चंद्रदीप नरकेंची ‘कुंभी’वर हॅट्‍ट्रिक

December 29, 2015, 1:30 pm

≫ Next: दोन सावकार अटकेत, दोन फरार

≪ Previous: आत्महत्याप्रकरणी दोघा सावकारांना अटक

$

0

0

म. टा. प्रतिनिधी, कोल्हापूर

कुडित्रे (ता.करवीर) येथील कुंभी-कासारी साखर कारखान्याच्या पंचवार्षिक निवडणुकीत आमदार चंद्रदीप नरके यांच्या नेतृत्वावाखालील सत्तारूढ गटाने सर्व वीस जागांवर सात ते आठ हजार मताधिक्काने विजय मिळवत हॅट्ट्रिक साधली.

विरोधी राजर्षी शाहू कुंभी-कासारी बचाव पॅनेलचा धुव्वा उडाला. अपक्ष उमेदवार संदीप नरके यांचा चार हजारांवर मतांनी पराभव झाला. पुरता धुव्वा उडला. उमेदवारी माघारीत विरोधी गटाला उमेदवारच न मिळाल्याने सत्तारुढ गटाची इतर मागासवर्गीय प्रवर्गातील जागा बिनविरोधी निवडून आल्याचे स्पष्ट झाले होते.

कारखान्याच्या वीस जागांसाठी मंगळवारी सकाळी आठ वाजता रमणमळा येथील शासकीय बहुद्देशीय सभागृहात मतमोजणी सुरू झाली. ५३ टेबलावर मतमोजणीला सुरूवात झाल्यानंतर प्रथम उत्पादक गट एक पाचमधील मतपत्रिकांची विभागणी करण्यात आली. पॅनेलनिहाय मतपत्रिका काढल्यानंतर क्रॉस वोटिंग मतपत्रिका बाजूला काढण्यात आल्या. पहिल्या फेरीमध्ये दहा हजार ३४४ मतांची मोजणी करण्यात आली. यामध्ये सत्तारुढ गटाच्या सर्व उमेदवारांना सहा ते साडेसहा हजारपेक्षा जास्त मते मिळाली होती.

मोबाइल अॅप डाउनलोड करा आणि राहा अपडेट

---

दोन सावकार अटकेत, दोन फरार

December 29, 2015, 10:04 am

≫ Next: ‘कॉँग्रेस-राष्ट्रवादीचे लबाडीचे राजकारण’

≪ Previous: चंद्रदीप नरकेंची ‘कुंभी’वर हॅट्‍ट्रिक

$

0

0

म. टा. वृत्तसेवा, इस्लामपूर
खासगी सावकाराच्या त्रासाला कंटाळून एकाच कुटुंबातील चौघांनी आत्महत्या केल्याप्रकरणी मंगळवारी पोलिसांनी दोन सावकारांना अटक केली. तर या प्रकरणातील अन्य दोन सावकार फरार झाले आहेत. अटक केलेल्या दोघांविरुद्ध आत्महत्येस प्रवृत्त करणे व सावकारी अधिनियमानुसार गुन्हे दाखल करण्यात आले आहेत. जयवंत विष्णू पाटणकर (वय ५२, रा. बोरगाव, ता. वाळवा) व मोहन केशव पाटील (वय ४८, रा. ताकारी, ता. वाळवा) अशी अटक केलेल्या खासगी सावकारांची नावे आहेत.
आत्महत्येबाबत रात्री उशीरा मृत संजय यादव यांचे मेहुणे संजय महादेव खोत (रा. पडवळवाडी) यांनी इस्लामपूर पोलिस ठाण्यात फिर्याद दिली. फिर्याद देताना संजय यादव यांनी मृत्यूपूर्वी लिहून ठेवलेल्या चिठ्ठीच्या आधारे पोलिसांनी चौघांच्या विरूद्ध आत्महत्येस प्रवृत्त करणे व सावकारी अधिनयमानुसार गुन्हा दाखल केला आहे. जयवंत विष्णू पाटणकर हा बोरगाव येथील सावकार पोलिस सेवेतून स्वेच्छानिवृत्ती घेऊन गावात सावकारी करीत होता. पाटणकर आप्पा या नावाने हा सावकार ओळखला जातो. मोहन पाटीलला रात्रीच पोलिसांनी जेरबंद केले आहे. अन्य दोघे फरार आहेत.
संजय खोत यांनी दिलेल्या फिर्यादीत, संजय व जयश्री यांचा विवाह २०१०मध्ये झाला होता. संजय याच्यावर कुटुंबांची जबाबदारी होती. त्याच्या आईचे आजारपण व बायकोच्या बाळंतपणासाठी झालेल्या दवाखान्याचा खर्च व बेकरीसाठी त्याने खासगी सावकाराकडून सात ते आठ लाख रुपयांचे कर्ज मासिक दहा टक्के व्याजाने घेतले होते. गेल्या तीन वर्षांपासून दहा टक्के व्याजाची रक्कम भागविण्यासाठी जमीन विकून टाकली. दोन वर्षांपूर्वी सावकारांचे कर्ज भागविण्यासाठी मेहुणे संजय यांना माझ्या बायकोचे मंगळसूत्र दिले होते. त्यावर पन्नास हजार रुपये काढून सावकाराचे व्याज भागवले होते. गेल्या सहा महिन्यांपूर्वी मला त्यांनी सांगितले होते की, सावकार विकासकुमार पाटील याच्याकडून तीन लाख रुपये घेतले आहेत. त्याचे व्याजाचे पैसे मी दिले आहेत. तरीही तो एकरक्कमी पाच लाख रुपयांची मागणी करत आहे. श्रीकांत जाधव याच्याकडून एक लाख, पाटणकर आप्पाकडून वीस हजार व मोहनआबा पाटीलकडून तीस हजार घेतले आहेत. त्यांचेही व्याजाचे पैसे मी देत आलो आहे. परंतु ते व्याजाच्या रक्कमेसह तिप्पट रक्कमेची मागणी करीत आहेत. माझ्याकडे त्यांनी पैशाची मागणी केली. त्यावेळी मी त्यांना एक लाख रुपये दिले होते. मागील वर्षी मी बहिणीला म्हैस दिली होती. म्हैस तुम्ही घेऊन जावा. नाही तर सावकार पाटणकर हा व्याजाच्या रक्कमेपोटी म्हैस सोडून घेऊन जाणार असल्याची मला धमकी दिली आहे, असे संजय यांनी मला तीन दिवसांपूर्वी फोनवर सांगितले होते. रविवारी रात्री बहिणीने सावकारांच्या तगाद्याने आम्ही हैराण झालो आहे, असे सांगितल्याचे म्हटले आहे.

मोबाइल अॅप डाउनलोड करा आणि राहा अपडेट

‘कॉँग्रेस-राष्ट्रवादीचे लबाडीचे राजकारण’

December 29, 2015, 10:13 am

≫ Next: ‘डी. वाय. पाटील’चा पहिला हप्ता २००० रु.

≪ Previous: दोन सावकार अटकेत, दोन फरार

$

0

0

म. टा. वृत्तसेवा, शिराळा
शिराळ्यात माझ्या विरोधात एकट्याचे काही चालणार नाही म्हणून कॉँग्रेस-राष्ट्रवादी कॉँग्रेसचे नेते लबाडीचे राजकारण करून लोकांची दिशाभूल करीत आहे. दुष्काळाचे राजकारण करीत आहेत, अशी टीका आमदार शिवाजीराव नाईक यांनी केलीय शिराळा येथे आयोजित केलेल्या कार्यकर्त्यांच्या मेळाव्यात ते बोलत होते.
आमदार शिवाजीराव देशमुख व माजी आमदार मानसिंगराव नाईक यांचे नाव न घेता नाईक म्हणाले, प्रश्नांची सोडवणूक न केल्यानेच जनतेने तुम्हाला नाकारले आहे. गेल्यावेळी तुम्ही दोघे आमदार असतानाही पेठ एमआयडीसी, चांदोली पर्यटन, कासेगाव पोलिस ठाणे, शिरसी वीजवितरणचा प्रश्न का सोडविला नाही? करुंगलीच्या माळावरील कारखान्याने शेतकऱ्यांना देशोधडीला लावले. त्यांनी आता दुष्काळाचे राजकारण करू नये. गेल्यावेळी मला जनतेने पुन्हा संधी दिली नाही, तरीही मी जनतेच्या संपर्कात राहून कामे केली. पेठ एमआयडीसी रद्द करावी, अशी या भागातील सर्वांची मागणी होती. त्यांच्याही गटाचे यामध्ये लोक होतेच. मात्र, तत्कालीन दोन्ही आमदारांनी दुर्लक्ष केले. गिरजवडे प्रकल्पाच्या मंडळाची मुदत संपल्याने निधी थांबला असून, त्या मंडळाला येत्या काही दिवसांत मुदतवाढ मिळून कामे सुरू होतील.

मोबाइल अॅप डाउनलोड करा आणि राहा अपडेट

‘डी. वाय. पाटील’चा पहिला हप्ता २००० रु.

December 29, 2015, 11:22 am

≫ Next: राखीव बटालियन जिल्ह्याबाहेर ?

≪ Previous: ‘कॉँग्रेस-राष्ट्रवादीचे लबाडीचे राजकारण’

$

0

0

म. टा. प्रतिनिधी, कोल्हापूर

असळज (ता.गगनबावडा) येथील पद्मश्री डॉ. डी. वाय. पाटील सहकारी साखर कारखान्याचा पहिला हप्ता २००० रुपये सभासदांच्या खात्यावर जमा केला असल्याची माहिती कारखान्याचे अध्यक्ष आणि माजी गृहराज्यमंत्री सतेज पाटील यांनी दिली. गळीत हंगाम २०१५-१६ मध्ये गळीतास आलेल्या ऊसास धोरणानुसार एफ. आर. पी. च्या ८० टक्के अॅडव्हॉन्स प्रति मे. टन २००० रुपयांप्रमाणे पहिला हप्ता सभासदांच्या खात्यावर जमा केला आहे.

