कोल्हापूर : ताल धरायला लावणारा ढोल-ताशाचा निनाद, लेझीमच्या ठेक्यावर फेर धरणारे आबालवृद्ध, मर्दानी खेळाची चित्तथरारक प्रात्यक्षिके, विविध कलागुण आणि गीत, नृत्यात रमलेला युवा वर्ग, पारंपरिक खेळाचा आनंद लुटणारे नागरिक, सायकलींचा थरार आणि रोप वेसारख्या साहसी खेळाचा आनंद लुटणारी बच्चे कंपनी अशा मौजमजेचा धमाका शहरवासीयांनी रविवारी सकाळी अनुभवला. निमित्त होते, 'महाराष्ट्र टाइम्स'तर्फे आयोजित 'हॅपी स्ट्रीट'चे! खेळ आणि मनोरंजनाची अनुभूती घेऊन येणाऱ्या 'हॅपी स्ट्रीट' या खेळ, मनोरंजनाच्या पर्वाला रविवारी सकाळी झकास सुरुवात झाली आणि बघता बघता हजारो नागरिक या आनंददायी सोहळ्यात सामील झाले. वय, पद या साऱ्या गोष्टींची झूल बाजूला ठेवत अडीच ते तीन तास फुल टू धमाल केली.
बालपणीच्या आठवणींना उजाळा देत कुणी विटी दांडू हाती घेतला, तर कुणी टायर पळविण्याच्या स्पर्धेत सहभागी होत चिअअप केले. रस्सीखेच हा चिमुकल्यांच्या आवडीचा खेळ, बच्चे कंपनी एकमेकांची ताकत आजमावण्यात दंग असताना मोठी मंडळी यामध्ये सहभागी झाले आणि 'जोर लगा के'चा नारा उंचावला. लेझीम, रस्सीखेच, पोत्यात पाय घालून पळणे या खेळ प्रकारातील जल्लोष तर टिपेला पोहचला. तरूणाईचे गीत, नृत्याचे सादरीकरण आणि हात उंचावत संगीताच्या तालावर फेर धरणारे सहकारी या जल्लोषी माहोलने कार्यक्रमाची रंगत आणखीनच वाढली. शाळकरी मुले, कॉलेजियन्स, ते मॉर्निग वॉकला येणाऱ्या नागरिकांनी 'हॅपी स्ट्रीट'चा आनंद लुटला. तलवारबाजी, लाठीकाठी अशा मर्दानी खेळाच्या चित्तथरारक प्रात्यक्षिकांनी उपस्थितांच्या अंगावर रोमांच उभे राहिले.मेजर ध्यानचंद हॉकी स्टेडियम ते यल्लम्मा मंदिर चौकपर्यंतचा रस्त्यावर सकाळी सात वाजल्यापासूनच शहरवासियांची रीघ लागली होती.
कोल्हापुरी फेटा, पांढरा कुर्ता-जीन्स परिधान केलेल्या आणि कपाळावर चंद्रकोर कोरलेल्या तरूण तरूणींचे पथक आणि तालबद्ध ढोल ताशा वादनाचा सामूहिक आविष्कार घडवित 'करवीर नाद' या कोल्हापुरातील मानद ढोल ताशा पथकाने करवीरवासियांवर मोहिनी घातली. तब्बल ७५ कलाकरांच्या या पथकाने अडीच तास वादन केले.
भारतीय संगीताच्या फ्यूजनवर आधारित सामूहिक वादन करताना महाराष्ट्रीयन, राजस्थानी, केरला संगीत प्रकार सादर केला. ३५ ढोल आणि १५ ताशांचा या पथकात समावेश आहे. शहरातील वेगवेगळ्या कॉलेजमध्ये शिकणाऱ्या युवा युवतींची यामध्ये विशेष करून सहभाग आहे. त्याचबरोबर शाळकरी मुले आणि नागरिकांचा यामध्ये समावेश होता. पथकाचे अध्यक्ष अक्षय पोतदार, उपाध्यक्ष संतोष वरेकर, सचिव सत्वधीर देसाई, खजानिस महेश चौगले यांच्यासह ७५ जणांचे पथक 'हॅपी स्ट्रीट'वर अवतरले आणि ढोल ताशा पथकाचा निनाद घुमू लागला. कलाकारांचा सामूहिक वादनाचा आविष्कार आणि नागरिकांची मिळणारी दाद असे चित्र 'हॅपी स्ट्रीट'वर निर्माण झाले.
