काँग्रेस, भाजपचे समर्थकांसह शक्तिप्रदर्शन
म. टा. प्रतिनिधी, कोल्हापूर
काँग्रेसबरोबर भाजपच्या उमेदवारांनी अर्ज सादर करत असताना समर्थकांचे शक्तीप्रदर्शन करत आपापल्या ताकदीची चुणुक दाखवण्याचा प्रयत्न केला. यामध्ये काँग्रेस पक्षासोबत राष्ट्रवादीचे पदाधिकारी उपस्थित राहून आघाडीतील एकजुट दाखवण्यात यशस्वी झाले. पण भाजपबरोबर असणाऱ्या शिवसेनेचे कुणी पदाधिकारी अर्ज भरताना पहायला मिळाले नाहीत.
बुधवारी सकाळी नऊच्या सुमारास काँग्रेस उमेदवारीची घोषणा झाल्यानंतर दोन तासात सतेज पाटील यांनी समर्थकांना एकत्र करून जोरदार शक्तीप्रदर्शन केले. काँग्रेसचे जिल्हाअध्यक्ष पी. एन. पाटील यांच्यासह महापालिकेतील महापौरांसह प्रमुख पदाधिकारी व नगरसेवक, जिल्हा परिषदेतील प्रमुख पदाधिकारी, सदस्य तर सहभागी होतेच. पण त्याशिवाय संजय पाटील, ऋतुराज पाटील, प्रतिमा पाटील, पेठवडगावच्या विद्या पोळ, माजी खासदार जयवंतराव आवळे, गुलाबराव घोरपडे, पंचायत समिती, ग्रामपंचायतींचे पदाधिकारी आवर्जून उपस्थित होते. महापालिकेत व या निवडणुकीत मित्र पक्ष असलेल्या राष्ट्रवादी काँग्रेसचे आर. के. पोवार, शहर अध्यक्ष राजू लाटकर, उपमहापौर शमा मुल्ला यांची उपस्थिती आघाडीतील एकजूट दर्शवत होती.
त्यांच्यापाठोपाठ प्रकाश आवाडे यांनी अर्ज सादर केला. त्यावेळी त्यांच्यासोबत इचलकरंजी नगरपालिकेतील नगरसेवक उपस्थित होते. आमदार महादेवराव महाडिक यांच्यासोबत त्यांचे बंधू नाना महाडिक, गोकुळचे अध्यक्ष विश्वास पाटील, संचालक अरुण नरके, रणजीतसिंह पाटील, विश्वास जाधव, धैर्यशील देसाई, रामराजे कुपेकर, नगरसेवक ईश्वर परमार, वसंत नंदनवाडे आदी उपस्थित होते. स्वरुप महाडिक यांनी अर्ज भरताना सत्यजित कदम, सतीश घोरपडे, निलेश देसाई, राजसिंह शेळके उपस्थित होते.
एकीकडे काँग्रेसमधून इच्छुक असलेल्या उमेदवारांच्या अर्ज भरण्यासाठी गर्दी झालेली असताना भाजपकडून अर्ज दाखल करण्यास आलेल्या विजय सूर्यवंशी यांच्यासोबत मोजके नगरसेवक तसेच काही पदाधिकारी होते. त्यामध्ये भाजपचे महानगर अध्यक्ष महेश जाधव, अॅड. संपतराव पवार पाटील, आर. डी. पाटील, राहुल चिकोडे, विरोधी पक्षनेते संभाजी जाधव, नगरसेवक अजित ठाणेकर, आशिष ढवळे, संतोष गायकवाड, विजय खाडे, विजय जाधव, सदानंद कोरगावकर, मारुती भागोजी यांचा समावेश होता.
मोबाइल अॅप डाउनलोड करा आणि राहा अपडेट
