यादा आणून काटकसरीने वापर करावा लागणार आहे. शेतीच्या पाण्याची समस्या आणखीणच बिकट होणार आहे. भुदरगडच्या सर्व जनतेला पाण्यासाठी संघर्ष करावा लागणार आहे.

सुमारे १५ हजार लोकवस्तीच्या या दुर्गम डोंगराळ भागाला टँकरने पाणी पुरवठा करावा लागणार आहे. कधी नव्हे इतकी पाण्याची मोठी कमतरता या परिसराला भासू लागली आहे. या परिसरातील सर्वच गावांना सायफन पद्धतीने नैसर्गिक पाण्याचा पुरवठा होतो. जंगली झऱ्यांचे पाणी सायपन पद्धतीने नळे टाकून आणले आहेत. सदरचे पाणी उच्च ठिकाणी साठवणुकीच्या टाक्या तयार करून त्यामध्ये टाकण्यात आले आहे. या टाक्यातून गावाला पाणी पुरवठा होत आहे. दिवसातून एकदा अर्धातास लोकांना पाणी मिळत आहे. यामुळे परिसरातील लोकांनी पाण्याच्या वापरावर मर्यादा आणल्या आहेत. याच परिसरातील चिकोत्रा प्रकल्पातह अत्यल्प पाणीसाठा झाल्याने आता करायचे काय? असा प्रश्न आम जनतेला निर्माण झाला आहे. या खोऱ्यातील पाण्याच्या कमतरतेची झळ नांगरगाव, हेळेवाडी, न्हाव्याचीवाडी, आरळगुंडी, धनगरवाडा, बारवे, जकीमपेठ, जोगेवाडी, भांडीबांबर, केळेवाडी, दिंडेवाडी, राणेवाडी, वरपेवाडी, गडबिद्री, सावतवाडी, बेडीव, घावरेवाडी, चोपडेवाडी, या डोंगरकपाऱ्यांतील सर्व वाड्यांना पाणी टंचाईची समस्या जाणवत आहे. आणखी काही दिवसात बेगवड, पिंपळगाव, बामणे आदी गावाना पाण्याचा तुटवडा जाणवत आहे. याबाबत तत्काळ निर्णय घ्यावा तसेच नागणवाडी प्रकल्पाचे पुनर्वसन करून या प्रकल्पात पाणी अडवल्यास अनेक गावातील पाणी टंचाई दूर होणार आहे. याबाबत स्थानिक लोकप्रतिनिधीनी आवाज उठवण्याची गरज निर्माण झाली आहे.

मोबाइल अॅप डाउनलोड करा आणि राहा अपडेट

इचलकरंजीत दोघा चोरट्यांना अटक

January 15, 2016, 11:41 am

≫ Next: भोनेमळ्यात चोरट्यांनी लांबविली सोन्याची चेन

≪ Previous: गारगोटीतील डोंगरकपारी तहानल्या

$

0

0

म. टा. वृत्तसेवा, इचलकरंजी

पंधरा दिवसापूर्वी चोरीस गेलेली टाटा सुमोची दोन चाके व व्हिलकॅप गॅरेज चालकाच्या हुशारीमुळे चोरट्यांसह मिळून आली. या प्रकरणी रफिक सलीम मुल्ला (वय ३१ रा. खोतवाडी) व सनी सदाशिव बुरसे (वय ३१ रा. त्रिशुल चौक गावभाग) या दोघांना शिवाजीनगर पोलिसांनी अटक केली आहे. इसाक हसन चौगुले (वय ३९ रा. कबनूर) यांनी फिर्याद दिली आहे.

इसाक चौगुले यांचे कोल्हापूर रोडवर स्वामी मळ्यानजीक मोटर वाहने दुरुस्तीचे गॅरेज आहे. ते स्वत: व त्यांचा भाचा मुस्ताक अबुबकर दानवाडे (रा. जेकेनगर) हे काम करतात. तीन जानेवारी रोजी दोघेजण गॅरेज उघडण्यासाठी आले असता दारात असलेल्या टाटासुमो (एमएच ०९ एस ६३४) ची मागील बाजूची दोन्ही चाके व पुढील चाकाचे व्हिलकॅप असा १६ हजार रुपयांचा मुद्देमाल चोरट्यांनी लंपास केल्याचे निदर्शनास आले होते.

मोबाइल अॅप डाउनलोड करा आणि राहा अपडेट

भोनेमळ्यात चोरट्यांनी लांबविली सोन्याची चेन

January 15, 2016, 11:42 am

≫ Next: न्यायालयाच्या आवरात पत्नीवर हल्ला

≪ Previous: इचलकरंजीत दोघा चोरट्यांना अटक

$

0

0

म. टा. वृत्तसेवा, इचलकरंजी

येथील भोनेमाळ परिसरात मोटरसायकलवरुन आलेल्या चोरट्यांनी वृद्धेच्या गळ्यातील तीन तोळे सोन्याची चेन लंपास केली. श्रीमती सुरेखा सुधाकर कोकाटे (वय ६१ रा. भोनेमाळ) असे वृद्धेचे नांव असून या घटनेची नोंद शिवाजीनगर पोलिस ठाण्यात झाली आहे. पोलिसांनी घटनेनंतर नाकाबंदी करुन चोरट्यांचा माग काढण्याचा प्रयत्न केला.

भोनेमाळ परिसरात राहणाऱ्या श्रीमती सुरेखा कोकाटे या काही कामानिमित्त मिरज येथे गेल्या होत्या. दुपारी तीन वाजण्याच्या सुमारास त्या घरी परतत असताना जुना एस. टी. स्टॅण्ड परिसरात समोरुन काळ्या रंगाच्या मोटरसायकलवरुन आलेल्या दोघा चोरट्यांपैकी मागे बसलेल्याने कोकाटे यांच्या गळ्यातील तीन तोळे वजनाची ७५ हजार रुपयांची सोन्याची चेन हातोहात लंपास केली. या घटनेमुळे कोकाटे यांनी आरडाओरडा केला.

मोबाइल अॅप डाउनलोड करा आणि राहा अपडेट

न्यायालयाच्या आवरात पत्नीवर हल्ला

January 15, 2016, 11:43 am

≫ Next: नगरपरिषदेला ‘ना हरकत’

≪ Previous: भोनेमळ्यात चोरट्यांनी लांबविली सोन्याची चेन

$

0

0

म. टा. वृत्तसेवा, इचलकरंजी

पोटगीचा दावा दाखल करण्यासाठी आलेल्या पत्नीवर कटरने प्राणघातक हल्ला करण्याची घटना शुक्रवारी दुपारी घडली. येथील जिल्हा व सत्र न्यायालयाच्या आवारातच हा प्रकार घडल्याने चांगलीच खळबळ उडाली. हल्ल्यात संगीता बिभीषण गायकवाड (वय ३७ रा. तारदाळ) यांच्या गळा आणि दंडावर वर्मी घाव बसले असून त्यांची प्रकृती गंभीर आहे. तर हल्लेखोर पती बिभीषण मारुती गायकवाड (वय ४०) याला घटनास्थळावरच पोलिसांनी जेरबंद केले. या घटनेची नोंद गावभाग पोलिसात झाली आहे.

