एअर कंडीशन बसेस, सकाळी चहा व नाष्टा, दुपारी अल्पोपहार व रात्रीचे जेवन अशा भरगच्च पॅकेजसह महिला मतदारांना नवदुर्गा दर्शनाची पर्वणी उमेदवारांनी उपलब्ध करून दिली आहे. मतदारांना आपल्या बाजूने वळवण्यासाठी उमेदवारांकडून जेवणावळी, मंडळे व तालमींना वर्गणी दिल्या जात आहेत. महिलांसाठी वेगळ्या भोजणावळीच्या पंगती उठू लागल्या आहेत.
नवरात्र उत्सवातील महिला मतदारांना कॅच करण्यासाठी धनाढ्य इच्छुक उमेदवारांनी नवदुर्गा दर्शनाची संधी यावेळीही साधली आहे. यापूर्वीच्या निवडणुकीत नवदुर्गा दर्शनासाठी इच्छुक उमेदवार केएमटी व वडापच्या वाहनांचा वापर करत होते. काही उमेदवार मिनी प्रवासी बसेस वापरत होते. यावेळी मात्र उमेदवारांनी मतदारांना ऑक्टोबर हिटचा त्रास होऊ नये, म्हणून एअरकंडिशन लक्झरी बसेस बुक केल्या आहेत.
उमेदवारांच्या कुटुंबातील महिला सदस्य घरोघरी जाऊन प्रचार करत आहेत. प्रचारात नवदुर्गा दर्शनासाठी नोंदणी करून घेतली जात आहे. प्रत्येक गल्लीसाठी दोन ते तीन बसेस बुक केल्या जातात. सकाळी आठच्या ठोक्याला बसेस चौकात उभ्या असतात. नवदुर्गा दर्शनाबरोबर सकाळी चहा व नाष्टा दिला जात आहे. दुपारच्यावेळी अल्पोपहार दिला जातो. ज्या महिलांचे नवरात्रांचे उपवास आहेत त्यांना केळी, खजूर,फळे व दूध दिले जाते. सायंकाळच्या सत्रात चहा दिला जात आहे. काही उमेदवारांनी नवदुर्गांचे दर्शन घेऊन दमलेल्या महिलांना घरी जाऊन जेवणाचा त्रास होऊ नये यासाठी रात्रीच्या भोजणाची व्यवस्था केली आहे.
केएमटीला फटका
लक्झरी बसेसमुळे केएमटीकडे यावेळी नवदुर्गा दर्शनासाठी कमी नोंद झाली आहे. ४० क्षमतेच्या प्रवाशी बसेससाठी ३९०० रूपये आकारले जातात. चार तास नवदुर्गासाठी बस उपलब्ध करून दिली जाते. केएमटीकडे सध्या ५० बसेस बुक झाल्या असून गतवेळच्या तलनेत हा आकडा कमी असल्याचे केएमटीच्या अधिकाऱ्यांनी सांगितले. त्याच्या उलट खासगी लक्झरी बसेस भाड्याने देणाऱ्या कंपन्याकडे एअर कंडिशन बसेसची मागणी वाढली आहे. पाच ते सात तासासाठी सात हजार रूपये भाडे आकारले जात आहे. सोमवारी एका कंपनीकडे २२ बसेस तर मंगळवारी १४ बसेस बुक झाल्या होत्या. इच्छुक उमेदवारांकडून एअर कंडिशन बसेसची मागणी वाढल्याचे एका कंपनीच्या मालकाने सांगितले.
मोबाइल अॅप डाउनलोड करा आणि राहा अपडेट