भाजप, ताराराणीच्या यादीला विलंब

October 3, 2015, 11:44 am

≫ Next: साळोखे, टिपुगडेंना संधी

≪ Previous: किसन कल्याणकरांचा बंडखोरीचा इशारा

$

0

0

म. टा. प्रतिनिधी, कोल्हापूर

भाजप व ताराराणी आघाडीच्या नेत्यांमध्ये अनेक जागांबाबत एकमत होत नसल्याने महापालिका निवडणुकीसाठी उमेदवारांची दुसरी यादी जाहीर होण्यास विलंब लागत आहे. शनिवारी ही यादी जाहीर होणार होती, पण काही प्रभागातील नावे निश्चित होत नसल्याने ती लांबणीवर टाकण्यात आली आहे.

भाजप व ताराराणी आघाडीचे उमेदवार निश्चित करण्यासाठी गेले दोन दिवस पालकमंत्री चंद्रकांत पाटील, महेश जाधव, सुहास लटोरे, सुनील मोदी, सुनील कदम यांच्या बैठका सुरू आहेत. कोणती जागा भा​जपने लढवायची व कोणती जागा ताराराणीने लढवायची याबाबत एकमत झाल्याचे समजते. पण उमेदवारी कोणाला द्यायची याबाबत निर्णय घेताना एकमत होत नसल्याने सर्वच यादी रखडली आहे. भाजपला कमी जागा देण्याबाबत पूर्वी निर्णय झाला होता, पण आता भाजपने समान जागांचा आग्रह सुरू केल्याने ताराराणीचे नेते नाराज आहेत. सक्षम उमेदवारांपेक्षा काही ठिकाणी भाजपने कार्यकर्त्यांना संधी देण्याचा आग्रह धरला आहे. हेच नाराजीचे मूळ कारण असल्याचे समजते.

शनिवारी दुपारी बराच वेळ यादी निश्चित करण्यासाठी बैठक झाली. पण एकमत झाले नाही. यामुळे आता रविवारी यादी जाहीर करण्यात येणार असल्याचे समजते. पालकमंत्री पाटील दोन दिवस कोल्हापुरात आहेत. रविवारी उमेदवारांचा मेळावा बोलवण्यात आला आहे. उमेदवारी अर्ज कसा भरावा यासाठी या मेळाव्यात मार्गदर्शन करण्यात येणार आहे.

राष्ट्रवादीची यादी आज

दरम्यान, उमेदवारी जाहीर करण्यात आघाडी घेतलेल्या राष्ट्रवादी पक्षाने रविवारी उर्वरित उमेदवारांची यादी जाहीर करण्याचा निर्णय घेतला आहे. यासाठी शनिवारी दिवसभर काही उमेदवारांबरोबर चर्चा केली. कॉंग्रेसची उमेदवारी मंगळवारी मुंबईतून जाहीर करण्यात येणार आहे.

मोबाइल अॅप डाउनलोड करा आणि राहा अपडेट

---

साळोखे, टिपुगडेंना संधी

October 3, 2015, 11:45 am

≫ Next: ताप, सर्दी, खोकल्याची डोकेदुखी

≪ Previous: भाजप, ताराराणीच्या यादीला विलंब

$

0

0

शिवसेनेची १७ उमेदवारांची दुसरी यादी जाहीर

म. टा. प्रतिनिधी, कोल्हापूर

महापालिका निवडणुकीसाठी शिवसेनेने शनिवारी दुपारी १७ उमेदवारांची दुसरी यादी जाहीर केली. जनसुराज्य शक्ती पक्षाचे माजी महापौर उदय साळोखे, माजी नगरसेवक दत्ताजी टिपुगडे, माजी नगरसेवक आप्पासो बेडगकर यांचे चिरंजीव चंद्रशेखर बेडगकर यांना उमेदवारी जाहीर झाली आहे. दरम्यान, तटाकडील तालीम व दुधाळी पॅव्हेलियन या प्रभागातील निष्ठावंत इच्छुकांनी बंडखोरी जाहीर केली आहे.

