म. टा. प्रतिनिधी, कोल्हापूर
जयंती नाल्यातील सांडपाणी थेट पंचगंगा नदीत मिसळून प्रदूषणाची तीव्रता वाढत असल्याच्या तक्रारी असताना सोमवारी महापालिकेच्या अनागोंदी कारभाराचा आणखी एक नमुना सामोरा आला. खानविलकर पेट्रोल पंपाच्या पिछाडीस असलेल्या महापालिकेच्या ड्रेनेज पाइपलाइन व चेंबरला भगदाड पडून मोठ्या प्रमाणात मैलायुक्त सांडपाणी जयंती नाल्यातून थेट नदीत मिसळण्यास सुरूवात झाली आहे.
प्रजासत्ताक सामाजिक सेवा संस्थेच्या दिलीप देसाई यांनी याप्रश्नी लक्ष वेधल्यानंतर महापालिका आणि जिल्हा प्रशसनाची यंत्रणा हलली. महाराष्ट्र प्रदूषण नियंत्रण मंडळाचे क्षेत्र अधिकारी राजेश आवटी यांनी सांडपाण्याचे नमुने घेत ते तपासणीसाठी चिपळूण येथील प्रयोगशाळेकडे पाठविण्यात येणार आहेत.
जयंती नाल्यातील मैलायुक्त सांडपाणी थेट नदीत मिसळत असल्याचा ई मेल देसाई यांनी सोमवारी दुपारी जिल्हाधिकारी, प्रांताधिकारी,महाराष्ट्र प्रदूषण नियंत्रण मंडळ व महापालिका अधिकाऱ्यांना केला. त्यानंतर प्रशासकीय यंत्रणा गतीमान झाली. महापालिकेचे पर्यावरण अभियंता आर. के. पाटील, प्रदूषण नियंत्रण मंडळाचे क्षेत्र अधिकारी आवटी यांच्यासोबत देसाई यांनी जयंती नाला पंपिंग स्टेशन, खानविलकर पेट्रोल पंपाचा पिछाडीचा परिसर, चेंबरचे ठिकाण या परिसराची पाहणी केली. चेंबरला भगदाड पाडल्याचा आरोपही देसाई यांनी केला. दुधाळी मैदानकडून एक ड्रेनेज लाइन सिद्धार्थनगरच्या पिछाडीपर्यंत येते. सिद्धार्थनगरच्या पिछाडीस असलेल्या शेतामधून येणारे ड्रेनेज लाइन तुंबले आहे. चेंबरला भगदाड पडल्याने मैलायुक्त सांडपाणी थेट पंचगंगेत मिसळत आहे.
पाण्याचे नमुने तपासणीसाठी घेतले आहेत. चिपळूण येथील प्रयोगशाळेकडे ते मंगळवारी तपासणीसाठी पाठविण्यात येईल. पंधरा दिवसात अहवाल येईल. त्यानंतर वरिष्ठांच्या सूचनेनुसार महापालिकेविरोधात कारवाई होईल. जयंती नाल्यातील सांडपाणी कसलीही प्रक्रिया न करता थेट नदीत सोडले जात असल्याबद्दल महापालिकेविरोधात यापूर्वीच गुन्हे दाखल केले आहेत.
- राजेश आवटी, क्षेत्र अधिकारी, महाराष्ट्र प्रदूषण नियंत्रण मंडळ
मोबाइल अॅप डाउनलोड करा आणि राहा अपडेट