याबाबत घटनास्थळ व पोलिसांतून मिळालेली माहिती अशी, संगिता व बिभीषण गायकवाड यांच्यात कौटुंबिक वाद निर्माण झाला आहे. या दाम्पत्याला सहा मुली असून पैकी एकीचा विवाह झाला आहे. दोन दिवसापूर्वी या दोघांमध्ये जोरदार वाद झाला होता. हा वाद घटस्फोटापर्यंत पोहोचला होता. त्यातूनच पोटगीचा दावा दाखल करण्यासाठी संग‌ीता या शुक्रवारी दुपारी जिल्हा व सत्र न्यायालयाच्या आवारात थांबल्या होत्या. त्याचवेळी तेथे आलेल्या बिभीषण याने हातातील रेडियम कटरने संगिता यांच्यावर हल्ला केला. त्यांच्या दंडावर तसेच गळ्यावर वार केल्याने संगिता या जाग्यावरच कोसळल्या. मोठ्या प्रमाणात रक्तस्त्राव झाल्याने घटनास्थळी रक्ताचा सडा पडला होता. जखमी संगिता यांना तातडीने त्यांच्या नातेवाईकांनी पालिकेच्या आयजीएम इस्पितळात दाखल केले. परंतु प्रकृती गंभीर असल्याने संगिता यांना खाजगी रुग्णालयात हलविण्यात आले.

मोबाइल अॅप डाउनलोड करा आणि राहा अपडेट

नगरपरिषदेला ‘ना हरकत’

January 15, 2016, 11:44 am

≫ Next: जि. प.तील लाचखोर लिपिक निलंबित होणार

≪ Previous: न्यायालयाच्या आवरात पत्नीवर हल्ला

$

0

0

जि.प.च्या स्थायी समितीचा ठराव नगरविकासकडे

म. टा. वृत्तसेवा, हातकणंगले

हुपरी (ता. हातकणंगले) येथे तातडीने नगरपरिषद व्हावी यासाठी जिल्हा परिषदेच्या स्थायी समितीच्या बैठकीमध्ये बहुमताने ठराव मंजूर करण्यात आला. याबाबतचा अहवाल नगरविकास मंत्रालयात तातडीने पाठवून देण्याची प्रक्रिया पूर्ण करण्यात आली. या सर्व घडामोडींमुळे येत्या काही दिवसांत हुपरी नगरपरिषदेची अंतिम घोषणा होऊन प्रशासक नेमणुकीच्या हालचाली गत‌िमान झाल्या आहेत.

हुपरीची लोकसंख्या ६० हजारांवर जाऊन पोहचल्यामुळे ग्रामपंचायतीच्या माध्यमातून विकासकामे करणे, नागरी सुविद्या देणे कठीण झाले आहे. तसेच ग्रामपंचायतीच्या माध्यमातून गोळा होणारा महसूल याचा ताळमेळ बसत नसल्यामुळे अनेक समस्यांना सामोरे जावे लागत होते. हुपरी गावाला नगरपरिषद होणेसाठी माजी सरपंच आप्पासो देसाई, मंगलराव माळगे यांच्यासह अनेक नेत्यांनी प्रामाणिक प्रयत्न केले होते. पंरतु राजकिय अनास्थेमुळे या प्रयत्नांना मोठया प्रमाणात खो बसल्यामुळे अनेक राजकिय नेत्यांनी या गंभीर मागणीकडे जाणीवपूर्वक दुर्लक्ष केल्यामुळे नागरिकांतून तीव्र संताप व्यक्त होत होता. महाराष्ट्र सरकारने ३१ जुलै, २०१५ रोजी हुपरी नगरपरिषदेला तत्व:ता मंजूरी देत अधिकृत उद्घोषणा केली. त्यानंतर पुढील कार्यवाहीसाठी ग्रामविकास खात्याचे उपसचिव गिरीश भालेराव यांनी ‌तीन डिसेंबर, २०१५ रोजी मुख्यकार्यकारी अधिकारी, कोल्हापूर यांना हुपरी ग्रामपंचायतीचे रूपातंर नगरपरिषदेत होण्यासाठी जिल्हा परिषदेच्या स्थायी समितीची मंजूरी घेऊन अहवाल तात्काळ सादर करण्याचा आदेश दिला होता.

ग्रामविकास खात्याच्या आदेशानुसार काल बुधवार १३ रोजी स्थायी समितीच्या बैठकीचे आयोजन करणेत आले. त्यामध्ये हुपरी ग्रामपंचायतीचे रूपांतर होण्याच्या अजेंड्याच्या विषय होता. त्यावेळी सर्व जिल्हा परिषद सदस्यांनी बहुमताने मंजूर केला व याबाबतचा अहवाल तत्काळ नगर विकास मंत्रालयाकडे पाठविणेच्या सूचना देण्यात आल्या. हुपरी नगरपरिषद होण्यासाठी स्थायी समितीच्या बैठकीत सर्व सदस्यांनी बहुमताने ठराव मंजूर केला आहे. त्यामुळे येत्या काही दिवसांत हुपरीकरांचे नगरपरिषदेचे स्वप्न पूर्ण होईल.

सध्या जिल्हा परिषदेच्या माध्यमातून आलेला निधी व प्रलंबित कामे तसेच पाणी पुरवठा योजना पूर्णत्वाकडे नेण्यासाठी महाराष्ट्र शासनाने सहकार्य करणे गरजेचे आहे.

किरण कांबळे, समाजकल्याण सभापती

मोबाइल अॅप डाउनलोड करा आणि राहा अपडेट

जि. प.तील लाचखोर लिपिक निलंबित होणार

January 15, 2016, 11:52 am

≫ Next: मिरज-कोल्हापूर मार्गावर मेगाब्लॉक

≪ Previous: नगरपरिषदेला ‘ना हरकत’

$

0

0

म. टा. प्रतिनिधी, कोल्हापूर

जिल्हा परिषदेच्या माध्यमिक शिक्षण विभागातील कनिष्ठ लिपिक विनायक पाटील व वरिष्ठ सहाय्यक अधिकारी विकास लाड यांना लाचलुचपत विभागाने रंगेहाथ पकडलेल्या प्रकरणाचा अधिकृत अहवाल सामान्य प्रशासनाकडे आला आहे.

