मुस्लीम सत्यशोधक मंडळाचे माजी अध्यक्ष आणि भाईचारा संघटनेचे अध्यक्ष हुसेन चाँदसाहेब जमादार (वय ७१, रा. प्लॉट नं. ६६, अरूणोदय हौसिंग सोसायटी, राजेंद्रनगर) यांनी राहत्या घरी गळफास लावून आत्महत्या केली. गुरूवारी पहाटे चारच्या सुमारास ही घटना उघडकीस आली. त्यांनी नैराश्यातून आत्महत्या केल्याची नोंद राजारामपुरी पोलिस ठाण्यात झाली आहे.
जमादार हे बुधवारी रात्री झोपी गेले होते. पहाटे चार वाजण्याच्या सुमारास त्यांच्या नातेवाईकांना जमादार यांनी आत्महत्या केल्याचे लक्षात आले. गेले तीन वर्षे ते डिप्रेशनखाली होते. पुणे व कोल्हापुरातील डॉक्टरांकडे ते उपचार घेत होते. त्यांच्या आजारात चढउतार होत होते असे त्यांच्या नातेवाईकांनी सांगितले. गुरूवारी सकाळी दहा वाजता बागल चौक येथील दफनभूमीत अंत्यसंस्कार करण्यात आले. त्यांच्या पश्चात पत्नी, दोन मुले, सुना, नातवंडे असा परिवार आहे.
जमादार यांनी हमीद दलवाई यांच्यासोबत मुस्लिम पुरोगामी समाजासाठी काम सुरू केले होते. त्यांनी आंतरभारती शिक्षण मंडळात त्यांनी २२ वर्षे हायस्कूलमध्ये नोकरी केली. विद्यार्थी दशेपासून समाजकार्यास सुरूवात केली. मुस्लीम समाजातील कालबाह्य चालीरिती, रूढी या विरूध्द आवाज उठवला. मुस्लीम सत्यशोधक मंडळाचे संस्थापक सभासद होते. मुस्लिम समाज प्रबोधन व शिक्षण प्रशिक्षण संस्थेच्या माध्यमातून त्यांनी काम केले. मुस्लिम समाजातील तलाक पीडित महिलांसाठी केंद्र स्थापन करून महिलांना न्याय देण्याचे काम केले. कोल्हापुरातील वारांगणासाठी संघटना तयार करून त्यांचे प्रश्न सोडवण्याचे काम केले. एड्स आजारासंबधी जनजागृती केंद्र त्यांनी सुरू केले.
मोबाइल अॅप डाउनलोड करा आणि राहा अपडेट