कारखान्याने ३० नोव्हेंबर २०१५ पर्यंत गळीतास आलेल्या १ लाख ३७ हजार ८२० मे. टन ऊसासाठी प्रति मे. टन दोन हजार प्रमाणे पहिल्या हप्त्यापोटी निघणारा रोखीचा, सेव्हींग आणि सोसायटीचा कर्जाचा भरणा २७ कोटी ५६ लाख ३८ हजार रुपये केडीसीसी आणि अन्य बँकेच्या शाखांकडे वर्ग केला आहे. शेतकऱ्यांनी संबधित शाखेशी संपर्क साधावा, असे आवाहन पाटील यांनी केले आहे. तसेच ठरविलेले उद्दीष्ट पूर्ण करण्यासाठी सर्व सभासद, ऊस उत्पादक शेतकऱ्यांनी ऊस पाठवावा, असे आवाहन कार्यकारी संचालक जयदीप पाटील यांनी केले आहे.

मोबाइल अॅप डाउनलोड करा आणि राहा अपडेट

राखीव बटालियन जिल्ह्याबाहेर ?

December 29, 2015, 11:23 am

≫ Next: क्रीडा प्रशालेतील ठेका रद्द

≪ Previous: ‘डी. वाय. पाटील’चा पहिला हप्ता २००० रु.

$

0

0

म. टा. प्रतिनिधी, कोल्हापूर

कोल्हापूरसह परिसरातील जिल्ह्यांमध्ये कायदा सुव्यवस्था अबाधित राहावी आणि मानवनिर्मित किंवा नैसर्गीक आपत्ती निर्माण झाली तर तातडीने मदत मिळावी यासाठी कोल्हापूरमध्ये भारत राखीव बटालियन स्थापण्यास परवानगी मिळाली होती. या बटालियनसाठी रेंदाळ आणि दिंडनेर्ली (ता. करवीर) या दोन्ही गावातील नागरिकांनी जागा देण्यास नकार दिल्याने अखेर रिझर्व्ह बटालियन जिल्ह्याबाहेर हलवण्याची मानसिकता वरिष्ठ पोलिस अधिकाऱ्यांची बनली आहे. अप्पर पोलिस महासंचालक संदीप बिष्णोई यांच्यासोबत झालेल्या बैठकीत दिंडनेर्लीच्या ग्रामस्थांना निर्णयासाठी १५ दिवसांची मुदत घेतली असून, १५ दिवसात सकारात्मक निर्णय न घेतल्यास बटालियन जिल्ह्याबाहेर जाणार आहे.

माजी गृहराज्यमंत्री सतेज पाटील यांनी सन २०१० मध्ये कोल्हापूरसह आसपासच्या जिल्ह्यांसाठी भारत राखीव बटालियनची मान्यता मिळवली होती. ऑक्टोबर २०१० मध्ये झालेल्या मंत्रिमंडळ बैठकीत झालेल्या निर्णयानुसार केंद्र सरकार आणि राज्य सरकारकडून एकत्रितपणे बटालियनचा खर्च भागवण्याचे ठरले होते.

यासाठी एकूण ३५० कोटी रुपयांची मंजुरीही मिळाली आहे. बटालियनसाठी आवश्यक असलेल्या १५० एकर जागेसाठी रेंदाळ आणि दिंडनेर्ली या दोन गावांकडे जिल्हा परिषदेने जागेची मागणी केली होती. जागा मिळवण्यासाठी चार वर्षे प्रयत्न सुरू होते, मात्र अजूनही जागा उपलब्ध झालेली नाही. जागेचा प्रश्न सोडवण्यासाठी राज्याचे अप्पर पोलिस महासंचालक संदीप बिष्णोई यांनी मंगळवारी (ता.२९) जिल्हा पोलिस अधीक्षक कार्यालयात रेंदाळ आणि दिंडनेर्लीतील ग्रामस्थांशी चर्चा केली.

बिष्णोई यांनी बटालियनचे फायदे सांगून, ही बटालियन कोल्हापूर जिल्ह्यात थांबवण्यासाठी सहकार्य करण्याची विनंती केली. यावेळी रेंदाळमधील ग्रामस्थांनी विरोध कायम असल्याचे स्पष्ट केले, तर दिंडनेर्लीतील ग्रामस्थांनी निर्णय घेण्यासाठी पंधरा दिवसांची मुदत मागितली आहे.बटालियनसाठी पुरेशी जागा उपलब्ध नाही. बटालियनसाठी गायरान जागेतील झाडांची कत्तल होणार असून, याचा परिणाम गावाच्या पर्यावरणावर होणार असल्याने बटालियनला विरोध असल्याचे रेंदाळ येथील ग्रामस्थांनी स्पष्ट केले. बटालियनची स्थापना झाल्यास याचा परिसरातील आर्थिक विकासाला मोठा फायदा होणार असल्याने काही सामाजिक संघटनांनी मात्र बटालियन स्थापन व्हावी यासाठी प्रयत्न सुरू केले आहेत.

दोन्ही गावातील ग्रामस्थांशी मी बोललो आहे. दिंडनेर्ली ग्रामपंचायतीने पंधरा दिवसांची मुदत मागितली आहे. त्यांच्याकडून योग्य निर्णय आला तर ठीक, नाहीतर ही बटालियन बाहेरच्या जिल्ह्यात नेण्याशिवाय आमच्याकडे पर्याय नाही.

संदीप बिष्णोई, अप्पर पोलिस महासंचालक

मोबाइल अॅप डाउनलोड करा आणि राहा अपडेट

क्रीडा प्रशालेतील ठेका रद्द

December 29, 2015, 11:25 am

≫ Next: वेदगंगा कोरडी : कागल धास्तावले

≪ Previous: राखीव बटालियन जिल्ह्याबाहेर ?

$

0

0

म. टा. प्रतिनिधी, कोल्हापूर

क्रीडापटू तयार करण्यासाठी शिंगणापूर येथे सुरु करण्यात आलेल्या राजर्षी शाहू छत्रपती क्रीडा प्रशालेतील विद्यार्थ्यांच्या जेवणाची हेळसांड केल्याबद्दल सिद्धार्थ मागासवर्गीय बहुउद्देशीय सेवा संस्थेचा ठेका रद्द करण्याचा ठराव जिल्हा परिषदेच्या मंगळवारी झालेल्या सभेत करण्यात आला. तसेच या कंत्राटदाराला जिल्हा परिषदेचा अन्य कोणताही ठेका मिळू नये यासाठी ब्लॅक लिस्ट करण्याचे आदेश देण्यात आले. कोल्हापूरच्या थेट पाइपलाइन योजनेच्या ३३०० मीटर लांबीच्या पाइपलाइनसाठी ना हरकतीसाठी पुढील आठवड्यात सदस्यांशी चर्चा करण्यात येणार आहे. तसेच जिल्ह्यात टंचाई असताना आराखड्याप्रमाणे तत्काळ कामे सुरु करण्यासाठी सदस्यांनी प्रशासनाला धारेवर धरले.

गेल्या मंगळवारी कोरमअभावी तहकूब झालेली सर्वसाधारण सभा या मंगळवारी बोलवण्याचा निर्णय त्याचवेळी घेण्यात आला होता. पण हा निर्णय अनेकांना समजला नसल्याने सभा सुरु होताच सदस्यांनी पदाधिकारी व प्रशासनाला धारेवर धरले.अजूनही आचारसंहिता असल्याने त्यामध्ये काही धोरणात्मक बाबींवर चर्चा करता येणार नाही. त्यामुळे सभा आणखी दोन दिवस पुढे ढकलली असती तर काय फरक झाला असता असा सवाल अरुण इंगवले यांनी उपस्थित केला. त्यावर तहकूब सभेमध्ये नवीन विषय घेता येत नसल्याने हा दिवस निवडल्याचे सांगण्यात आले.

धैर्यशील माने यांनी शिंगणापूर येथे जिल्हा परिषदेने सुरु केलेल्या क्रीडा प्रशालेतील सहा मुले देशपातळीवरील स्पर्धेसाठी निवडली गेली. पण त्याच विद्यार्थ्यांना पोषक अन्न वेळेवर मिळत नसल्याने त्यांच्या कामगिरीवर परिणाम होत असल्याचे निदर्शनास आणले. त्यांनी या मुलांच्या आहाराची हेळसांड होत असून त्याबाबत विचारणा केल्यावर ठेकेदार राजेश संदे हा पालकांच्या अंगावर धावून जातो अशा तक्रारी असल्याचेही सां​गितले. या सर्व मुलांची जबाबदारी जिल्हा परिषदेची असल्याने हे प्रकार खपवून घेतले जाणार नाहीत असे सांगितल्यानंतर हिंदुराव चौगुले, अरुण इंगवले, एस. आर. पाटील, प्रकाश पाटील, उमेश आपटे यांनी शिक्षण विभागाला धारेवर धरले. अशा ठेकेदाराचा ठेका तातडीने रद्द करण्याची गरज असताना विभागाने आतापर्यंत काय केले असा सवालही उपस्थित केला. त्यावेळी प्रशासनाकडून आतापर्यंत दोन नोटीस दिल्या असून अंतिम तिसरी नोटीसही दिली जात आहे. त्यानंतर कारवाई करण्यात येईल, असे सांगताच सर्व सदस्यांनी अशा कामासाठी वेळ लावण्यापेक्षा त्या संस्थेचा ठेका तत्काळ रद्द करण्याचा ठराव केला. जातीच्या दाखल्यांबाबतचा विषय उपस्थित केल्यानंतर सुरेश कांबळे, विकास कांबळे यांनी आयुक्तांकडून जाऊन सोक्षमोक्ष लावण्याचे ठरवण्यात आले. त्यासाठी लवकरच अधिकाऱ्यांसह हे शिष्टमंडळ आयुक्तांची भेट घेणार आहे.

कोल्हापूरच्या थेट पाइपलाइनबाबत हिंदुराव चौगुले यांनी प्रशासनाकडे प्रतिक्षेत असलेल्या मंजुरीची विचारणा केली. त्याबाबत स्थानिक लोकांकडून आंदोलने होण्याची शक्यता असल्याने प्रशासनाकडून त्याबाबत काही माहिती दिली जात नसल्याचा आरोप केला. याबाबत मुख्य कार्यकारी अधिकारी अविनाश सुभेदार यांनी जिल्हा परिषदेकडे ३३०० मीटर लांबीच्या पाइपलाइनच्या मंजुरीचा प्रस्ताव आहे. त्याबाबतची ना हरकत दिलेली नाही. पुढील आठवड्यात सदस्यांशी बैठक घेण्यात येणार आहे. जानेवारी ते मार्च दरम्यानचा ५ कोटी ४६ लाखाचा टंचाई आराखडा जिल्हाधिकारी कार्यालयाकडे सादर केल्याचे सांगण्यात आले.