ज्या दिवशी दोन्ही कर्मचारी लाच घेताना सापडले त्या दिवसांपासून ते निलंबीत झाले असल्याची माहिती सामान्य प्रशासन विभागाचे उपमुख्य कार्यकारी अधिकारी चंद्रकांत वाघमारे यांनी दिली. प्राप्त झालेला अहवाल प्रभारी सीईओ डॉ. हरीष जगताप यांच्याकडे पाठवण्यात आला आहे. मात्र, मुख्य कार्यकारी अधिकारी अविनाश सुभेदार रजेवरुन आल्यानंतरच निलंबनावर शिक्कामोर्तब होणार आहे.

वरिष्ठ वेतनश्रेणीचा आदेश काढण्यासाठी एकात्मिक बाल विकास प्रकल्पाचे विकास लाड लाचलुचपतच्या जाळ्यात रंगेहात सापडले होते. तर त्याचे सहकारी विनायक पाटील याला दुसऱ्या दिवशी ताब्यात घेण्यात आले होते. त्याची प्रक्रिया आता सुरू आहे.

मोबाइल अॅप डाउनलोड करा आणि राहा अपडेट

---

मिरज-कोल्हापूर मार्गावर मेगाब्लॉक

January 15, 2016, 1:30 pm

≫ Next: तलाव आटला; कागल तहानले

≪ Previous: जि. प.तील लाचखोर लिपिक निलंबित होणार

$

0

0

मिरज : मिरज-कोल्हापूर मार्गावर रेल्वेरुळाच्या दुरुस्तीसाठी शनिवारी मध्यरात्रीपासून रविवार सकाळपर्यंत मेगाब्लॉक करण्यात येणार आहे. मेगाब्लॉकमुळे रेल्वेगाड्यांचे वेळापत्रक विस्कळीत झाले आहे. कोल्हापूरहून सुटणाऱ्या रेल्वेगाड्या व कोल्हापूरला जाणाऱ्या रेल्वेगाड्या मिरजेत थांबविण्यात येतील. येथूनच त्या सोडण्यात येणार आहेत.

मिरज-कोल्हापूर रेल्वेमार्गावरील जयसिंगपूर व हातकणंगले रेल्वे स्थानकांदरम्यान रेल्वेरुळाची दुरुस्ती करण्यात येणार आहे. यासाठी आज (शनिवार) रात्री पावणेएक वाजल्यापासून रविवारी सकाळी पावणेसहा वाजेपर्यंत या मार्गावर मेगाब्लॉक असणार आहे. मेगाब्लॉकमुळे या मार्गावरुन कोल्हापूरला जाणाऱ्या सांगली-कोल्हापूर पॅसेंजर व मुंबईहून येणारी सह्याद्री एक्स्प्रेस मिरजेतच थांबविण्यात येणार आहे. तर कोल्हापूर-सोलापूर व कोल्हापूर-हैदराबाद या रेल्वेगाड्या मिरजेतून सुटणार आहेत.

मोबाइल अॅप डाउनलोड करा आणि राहा अपडेट

तलाव आटला; कागल तहानले

January 15, 2016, 11:46 am

≫ Next: ठिबक सिंचनाकडे शेतकऱ्यांची पाठ

≪ Previous: मिरज-कोल्हापूर मार्गावर मेगाब्लॉक

$

0

0

म. टा. वृत्तसेवा, कागल

कागल शहराला पाणीपुरवठा करणाऱ्या जयसिंगराव तलावात केवळ सात फूट पाणी साठा शिल्लक असून त्यातील साडेतीन फूट पाणीच वापरात घेता येऊ शकते. ते पहाता भविष्यातील पाण्याची गरज आणि टंचाईचा विचार करुन कागल नगरपालिकेने दर सोमवारी पाणीपुरवठा बंद ठेवण्याचा निर्णय घेतला आहे. त्यामुळे बाजाराचा दिवस असला तरीही सोमवारी कागलचा पाण्यासाठी ड्राय डे रहाणार आहे.

कागल शहराला दररोज २५ लाख लिटर पाणी लागते. सध्या जयसिंग तलाव आणि तीन किलोमीटरवरुन दूधगंगा नदीवरुन केलेल्या पाणी योजनेच्या टाकीतून पाण्याची ही गरज भागवली जाते. यामध्ये पाच ते सहा ठिकाणी गळती आहे. पाण्याची कमतरतेचा विचार करुन पालिकेने आता ३० मिनीटांऐवजी २० मिनीटे पाणी सोडण्यास सुरूवात केली आहे. पाण्याचा अनावश्यक वापर वाचेल असा उद्देश यामध्ये आहे. यापूर्वी सुरु केलेली चाव्यांना मीटरची योजना आता पुर्णत्वास आली असून २४ तास पाणी देण्यासाठी राजकीय अडचणी आल्या आहेत. यावर उपाय म्हणून शहराच्या १७ प्रभागात १७ बोअरवेल मारण्याचा निर्णय सभेत घेण्यात आला आहे. सोमवारो पाणीपुरवठा बंद राहिल्यास फिल्टरचे बेड स्वच्छ करणे, पाण्याच्या टाकीची गळती काढणे आणि एक दिवसात तलावात नदीतून ५० लाख लिटर पाणी साठवून तलावातील पाण्याचा साठा वाढवणे असे नियोजन करण्यात आले आहे.

सध्या फिल्टर हाऊसला ६० आणि ४० हॉर्सपॉवरचे विद्युत पंप्स आहेत. तलावात जास्त प्रमाणात पाणी साठवायचे असेल तर आणखी ६० हॉर्सपॉवरचा पंप पाहिजे म्हणून दोनच महिन्यापूर्वी पालिकेने जिल्हाधिकारी कार्यालयात मंजूरीसाठी प्रस्ताव दिला आहे. जेणेकरुन दिवसाला २४ लाख लिटर पाणी तलावात नदीतून आणून साठवता येणार आहे. पालिकेकडून मोठ्या प्रमाणावर प्रयत्न सुरु असून कर्मचाऱ्यांनाही पाणीबचतीसाठी मार्गदर्शन करण्यात आले आहे. परंतु यापूर्वी केलेल्या योजनेमया पाण्याच्या टाक्या खूपच जुन्या असून पाइपलाइन तर ६० वर्षांपूर्वीची आहे. त्या बदलण्यासाठी आणि नवीन उपनगरांना पाणीपुरवठा करण्यासाठी ११ कोटींची नवीन योजना सरकारकडे मंजूरीसाठी दिली आहे.

नवीन ११ कोटींची योजना सरकारच्या सचिव समितीच्या बैठकीत मंजूर झाली आहे. असे असताना महाराष्ट्रातील सर्व स्कीमना मंजूरी मिळाली पण आमदार हसन मुश्रीफ दोन वेळा मुख्यमंत्र्यांना भेटूनही राजकीय हेतूने आमच्याच योजनेला मंजूरी मिळाली नाही. ती मिळाल्यास कायमस्वरूपी पाणीटंचाई मिटेल.

