घनकचऱ्यापासून वीज व खत निर्मिती करणाऱ्या पालिकेच्या प्रकल्पासाठीचे 'ग्रीन बॉक्स डायजेस्टर' हे मशीन आज आणण्यात आले. त्याचे पूजन नगराध्यक्ष संगिता गाडेकर यांच्या हस्ते झाले. नगरपरिषदेच्या नाविन्यपूर्ण योजनेतून हा प्रकल्प साकारत आहे. या प्रकल्पांतर्गत शून्य कचरा ही संकल्पना अस्तित्वात येणार आहे. 'क' वर्ग नगरपालिकांमध्ये राज्यात प्रथमच कागल येथे पाच एकर जागेवर हा प्रकल्प साकारत आहे. या प्रकल्पाचे काम ७५ टक्के पूर्ण झाले आहे. शून्य कचरा उपक्रमांतर्गत कागलला कचऱ्यापासून विजनीर्मितीसाठी साडेतीन कोटी रुपये मंजूर आहेत.
या प्रकल्पासाठी 'ग्रीन बॉक्स डायजेस्टर' हे मिथेन वायू तयार करणारे मशीन मंगळवारी आणले. यावेळी उपनगराध्यक्षा उषाताई सोनुले, नगरसेविका नम्रता कुलकर्णी, संजय चितारी आदींसह नगरेसवक, नगरेसविका उपस्थित होते.
याबाबत अधिक माहिती देताना पक्षप्रतोद रमेश माळी म्हणाले, या मशीनमध्ये जर्मन तंत्रज्ञानाचा अवलंब करण्यात आला आहे. दोन महिने कंपनीचे कर्मचारी हे मशीन हाताळणार असून दोन वर्षे या मशीनची देखभाल कंपनीकडून करण्यात येणार आहे. लवकरच आणखी एक मशीन येणार आहे. या दोन्ही मशीनसाठी पालिकेकडून प्लॅटफॉर्म तयार करण्यात आला आहे. पालिकेच्या कर्मचाऱ्यांनाही प्रशिक्षणही देणार आहेत. छत्तीसगड रायपूर येथून हे मशीन आणण्यात आले आहे. हे मशीन आणण्यासाठी आमदार हसन मुश्रीफ यांनी प्रयत्न केले. तत्कालिन जिल्हाधिकारी राजाराम माने व घोरपडे कारखान्याचे पर्यावरण तज्ज्ञ देसाई यांचेही सहकार्य लाभले आहे. या मशीनपासून अर्धा मेगावॅट वीज निर्मिती होणार आहे. तसेच कंपोष्ट आणि गांढूळ खताची निर्मिती होणार आहे. वीज निर्मितीतून शहरातील दोनशे पथदिव्यांना वीजेचा पुरवठा होणार आहे. ओल्या कचऱ्यापासून ही वीज निर्मिती केली जाणार आहे.
कचऱ्यापासून वीजनिर्मिती
कचऱ्यापासून विजनिर्मीती केल्या जाणाऱ्या क वर्ग नगरपालिकेतील राज्यातील एकमेव असणाऱ्या कागल नगरपालिकेने चारचाकी चार हायड्रोलिक घंटागाड्या खरेदी केल्या असून शहरातील सात हजार मालमत्ताधारकांना हिरवा आणि ओला कचरा स्वतंत्रपणे साठवण्यासाठी प्रत्येकी दोन बकेटचे वाटपही केले आहे. जमा झालेला कचरा जर्मन तंत्रज्ञानानुसार तीन ग्रीन बॉक्स टाकून त्यातील खिळे,प्लास्टिक बाजूला काढून उर्वरित कचऱ्यापासून उच्च दर्जाचे सेंद्रिय खत आणि तयार होणाऱ्या गॅसपासून शहरात एक हजार ४०० स्ट्रीट लाईट लागणार आहेत. ज्यासाठी नगरपालिका महिन्याकाठी सात लाख रुपये बील भरते. यातील रकमेत बचत होणार असून बचतीच्या रकमेतून शहरात छोटी-मोठी विकासकामे होण्यासाठी मदत होणार आहे.
मोबाइल अॅप डाउनलोड करा आणि राहा अपडेट