शिवसेनेने यापूर्वी ४१ उमेदवारांची यादी जाहीर केली आहे. दुसऱ्या यादीत २० जणांची नावे जाहीर होणार अशी घोषणा केली होती. पण शनिवारी १७ उमेदवारांचीच यादी जाहीर झाली आहे. तटाकडील तालीम प्रभागातून माजी महापौर उदय साळोखे यांना उमेदवारी जाहीर झाली. साळोखे यापूर्वी दोन वेळा सेनेच्या तिकीटावर विजयी झाले आहेत. पण २००५ मध्ये ते जनसुराज्य शक्ती पक्षाचे उमेदवार होते व महापौरही झाले होते. साळोखे व रिक्षा सेनेचे राजेंद्र शंकरराव जाधव यांच्यात उमेदवारीसाठी चुरस होती. पण नेत्यांनी साळोखे यांच्या पारड्यात वजन टाकले आहे. पहिल्या यादीत समावेश नसलेल्या माजी नगरसेवक दत्ताजी टिपुगडे यांचे नाव दुसऱ्या यादीत समाविष्ठ करण्यात आला आहे. आमदार राजेश क्षीरसागर यांचे मेव्हणे विश्वजित मोहिते यांना शिवाजी पार्क येथून उमेदवारी जाहीर झाली आहे.

दरम्यान, वीस उमेदवारांची यादी जाहीर करण्याची घोषणा केली असताना १७ प्रभागातील उमेदवारच जाहीर झाल्याने शिवसेना नेतृत्वापुढे पेच निर्माण झाल्याची चर्चा आहे. व्हिनस टॉकीज येथून शशी बीडकर व सचिन घोरपडे यांच्यात चुरस आहे. तसेच पांजरपोळ प्रभागातून कमलाकर जगदाळे यांच्या पत्नी सुखदा जगदाळे यांनी उमेदवारी मागितली आहे. बिंदू चौकातील उमेदवारीचा तिढा सुटलेला नाही. सिध्दाळा गार्डन प्रभागातही चौघांनी सेनेची उमेदवारी मागितल्याने या प्रभागाचाही अद्याप निर्णय झालेला नाही. मंगळवारपासून अर्ज भरण्यास सुरूवात होणार असून त्यापूर्वी शिल्लक प्रभागातील उमेदवारांची नावे जाहीर होण्याची शक्यता आहे.

उमेदवारांची नावे व प्रभाग

रमेश तुकाराम पोवार (शुगर मिल), प्रकाश कोळी (लक्ष्मी विलास पॅलेस), संध्या सुशीलकुमार पागर (सर्कीट हाऊस), चंद्रशेखर बेडगकर (रमणमळा), विश्वजित मोहिते (शिवाजी पार्क), प्रतिज्ञा उत्तुरे (राजारामपुरी तवन्नाप्पा पाटणे हायस्कूल), शिवाजी कोंडीबा गवळी (मंगेशकर नगर), उदय साळोखे (तटाकडील), महेश शंकरराव चौगुले (पद्माराजे उद्यान), दत्ताजी टिपुगडे (संभाजीनगर बसस्थानक), सरोजनी पोळ (नेहरूनगर), विद्या हेमंत निरंकारी (बुद्ध गार्डन), कोमल महादेव बिरजे (स्वातंत्र्य सैनिक कॉलनी), वैशाली सुरेश कांबळे (कळंबा फिल्टर हाऊस), आरती इंद्रजित साळोखे (राजलक्ष्मीनगर), सुनीता गजानन मोरे (फुलेवाडी रिंगरोड), उषा शामराव खतकर (सुर्वेनगर).

परिवर्तन विकास आघाडीची रॅली

महापालिका निवडणुकीसाठी आपटेनगर प्रभागातून (क्र.७५) राहुल काळे हे भाजपकडून निवडणूक लढवण्यास इच्छुक होते, मात्र ऐनवेळी त्यांना डावलल्याने प्रभागातील नागरिकांनी स्थापन केलेल्या परिवर्तन विकास आघाडीच्या वतीने निवडणूक लढवण्याचा निर्णय त्यांनी घेतला आहे. रविवारी (ता.४) संध्याकाळी चार वाजता आपटेनगर प्रभागात ते रॅलीने शक्तीप्रदर्शन करणार आहेत. काळे हे भाजपचे कार्यकर्ते असून, आपटेनगर प्रभागातून त्यांनी पक्षाकडे उमेदवारी मागितली होती. मात्र पक्षाने उमेदवारी नाकारल्याने त्यांनी परिसरातील नागरिकांची परिवर्तन विकास आघाडी स्थापन करून निवडणूक रिंगणात उतरण्याचा निर्णय घेतला आहे. प्रभागातील उमेदवारी आणि जाहीरनामा प्रसिद्ध करण्यासाठी रॅलीनंतर सभेचे आयोजन केले आहे.