- संगीता गाडेकर, नगराध्यक्षा

मोबाइल अॅप डाउनलोड करा आणि राहा अपडेट

ठिबक सिंचनाकडे शेतकऱ्यांची पाठ

January 15, 2016, 11:54 am

≫ Next: सरकार गय करणार नाही

≪ Previous: तलाव आटला; कागल तहानले

$

0

0

Maruti.Patil@timesgroup.com

कोल्हापूर : ऊसासारख्या नगदी पिकांना पाटाने पाणी देण्याची पद्धत असल्याने पाण्याचा मोठ्या प्रमाणात अपव्यव होत आहे. पाण्याची नासाडी रोखण्यासाठी ठिबक सिंचनासारखा चांगला पर्याय असताना याकडे सर्वांचे दुर्लक्ष होत आहे. जिल्ह्यातील एकूण एक लाख ४५ हजार हेक्टर क्षेत्रापैकी केवळ पाच हजार ८७८ हेक्टरवर ठिबक सिंचन कार्यन्वित असल्याची आकडेवारी साखर कारखान्यांकडील नोंदीवरून दिसते. हे क्षेत्र नगण्य असल्याने यापुढे ठिबक सिंचनाखालील क्षेत्र वाढवण्यासाठी सामुदायिक प्रयत्न करण्याची आवश्यकता आहे.

पावसाचे प्रमाण कमी होत असल्याने उसाखालील क्षेत्र ठिबक सिंचनाखाली आणण्यासाठी सरकार आणि कारखान्यांतर्फे मोठ्या प्रमाणावर प्रयत्न केले होते. साखर कारखान्यामार्फत ठिबकची सक्ती करण्याचाही प्रयत्न केला गेला. मात्र याला फारसा प्रतिसाद मिळाला नसल्याचे दिसते. कारखान्याकडून देण्यात आलेल्या ठिबक सिंचनामध्ये सर्वात जास्त जवाहर साखर कारखान्याने व दत्त शिरोळ कारखान्याने शेतकऱ्यांना प्रोत्साहित केले. इतर कारखान्यांबाबत फारसी स्थिती समाधानकारक नसल्याने पाण्याची बचत आणि अपव्यवय टाळण्यासाठी सामुदायिक प्रयत्न करण्याची आवश्यकता आहे. तालुक्या निहायक्षेत्रामध्ये शिरोळ, हातकणंगले तालुक्यांनी बाजी मारली आहे. या दोन्ही तालुक्यांमध्ये ऊस क्षेत्राबरोबरच फळबागा व भाजीपाल्यांचे उत्पादन जास्त असल्याने या तालुक्यांतील शेतकऱ्यांकडे ठिबक सिंचन जास्त असल्याचे दिसून येते.

एंजटांची साखळी

राज्य सरकारच्या कृषी विभागाकडून हेक्टरी एक लाख २५ हजार रुपयांचे अनुदान दिले जाते. मात्र शेतकऱ्यांना सहजासहजी अनुदान मिळत नसल्याने शेतकरी फारशी आस्था दाखवत नाहीत. याचाच फायदा घेवून अनुदान लाटण्यासाठी कृषी कार्यालयात एजंटाची साखळी निर्माण झाली आहे. यामध्ये काही अधिकारी आणि कर्मचारीही सहभागी असल्याची चर्चा आहे. एजंटाच्या साखळीत शेतकरी सहभागी न झाल्यास त्याला वर्षानुवर्षे अनुदानासाठी हेलपाटे मारावे लागत असल्याची स्थिती आहे.

मोबाइल अॅप डाउनलोड करा आणि राहा अपडेट

सरकार गय करणार नाही

January 15, 2016, 11:56 am

≫ Next: शरद पवार यांचा आजपासून दौरा

≪ Previous: ठिबक सिंचनाकडे शेतकऱ्यांची पाठ

$

0

0

म. टा. प्रतिनिधी, कोल्हापूर

'सरकारच्या नव्या धोरणांची अंमलबजावणी करण्यात काही अधिकारी कुचराई करत असल्याच्या तक्रारी आहेत. अशा अधिकाऱ्यांची गय केली जाणार नाही, असा इशारा राज्याचे उद्योगमंत्री सुभाष देसाई यांनी शुक्रवारी दिला. कोल्हापूरच्या ग्लोबल व्हिजन ग्रुपच्यावतीने आयोजित 'मेक इन इंडिया' कार्यशाळेचे उदघाटन उद्योगमंत्री देसाई यांच्या हस्ते झाले.

व्यासपीठावर महाराष्ट्र औद्योगिक विकास महामंडळाचे सीईओ भूषण गगराणी, ग्लोबल व्हिजन ग्रुपचे निमंत्रक मोहन मुल्हेरकर यांच्यासह औद्योगिक संघटनांचे प्रतिनिधी उपस्थित होते. शहाजी हॉटेलमध्ये झालेल्या या कार्यशाळेत दीडशेहून अधिक उद्योजक सहभागी झाले होते. मंत्री देसाई यांनी वीजेच्या प्रश्नाबरोबर मेक इन इंडियाच्या माध्यमातून राज्यात निर्माण होत असलेल्या संधीची माहिती दिली.

देसाई म्हणाले, 'अधिकारी अडवणूक करत असल्याच्या तक्रारी उद्योजकांकडून होत आहेत. सचिव पातळीवर कामे मार्गी लागत आहेत. मात्र, खालच्या किंवा मधल्या पातळीवर अधिकारी उद्योजकांची अडवणूक करत आहेत. अशा झारीतील शुक्राचार्यांची सरकार गय करणार नाही. मेक इन इंडिया ही महाष्ट्रातील उद्योजकांसाठी आणखी एक मोठी संधी आहे. यामुळे उद्योग क्षेत्रातील महाराष्ट्राचे स्थान आणखी मजबूत होईल.'

'एमआयडीसी'चे सीईओ गगराणी म्हणाले, 'महाराष्ट्रात गुंतवणुकीचा ओघ वाढला आहे. दुर्देवाने राज्यात उद्योगांसाठी आता जागा अपुरी पडत आहे. गोकुळ आणि कागल परिसरात अजून २०० ते ३०० हेक्टर जागेची गरज आहे. सध्या देशातील एकूण औद्योगिक उत्पादनाच्या १६ टक्के वाटा महाराष्ट्राचा आहे. तो २५ टक्क्यांपर्यंत नेण्याचे आमचे धेय्य आहे.'

व्यासपीठावर 'स्मॅक'चे अध्यक्ष सुरेंद्र जैन, गोशिमा'चे अध्यक्ष देवेंद्र दिवाण, 'मॅक'चे अध्यक्ष संजय जोशी, 'चेंबर ऑफ कॉमर्स'चे अध्यक्ष आनंद माने, 'फौंड्री क्लस्टर'चे अध्यक्ष सचिन पाटील, उद्योजक चंद्रकात जाधव यांच्यासह ग्रुपचे अध्यक्ष शीतल मिरजे, सहनिमंत्रक विक्रांत कदम, उद्योजक एस. एस. पाटील आदी उपस्थित होते.