'करवीर नाद'चा घुमला निनाद पारंपरिक वाद्यवृंदाच्या साथीने पथकातील कलाकारांनी महाराष्ट्रीयन, राजस्थानी आणि केरला संगीत प्रकार पेश केला. सप्टेंबर २०१५ मध्ये 'करवीर नाद' या ढोल ताशा पथकाची स्थापना झाली. येत्या २६ जानेवारी रोजी भवानी मंडप येथे ढोल ताशा वादनाचा कार्यक्रम होणार आहे. या कार्यक्रमाच्या तयारीसाठी पथकातील कलाकारांनी २१ डिसेंबर २०१५ पासून रोज सराव करत आहेत.
खुल्लमखुल्ला डान्स डान्सचा एक फ्रेश प्रकार म्हणून गेल्या काही दिवसात तरूणाईमध्ये लोकप्रिय झाला आहे आणि त्याचे नाव आहे फ्लॅशमॉब. एरव्ही थिरकायला स्टेज हवे असते, मात्र फ्लॅश मॉब या प्रकारचा डान्स थेट प्रेक्षकांच्या गर्दीतच केला जातो. हॅपी स्ट्रीटवर दोन तास रंगलेल्या कलागुणांच्या सफरीची सांगता झाली ती चैतन्य आणि ग्रुपच्या फ्लॅश मॉबने. चैतन्य वज्रमुष्ठी, सुशांत ऐतवडेकर, शुभम पाटील, संग्राम पाटील, समृद्धी सदलगे, अश्विनी जगताप, मयुरी पाटील, जीनल माने आणि कैवल्य काळे यांनी फ्लॅश मॉबमध्ये कॉकटेल गाण्यावर ताल धरला आणि मॉबला धरायलाही लावला. ब्ल्यू जीन्स आणि काळा टी शर्ट असा ड्रेसअप केलेल्या या ग्रुपने जुम्मे की रात है...आज की पार्टी मेरी तरफ से अशा टॉप गाण्यांवर मॉबमध्येच डान्स केला. चैतन्यग्रुपसोबत हॅपी स्ट्रीटवर धमाल करायला आलेल्यांनीचीही पावले थिरकायला लागली.
आरोग्यासाठी सहजमार्ग आजच्या धकाधकीच्या जीवनात मनाला शांती मिळणे कठीण होऊन बसले आहे. रोजच्या रॅट रेसमध्ये धावताना स्वतःच्या आणि मनाच्या आरोग्याकडे दुर्लक्ष करू लागला आहे. त्यावरही हॅप्पी स्ट्रीटच्या माध्यमातून अनेकांनी उपाय शोधण्याचा प्रयत्न केला. त्यात सहभागी सहजमार्ग स्पिरिच्युलिटी फाउंडेशनच्या ध्यान मार्गदर्शन वर्गाला जवळपास ५०० हून अधिक लोकांनी भेट दिली. रिलॅक्सेशन टेकनिकद्वारे संपूर्ण शरीर रिलॅक्स करणे हा ध्यान धारणेतील पहिला टप्पा होता. त्यासाठी एक ऑडिओ टेप ऐकविण्यात येत होती. त्यानंतर पंधरा मिनिटांचे हृदयानुभूती देणारे ध्यान शिकविले जात होते. जवळपास ५०० लोकांनी रिलॅक्सेशन टेकनिकची अनुभूती घेतली, तर त्यातील तीनशे जणांनी ध्यान धारणेचा दुसरा आणि मुख्य टप्पा देखील अनुभवला. ध्यान करणे शिकवणारे हे प्रशिक्षण पूर्णपणे मोफत होते.
