म. टा. वृत्तसेवा, इचलकरंजी
इचलकरंजी-सांगली रस्त्यावर भरधाव डंपरने दिलेल्या गुरुवारी धडकेत युवक जागीच ठार झाला. संतोष सोपान पोळ (वय २८ रा. सहकारनगर) असे युवकाचे नाव आहे. अपघातानंतर संतप्त जमावाने डंपरवर दगडफेक करुन तो पेटवून दिला. ही घटना दुपारी साडेचार वाजण्याच्या सुमारास घडली. पार्वती औद्योगिक वसाहतीसमोर अपघातस्थळी मोठा तणाव निर्माण झाला होता. दरम्यान, संतप्त जमावाने गर्दीतील एकाला डंपरचा चालक समजून बेदम मारहाण केली.
याबाबत घटनास्थळ व पोलिसांतून मिळालेली माहिती अशी, सहकारनगर येथील राहणारा संतोष पोळ हा आपला मित्र नितीन बाळू तिवडे याच्यासोबत जयसिंगपूरकडे ग्लॅमर या मोटरसायकलवरुन निघाला होता. इचलकरंजी-सांगली रस्त्यावर पार्वती औद्योगिक वसाहतीसमोर संतोष हा लघुशंकेसाठी थांबला होता. याचवेळी इचलकरंजीहून जयसिंगपूरकडे निघालेल्या डंपर (क्र. एमएच ०७ - २७६) ने संतोष याला जोराची धडक दिली. धडकेनंतर डंपरने संतोषला काही अंतरापर्यंत फरफरट नेले. त्यामुळे संतोष हा जागीच ठार झाला. तर मोटरसायकलसह थांबलेला नितीन तिवडे हा सुदैवाने बचावला. अपघातानंतर डंपर रस्त्याच्या बाजूस असलेल्या चरीत गेला. या अपघाताचे वृत्त तिवडे याने संतोषच्या नातेवाईकांना सांगितले. त्यानंतर संतोष याच्या नातेवाईकांसह नागरिकांनी घटनास्थळी एकच गर्दी केली होती.
संतप्त नागरिकांनी डंपरवर जोरदार दगडफेक केली. तर काही तरुणांनी डिझेलची टाकी उघडून त्याच डिझेलने डंपर पेटवून दिला. या दरम्यान, गर्दीतील स्वप्नील नामक तरुणास डंपरचा चालक असल्याच्या संशयावरुन जमावाने बेदम मारहाण केली. मोबाइलवर फोटो घेणाऱ्यासही मारहाण करण्यात आली.
मोबाइल अॅप डाउनलोड करा आणि राहा अपडेट