कार्यक्रमास आमदार राजेश क्षीरसागर, चंद्रदीप नरके, सुजित मिणचेकर, प्रकाश आबिटकर, शिवसेनेचे जिल्हा संपर्क उपप्रमुख प्रा. संजय मंडलिक आदी उपस्थित होते. स्वागत योगेश कुलकर्णी यांनी केले.

'मेक इन कोल्हापूर' व्हावे

कोल्हापूरच्या औद्योगिक क्षेत्राचा गौरव करताना उद्योगमंत्री देसाई म्हणाले, 'मेक इन इंडिया हे धोरण मेक इन महाराष्ट्र शिवाय शक्य नाही आणि मेक इन महाराष्ट्र हे मेक इन कोल्हापूर शिवाय शक्य नाही.' कोल्हापूरचा उद्योजक अडचणींना डगमगत नाही. त्यामुळेच कोल्हापूर हे महाराष्ट्राचे ग्रौथ इंजिन असल्याचा उल्लेख देसाई यांनी केला.

गुंतवणुकीत आता महाराष्ट्रच अग्रेसर

युरोप, अमेरिकेतील आतरराष्ट्रीय कंपन्या महाराष्ट्रात गुंतवणूक करण्यास इच्छुक आहेत. देशातील इतर राज्यांच्या तुलनेत महाराष्ट्राला गुंतवणुकीसाठी प्राधान्य दिले जात आहे. मेक इन इंडियाच्या माध्यमातून आम्ही राज्यातील उद्योगांनाही प्रोत्साहन देण्याचे धोरण स्वीकारले आहे. त्यामुळेच येत्या काही महिन्यांत राज्यात ७५ हजार कोटी रुपयांची नवी गुंतवणूक झाली आहे' अशी माहिती उद्योगमंत्री देसाई यांनी या कार्यक्रमावेळी दिली.

मोबाइल अॅप डाउनलोड करा आणि राहा अपडेट

शरद पवार यांचा आजपासून दौरा

January 16, 2016, 9:36 am

≫ Next: धार्मिक कट्टरतेविरोधात एटीएसकडून तरुणांचे प्रबोधन

≪ Previous: सरकार गय करणार नाही

$

0

0

म. टा. प्रतिनिधी, कोल्हापूर

माजी केंद्रिय मंत्री व राष्ट्रवादीचे अध्यक्ष रविवारपासून (ता.१७) दोन दिवस कोल्हापूर दौऱ्यावर आहेत. रविवार व सोमवारी त्यांच्या उपस्थितीत विविध कार्यक्रम होणार आहेत. रविवारी दुपारी अडीच वाजता ते हेलिकॉप्टरने शिरोळला येणार आहेत. तेथे त्यांच्याहस्ते माजी आमदार कै. आप्पासाहेब उर्फ सा.रे.पाटील यांच्या पुतळ्याचे अनावरण करण्यात येईल. दत्त कारखान्याच्या कार्यस्थळावर कार्यक्रम होणार आहे. तेथून साडेपाच वाजता शिरोली येथील विवेक इंजिनीअरिंगचे उद्‍घाटन व 'स्मॅक'च्या पदा​धिकाऱ्यांशी चर्चा करतील. साडेसहा वाजता मुस्लिम बोर्डिंग येथे कोल्हापूर प्रेस क्लबच्यावतीने त्यांचे व्याख्यान आयोजित केले आहे. सोमवारी (ता.१८) सकाळी साडेदहा वाजता कोल्हापूर अर्बन बँकेच्या शतकमहोत्सव सांगता समारंभानिमित्त ताराबाई पार्क येथील धैर्यप्रसाद कार्यालयात आयोजित कार्यक्रमाला उपस्थिती आणि नंतर बारा वाजता मार्केट यार्ड येथील शाहू सांस्कृतिक सभागृहात शेतकरी संघाचा अमृतमहोत्सवी कार्यक्रम त्यांच्या उपस्थितीत होणार आहे.

मोबाइल अॅप डाउनलोड करा आणि राहा अपडेट

धार्मिक कट्टरतेविरोधात एटीएसकडून तरुणांचे प्रबोधन

January 16, 2016, 1:30 pm

≫ Next: दुभाजकाला धडकून महाविद्यालयीन युवक ठार

≪ Previous: शरद पवार यांचा आजपासून दौरा

$

0

0

म. टा. प्रतिनिधी, कोल्हापूर

सोशल मीडियाव्दारे धार्मिक संघटना तरूणांना कट्टरेतकडे वळवत आहेत. धार्मिक कट्टरतेपासून तरूणांना परावृत्त करण्यासाठी एटीएसने प्रयत्न सुरू केले आहेत, अशी माहिती दहशतवादीविरोधी पथकाचे (एटीएस) वरिष्ठ पोलिस निरीक्षक भानूप्रताप बर्गे यांनी पत्रकारांशी बोलताना माहिती दिली. बर्गे यांनी शनिवारी सायंकाळी शहरातील मौलवींबरोबर संवाद साधला. मुस्लिम बोर्डिंग येथे चर्चा झाली.

बर्गे म्हणाले, 'जगभरातील तरूण आयसीसकडे वळत आहेत. भारतातील तरूणांना सोशल मीडियाच्या माध्यमातून आयसीसकडे वळवण्याचे प्रकार सुरू आहेत. या पार्श्वभूमीवर एटीएसने डिसेंबरपासून शाळा, महाविद्यालये, संस्था, धार्मिक नेते व धर्मगुरूंच्या बैठका घेण्यास सुरूवात केली आहे. आयसीसीचा धोका मोठा असल्याने मुस्लिमधर्मियांनी स्वतःहून आपल्या धर्माची चांगली शिकवण व तत्वे सांगण्यास पुढे आले पाहिजे. पालकांनीही जागरूक राहिले पाहिजे. तरूणांच्या वागण्यातील बदलाकडे लक्ष द्यावे. चुकीचे पाऊल पडण्याऐवजी अशा मुलांना मुख्य प्रवाहात आणण्यासाठी प्रयत्न केले जात आहेत. चुकीचे पाऊल पडलेल्या तरूणांवर थेट गुन्हे दाखल केले जाणार नाहीत तर त्यांचे प्रबोधन करण्याचे प्रयत्न केले जातील. अशा प्रयत्नांना यश मिळत आहे. त्यादृष्टीने एटीएसने बैठका सुरू केल्या आहेत.

