म. टा. प्रतिनिधी, कोल्हापूर
महापालिकेची निवडणूक ऐन भरात आली असताना शहराच्या विकासाचा मुद्दा घेऊन सर्वच राजकीय पक्षांनी पोस्टरबाजीवर भर दिला आहे. शहर टोलमुक्त, पारदर्शी भ्रष्टाचारमुक्त प्रशासन, स्मार्ट सिटीकडे वाटचाल असे विकासाच मुद्दे मांडतच विरोधकांवर टिकास्त्रही सोडले आहे. फसव्या आघाडीला दूर करा, अशीही उपरोधिक टीका आणि मार्मिक पोस्टरबाजी राजकीय पक्षांनी केली आहे. स्थानिक नेत्यांसह राष्ट्रीय नेतेही पोस्टरवर झळकत आहेत.
काँग्रेस पक्षाने कोल्हापूरची स्मार्ट सिटीकडे वाटचाल याविषयी गेल्या काही वर्षात नव्याने उभारलेल्या इमारतींच्या माध्यमातून पोस्टर्स प्रदर्शित केली आहे. न्यायसंकुल, जिल्हाधिकारी कार्यालय, केशवराव भोसले नाट्यगृह या इमारतींसह कोल्हापूरची स्मार्ट सिटीककडे वाटचाल सुरू आहे हे पोस्टरमधून मांडले आहे. त्यावर माजी गृहराज्यमंत्री सतेज पाटील यांचे छायाचित्र आहे. पाच वर्षात कोल्हापूरचा विकास केवळ काँग्रेसने केला असल्याचे पोस्टर्समधून मांडले आहे.
'महाराष्ट्रासह देशाला नंबर एक बनवू शकतो', असे आश्वासने भाजपने पोस्टरमधून मतदारांना दिली आहेत. महायुतीच्या पोस्टरवर भ्रष्टाचारमुक्त प्रशासनासाठी महायुतीलाच विजय करण्याचे आवाहन आहे. केंद्रात भाजप, राज्यात भाजप आणि कोल्हापुरातदेखील भाजप-ताराराणी पक्ष महायुतीलाच विजयी करा, असे आवाहन करणारे पोस्टर्स झळकले आहेत. पंतप्रधान नरेंद्र मोदी, मुख्यमंत्री देवेंद्र फडणवीस यांच्यासह भाजपच्या पदाधिकाऱ्यांचे फोटो त्यावर आहेत. कमळ आणि कपबशीचे चिन्ह आहे. पालकमंत्री चंद्रकांत पाटील यांनी मतदारांना आश्वासन दिल्याचेही पोस्टर प्रदर्शित केले आहे. देश बदलतोय. नवंकाही घडतयं.. तुमचं एक मत कोल्हापूरही बदलू शकतं, असे आवाहन पंतप्रधान नरेंद्र मोदी करीत असल्याचे पोस्टर प्रदर्शित केले आहे.
शिवसेनेने 'टोला आम्हीच देणार', या आशयाची फलकबाजी केली आहे. 'कोल्हापूर शहर टोलमुक्त करणार म्हणजे करणारच...' अशी ग्वाही पोस्टरमधून दिली आहे. 'आम्ही जनतेसोबत... जनता आमच्यासोबत, लढाई शिवसेनेची, स्वाभिमानाची, शिवसेना आपली कामाला पुढे' असा आशयाचे पोस्टर्स शहरभर आहेत. टोलच्या लढाईत शिवसेना अग्रभागी असल्याचे पोस्टरमधून दर्शविले आहे. सार्वजनिक बांधकाम राज्यमंत्री एकनाथ शिंदे यांच्या छायाचित्रासह टोलमुक्तीचे आश्वासन देण्यात आले आहे. याशिवाय आमदार राजेश क्षीरसागर यांच्या फोटोसह 'विळा प्लस भोपळा, दिल्लीत नाकारलं... राज्यात नाकारलं अशा पक्षासोबत कोल्हापुरात आघाडी?, फसव्या आघाडीला ८१ नं पळवून लावूया,' अशी टोलेबाजी शिवसेनेने केली आहे.
राष्ट्रवादी काँग्रेस पार्टीच्या पोस्टरवर 'महाराष्ट्र नव्हे, देशात कोल्हापूरला नंबर एक आम्हीच बनवू शकतो,' 'आम्ही कोल्हापुरी, आम्ही राष्ट्रवादी' अशी वाक्ये आहेत. नूतन जिल्हाधिकारी कार्यालय, केशवराव भोसले नाट्यगृह, शाहू खासबाग मैदान, नवीन अत्याधुनिक केएमटी, न्यायसंकुलाची इमारत, आयआरबीची रस्ते अशा केलेल्या कामांची छायाचित्रे त्यांच्या पोस्टर्सवर आहेत. मागील पाच वर्षात आमच्या नगरसेवकांसोबत आम्ही कोल्हापूर शहरात १४५० कोटींचा विकास केला. सत्ता पुन्हा राष्ट्रवादीस दिल्यास कोल्हापूर नंबर वन बनवू ,असे आश्वासन देण्यात आले आहे. याशिवाय राष्ट्रवादी काँग्रेसने मार्मिक टीका करणारी पोस्टरबाजी केली आहे. कळसूत्रीच्या बाहुल्यांचा खेळ मांडत 'महापालिकेत बाहुल्यांचा खेळ पुन्हा बघायचाय? विचार करा, विकास बघा,' असे आवाहन केले आहे. या फलकबाजीची मतदारांत मोठी चर्चा सुरू आहे.
मोबाइल अॅप डाउनलोड करा आणि राहा अपडेट