३१ डिसेंबरला निवृत्त होणाऱ्या एका कर्मचाऱ्याला एका दिवसासाठी पदोन्नती दिली जात असल्याचे प्रकाश पाटील यांनी निदर्शनास आणून दिला. अनेक कर्मचाऱ्यांच्या पदोन्नती रखडल्या असताना एका दिवसासाठी इतकी तातडीने का पदोन्नती दिली जात आहे? असा प्रश्न सदस्यांनी विचारला.

चार वर्षांत मनरेगाचे काम नाही

जिल्ह्यात चार वर्षात मनरेगाचे एकही काम झाले नसल्याचे सांगत अरुण इंगवले यांनी शेवटच्या वर्षात तरी काही कामे सुरु करावीत असे सांगितले. याबाबत मुख्य कार्यकारी अधिकारी सुभेदार यांनी अभियंते व ग्रामसेवकांनी बहिष्कार आता मागे घेतला असून यंदा ५०० सिंचन विहिरींचे उद्दिष्ट असल्याचे सांगितले. पण विहिरींपेक्षा पाणंद रस्त्यांची कामे महत्वाची असल्याचे ते म्हणाले.

मोबाइल अॅप डाउनलोड करा आणि राहा अपडेट

वेदगंगा कोरडी : कागल धास्तावले

December 29, 2015, 11:20 am

≫ Next: सतेज की महाडिक?

≪ Previous: क्रीडा प्रशालेतील ठेका रद्द

$

0

0

काळम्मावाडी धरणातून पाणी न सोडल्याने दुर्भिक्ष्य

म. टा. वृतसेवा, कागल

काळम्मावाडी धरणातून पाणी सोडले नसल्याने गेल्या आठ दिवसांपासून वेदगंगा नदी कोरडी पडली आहे. गेल्या २० वर्षांत प्रथमच वेदगंगा नदी कोरडी पडली आहे. चार दिवसांत काळम्मावाडी धरणातून पाणी न सोडल्यास नदीकाठावरील गावांना पिण्याच्या पाण्याची तीव्र टंचाईला समोरे जावे लागण्याची शक्यता आहे.

२०-२५ वर्षांपूर्वी काळम्मावाडीच्या डाव्या कालव्यातून आदमापूराच्या ओढ्यातून काळम्मावाडीचे पाणी थेट वेदगंगा नदीत सोडण्याचे अत्यंत महत्त्वाचे आणि धाडसी निर्णय तत्कालीन पाटबंधारे राज्यमंत्री सदाशिवराव मंडलिक यांनी घेतला होता. तेव्हापासून वाघापूर ते कर्नाटकातील अकोळ ममदापूरपर्यंत वेदगंगा नेहमीच दुधडी भरून वाहत आहे. यामुळे या नदीच्या काठावरील लोकांचे जीवनमान कमालीचे बदलेले असून शेतकऱ्यांचे जीवनही फुलले आहे. पण यावर्षी पावसाचे प्रमाण कमी झाल्याने काळम्मावाडीचे धरण पूर्ण क्षमतेने भरले नाही. त्यामुळे पाण्याचा वापर काटकसरीने करण्याची गरज निर्माण झाली आहे. त्याचाच एक भाग म्हणून वेदगंगा नदीत पूर्वीप्रमाणे मुबलक पाणी सोडणे अशक्य बनत आहे. गेले आठ दिवस ही नदी पुर्णतः कोरडीच पडल्याने या नदीकाठावरील गावांना पिण्याच्या पाण्याची तीव्र टंचाई जाणवणार आहे. तसेच शेतीच्या पाण्यावरसुद्धा मर्यादा येणार आहेत. तरीसुद्धा या नदीच्या काठावरील गावांना पिण्याच्या पाण्याची टंचाई जाणवू नये, यासाठी पाटबंधारे खात्याने योग्य ते नियोजन करून शेतीसाठी उपसाबंदी करून पिण्यासाठी नदीत पाणी सोडणे अत्यंत गरजेचे आहे.

या नदीच्या पाण्यावर हमिदवाडा साखर कारखाना चालू आहे. पाणी कमतरतेने या कारखान्याच्या गळीतावर सुद्धा परिणाम होऊ शकतो. त्यामुळे काळम्मावाडी धरणाचे पाणी नियोजन करुन पिण्याच्या पाण्याची टंचाई जाणवणार नाही याची दक्षता पाटबंधारे खात्याने घेऊन लवकरात लवकर वेदगंगा नदीत किमान पिण्यासाठी तरी पाणी सोडावे, अशी मागणी या नदीच्या काठावरील गावातील नागरिकांकडून होत आहे.

मोबाइल अॅप डाउनलोड करा आणि राहा अपडेट

सतेज की महाडिक?

December 29, 2015, 9:30 am

≫ Next: आयआरबीला ४५९ कोटी देणार

≪ Previous: वेदगंगा कोरडी : कागल धास्तावले

$

0

0

म. टा. प्रतिनिधी, कोल्हापूर

कोल्हापूर जिल्ह्याचे आगामी राजकीय समी​करण काय असेल हे ठरवणारा विधानपरिषद निवडणुकीचा निकाल आज (बुधवारी) जाहीर होणार आहे. मताच्या आकडेवारीत सतेज पाटील हेच बाजी मारणार असा अंदाज असून आमदार महादेवराव महाडिक यांच्या गनिमी काव्यावरच त्यांचे भवितव्य अवलंबून आहे. निकालाची प्रचंड उत्सुकता लागली असून सकाळी दहापर्यंत निकाल अपेक्षित आहे.

विधानपरिषद निवडणुकीसाठी काँग्रेसचे उमेदवार सतेज पाटील व महादेवराव महाडिक यांच्यात 'काँटे की टक्कर' झाली. प्रचंड इर्ष्येमुळे निवडणुकीत शंभर कोटीपेक्षा जास्त उलाढाल झाली. रविवारी शंभर टक्के मतदान झाले असून, त्याची मोजणी बुधवारी सकाळी आठ वाजता न्यू पॉलिटेक्निक कॉलेजच्या इमारतीत होणार आहे. दोन तासाच्या आतच निकाल समजणार आहे. दोन्ही गटांनी विजयाचा दावा केला आहे. पाटील यांच्यामार्फत सहलीवर गेलेल्या मतदारांची संख्या जास्त होती. सहलीत फोडाफोडीला फारशी संधी न मिळाल्याने महाडिक गट अस्वस्थ होता. आपल्याला २५०पेक्षा जास्त मते मिळतील, असा दावा पाटील यांनी केला आहे. तर किमान दहा मतांनी तरी विजयी होऊच असा विश्वास महाडिक यांनी व्यक्त केला आहे.

या निवडणुकीच्या निमित्ताने जिल्ह्यात दोन गट पडले आहेत. सतेज पाटील-हसन मुश्रीफ व विनय कोरे यांच्या नेतृत्वाचे नवे समीकरण या निवडणुकीच्या निमित्ताने पुन्हा पुढे आले आहे. महापालिकेत यश मिळवल्यानंतर विधानपरिषदेत पुन्हा हे नेते एकत्र आले. भाजप व इतर काही तालुका नेत्यांच्या ताकदीवर महाडिक यांनी पाटील यांना आव्हान दिले, पण पाटील यांना प्रकाश आवाडे, कोरे व राजेंद्र पाटील-यड्रावकर यांनी हात दिल्याने विजयाचे पारडे त्यांच्या बाजूने झुकले. उमेदवारी मिळवण्यापूर्वीच शंभर मते विकत घेतल्याने विजय आपलाच, असा महाडिक गटाने दावा केला आहे.

पाटील यांचा विजय झाल्यास पाटील-मुश्रीफ-कोरे यांच्याबरोबरच प्रा. संजय मंडलिक यांची नवी आघाडी जिल्ह्यात यापुढे राजकारणात सक्रीय राहील. जिल्हाध्यक्ष पी.एन. पाटील व प्रकाश आवाडे यांची अवस्था तळ्यात मळ्यात अशीच असेल. महाडिक विजयी झाल्यास महाडिक-पी.एन. व आवाडे पुन्हा एकत्र येण्याची चिन्हे आहेत. सतेज पाटील यांच्याकडे किमान सत्तरपेक्षा जास्त मते जास्त असल्याने फाटाफुटीला फारशी संधी मिळण्याची शक्यता दिसत नाही. या निकालाकडे जिल्ह्याचेच नव्हे तर राज्याचे लक्ष लागले आहे.

........

तर बावड्यात चौथी दिवाळी

महापालिका निवडणुकीत काँग्रेसला दणदणीत यश मिळाल्यानंतर तीन नोव्हेंबरला कसबा बावड्यात पहिली दिवाळी साजरी झाली. पुढच्याच आठवड्यात दिवाळीचे फटाके वाजले. १६ नोव्हेंबरला काँग्रेसच्या अश्विनी रामाणे महापौर झाल्या आणि पुन्हा बावड्यात तिसरी दिवाळी झाली. आता पाटील यांच्या विजय झाल्यास बावड्यात चौथ्या दिवाळीची जोरदार तयारी करण्यात येत आहे. आप्पांची शिट्टी वाजणार की चौथी दिवाळी याचा निकाल सकाळी दहा पूर्वीच लागणार आहे.

०००००

मोबाइल अॅप डाउनलोड करा आणि राहा अपडेट

---

आयआरबीला ४५९ कोटी देणार

December 29, 2015, 1:30 pm

≫ Next: इस्लामपुरात सावकारांना पोलिस कोठडी

≪ Previous: सतेज की महाडिक?

$

0

0

म. टा. प्रतिनिधी, कोल्हापूर

टोल रद्दसाठी आयआरबीला ४५९ कोटी रुपये देण्याचे सरकारने निश्चित केले असून त्यानुसार रस्ते विकास महामंडळाने (एमएसआरडीसी) मंगळवारी आयआरबीला एक जानेवारीपासून टोल बंद करण्याचे पत्र दिले. ही रक्कम मान्य करण्याबरोबरच कोर्टात दाद मागणार नसल्याचे आयआरबीने मान्य केल्याचे पालकमंत्री चंद्रकांत पाटील यांनी पत्रकार परिषदेत सांगितले. निश्चित केलेल्या रकमेतही तडजोडीसाठी एमएसआरडीसी आयआरबीसोबत बैठक घेणार आहे. दहा दिवसात हा प्रश्न संपलेला असेल. महापालिकेने दिलेल्या टेंबलाईवाडी येथील जागेशीही आयआरबीचा संबंध राहणार नाही, असेही त्यांनी स्पष्ट केले.