मोबाइल अॅप डाउनलोड करा आणि राहा अपडेट

दुभाजकाला धडकून महाविद्यालयीन युवक ठार

January 16, 2016, 1:30 pm

≫ Next: पवारांचा बिगरराजकीय दौरा

≪ Previous: धार्मिक कट्टरतेविरोधात एटीएसकडून तरुणांचे प्रबोधन

$

0

0

म. टा. प्रतिनिधी, कोल्हापूर

शिवाजी विद्यापीठ एनसीसी ऑफिस ते सायबर या रस्त्यावर दुभाजकाला जोरदार धडक दिल्याने मोटारसायकलस्वार ठार झाला. यश शिवाजी चावरेकर (वय १८, रा. ग्रीन पार्क, समता कॉलनी, मोरेवाडी) असे त्याचे नाव आहे. तो राजाराम कॉलेजमध्ये बारावीत शिकत होता. मित्राची मोटारसायकल चालवत असताना त्याची दुभाजकाला धडक बसली. याबाबतची नोंद राजारामपुरी पोलिस ठाण्यात झाली आहे.

शनिवारी सकाळी मित्राची मोटारसायकल घेऊन यश राम मंगल कार्यालय, एनसीसी ऑफिसमार्गे सायबर रस्त्याकडे वेगाने निघाला होता. स्टाइलमध्ये मोटार चालवत असताना त्याचा ताबा सुटल्याने मोटारसायकल दुभाजकाला जोरात धडकली. त्यामुळे तो गंभीर जखमी झाला. त्याला उपचारासाठी सीपीआर हॉस्पिटलमध्ये उपचारासाठी दाखल करण्यात आले, पण उपचारापूर्वीच त्याचा मृत्यू झाला होता. यश हा सहाय्यक फौजदार शिवाजी चावरेकर यांचा एकुलता मुलगा होता. त्याच्या पश्चात आई, वडील, चार बहिणी असा परिवार आहे.

मोबाइल अॅप डाउनलोड करा आणि राहा अपडेट

---

पवारांचा बिगरराजकीय दौरा

January 16, 2016, 11:28 am

≫ Next: मेगाब्लॉकमुळे रेल्वेसेवा विस्कळीत

≪ Previous: दुभाजकाला धडकून महाविद्यालयीन युवक ठार

$

0

0

कोल्हापुरातील राष्ट्रवादीतील गटबाजीला लगाम घालण्याचे आव्हान

Gurubal.Mali@timesgroup.com

कोल्हापूर ः लोकसभा, विधानसभा, जिल्हा बँक, बाजार समिती, महापालिका अशा अनेक निवडणुकीतील यशानंतर जिल्ह्यात राष्ट्रवादीची ताकद वाढत असल्याचे ​स्पष्ट होत आहे. पण महापालिका आणि विधानपरिषद निवडणुकीच्या निमित्ताने पक्षाला गटबाजीचे ग्रहण लागले आहे. कोणत्याही निवडणुकीची रणधुमाळी नाही, प्रचाराचा धुरळा नाही, अशा ​परिस्थितीत पक्षाचे अध्यक्ष शरद पवार दोन दिवस कोल्हापूर दौऱ्यावर येत आहेत. राजकीय दौरा नसतानाही गटबाजीच्या पार्श्वभूमीवर होत असलेल्या या दौऱ्याला महत्व आहे. या दौऱ्यात गटबाजीला लगाम घालण्याचे आव्हान त्यांच्यासमोर आहे.

जिल्ह्यातील लोकसभेच्या दोन्ही जागा राष्ट्रवादीकडे होत्या. काँग्रेसने फारसा आग्रह न धरता पवारांनी हातकणंगलेची जागा काँग्रेसला दिली. कल्लाप्पाणा आवाडे यांना पक्षाची उमेदवारी देण्यातही पवार यांचाच पुढाकार होता. ज्येष्ठ नेते सदाशिवराव मंडलिक यांनी केलेला राष्ट्रवादीचा पराभव पवारांच्या जिव्हारी लागला होता. त्यामुळे त्यांनी दोन वर्षे कोल्हापुरात येणे टाळले होते. या पार्श्वभूमीवर त्यांनी धनंजय महाडिक यांना पक्षाची उमेदवारी देऊन काँग्रेसच्या मदतीने कोल्हापूरवर राष्ट्रवादीचा झेंडा फडकवला. त्यानंतर झालेल्या विधानसभा निवडणुकीत पक्षाला फार मोठे यश आले नाही. पण काँग्रसला एकही जागा न मिळाल्याच्या पार्श्वभूमीर राष्ट्रवादीने किमान दोन जागा तरी मिळवल्या.

विधानसभेनंतर आमदार हसन मुश्रीफ यांनी काँग्रेसचीच मदत घेत अनेक संस्थांवर राष्ट्रवादीचा झेंडा फडकवला आहे. गोकुळ दूध संघात पक्षाने चंचूप्रवेश केला. त्यानंतर जिल्हा बँकेची सत्ता मिळवली. बाजार स​मिती ताब्यात घेतली. महापालिकेत सत्तेत सहभाग मिळवला. जिल्हा परिषद वगळता बहुतेक ठिकाणी सत्ता मिळवताना राष्ट्रवादीने आपली ताकद वाढवली आहे. विधानपरिषद निवडणुकीत काँग्रेसला प्रामाणिकपणे मदत करत विजयाचे खरे शिल्पकार आपणच असल्याचे दाखवून दिले.

या सर्व यशोगाथेच्या पार्श्वभूमीवर पक्षाला गटबाजीचे ग्रहण लागले आहे. त्याची सुरूवात विधानसभा निवडणुकीत झाली. महापालिका, विधानपरिषद निवडणुकीत ती उफाळून आली. पक्षाचे खासदार धनंजय महाडिक आणि आमदार हसन मुश्रीफ यांच्यात शीतयुध्द सुरू आहे. विधानपरिषद निवडणुकीत चुलत बंधू, भाजपचे उमेदवार आणि विधानपरिषद निवडणुकीत काका अपक्ष उमेदवार असल्याने खासदारांनी त्यांच्या प्रचाराची सूत्रे सांभाळली. महापालिका निवडणुकीत पक्षाच्या प्रचारापासून अलिप्त राहण्याचे धोरण स्वीकारले. यामुळे पक्षाचे नुकसान झाल्याचा आरोप मुश्रीफ सातत्याने करत आहेत. यातूनच पक्षाच्या कार्यक्रमालाच न बोलवण्याचे धाडस दाखवले जात आहे. याचा राग म्हणून महाडिक यांनी पक्षाला बेदखल करत भाजपशी सलगी वाढवली आहे.