थरार फ्लाइंग फॉक्सचा केवळ रस्सीच्या सहाय्याने शंभर फूट उंचीवरुन जमिनीवर येण्याचा थरार बालचमूने अनुभवला. हिल रायडर्स ग्रुप व माउंटन स्पोर्टसच्यावतीने अॅडव्हेंचर स्पोर्टसची ओळख करुन देण्यासाठी प्रात्यक्षिके सादर केली. हॉकी स्टेडियमच्या पॅव्हेलियनवरुन सोडलेली दोरी व त्या दोरीमध्ये अडकवण्यासाठी असलेले लॉकच्या सहाय्याने एक एक करत उतरणारी मुले, मुली पाहून पॅव्हेलियनवर त्यासाठी रांगच लागली होती. प्रमोद पाटील, विनोद कांबोज यांच्याबरोबर जयदिप जाधव, मयूर लवटे, प्रसाद आडनाईक, शिवतेज पाटील, निखिल कोळी, ऋषिकेश पोवार, राणोजी पाटील, विशाल मोरे, सुहास बेलेकर, संदीप कोळेकर यांच्या टिमने मुलांना या फ्लाईंग फॉक्सची थरारक सफर घडवली. तर समीट अॅडव्हेंचरर्सच्यावतीने क्लायम्बिंगसाठी कृत्रिम वॉल उपलब्ध करुन दिली होती. परेश चव्हाण यांच्या सहाय्याने अनेक मुलांनी त्यावर चढण्याचा, उतरण्याचा आनंद घेतला.
डान्ससोबत व्यायामही 'एक्झरसाइज वुईथ फन' अशी टॅगलाइन असलेल्या एरोबिक्सच्या ठेक्यावर निकिता दोरकर आणि ग्रुपने हॅपी स्ट्रीटवर आलेल्या कोल्हापूरकरांना फिटनेस मंत्रा दिला. निकितासोबत प्रियांका जामसांडेकर, कवन पेडणेकर आणि शलाका शहा यांनी एरोबिक्सवर डान्सस्टेप्स केल्या. त्यापूर्वी निकिता यांनी एरोबिक्सची रंजक माहिती देत हा व्यायामप्रकार अगदी स्वयंपाकघरात काम करताना, बागेत झाडांना पाणी घालताना किंवा ऑफीसमध्ये पाच मिनिटे वेळ काढून लंचब्रेकमध्येही करता येत असल्याचे सांगितले. पाय आणि शरीराची लयबद्ध हालचाल करत एरोबिक्स कसे करायचे हे दाखवत निकिता आणि ग्रुपने उपस्थितांनाही ठेका धरायला लावला. सध्याच्या तणावात रिलॅक्सेशन महत्त्वाचे झाले आहे. त्यामुळे पुन्हा व्यायाम करतानाही गंभीर होण्यापेक्षा हसतखेळत आणि नाचत व्यायाम करण्याची ही कला म्हणजे एरोबिक्स. थिरकायला लावणाऱ्या म्युझिकचा ताल आणि त्यावर शरीराला ठेका धरायला लावणाऱ्या स्टेप्समुळे डान्सही आणि व्यायामही हा आनंद देणाऱ्या एरोबिक्सने रविवारच्या सकाळी हॅपीस्ट्रीटलाही ताजेतवाने करून टाकले.
स्केटिंगचा थरार हॅप्पी स्ट्रीमध्ये एस के रोलिंग अकॅडमीची ६० मुले-मुली सहभागी झाली होती. यात अडीच वर्षांच्या चिमुकल्यांपासून १०-१२ वर्षांच्या मुलांचा समावेश होता. या सर्व मुलांचे स्केटिंग कौशल्यापासून उपस्थितांनी त्यांचे कौतुक केले. यातील यश पाटील याने लिंबो स्केटिंगसह स्केटिंगची सर्व प्रत्यक्षिके दाखवून उपस्थितांची वाहव्वा मिळविली.
मोबाइल अॅप डाउनलोड करा आणि राहा अपडेट