दरम्यान, राज्य सरकारच्या अखत्यारितील राज्यातील १४ टोल नाक्यांबाबतही याच पद्धतीची प्रक्रिया अवलंबण्याचा विचार असल्याचेही पाटील यांनी सांगितले. टोल रद्द केल्यानंतर देखभालीचा खर्च महापालिकेला परवडणार नसल्याने जिल्ह्याबाहेरील वाहनांना टोल आकारण्याचा प्रस्ताव मांडला होता, पण मी त्याबाबत आग्रही नाही. हा खर्च कसा करायचा हे महापालिकेने ठरवावे. त्यासाठी अडचणी आल्यास सरकार मदत करेल.

टोल रद्दसाठीची सारी प्रक्रिया एमएसआरडीसीच्या माध्यमातून होणार आहे. सरकारने अधिवेशनात घेतलेल्या निर्णयाचा संदर्भ देत एमएसआरडीसीने मंगळवारी आयआरबीला पत्रही दिले. सरकारच्या निर्णयानुसार निश्चित केलेल्या ४५९ कोटी रुपयांमध्येही तडजोड करण्यासाठी बैठक घेण्यात येणार आहे. त्यामुळे १ जानेवारी २०१६ पासून टोल बंद करावा, असे स्पष्ट केले आहे. त्यामुळे नोटिफिकेशन वगैरे निघाले नाही तरी ३१ डिसेंबरनंतर टोल सुरु होण्याची कोल्हापूरकरांच्या मनातील शंका दूर झाली आहे.

पाटील म्हणाले, 'सरकारने हा प्रकल्प विकत घेण्याचे निश्चित केले आहे. त्यासाठी सचिव तामसेकर समितीच्या अहवालानुसार ४५९ कोटीपेक्षा आयआरबीला जादा रक्कम द्यायची नाही असे ठरवले आहे. आयआरबी कोर्टात गेली तर कंपनीच्याबाजूने निकाल लागेल, पण कोल्हापूरकर टोल सुरू करुन देणार नाहीत असे मुख्यमंत्र्यांनीच आयआरबीला सांगितल्याने त्यांच्याकडून रकमेला मान्यता दिली गेली. त्यामुळे कंपनी कोर्टातही जाणार नाही. हा प्रकल्प सरकारच्यावतीने एमएसआरडीसी विकत घेणार असून त्यांच्याकडूनच आयआरबीला पैसे दिले जातील. ४५९ कोटी रक्कम ठरवली असली तरी त्यातही तडजोड करण्यासाठी लवकरच आयआरबीसोबत बैठक घेतली जाईल. त्यानुसार किती रक्कम निश्चित करायची, ती किती टप्प्याने द्यायची हे दहा दिवसात ठरवण्यात येणार आहे.'

भूखंडाची मालकी एमएसआरडीसीकडे

या प्रक्रियेनुसार आता महापालिकेने दिलेल्या जागेशी आयआरबीचा संबंध राहणार नाही, असे सांगत पाटील म्हणाले, 'प्रकल्प विकत घेतल्यानंतर या जागेची मालकी एमएसआरडीसीकडे राहणार आहे. यावर ८० टक्के झालेले बांधकाम पूर्ण करायचे की आहे त्या स्थितीत विकायचे याचा निर्णय एमएसआरडीसीने घ्यायचा आहे. मात्र आयआरबीला रक्कम देण्यासाठी आवश्यकता असल्यास सरकार मदत करेल.'

मोबाइल अॅप डाउनलोड करा आणि राहा अपडेट

इस्लामपुरात सावकारांना पोलिस कोठडी

December 30, 2015, 10:12 am

≫ Next: कोयत्याने वार करून ऊसतोड पत्नीचा खून

≪ Previous: आयआरबीला ४५९ कोटी देणार

$

0

0

म. टा. वृत्तसेवा, इस्लामपूर
खासगी सावकाराच्या त्रासाला कंटाळून एकाच कुटुंबातील चौघांनी आत्महत्या केल्याप्रकरणी मंगळवारी अटक केलेल्या जयवंत विष्णू पाटणकर (वय ५२, रा. बोरगाव) व मोहन केशव पाटील (वय ४८, रा. ताकारी, ता. वाळवा) या दोघांना कोर्टाने पाच जानेवारीपर्यंत पोलिस कोठडी सुनावली आहे. आरोपींना बुधवारी कोर्टासमोर उभे केले. या प्रकरणातील अन्य दोन सावकार अद्यापही फरार आहेत. पोलिसांच्या पातळीवर पथके स्थापन करून त्या दोन सावकारांचा शोध सुरू आहे.
बनेवाडी येथील संजय भीमराव यादव (वय ४५) यांनी खासगी सावकारांच्या त्रासाला कंटाळून आपल्या रहात्या घरीच राजवर्धन (वय४), समृद्धी (वय चार महिने) यांचा गळा दाबून पत्नी जयश्री (वय ३०) यांच्यासह गळफास लाऊन आत्महत्या केली आहे. त्यांच्या वडिलांचे लहानपणी, तर आईचे दीड वर्षांपूर्वीच निधन झाले आहे. त्यांना भाऊ, चुलता, चुलतभाऊ, बहीण, असे कोणीही नातेवाईक नाहीत.

'कठोर कारवाई करा'
'बनेवाडी येथील आत्महत्येची घटना, दुर्दैवी व हृदयद्रावक आहे. या दुर्दैवी घटनेस जबाबदार असणाऱ्यांवर कठोर कारवाई व्हायला हवी,' अशी मागणी आमदार जयंत पाटील यांनी केली आहे. पाटील यांनी मंगळवारी सायंकाळी बनेवाडीस भेट देऊन घटनेची माहिती घेतली.
आमदार पाटील यांचे बनेवाडीत आगमन झालेनंतर ग्रामस्थांनी यादव यांच्या घराचे कुलूम काढून दार उघडले. पाटील यांनी ग्रामस्थांच्यासह घराची पहाणी करून घटना कशी घडली? याची माहिती घेतली. 'यादव गावातील अथवा बाहेरच्या कोणाजवळ सावकारांच्या त्रासाबददल बोलले असते, तर यातून निष्चितपणे काही तरी मार्ग निघाला असता. त्यांनी कोवळी निष्पाप मुले, पत्नीसह आत्महत्येसारखे पाउल उचलायला नको होते,' अशी भावना व्यक्त करून तालुक्यातील सावकारी सारखे प्रकार खणून काढण्यासाठी पोलिस खात्यास सूचना देणार असल्याचेही त्यांनी लोकांशी चर्चा करताना सांगितले. आमदार पाटील यांचे समवेत राजारामबापू सहकारी दूध संघाचे चेअरमन विनायक पाटील होते.

मोबाइल अॅप डाउनलोड करा आणि राहा अपडेट

कोयत्याने वार करून ऊसतोड पत्नीचा खून

December 30, 2015, 10:13 am

≫ Next: ‘ग्राहकांना आधुनिक सेवा द्या’

≪ Previous: इस्लामपुरात सावकारांना पोलिस कोठडी

$

0

0

म. टा. वृत्तसेवा, इस्लामपूर
वाळवा तालुक्यातील कुरळप येथे बुधवारी रात्री ऊसतोड मजुराने कोयत्याने गळयावर वार करून पत्नीचा खून केला. घटनेनंतर तो ऊसतोड मजूर फरार झाला आहे. निर्मला संदीप वायदंडे (वय ३०, मूळ रा. बनपुरी, ता. आटपाडी) असे खून झालेल्या विवाहितेचे नाव आहे.

या बाबत ऊसतोड टोळीचा मुकादम भाऊसो जयवंत पाटील यांनी कुरळप पोलिस ठाण्यात फिर्याद दिली आहे. कुरळप पोलिसांनी मृत विवाहितेचा पती संदीप बाबुराव वायदंडे याच्या विरूद्ध खुनाचा गुन्हा नोंद केला आहे. आटपाडी तालुक्यातील बनपुरी येथील ऊसतोड मजुरांची टोळी सध्या कुरळप येथे जिल्हा परिषद शाळेच्या मागील बाजूस वास्तव्यास आहे. रात्री दहा ते पहाटे पाचच्या दरम्यान संदीप वायदंडे याने पत्नी निर्मला हिच्या गळयावर ऊसतोडणीच्या कोयत्याने घाव घालून तिचा खून केला. आज सकाळी ऊसतोडणीला जाण्यासाठी सर्वांची लगबग सुरू झाल्यावर हा प्रकार लक्षात आला. मृत महिलेचे आई-वडिलही याच परिसरात दुसऱ्या ऊसतोड मजुरांच्या टोळीत काम करतात. हा प्रकार समजताच त्यांनी कुरळपला धाव घेतली. कुरळपचे पो. नि. कांबळे तपास करीत आहेत.