राष्ट्रवादीत आता जुने विरूध्द नवे असाही संघर्ष सुरू झाला आहे. या पार्श्वभूमीवर शरद पवार कोल्हापूर दौऱ्यावर येत आहेत. पक्षाला वाद नवा नाही. मंडलिक-मुश्रीफ वाद पचवलेल्या पक्षाला सध्याचा वाद किरकोळ आहे. पवारांच्या एका दौऱ्यात अनेक वाद शांत होतात. महाडिक गटाची ताकद पक्षाला हवी आहे. राज्यात चारच खासदार असल्याने महाडिक यांना महत्व आहे. यामुळे त्यांना पक्षात अधिक सक्रीय करण्याच्या दृष्टीने अधिक प्रयत्न होण्याची शक्यता आहे. सध्या महाडिक गटाची जवळिकता भाजपशी जास्त आहे. अमल महाडिक भाजपचे आमदार आहेत. माजी आमदार महादेवराव महाडिक यांना भाजपने विधानपरिषद निवडणुकीत उघड पाठिंबा दिला होता. भाजपला या गटाची ताकद हवी आहे. याची जाणीव पवार यांना आहे. यामुळे पवार या वादावर फुंकर घालण्याची दाट शक्यता आहे.

भाजपशी जवळीकता

महाडिक गटाची जवळिकता भाजपशी जास्त आहे. अमल महाडिक भाजपचे आमदार आहेत. माजी आमदार महादेवराव महाडिक यांना भाजपने विधानपरिषद निवडणुकीत उघड पाठिंबा दिला होता. भाजपला या गटाची ताकद हवी आहे. हा गट त्या पक्षात गेल्यास राष्ट्रवादीचे आणि काँग्रेसचेही नुकसान होणार आहे.

मोबाइल अॅप डाउनलोड करा आणि राहा अपडेट

मेगाब्लॉकमुळे रेल्वेसेवा विस्कळीत

January 16, 2016, 11:37 am

≫ Next: पाणीमीटर चोरटा अटकेत

≪ Previous: पवारांचा बिगरराजकीय दौरा

$

0

0

म. टा. प्रतिनिधी, कोल्हापूर

जयसिंगपूर ते हातकणंगले दरम्यान रेल्वे मार्गाच्या दुरुस्तीसाठी शनिवार मध्यरात्रीपासून रविवारी सकाळपर्यंत मेगाब्लॉकमुळे मिरज-कोल्हापूर रेल्वे सेवा बंद राहणार आहे. त्यामुळे रविवारी सकाळी सह्याद्री एक्स्प्रेस, सोलापूर-कोल्हापूर एक्स्प्रेस मिरजेपर्यंत धावणार आहे. कोल्हापूरातून सुटणारी पुणे पॅसेंजर व हैदराबाद एक्स्प्रेस मिरजेतून सोडण्यात येणार आहे.

जयसिंगपूर ते हातकणंगले दरम्यान रेल्वेमार्ग दुरुस्तीसाठी शनिवारी मध्यरात्री एक ते रविवारी सकाळी आठ वाजेपर्यंत मिरज-कोल्हापूर मार्गावरील रेल्वे वाहतूक बंद राहणार आहे. मेगाब्लॉक असल्यामुळे शनिवारी रात्री कोल्हापूरला येणारी सांगली-कोल्हापूर पॅसेंजर मिरजे रेल्वे स्थानकावर थांबवण्यात आली. रविवारी सकाळी कोल्हापूर-पुणे धावणारी पॅसेंजर रेल्वे मिरजेतून सुटणार आहे. तर मुंबईहून कोल्हापूरकडे येणारी सह्याद्री एक्स्प्रेस मिरजेतच थांबवण्यात आली आहे.

दोन आठड्यापूर्वी दुरुस्तीसाठी मेगा ब्लॉक घेण्यात आला होता. मात्र काम अपूर्ण असल्याने पुन्हा मेगा ब्लॉक घेण्यात आला आहे. सकाळी आठनंतर रेल्वे सेवा सुरळीत होणार आहे. पहाटे साडेचार वाजता येणारी सोलापूर-कोल्हापूर एक्स्प्रेस मिरजेत येथे थांबणार असून हीच रेल्वे मिरजेतून कोल्हापूर-हैदराबाद एक्स्प्रेस म्हणून मिरज येथून प्रयाण करणार आहे.

मोबाइल अॅप डाउनलोड करा आणि राहा अपडेट

पाणीमीटर चोरटा अटकेत

January 16, 2016, 11:38 am

≫ Next: सुपारी किलरला जन्मठेप

≪ Previous: मेगाब्लॉकमुळे रेल्वेसेवा विस्कळीत

$

0

0

म. टा. प्रतिनिधी, कोल्हापूर

पाणी मीटर चोरणारा नितीन दीपक अंभगे (रा. जुना कंदलगाव नाका, जवाहरनगर) याला राजारामपुरी पोलिसांनी अटक केली. तसेच चोरीचे मीटर खरेदी करणाऱ्या साई उर्फ प्रकाश बापू लाखे (रा. राजेंद्रनगर) व रियाजुद्दीन सिरायुद्दीन (रा. पिटकरी, उत्तरप्रदेश. सध्या रा. सत्कार लॉज) या दोघांना अटक केली. पोलिसांनी प्रत्येकी दोन हजार रूपये किंमतीची १८ पाण्याची मीटर जप्त केली. पाणी मीटर चोरीचा तपास करताना पोलिस निरीक्षक अमृत देशमुख यांना चोरी व घरफोडीतील रेकॉर्डवरील गुन्हेगार नितिन अंभगे यांची माहिती पोलिसांना मिळाली होती. पोलिसांनी त्याच्याकडे चौकशी केली असता त्याने चोरीची कबुली दिली. तसेच साई लाखे व रियाजउद्दीन याला १८ मीटर विकल्याची कबुली दिली. देशमुख यांच्या मार्गदर्शनाखाली पोलिस उपनिरीक्षक आण्णाप्पा कांबळे यांनी तपास केला.

मोबाइल अॅप डाउनलोड करा आणि राहा अपडेट

सुपारी किलरला जन्मठेप

January 16, 2016, 11:40 am

≫ Next: ‘होर्डिंगप्रश्नी यापूर्वीच प्रतिज्ञापत्र’

≪ Previous: पाणीमीटर चोरटा अटकेत

$

0

0

म. टा. प्रतिनिधी, कोल्हापूर

सुपारी घेऊन तरूणाचा खून केल्याप्रकरणी येथील अमर तानाजी लोखंडे (वय २४, रा. साळखे पार्क, कट्टा ग्रुप, राजारामपुरी) याला सत्र न्यायाधीश के. डी. बोचे यांनी जन्मठेपेची शिक्षा व दहा हजार रूपये दंडाची शिक्षा ठोठावली. अमर म्हाकवेकर याच्या खूनाची सुपारी त्याच्याच आईने दिली होती. याप्रकरणी संशयित सुशीला म्हाकवेकर (५२, राजेबागस्वार दर्गा) व तिची मैत्रिण रोशनबी कलंदर मुजावर (३७, रा. राजेबागस्वार दर्गा) यांची कोर्टाने निर्दोष मुक्तता केली.

