'ऑनर किलिंगमधील प्रतिष्ठेच्या राजकारणापाठीमागे जातीचा नव्हे तर पितृसत्ताक कुटुंब पद्धतीचा पदर आहे. बाईने निर्णय घेतला तर तो खपवून घेतला जाणार नाही हेच त्यातून दाखवून द्यायचे असते,' असे मत सामाजिक कार्यकर्त्या उल्का महाजन यांनी व्यक्त केले. यावेळी ऑनर किलिंगचा निषेध करत कुटुंब, नातेवाईक, समाजाकडून त्रास दिल्या जाणाऱ्या आंतरजातीय, आंतरधर्मीय विवाह करणाऱ्यांना सहकार्य म्हणून सरकारकडून तीन लाख रुपये व सरकारी नोकरीमध्ये राखीव जागा ठेवाव्यात, विवाहापूर्वी वैद्यकीय चाचणी अनिवार्य करावी, असे ठराव करण्यात आले.
ऑनर किलिंगमधून मेघा व इंद्रजीत या दोघांच्या झालेल्या खुनाच्या पार्श्वभूमीवर शहीद गोविंद पानसरे विचार मंचच्यावतीने सोमवारी शाहू स्मारकमध्ये ऑनर किलिंग विरोधी परिषदेचे आयोजन केले होते. यावेळी जिल्हा पोलिस अधीक्षक प्रदिप देशपांडे उपस्थित होते. याप्रसंगी आंतरजातीय व आंतरधर्मीय विवाह केलेल्या दांपत्यांचा सत्कार करण्यात आला. अध्यक्षस्थानी अनिल चव्हाण होते.
महाजन म्हणाल्या, 'प्रतिष्ठेच्या नावाखाली केले जाणारे खून, सुखाचे संसार केलेल्या जोडप्यांचा सत्कार व नवीन विवाहाचे आयोजन असे तीन कार्यक्रम एकत्रित घेऊन समाजाला एक नवी दिशा दाखवण्याचा प्रयत्न मंचने केला आहे. माणुसकीच्या वाटेवर चालताना जातीभेद वाईटच असून तो दूर केली पाहिजे. ऑनर किलिंगमध्ये पितृसत्ताक कुटुंब पद्धतीचा भाग जाणवतो. मुलींकडील नातेवाईक यामध्ये अग्रेसर असतात. त्यांच्याकडून बाईने घेतलेला निर्णय खपवून घेतला जाणार नाही, असे दाखवण्यात येते. यामध्ये खून करुन कोणती प्रतिष्ठा जपली जाते हा मोठा प्रश्न आहे. त्याचा केवळ निषेधच करता येऊ शकतो.'
पोलिस अधीक्षक देशपांडे म्हणाले, 'ऑनर किलिंगसारख्या घटनांमुळे आंतरजातीय, आंतरधर्मीय विवाह करणाऱ्यांना अजूनही असुरक्षित वाटते. याकरिता पोलिस अधिकाऱ्यांमध्ये संवेदनशीलता आणण्याची गरज आहे. त्यासाठी सुरक्षेचे प्रश्न, पोलिसांनी हे प्रकरण कसे हाताळायचे, संवेदनशीलता कशी जपायची याची कार्यशाळा घेण्यात येणार आहे.' याप्रसंगी आंतरजातीय व आंतरधर्मीय विवाह केलेल्या दांपत्यांनी भावना व्यक्त केल्या. काही कॉलेज तरुणींनीही मते मांडली.
याप्रसंगी सतिश कांबळे, गिरीष फोंडे, मनीषा बुचडे, दिलावर जमादार, इंद्रजीत कुलकर्णी याचे काका रघुनाथ कुलकर्णी उपस्थित होते. प्रदीप आंदोजी यांनी सूत्रसंचालन केले. प्रियांका कांबळे यांनी आभार मानले. तेजस्विनी पांचाळ यांनी पाहुण्यांची ओळख करुन दिली.
चौकट
ठार मारण्यासाठी गुंडाला सुपारी
आंतरजातीय, आंतरधर्मीय विवाह केलेल्यांना पूर्वी घरातून धमकी देण्यात यत असत. तीच परिस्थिती आजही असल्याचे काहींनी व्यक्त केलेल्या मतांतून दिसून आले. आंतरधर्मीय विवाह केलेल्या एका युवतीने तर आपल्या पतीला मारण्यासाठी एका गुंडाला सुपारी दिल्याची धक्कादायक माहिती जिल्हा पोलिस अधीक्षकांसमोरच दिली. तर एका युवतीने आमच्या दोघांपैकी कुणी दिसले तर ठार मारणार असा इशारा आपले आईवडील वारंवार देत असल्याचे सांगितले.
मोबाइल अॅप डाउनलोड करा आणि राहा अपडेट