मोबाइल अॅप डाउनलोड करा आणि राहा अपडेट

‘ग्राहकांना आधुनिक सेवा द्या’

December 30, 2015, 1:30 pm

≫ Next: विद्यार्थी संमेलन कर्नाळ्यात

≪ Previous: कोयत्याने वार करून ऊसतोड पत्नीचा खून

$

0

0

म. टा. वृत्तसेवा, कुपवाड
बँकिंग क्षेत्रात होणारे बदल, दुरूस्त्या व सुधारणा आत्मसात करीत बँकेची सुरू असणारी प्रगती समाधानकारक आहे. स्पर्धेत टिकण्यासाठी खासगी बँकांच्या कामाची माहिती घेऊन आपल्याही ग्राहकांना आधुनिक, सेवा कमी वेळेत कशा देता यासाठी सांगली जिल्हा मध्यवर्ती बँकेने प्रयत्न करावेत, असे आवाहन माजी अर्थ व ग्रामविकास मंत्री आमदार जयंत पाटील यांनी मंगळवारी सांगलीत केले.
सांगली जिल्हा मध्यवर्ती बँकेच्या ग्राहकांना रुपे डेबिट कार्डचे वाटप मंगळवारी जयंत पाटील यांच्या हस्ते करण्यात आले. या कार्यक्रमात पाटील बोलत होते. बँकेने ग्राहकांना अपेक्षित असे पाऊल टाकले आहे. प्रशासक जाऊन बँकेत नव्याने संचालक मंडळ कार्यरत झाल्यापासून बँकेने शेती कर्जाची मर्यादा वाढवणे, शिक्षकांना कर्ज देणे, नोकरदारांच्या कर्ज मर्यादेत वाढ, द्राक्ष बागांसाठी मदत, असे काही निर्णय घेत समाधानकारक पावले उचलली असल्याबद्दल पाटील यांनी बँकेचे अध्यक्ष दिलीप पाटील व संचालक मंडळाचे कौतुक केले. दिलीप पाटील यांनी बँकेच्या ठेवी मार्च अखेरीस ४५०० कोटींवर जातील, असा दिलेला विश्वास खरा ठरेल, असेही पाटील म्हणाले.
जिल्हा बँकेचे अध्यक्ष दिलीप पाटील यांनी यावेळी प्रास्ताविक केले. बँकेने गेल्या पाच-सहा महिन्यांत केलेली प्रगती, घेतलले नवे निर्णय याची माहिती पाटील यांनी दिली. थकीत कर्जेच काय अपहाराच्या रक्कमाही वसुल करण्यात येत आहे. शेतकऱ्यांच्या मागणीप्रमाणे आता बँकेचा बोजा इतर हक्कात नोंद करण्यात येत आहे. ग्राहक मेळावे घेऊन ग्राहकांच्या मागणीप्रमाणे बदल केले आहेत, अशी माहिती त्यांनी दिली. स्वागत जिल्हा बँकेचे कार्यकारी संचालक बी. एम. रामदुर्ग यांनी केले. कार्यक्रमास माजी आमदार व बँकेचे संचालक विलासराव शिंदे, मानसिंग शिंदे, डॉ. सिकंदर जमादार, महेंद्र लाड, विक्रम सावंत, बी. के. पाटील, डॉ. पृथ्वीराज पाटील यांच्यासह सर्व संचालक उपस्थित होते. जिल्ह्यातील
सेवा सोययट्यांचे पदाधिकारी, सचिव, सहकारी संस्थांचे पदाधिकारी यांच्यासह ग्राहक मोठ्या संख्येने उपस्थित होते. बँकेचे उपाध्यक्ष संग्रामसिंह देशमुख यांनी सर्वांचे आभार मानले. जिल्हा बँकेच्या वतीने प्रकाशीत करण्यात आलेल्या २०१६च्या दिनदर्शिकेचे प्रकाशनही यावेळी करण्यात आले.

मोबाइल अॅप डाउनलोड करा आणि राहा अपडेट

विद्यार्थी संमेलन कर्नाळ्यात

December 30, 2015, 1:30 pm

≫ Next: मृत माशांचा मिरजेत खच

≪ Previous: ‘ग्राहकांना आधुनिक सेवा द्या’

$

0

0

म. टा. वृत्तसेवा, कुपवाड
तिसरे विद्यार्थी साहित्य संमेलन रविवारी तीन जानेवारीला मिरज तालुक्यातील कर्नाळ येथे होत आहे. एक दिवसाच्या या संमेलनाच्या अध्यक्षांपासून ते सहभागी साहित्यिक, मुलाखतकार, सूत्रसंचालन, आभारापर्यंत सर्वकाही विद्यार्थीच करणार आहेत, अशी माहिती दयासागर बन्ने आणि विकास चौगुले यांनी बुधवारी सांगलीत पत्रकारांना दिली.
बन्ने म्हणाले, कर्नाळ येथील हायस्कूलच्या पटांगणावर होणाऱ्या विद्यार्थी साहित्य संमेलनाच्या परिसराला साहित्यिक म. भा. भोसले साहित्यनगरी असे नाव देण्यात आले आहे. तीसरी ते आठवीपर्यंतची एक हजार मुले-मुली यामध्ये सहभागी होणार आहेत. संमेलनाच्या अध्यक्षा म्हणून मौजे डिग्रज येथील कु. सुमरण जवाहरलाल जमादार हिची तर स्वागताध्यक्ष म्हणून आदेश देशमाने या विद्यार्थ्याची निवड करण्यात आली आहे. कवी संमेलनाचे अध्यक्षपद ओंकार सिद्ध तर कथा वाचन संमेलनाचे अध्यक्षपद सुबोध पाटील हा सांभाळणार आहे. या संमेलनात प्रकाशक आणि पाठ्यपुस्तकांतील लेखक बाबा भांड यांची मुलाखत विद्यार्थी घेणार आहेत. या संमलनाकडे एकही शिक्षक किंवा विद्यार्थ्याचा पालक फिरकणार नाही, याची काळजी घेण्यात येणार आहे.
सांगलीत शब्दोत्सवाचे आयोजन
सांगलीत एक जानेवारीपासून ग्रंथप्रदर्शन आणि व्याख्यानमालेचा समावेश असलेल्या शब्दोत्सवाचे आयोजन करण्यात आले आहे. या उपक्रमाचे उद्घाटन जिल्हाधिकारी शेखर गायकवाड यांच्या व्याख्यानाने होणार आहे. हा उत्सव ११ जानेवारीपर्यंत चालणार असल्याची माहिती प्रसाद वितरण ग्रंथ दालनाचे त्रिलोकनाथ जोशी आणि रोटरी क्लब विश्रामबागचे अध्यक्ष सदानंद गाडगीळ यांनी बुधवारी दिली.
सांगलीतील राम मंदिर चौकानजीकच्या सांगली इंडस्ट्रियल स्कूलच्या मैदानावर होणाऱ्या या ग्रंथोत्सवात पन्नास हजारांपेक्षा अधिक पुस्तके मांडण्यात येणार आहेत. राज्यनाट्य स्पर्धेत सांगली केंद्रावर प्रथम आलेल्या 'वृंदावन' या नाट्यप्रयोगावर चर्चा, साहित्य आणि शेती या विषयावर प्रा. वैजनाथ महाजन, आर. एम. माने, प्राचार्य कणसे, बापू जाधव, संतोष काळे यांच्यातला परिसंवाद. सहा जानेवारीला ज्येष्ठ पत्रकार सुकृत खांडेकर यांचे 'पत्रकारिता काल आज, उद्या', या विषयावर व्याख्यान होणार आहे.

मोबाइल अॅप डाउनलोड करा आणि राहा अपडेट

मृत माशांचा मिरजेत खच

December 30, 2015, 1:30 pm

≫ Next: सतेज पाटील यांच्याकडून महाडिकांचा पराभव

≪ Previous: विद्यार्थी संमेलन कर्नाळ्यात

$

0

0

मिरज : मिरजेतील गणेश तलावात मोठ्या प्रमाणात मासे मृत झाले आहेत. तलावात मेलेल्या माशांचा खच पडला आहे. मृत माशांमुळे परिसरात मोठ्या प्रमाणात दुर्गंधी पसरली आहे. नागरिकांनी तक्रार करुनही महापालिकेचे याकर्डे दुर्लक्ष आहे. नागरिकांनी महापौरांशी संपर्क साधल्यानंतर आरोग्य विभागाने तलावातील पाण्याचे नमुने तपासणीसाठी घेतले आहेत. तलावातील मृत मासे हटविण्याचे काम सुरू आहे.
शहराच्या मध्यवर्ती ठिकाणी असलेल्या गणेश तलवात मोठ्या प्रमाणात मासे आहेत. तलावाच्या सभोवताली रहिवासी परिसर आहे. तलावातील मासे मोठ्या प्रमाणात अचानक मृत झाल्याने माशांचा खच पडला आहे. मोठ्या संख्येने मासे मृत झाल्याने सभोवतालच्या परिसरात दुर्गंधी पसरली आहे. दुर्गंधीने त्रस्त झालेल्या नागरिकांनी महापालिकेशी संपर्क करण्याचा प्रयत्ना केला. मात्र महापालिका अधिकाऱ्यांनी नागरिकांच्या तक्रारीकडे दुर्लक्ष केले. सोमवारी दुर्गंधीचा त्रास वाढल्याने नागरिकांनी पुन्हा अधिकाऱ्यांशी संपर्क करण्याचा प्रयत्न केला. मात्र, महापालिका अधिकाऱ्यांचे दूरध्वनी बंद होते. त्यामुळे संतप्त झालेल्या नागरिकांनी महापौरांशी संपर्क साधला. या नंतर खडबडून जागे झालेल्या आरोग्य विभागाच्या अधिकाऱ्यांनी तलावातील पाण्याचे नमुने
तपासणीसाठी घेतले.

मोबाइल अॅप डाउनलोड करा आणि राहा अपडेट

सतेज पाटील यांच्याकडून महाडिकांचा पराभव

December 30, 2015, 10:21 am

≫ Next: इस्लामपुरात चार जानेवारीपासून राज्य कला प्रदर्शन

≪ Previous: मृत माशांचा मिरजेत खच

$

0

0

म. टा. प्रतिनिधी, कोल्हापूर

उमेदवारांच्या प्रतिष्ठेबरोबर जिल्ह्यातील नेत्यांच्या प्रामाणिकपणाची कसोटी लागलेल्या कोल्हापूर विधानपरिषद निवडणुकीत काँग्रेसच्या सतेज पाटील यांनी विद्यमान आमदार महादेवराव महाडिक यांचा ६३ मतांनी पराभव केला. पक्ष व नेत्यांच्या शब्दाला मतदारांनी साथ दिल्याने सतेज पाटील यांनी महाडिक यांनी अवलंबलेल्या गनिमी काव्याला सुरुंग लावला आणि सलग चौथ्यांदा विजयी होण्याचे महाडिकांचे स्वप्न धुळीस मिळवले. सतेज पाटील यांना २२० तर महाडिकांना १५७ मते पडली. पाच मते अवैध ठरवण्यात आली. या निकालानंतर कसबा बावड्यात पाटील समर्थकांनी नऊ वाजल्यापासूनच विजयाच्या रॅली काढून गुलालाच्या उधळणीबरोबरच फटाक्यांची आतषबाजी करत दिवाळी साजरी केली.सतेज पाटील यांनी या लढाईतील विजयाचे शिल्पकार राष्ट्रवादीचे नेते आमदार हसन मुश्रीफ असल्याच्या प्रांजळ भावना व्यक्त केल्या.

