घटना क्रमांक एक : स्थळ - कसबा बावडा, गणेश कॉलनी, ता. १६ डिसेंबर २०१५, वेळ - रात्री दहाच्या सुमारास, गुन्हा - आंतरजातीय प्रेमविवाह केल्याच्या रागातून दोघा सख्ख्या भावांकडून बहिणीचा खून.
घटना क्रमांक दोन : स्थळ - गंगावेश, ता. ५ ऑगस्ट २०१५, वेळ - रात्री ८ च्या सुमारास, गुन्हा - फॅशनेबल कपडे घालते आणि मोबाइलवरून मुलांशी बोलते म्हणून सख्ख्या भावाकडून बहिणीचा खून.
घटना क्रमांक तीन : स्थळ - इस्लामपूर (साखराळे), वेळ - सुमारे १५ वर्षांपूर्वी, गुन्हा - आंतरजातीय प्रेमविवाह केल्याच्या रागातून आई-वडिलांनी मुलीला जिवंत जाळून मारले.
पोलिस रेकॉर्डवर आलेल्या या प्रातिनिधिक घटना. ज्या घटनांची वाच्यताच झालेली नाही, अशाही अनेक घटना घडत असतात. मुलीचे मनाविरुद्ध लग्न लावून देऊन तिच्या व्यक्तिस्वातंत्र्याचा आणि तिच्या अधिकारांचा गळा घोटण्याचे काम तर दररोज कुठे ना कुठे घडतच असते. पुरोगामी म्हणवणाऱ्या कोल्हापूर जिल्ह्यातही प्रतिष्ठेपायी स्वतःच्याच पोटच्या गोळ्यांना संपविण्याच्या घटना घडत असल्याने उत्तर भारतातील ऑनर किलिंगचे लोण इथेही धडकल्याची चर्चा सुरू झाली आहे.
सख्खा बहिणीने केलेल्या प्रेमविवाहाचा राग मानत धरून स्वतःच तिची जीवनयात्रा संपवायची आणि प्रतिष्ठेला लागलेला बट्टा पुसल्याची शेखी मिरवायची, असे प्रकार दिवसेंदिवस वाढत आहेत. कसबा बावड्यात गुरुवारी (१६ डिसेंबर) रात्री घडलेली घटना हा अशाच ऑनर किलिंगचा प्रकार असल्याचे पुढे आले आहे. दोन्ही तरुणांनी अतिशय शांत डोक्याने केलेल्या या खुनामुळे बहीण-भावाच्या नात्याला कलंक लागल्याची प्रतिक्रिया आहे.
उत्तर भारतातील राजस्थान, उत्तर प्रदेश आणि मध्य प्रदेशमध्ये ऑनर किलिंगच्या घटना वारंवार घडत असतात. तिथे असलेला जात पंचायतीचा प्रभाव, जमीनदार आणि मजुरांमधील वाढती दरी आणि खोट्या प्रतिष्ठेचे वलय यामुळे जातीबाहेर लग्न करणाऱ्या मुलींना जीवे मारण्याच्या घटना घडतात.
राजर्षी शाहू महाराजांनीच आंतरजातीय विवाहांसाठी प्रोत्साहन दिले होते. मात्र, अलीकडच्या काळात खोट्या प्रतिष्ठेला खतपाणी घालण्याचेच प्रकार मोठ्या प्रमाणात घडत असल्याने अशा घटना वाढत असल्याचे समाज अभ्यासकांचे मत आहे.
१६ डिसेंबर रोजी कसबा बावडा येथे घडलेल्या घटनेने चौघांच्या आयुष्याची राखरांगोळी केली. इंद्रजित आणि मेघा कुलकर्णी या दाम्पत्याचे आयुष्य तर संपलेच, पण मेघाचे सख्खे भाऊ गणेश आणि जयदीप पाटील या दोघांचेही भविष्य अंधःकारमय बनले आहे. थेरगावच्या पाटील कुटुंबासाठी हा दुहेरी धक्का बसला आहे. पोटची मुलगी जीवानिशी गेली आणि दोन तरुण मुलं पोलिस कोठडीत पडली आहेत. शहरापेक्षा ग्रामीण भागात खोट्या प्रतिष्ठेला कवटाळून बसण्याचे प्रकार घडतात.
सामाजिक प्रतिष्ठेला लागलेला धक्का, नातलग, पै-पाहुण्यांकडून होणारी हेटाळणी आणि पुरुषप्रधान मानसिकतेतून असे प्रकार घडले आहेत. कसबा बावडा येथील घटनेतही नेमके हेच घडल्याचे पोलिस तपासात निष्पन्न होत आहे. त्यामुळे खोट्या प्रतिष्ठेतूनच अशा घटना वाढत असल्याचे चित्र दिसत आहे.
जिवंतपणीच मुलीचे श्राद्ध
सहा महिन्यांपूर्वीच कोल्हापुरातील एका उपनगरात मुलीने आंतरजातीय विवाह केल्याचा राग मनात धरून तिच्या वडिलांनी मुलगी जिवंत असतानाच तिचे श्राद्ध घातले होते. मुलीच्या छायाचित्रासह एक फलक चौकात लावून त्यावर 'आमची मुलगी आमच्यासाठी मेली' असा मजकूरही त्यावर लिहिला होता.
मोबाइल अॅप डाउनलोड करा आणि राहा अपडेट