अमर म्हाकवेकर याच्या मृत्यूची फिर्याद आई सुशीला म्हाकवेकर यांनी १५ जून २०१३ रोजी लक्ष्मीपुरी पोलिस ठाण्यात दिली होती. पोलिसांनी तपास केला असता आई सुशिलाने तिची मैत्रिण रोशनबी मुजावर यांच्या मदतीने मुलाचा काटा काढण्यासाठी अमर लोखंडे याला सुपारी दिली होती. सुशीला या रोशनबी यांच्या घरी वारंवार जात होत्या. पण मयत अमर म्हाकवेकर याला ते आवडत नव्हते. त्यामुळे आई व मुलांच्यात भांडणे होत होती. रोशनबी यांनी सुशीला यांना अमरला ठार मारण्याचा सल्ला दिला. अमर लोखंडे यांनी १५ जून रोजी दारूमध्ये गोळ्या घालून अमर म्हाकवेकर याला दारू प्यायला दिली. रात्री साडेनऊ वाजता टाऊन हॉल बसस्टॉपजवळ अमर लोखंडे याने रूमालाने त्याचा गळा आवळून खून केला.

न्यायाधीश बोचे यांच्यासमोर हा खटला चालला. या गुन्ह्यात प्रत्यक्ष साक्षीदार नव्हता. सरकारी वकील एन.बी. आयरेकर यांनी १२ साक्षीदार तपासले. या घटनेच्या दरम्यान कोल्हापुरात फिरस्ता खुनाचे सत्र सुरू होते. त्यामुळे रात्री पोलिस बंदोबस्त व पेट्रोलिंग करत होते. पोलिस कॉन्स्टेबल साजिद शिकलगार यांनी मयत अमर म्हाकवेकर व आरोपी अमर लोखंडे यांना एकत्र पाहिले होते. तसेच बिर्याणी गाडीवाला महमंद गौस जहांगिर बेग यांनीही दोघांना एकत्र पाहिले होते. रिक्षाचालक महमंद कासिम शेख यांनी रात्री एकच्या दरम्यान अमर लोखंडे याला पद्मा चौक येथून साळोखे पार्क येथे रिक्षाने सोडले होते. रिक्षाचालकाने गुन्ह्यात वापरण्यात आलेला रूमाल ध्यानचंद हॉकी स्टेडियमजवळ टाकलेले पाहिले ​होते. तपास अधिकारी पोलिस निरीक्षक पी. डी. पोमण व साक्षीदारांच्या साक्षी ग्राह्य धरून न्यायाधीशांनी अमर लोखंडे यांना जन्मठेपेची शिक्षा व दहा हजाराचा रूपयाचा दंड ठोठावला.

हायकोर्टात आव्हान

कोर्टाने निर्दोष मुक्तता केल्यानंतर मुंबई हायकोर्टात दाद मागणार असल्याचे सरकारी वकील एन.बी. आयरेकर यांनी सांगितले. आईने सुपारी देऊन मुलग्यााचा खून केला असा सुशीला यांच्यावर आरोप होता. टाऊन हॉल बसस्टॉपजवळ त्याचा मृतदेह मिळाल्यानंतर त्याच्या आईने कांगावा करत टाहो फोडला होता.

मोबाइल अॅप डाउनलोड करा आणि राहा अपडेट

‘होर्डिंगप्रश्नी यापूर्वीच प्रतिज्ञापत्र’

January 16, 2016, 11:41 am

≫ Next: ‘स्वीकृत’ निवडी बिनविरोध

≪ Previous: सुपारी किलरला जन्मठेप

$

0

0

म. टा. प्रतिनिधी, कोल्हापूर

शहरातील बेकायदा होर्डिंग हटवण्याच्या कारवाईत चालढकल करणाऱ्या आणि या कारवाईचा अहवाल वेळत उच्च न्यायालयाकडे सादर न करणाऱ्या राज्यातील दहा महापालिकांना उच्च न्यायालयाने फटकारले होते. कोल्हापूर महापालिकेलाही याबाबत कोर्टाच्या अवमानप्रकरणी कारवाई का करू नये, अशी विचारणा करणारी नोटीस पाठवली आहे. यावर कोल्हापूर महापालिका प्रशासनाने बेकायदा होर्डिंगप्रकरणी कारवाई सुरूच असून, यापूर्वीच हायकोर्टात प्रतिज्ञापत्र सादर केले असल्याचे स्पष्टीकरण दिले आहे.

शहरात वाढदिवस, शुभेच्छा यासह काही कार्यक्रमांचे बेकायदा होर्डिंग रातोरात उभारली जातात आणि शहराचे विद्रुपीकरण होते. या प्रकाराला आळा घालण्यासाठी उच्च न्यायालयाने राज्यातील सर्वच शहरांना बेकायदा होर्डिंगवर कारवाई करून अहवाल सादर कण्याच्या सूचना दिल्या होत्या. कोल्हापूरसह दहा महापालिकांनी वेळेत अहवाल सादर न केल्याने नुकतेच मुंबई हायकोर्टाने संबंधित दहा महापालिक प्रशासनाची कानउघडणी केली. कोर्टाच्या निर्णयाचा अवमान केल्याबद्दल कारवाई का करू नये, अशी विचारणाही केली आहे. याबाबत कोल्हापूर महापालिकेचे आयुक्त पी. शिवशंकर यांच्याशी संपर्क साधला असता त्यांनी याबाबतची माहिती देताना महापालिकेने यापूर्वीच हायकोर्टात प्रतिज्ञापत्र सादर केल्याचे सांगितले. 'कोल्हापूर महापालिका प्रशासनाने कोर्टाच्या आदेशानुसार वेळोवेळी बेकायदा होर्डिंग हटवण्याचे काम केले असून, संबंधितांवर कारवाईदेखील केली आहे. कोर्टाच्या सूचनेनुसार कारवाईची माहिती वकिलांकरवी सादर केली आहे. यापुढेही बेकायदा होर्डिंगवर कारवाई सुरूच राहणार आहे', अशी माहिती शिवशंकर यांनी दिली.

कोल्हापूर महापालिकेच्या वकिलांनी संबंधित कारवाईचे प्रतिज्ञापत्र हायकोर्टात सादर केल्याचा दावा आयुक्तांनी केला आहे, मात्र ते प्रतिज्ञापत्र वकिलांनी वेळेत सादर केले नाही, की हायकोर्टाला उपलब्ध झालेली माहिती अपुरी आहे याबाबत संभ्रमावस्था निर्माण झाली आहे. दरम्यान, याबाबत महापालिकेच्या इस्टेट विभागातील अधिकाऱ्यांशी संपर्क साधन्याचा प्रयत्न केला असता शनिवारी दिवसभर त्यांचा मोबाइल बंद होता. आयुक्त पी. शिवशंकर यांनी मात्र बेकायदा होर्डिंगवर यापुढेही कारवाई सुरूच राहील असे सांगितले आहे.

मोबाइल अॅप डाउनलोड करा आणि राहा अपडेट