मतदानादिवशी बुधवारी मतमोजणीला गुलाल घेऊन येणार असल्याचे सांगणारे आमदार महाडिक फिरकलेच नव्हते. महाडिक यांना भाजप, शिवसेनेने मदत केली होती. या निकालाने जिल्ह्यातील महाडिक विरोधातील आगामी राजकारणाची दिशा स्पष्ट केली आहे. पाटील यांना अपेक्षेपेक्षा १२ मते कमी पडल्याची चर्चा होती. त्यामुळे एक किंवा दोन नेते फुटल्याची चर्चा आहे. मतमोजणीला काँग्रेसच्या नेत्यापेक्षा राष्ट्रवादीच्या नेत्यांचीच जास्त संख्या होती. यावरुन राष्ट्रवादी काँग्रेस यामध्ये प्रचंड ताकदीने उतरल्याचे दिसून आले.

काँग्रेसच्या तिकिटावर आमदार झालेल्या महाडिक यांना यंदा पक्षाने उमेदवारी नाकारत पाटील यांना उमेदवारी दिली होती. त्यामुळे महाडिक यांनी भाजपच्या मदतीने बंडखोरी केली. त्यामुळे दुरंगी सामन्यात नेते व मतदारांसाठी महिनाभर दोघांनीही जोरदार प्रयत्न केला. रविवारी (२७ डिसेंबर) झालेल्या मतदानामध्ये यातील इर्षेमुळे ३८२ मतदारांनी चुरशीने १०० टक्के मतदान केले होते. बुधवारी शासकीय तंत्रनिकेतनमध्ये सकाळी आठ वाजता मतमोजणीला प्रारंभ झाला. यापूर्वीच्या निवडणुकांमध्ये कधीही मतमोजणीला उपस्थित न राहणारे सतेज पाटील यावेळी मात्र उपस्थित होते. पण ते येण्यापूर्वीच त्यांचे उमेदवार प्रतिनिधी म्हणून आमदार हसन मुश्रीफ मतमोजणीच्या ठिकाणी उपस्थित होते. मतपत्रिका एकत्र करुन अवैध मते बाजूला काढून प्रत्यक्ष मोजणीच्या प्रक्रियेला नऊ वाजता सुरुवात झाली व साडेनऊ वाजता मतदानाचा कल समजला. पावणेदहा वाजता सतेज पाटील विजयी ठरले. निकाल समजताच सतेज पाटील यांनी मतमोजणीच्या ठिकाणीच मुश्रीफ, प्रा. जयंत पाटील यांची गळाभेट घेऊन विजयाचा आनंद साजरा केला.

सतेज पाटील यांच्याकडून २५० वर मतदार असल्याचे सांगितले होते. पण त्यांच्या अपेक्षेपेक्षा १२ मते कमी पडल्याची चर्चा होती. तर महाडिक यांनी मतदानादिवशी दुपारी बारा वाजेपर्यंत झालेले १५२ मतदान आपले असल्याचे सांगितले होते. त्यानंतरच्या होणाऱ्या मतदानातून आपल्याला ४० मतदान मिळेल, असे गणित मांडले होते. मात्र त्यांचा हा आकडा १५७ च्या पुढे सरकलाच नसल्याचे मतमोजणीतून स्पष्ट झाले. महाडिक यांच्यावतीने उमेदवार प्रतिनिधी म्हणून सुनील कदम उपस्थित होते. तर पाटील यांच्याकडून मतमोजणी प्रतिनिधी म्हणून प्रा. जयंत पाटील, राजेश लाटकर, मोहन सालपे, अजित फराकटे होते. तर महाडिक यांच्याकडून सुनिल मोदी, संग्राम निकम उपस्थित होते.

मोबाइल अॅप डाउनलोड करा आणि राहा अपडेट

---

इस्लामपुरात चार जानेवारीपासून राज्य कला प्रदर्शन

December 30, 2015, 10:27 am

≫ Next: मासिक पाससाठी विद्यार्थी ताटकळले

≪ Previous: सतेज पाटील यांच्याकडून महाडिकांचा पराभव

$

0

0

म. टा. वृत्तसेवा, इस्लामपूर

महाराष्ट्र शासनाच्या कला संचालनालयातर्फे होणारे या वर्षीचे विद्यार्थी विभागाचे '५६ वे राज्य कला प्रदर्शन' येत्या सोमवारपासून इस्लामपूर येथे सुरू होत आहे. सोमवार, ता. ४ जानेवारी ते रविवार, (ता. १०) या कालावधीत होत असलेले हे प्रदर्शन जयंत पाटील खुले नाट्यगृह, ताकारी रोड, येथे आयोजित करण्यात आले आहे. या प्रदर्शनाचे उद्‍घाटन शालेय, उच्च व तंत्र शिक्षणमंत्री विनोद तावडे यांच्या हस्ते होणार आहे. या कार्यक्रमास उच्च व तंत्र शिक्षण राज्यमंत्री रवींद्र वायकर, आमदार जयंत पाटील, उच्च व तंत्र शिक्षण विभागाचे प्रधान सचिव डॉ. संजय चहांदे आणि राज्याचे प्रभारी कला संचालक राजीव मिश्रा उपस्थित राहणार आहेत. कलापुष्प शिक्षण संस्थेचे सचिव प्रा. बाळासाहेब पाटील यांनी पत्रकार परिषदेत ही दिली.

या प्रदर्शनाचे आयोजन येथील राजारामबापू पाटील चित्रकला महाविद्यालयाने केले आहे. या प्रदर्शनाच्या निमित्ताने विविध कार्यक्रमांचे आयोजन करण्यात आले आहे. कला प्रदर्शनाच्या उद्‍घाटनप्रसंगी पारितोषिक व गुणवत्ता प्रमाणपत्र प्राप्त विद्यार्थ्यांना पारितो‌षिके देऊन सन्मानित करण्यात येणार आहे. या पारितोषिक वितरणानंतर कला महाविद्यालयातील विद्यार्थी-विद्यार्थींनीचा सांस्कृतीक कार्यक्रम होणार आहे.

हे प्रदर्शन महाराष्ट्रातील कला संस्थांच्या विद्यार्थ्यांना आपल्या कलाकृती रसिकांपर्यंत पोहोचविण्याचे एक प्रभावी माध्यम ठरत आहे. जिल्हा व तालुकास्तरावर या राज्य कलाप्रदर्शनाचे आयोजन केले जाते. मुलभूत अभ्यासक्रम, रेखा व रंग कला, षिल्पकला व प्रतिमानबंध, कला षिक्षक प्रषिक्षण, उपयोजित कला, कला व हस्त व्यवसाय (धातूकाम, मातकाम, अंतर्गत गृह सजावट, वस्त्रकला) आणि अपंग अषा सात विभागात सुमारे पाच हजारांवर अधिक कलाकृती स्वीकारण्यात आल्या होत्या. त्यापैकी सुमारे सातशे कलाकृती या प्रदर्शनासाठी निवडण्यात आल्या आहेत. विविध माध्यम आणि कलाप्रकारातील कलाकृती एकाचवेळी आस्वादण्याची संधी या निमित्ताने रसिकांना उपलब्ध होणार आहे. प्रदर्शनात वस्तूचित्र, निसर्ग नमुना, व्दिमित व त्रिमित संकल्प, रचना मित्र, निसर्ग चित्र व्यक्तिरेखांकन, व्यक्तिचित्र, मुद्राचित्र, व्यक्तिषिल्प, जाहिरात, प्रतिबिंबीत करणाऱ्या प्रदर्शनातील कलाकृती काळाचे भान जपणाऱ्या आजच्या पिढीच्या आहेत. बुधवारी, ६ जानेवारीला आंतरराष्ट्रीय ख्यातीचे सुलेखनकार अच्युत पालव यांचे प्र‌ात्यक्षिक होणार आहे.

पत्रकार परिषदेला प्राचार्य प्रदीप पाटील, बी. व्ही. पाटील, अजेय दळवी, कला संचालनालयाचे प्रदर्शन अधिकारी शशिकांत काकडे आदी

उपस्थित होते.

मोबाइल अॅप डाउनलोड करा आणि राहा अपडेट

मासिक पाससाठी विद्यार्थी ताटकळले

December 30, 2015, 12:09 pm

≫ Next: सोहाळे बंधाऱ्याला गळती

≪ Previous: इस्लामपुरात चार जानेवारीपासून राज्य कला प्रदर्शन

$

0

0

म. टा. वृत्तसेवा चंदगड

येथील आगारामध्ये एसटीच्या मासिका व त्रैमासिक पाससाठी शालेय व महाविद्यालयीन विद्यार्थी-विद्यार्थ्यींनीनी गर्दी करत असून दिवाळी सुट्टीनंतर पासची ही दुसरी वेळ असल्यामुळे विद्यार्थ्यांना दिवसभर ताटकळत उभे रहावे लागत आहे. पास मिळविण्यासाठी विद्यार्थी-विद्यार्थ्यींनी सकाळपासून उपाशीपोटी रांगेत उभ्या होत्या. दिवाळी सुटीनंतर एकाच वेळी सर्वच विद्यार्थी-विद्यार्थ्यींनींचे पास संपल्याने मोठी गर्दी होती. कॉलेजला येणाऱ्या अनेक विद्यार्थी-विद्यार्थ्यींनीं या ग्रामीण भागातील येत असल्यामुळे अनेकांना सायंकाळपर्यंत उपाशीपोटीच रहावे लागते. त्यामुळे चंदगड आगाराने विद्यार्थ्यांचे होणारे हाल लक्षात घेता पासचे नियोजन करावे अशी मागणी आहे.

