राजमाता जिजाऊ यांचा जन्मदिन व स्वामी विवेकानंद यांच्या जयंतीचे औचित्य साधून डॉ. सायरस पूनावाला इंटरनॅशनल स्कूलचा विद्यार्थी पृथ्वीराज संजय शहापुरेने बेळगाव ते कोल्हापूर १२५ किमी अंतर सायकलिंगने ५ तास ५५ मिनिटे ४४ सेकंदात पूर्ण करून विश्वविक्रम केला. पृथ्वीराजचे वय अवघे दहा वर्षे असून या वयात केलेला उपक्रमाची युनिक बुक ऑफ वर्ल्ड रेकॉर्डमध्ये नोंद झाली आहे.
पृथ्वीराज हा वयाच्या सहाव्या वर्षापासून सायकलिंग करीत आहे. विक्रम करण्यासाठी त्याने सहा महिन्यापासून प्रति दिवस ३० ते ४० किमीचा सराव केला. सकाळी साडेसहा वाजता बेळगावच्या मराठा सेवा मंडळापासून पृथ्वीराजने सायकलिंगची सुरुवात झाली. बेळगावपासून सुमारे वीस किलोमीटर अंतरपर्यंत थंडी आणि वेगाशी स्पर्धा करत त्याने अखंडपणे प्रवास सुरु केला. परदेशी बनावटीच्या सायकलीवरुन या चिरमुड्याने अवितरपणे कोल्हापूर गाठले. शाहू टोल नाका येथे आल्यानंतर त्याच्या आनंदा पारावार राहिला नाही. भवानी मंडपात दाखल झाल्यानंतर त्याचे जल्लोषी स्वागत करण्यात आले. मुलाने केलेला हा विक्रम पाहून शहापुरे कुटुंबियांच्या आनंदाला पारावार उरला नाही. सायकलिंगच्या माध्यमातून त्याने 'पश्चिम घाट वाचवा' असा संदेश दिला.
पृथ्वीराजला वयाच्या चौथ्या वर्षापासून सायकलिंगची आवड आहे. त्याच्या कुटुंबियांनी ही आवड जोपासण्यासाठी त्याला नामंवत कंपन्याच्या सायकली घेऊन दिल्या. तो शालेय गटातील स्पर्धेतही सहभागी झाला. त्यात दोन पारितोषिके मिळविली आहेत. रग्गड सह्याद्रीतही त्याने सहभाग घेतला होता. त्याने कोल्हापूर ते बेळगाव अंतर सहा तासांत पूर्ण करण्याचा संकल्प तीन महिन्यांपूर्वी केला होता. त्यासाठी दररोज त्याचा सराव सुरु होता. युनिक बुक ऑफ वर्ल्ड रेकॉर्डच्या अधिकारी ज्योती चंडक यांनी हा विश्वविक्रम झाल्याचे घोषित केले.
भवानी मंडपात श्रीमंत छत्रपती शाहू महाराज, जिल्हाधिकारी डॉ. अमित सैनी, जिल्हापोलिस प्रमुख प्रदीप देशपांडे, महापौर आश्विनी रामाणे, उपमहापौर शमा मुल्ला, श्री शाहू शिक्षण प्रसारक सेवा मंडळाचे अध्यक्ष गुलाबराव पोळ, डॉ. सायरस पूनावाला इंटरनॅशनल स्कूलच्या अध्यक्षा विद्या पोळ, सारिका शहापुरे, प्राचार्य सरदार जाधव, क्रीडा प्रशिक्षक सागर पाटील, कुबेर पाटील, शशीन कुंभोजकर, शारदा मोरे, शिवानी पाटील आदी उपस्थित होते.
'विक्रम'वीराचे विद्यापीठात स्वागत
पृथ्वीराजचे शिवाजी विद्यापीठात आगमन होताच विद्यापीठातर्फे परीक्षा नियंत्रक महेश काकडे यांनी पुष्पगुच्छ देऊन त्याचे स्वागत केले. एनसीसी विभागाचे कर्नल बेली अप्पा, कृषी कॉलेजचे प्राचार्य जी. जी. खोत आदी यावेळी उपस्थित होते.
'प्रबळ इच्छाशक्ती असल्यास कोणतीही स्पर्धा अवघड नाही. दररोजचा सराव विक्रम करण्यासाठी उपयोगी ठरला. भविष्यात यापुढेही मोठे ध्येय आहे. सर्वांच्या पाठबळावर अनेक स्पर्धा जिंकण्यासाठी प्रेरणा मिळाली. बेळगाव ते कोल्हापूर अंतर पार केल्याने आत्मविश्वास मिळाला.
- पृथ्वीराज शहापुरे, सायकलपटू
मोबाइल अॅप डाउनलोड करा आणि राहा अपडेट