चंदगड आगारामध्ये सकाळी नऊ ते सायंकाळी चार या वेळेत पास दिले जातात. शाळेची वेळ सकाळी अकरा तर महाविद्यालयीन वेळ सकाळी आठपासून असते. मात्र गर्दीला टाळण्यासाठी अनेक विद्यार्थी-विद्यार्थ्यींनी सकाळी पहिल्या बसने येवून कॉलेजला दांडी मारत पास पदरात पाडून घेतात. चंदगड आगारामध्ये कोवाड महाविद्यालयाशी संबंधित विद्यार्थी-विद्यार्थ्यींनींना आगारातील एक व्यक्ती जाऊन पास देतो. कोवाड व्यतिरिक्त उर्वरीत चंदगड, अडकूर, हलकर्णी, पाटणे फाटा, नागनवाडी, कार्वे, तुर्केवाडी, हेरे, पाटणे, कानूर, तुडये येथील विद्यार्थी-विद्यार्थ्यींनी पास हा चंदगड आगारामध्येच दिला जातो. त्यामुळे गर्दी जाणवते. कॉलेजच्या प्रारंभी प्रवेशाच्या वेळी जसजसे प्रवेश घेतले जातात. त्याप्रमाणे पास काढले जातात. मात्र यावेळी दिवाळी सुटी संपल्यानंतर कॉलेज सुरु झाल्यानंतर विद्यार्थ्यांनी एकदम पास काढले. सुटी संपल्यानंतर काढलेले पास एकाच वेळी संपल्याने यावेळी मोठी गर्दी झाली. उपाशीपोटी दिवसभर रांगेत थांबून केवळ पास काढून घरी परतले.

मोबाइल अॅप डाउनलोड करा आणि राहा अपडेट

सोहाळे बंधाऱ्याला गळती

December 30, 2015, 12:12 pm

≫ Next: आमदार चंद्रदीप नरकेंची ‘करवीर’वर मांड पक्की

≪ Previous: मासिक पाससाठी विद्यार्थी ताटकळले

$

0

0

म. टा. वृत्तसेवा, आजरा

लघुसिंचन विभागाच्या अखत्यारित असलेला सोहाळे बंधारा सध्या धबधब्यासारखा कोसळू लागला आहे. या बंधाऱ्यात बरगेच व्यवस्थित न बसविल्यामुळे पाण्याचा प्रवाह वाढत चालला आहे. ही गळती न काढल्यास व चांगले बरगे न बसविल्यास ऐन उन्हाळ्याआधीच बंधारा कोरडा पडणार आहे. यामुळे या परिसरातील शेती आणि ग्रामस्थांच्या पिण्याच्या पाण्याचा मोठा प्रश्न निर्माण होणार आहे. जलसंधारणकडील लघुसिंचन विभागाला याबाबत काही देणे-घेणेच नसल्याने याबाबत पावले उचलली जात नसल्याचे दिसत आहे. परिणामी बंधाऱ्यात जेमतेमच पाणी शिल्लक आहे.

यावर्षीच्या निच्चांकी पावसाच्या पार्श्वभूमीवर तालुक्यातील जलस्त्रोत बळकट करण्याचे व जमेल तेथे पाणी साठवून ठेवण्याच्या सूचना संबंधित विभागांस देण्यात आल्या होत्या. पण त्या सूचनांची पायमल्ली कशी व कोणत्या पद्धतीने होत आहे, याचे ज्वलंत उदाहरण म्हणून सोहाळे बंधाऱ्यातील धबधब्यासारखी गळतीकडे पाहता येईल. जमेल तेथे पाणी अडवा, पाण्याची अनाठायी उधळपट्टी रोखा, असे सांगूनही या गळतीकडे दुर्लक्ष करत आहे. हा विभाग नेमका असतो कुठे व करतो काय, असे विचारणे सुरू आहे.

सोहाळे गावाजवळ बंधारा असून यामध्ये अडवलेले पाणी उन्हाळ्यात आसपासच्या गावांना मिळते. किंबहुना यातील पाणी हिरण्यकेशीच्या काठावरील गावांना मिळते. यावर्षी तालुक्यात पाऊसमान कमी झाल्याने पाण्यचे मोठे दुर्भिक्ष्य समोर आहे. मध्यंतरी तहसीलदार शिल्पा ठोकडे यांनी महसूलसह अन्य विभागातील अधिकारी व कर्मचाऱ्यांची बैठक घेऊन पाणीनियोजनाबाबत प्रयत्न केले होते. मात्र, या बैठकीतच अनेकजण कोणतेही नियोजन न करता आल्याने ठोकडे यांनी चांगलेच झापले होते. त्यानं‌तरही पाण्याबाबत गांभिर्य जाणवत नाही. मुळात तालुक्यात असलेल्या बंधाऱ्यांना घालण्यासाठी पुरेसे बरगे नाहीत. सुमारे ९० बरगे या विभागाला मिळाले होते. या बंधाऱ्यातील पाणी अडविण्यासाठी १८३ बरगे लागतात. त्यामुळे या नव्या व काही जुन्या बरग्यांचा वापर करून या बंधाऱ्यातील पाणी अडविले जाते. सध्या होणाऱ्या गळतीचा परिणाम पुढील काळात होणार आहे.

साळगाव बंधाराही दुर्लक्ष‌ित

सोहाळे बंधाऱ्याच्या वरच्याच बाजूला काही मीटर अंतरावर साळगाव बंधारा आहे. या बंधाऱ्यामध्ये बरगे घातले आहेत, पण त्यामध्ये माती भरून घेतलेली नाही. त्यामुळे या बंधाऱ्यात चांगले पाणी साठलेले दिसत असले तरी हा बंधाराही गळतो आहे. फक्त प्रमाण कमी आहे. तेथून पाणी या बंधाऱ्यापर्यंत येते आणि येथे निकामी बरगे वापरल्यामुळे पाणी धबधब्याप्रमाणे वाहते आहे.

मोबाइल अॅप डाउनलोड करा आणि राहा अपडेट

आमदार चंद्रदीप नरकेंची ‘करवीर’वर मांड पक्की

December 30, 2015, 12:16 pm

≫ Next: बावड्यात चौथ्यांदा दिवाळी

≪ Previous: सोहाळे बंधाऱ्याला गळती

$

0

0

Maruti.Patil@timesgroup.com

कोल्हापूरः निवडणूक साखर कारखान्याची असली तरी चेअरमन चंद्रदीप नरके यांनी २०१९ च्या विधानसभा निवडणुकीची तयारी म्हणून या निवडणुकीला गांभीर्याने घेतले. कारखाना निवडणुकीत पहिल्यापासूनच विरोधक निष्प्रभ ठरले तरी नरके यांनी नियोजनबद्ध आपली प्रचाराची यंत्रणा राबवत कुंभी-कासारी सहकारी साखर कारखान्यावर विजयाची हॅटट्रिक साधली. कारखान्याची निवडणूक असताना एक-एक विरोधकांना धोबीपछाड देत विधानसभा अधिक सोपी करुन घेतली. निवडणुकीदरम्यान अनेक विरोधी गटातील सक्षम नेत्यांना आपल्या कळपात सामील करुन विधानसभा निवडणुकीबरोबर पुढील वर्षात होणाऱ्या कुंभी व यशवंत बँकेच्या निवडणुकीची भक्कम मोर्चेबांधणी करुन ठेवली आहे. कारखाना निवडणुकीच्या माध्यमातून काँग्रेस गटाची मात्र मोठी पिछेहाट झाली आहे.

कुंभी-कासारी कारखान्यावर स्वर्गीय डी. सी. नरके यांचे वर्चस्व असले, तरी त्यांच्यासमोर कायम मारुती खाडे, शंकरराव पाटील-शिंगणापूरकर, पांडुरंग दादा पाटील यांच्या कडव्या विरोधाला सामोरे जावे लागत होते. विरोधकांना माजी कृषी राज्यमंत्री श्रीपतराव बोंद्रे यांची मदत होत होती. या युतीला युवकांची साथ मिळाल्याने १९९९ मध्ये कुंभीमध्ये सत्तातंर झाले. पाच वर्षांच्या संघर्षानंतर अरुण नरके, चंद्रदीप नरके या चुलत्यापुतण्यांनी पुन्हा कारखान्यावर सत्ता मिळवली. त्यानंतर झालेल्या २००४ निवडणुकीत त्यांनी मोठ्या संघर्षातून कारखान्यावर सत्ता कायम राखली. त्याचवेळी मतदारसंघ पुनर्रचनेमध्ये करवीर विधानसभा मतदारसंघ आकाराला आला. मतदारसंघात पन्हाळा, गगनबावडा तालुक्यातील काहींचा गावांचा समावेश असल्याने आणि याच गावात कारखान्याचे कार्यक्षेत्र असल्याने चंद्रदीप यांनी पायाला भिंगरी बांधली. नियोजनबद्ध आखणीद्वारे त्यांनी मतदारसंघात कार्यकर्त्यांची फळी निर्माण केली. त्याला गोकुळचे ज्येष्ठ संचालक अरुण नरके आणि बंधू अजित यांची मोलाची साथ मिळाली. त्यांच्या प्रयत्नातून त्यांनी काँग्रेसचे जिल्हाध्यक्ष आणि विद्यमान आमदार पी. एन. पाटील यांचा २००९ मध्ये पराभव केला. कारखाना आणि विधानसभा निवडणुकीतमध्ये यश मिळवत नरके गटाने ताकद निर्माण केली.

गटाची ताकद वाढत असतानाच नाराजीमध्येही वाढ होती. कारखान्याचा आमदाराकीसाठी वापर होत असल्याचा विरोधकांकडून आरोप केला जावू लागला. त्यामुळे विरोधकांनी दोन वर्षांपासूनच कारखान्याच्या निवडणुकीची तयारी सुरू केली होती. याचा फायदा घेत २०१४ च्या निवडणुकीत पी. एन. पाटील यांनी विजयाकडे वाटचाल केली, मात्र शेवटच्या क्षणी त्यांना पराभव पत्करावा लागला. पाटील यांनी पराभव जिव्हारी लागल्याने कारखाना निवडणुकीमध्ये अलिप्त राहण्याचे धोरण स्वीकारले. त्यामुळे झालेल्या घडामोडीमुळे राजर्षी शाहू पॅनेलची जमत आलेली घडी विस्कटली. अखेरच्या क्षणी बचाव मंचचे बाजीराव खाडे यांनी पॅनेलची बांधणी केली. पण त्यांनाही पूर्ण पॅनेल देता आले नाही. याचवेळी विरोधकांचे तगडे पॅनेल असल्याचे गृहीत धरुन चेअमरन नरके यांनी जोरदार मोर्चेबांधणी केली. निवडणूक एकतर्फी होणार असली, तरी नरके यांनी प्रचारामध्ये कोणतीही शिथिलता न आणता जोमाने यंत्रणा राबवली. कारखान्याच्या निवडणुकीच्या माध्यमातून पी. एन. यांना विधानसभेची मोर्चेबांधणी करता आली असती, पण त्यांनी ही संधी गमावली. आमदार नरके यांनी मात्र या संधीचे सोने केले.

कारखान्याचे व्यवस्थापन बदलावे लागेल

कारखाना निवडणुकीच्या माध्यमातून विधानसभेची बेगमी केली असली, तरी कारखान्यावर तितकेच लक्ष द्यावे लागणार आहे. ऊस क्रमपातळीमध्ये प्रचंड हेराफेरी केली जात आहे. त्यामुळे सभासदांमध्ये प्रचंड नाराजी आहे. एफआरपीनुसार दर देण्याबरोबरच उत्पादकांचे हीत जोपासण्यासाठी अधिक प्रयत्न करण्याची आवश्यकता आहे. स्वर्गीय डी. सी. नरके यांनी कारखाना कधीही राजकाराणाचा अड्डा होऊ दिला नाही. त्यांच्या आदर्शाप्रमाणे कारखाना राजकीय अड्डा बनणार नाही, याची भविष्यात काळजी घ्यावी लागेल.

साक्षात्कारी जादू चालली नाही

संदीप नरके यांना विरोधी आघाडीने बळ देवून नरके कुटुंबीयात दुही माजवण्याचा प्रयत्न केला. राजर्षी शाहू पॅनेलच्या रचनेदरम्यान नेत्यांनी टोकाचा एकमेंकाबद्दल दुराग्रह दाखवल्याने होता-होता आघाडी बिघडून गेली. विरोधकच निष्प्रभ झाल्याने गोकुळचे ज्येष्ठ संचालक अरुण नरके यांनी मुलगा संदीप यांची माघारीसाठी मनधरणी केली. त्यामध्ये ते यशस्वीही झाले. मात्र तांत्रिक कारणाने त्यांचा अर्ज कायम राहिला. याचाच आधार घेत संदीप हे 'साक्षात्कार' झाल्याचा दावा करत निवडणुकीला सामोरे गेले.मात्र ही साक्षात्कारी जादू चालली नाही.

मोबाइल अॅप डाउनलोड करा आणि राहा अपडेट

बावड्यात चौथ्यांदा दिवाळी

December 30, 2015, 12:18 pm

≫ Next: मुश्रीफ, कोरे, सतेज नवे समीकरण

≪ Previous: आमदार चंद्रदीप नरकेंची ‘करवीर’वर मांड पक्की

$

0

0

म. टा. प्रतिनिधी, कोल्हापूर

विधान परिषद निवडणुकीत सतेज पाटील यांनी ६३ मतांनी विजय संपादन केल्यानंतर पाटील समर्थकांनी कसबा बावड्यात प्रचंड जल्लोष साजरा केला. अजिंक्यतारा कार्यालयावरील डॉल्बीच्या दणदणाटासह बावड्याच्या प्रत्येक गल्लीत फटाक्यांची आतषबाजी आणि गुलालाची उधळण झाली, तर वाद्यांच्या गजरात साखर वाटप करून बावडेकरांनी अक्षरशः चौथी दिवाळीच साजरी केली.

सतेज पाटील आणि महाडिक यांच्यातील लढतीच्या निकालाची सर्वाधिक उत्सुकता बावड्यात होती. काहींना तर सतेज पाटील यांच्या विजयाची खात्रीच होती, त्यामुळे जल्लोषाची तयारीही सुरू झाली होती. अनेक समर्थकांनी डिजिटल बोर्ड छापाईसाठी ऑर्डर दिल्या होत्या. सकाळी आठ वाजता सतेज पाटील मतमोजणीच्या ठिकाणाकडे रवाना झाल्यानंतर घरात एकही कार्यकर्ता नव्हता. श्रीराम सोसायटी, डॉ. डी. वाय. पाटील पतसंस्थेसह चौकांमध्ये कार्यकर्ते थांबले होते. मतमोजणीला सुरुवात झाल्यानंतर हळहळू कार्यकर्त्यांची गर्दी वाढू लागली. साडेनऊच्या सुमारास सतेज पाटील यांचे मताधिक्य समजताच समर्थकांनी जल्लोष साजरा करायला सुरुवात केली. काही क्षणातच शेकडो तरुण रस्त्यावर आले आणि प्रचंड घोषणाबाजीत फटाक्यांची आतषबाजी, गुलालाची उधळण सुरू झाली. बावड्याच्या प्रत्येक गल्लीत फटाके फुटले आणि अभिनंदनाचे फलकही उभे राहिले. अनेक ठिकाणी बावडेकरांनी साखर वाटप करून आनंद साजरा केला.

साडेअकराच्या सुमारास सतेज पाटील हे समर्थकांसह बावड्यात पोहोचले. प्रथम त्यांनी बावड्याचे ग्रामदैवत हनुमान मंदिरात जाऊन दर्शन घेतले, त्यानंतर गणपती मंदिरात जाऊन दर्शन घेतले. ग्रामदैवतांच्या दर्शनानंतर ज्ञानशांती बंगल्यात पोहोचलेल्या सतेज पाटील यांना भाऊ संजय पाटील यांनी उचलून घेतले. वडील डॉ. डी. वाय. पाटील आणि आई शांतादेवी यांना नमस्कार केला. यावेळी डी. वाय. पाटील यांनी आनंदाने सतेज पाटलांना कवेत घेऊन चुंबन घेतले. अत्यानंदाने आईच्या डोळ्यात अश्रू आल्यानंतर काही काळ सतेज पाटीलही भावूक झाले होते. संजय डी. पाटील. वहिणी वैजयंती पाटील यांना नमस्कार केल्यानंतर सतेज पाटील थेट यशवंत निवासमध्ये पोहोचले. पत्नी प्रतिमा यांची भेट घेतल्यानंतर ते पुन्हा समर्थकांच्या घोळक्यात सहभागी झाले. सकाळपासूनच महापौर अश्विनी रामाणे, माजी महापौर वैशाली डकरे, वंदना बुचडे यांच्यासह कॉँग्रेसचे सर्व नगरसेवक, प्रल्हाद चव्हाण आदी नेतेही उपस्थित होते.

अकलूजचा ताशा कडाडला

विधान परिषद निवडणुकीत पाटील निवडून येणार याची खात्री त्यांच्या नातेवाईकांसह पै-पाहुण्यांनाही होती. पाटील यांचे मेहुणे सुशांत आणि निशांत पाटील यांनी विजयानंतर जल्लोष करण्यासाठी अकलूजहून येतानाच अकलूजचे प्रसिद्ध ताशा पथक सोबत आणले होते. निकाल समजताच बावड्यात अकलूजचा ताशा कडाडला.

कुटुंब भावूक झाले

ग्रामदेवतांच्या दर्शनानंतर सतेज पाटील यांनी घरात जाऊन आई-वडील आणि बंधूंची भेट घेतली. दोन्ही घरांमध्ये औक्षणही झाले. विधानसभेतील पराभव जिव्हारी लागल्यानंतर चुरशीच्या लढतीत मिळवलेल्या विजयाने संपूर्ण पाटील कुटूंब आनंदात बुडाले होते. सतेज पाटील यांच्या आईच्या डोळ्यात पाणी आल्यानंतर आनंदातही काही क्षण वातावरण भावूक झाले होते.

ऋतुराज यांनी केले सारथ्य

निकालानंतर शासकीय तंत्रनिकेतन कॉलेजपासून ते अजिंक्यतारा आणि अजिंक्यतारापासून बावड्यापर्यंत सतेज पाटील यांच्या गाडीचे सारथ्य ऋतुराज पाटील यांनी केले. महापालिका निवडणुकीपासनू ऋतुराज यांचा राजकीय वर्तुळातील वावर वाढला आहे, त्यामुळे पुढील विधानसभेसाठी कोल्हापूर दक्षिण मतदार संघातून ऋतुराज यांची दावेदारी भक्कम झाली असल्याची चर्चा बावड्यात सुरू होती.

...आणि विजय साजरा झाला

प्रथम जिल्ह्यातील बारा केंद्रावरील २४ मतपेट्यांमधील साऱ्या मतपत्रिका एक​त्रित करण्यात आल्या. त्यानंतर सरसकट दोन टेबलवर प्रत्येकी १२८ तर एका टेबलवर १२५ मतपत्रिका देण्यात आल्या. त्यातून पाच अवैध मतपत्रिका बाजूला काढण्यात आल्या. त्यामुळे विजयी होण्यासाठी १९० चा कोटा निश्चित करण्यात आला. सर्व मतपत्रिका एकत्र करुन प्रत्येक टेबलवर १२५ मतांचे गठ्ठे देण्यात आले. तर एका टेबलला जादाची ७ मते देण्यात आली. त्यांची उमेदवारनिहाय मतमोजणी करण्यात आली. त्यामध्ये पहिल्या पसंती क्रमात १९० चा विजयाचा कोटा सतेज पाटील यांनी गाठल्याने त्यांचा विजय निश्चित झाला. मतपत्रिका एकत्र करुन अवैध मते बाजूला काढून प्रत्यक्ष मोजणीच्या प्रक्रियेला नऊ वाजता सुरुवात झाली व साडेनऊ वाजता मतदानाचा कल समजला.

पावणेदहा वाजता सतेज पाटील विजयी ठरले. निकाल समजताच सतेज पाटील यांनी मतमोजणीच्या ठिकाणीच मुश्रीफ, प्रा. जयंत पाटील यांची गळाभेट घेऊन विजयाचा आनंद साजरा केला. सतेज पाटील यांच्याकडून २५० वर मतदार असल्याचे सांगितले होते. पण त्यांच्या अपेक्षेपेक्षा १२ मते कमी पडल्याची चर्चा होती. तर महाडिक यांनी मतदानादिवशी दुपारी बारा वाजेपर्यंत झालेले १५२ मतदान आपले असल्याचे सांगितले होते. त्यानंतरच्या होणाऱ्या मतदानातून आपल्याला ४० मतदान मिळेल, असे गणित मांडले होते. मात्र त्यांचा हा आकडा १५७ च्या पुढे सरकलाच नसल्याचे मतमोजणीतून स्पष्ट झाले. महाडिक यांच्यावतीने प्रतिनिधी म्हणून सुनील कदम उपस्थित होते.

मोबाइल अॅप डाउनलोड करा आणि राहा अपडेट