मोबाइल अॅप डाउनलोड करा आणि राहा अपडेट

ताप, सर्दी, खोकल्याची डोकेदुखी

October 3, 2015, 11:46 am

≫ Next: अंतिम मतदारयादी आज प्रसिद्ध होणार

≪ Previous: साळोखे, टिपुगडेंना संधी

$

0

0

म. टा. प्रतिनिधी, कोल्ह‌ापूर

ऐन ऋतुत सुमारे दोन महिन्याहून अधिककाळ पावसाने दिलेली ओढ, त्यातच बसलेला उन्हाचा तडाखा आणि सध्या सुरू असणारा परतीचा पाऊस या सर्वांमुळे वातावरणात सातत्याने प्रचंड प्रमाणात बदल होत आहेत. वातावरणातील या बदलांचा परिणाम थेट आरोग्यावर होत आहे. ताप, सर्दी, खोकला, अंगदुखी अशा विविध कारणांमुळे लहान मुलांपासून ते ज्येष्ठ नागरिकांपर्यंत सर्वच आजारी पडत आहेत.

गेल्या दोन महिन्यांपासून पाऊस न पडल्याने मे महिन्यातील उन्हाळी ऋतूचा अनुभव लोकांना घ्यावा लागला. त्यातच ऑक्टोबर हिटची भर पडल्याने उन्हाचे चटके अधिकच वाढले. सकाळी धुके, दुपारी उन्हाच्या तीव्र झळा आणि सायंकाळी प्रचंड पाऊस यामुळे वातावरणात मोठ्या प्रमाणात बदल निर्माण झाले आहेत. यामुळे विषाणूजन्य आजारात वाढ होत आहे. ताप, सर्दी, खोकला, घसा दुखी, अंगदुखी अशा विविध कारणांनी लोक आजारी पडले आहेत. यामुळे औषधोपचारासाठी दवाखान्यात रुग्णांच्या रांगाच्या रांगा दिसत आहेत. राज्यभर स्वाइन फ्लूचा फैलाव वाढला आहे. यातच आजारपणात वाढ होत असल्याने लोकांत भीतीचे वातावरण आहे.

बदलाचा परिणाम विशेषत: लहान मुलांवर अधिक दिसत आहे. प्रतिकारशक्ती कमी असल्याने त्यांना विषाणूजन्य आजार होत आहेत. वृद्धांनाही ताप, खोकला, अंगदुखी आदी व्याधी जाणवू लागल्या आहेत.

डासांचा प्रादुर्भाव वाढतोय

परतीच्या पावसाचे पाणी साठल्यामुळे डास व तत्सम रोगजंतूंची निर्मिती वाढते. यामुळे ताप, अंगदुखीसारख्या आजरांनी लोक त्रस्त आहेत. चार, पाच दिवस ताप राहात आहे. विविध प्रकारच्या औषधांना प्रतिसाद मिळत नसल्याने प्लेटलेस कमी होणे व डेग्यीसदृश आजारांची संख्या वाढत आहे, असे डॉ. युवराज वरुटे यांनी सांगितले. यावर उपाय म्हणून भरपूर पाणी पिणे, पाणीजन्य पदार्थ खाणे, मच्छरदाणी व डासविरोधी साधनांचा वापर करणे,अशा उपाययोजना कराव्यात, असे ते म्हणाले.

ट्रान्झेशन ऑफ सीझन

वातावरणातील या बदलांना वैद्यकीय भाषेत 'ट्रान्झेशन ऑफ सीझन' असे म्हणतात, असे बालरोग तज्ज्ञ डॉ. मोहन पाटील यांनी सांगितले. वातारवणात बदल होत असताना अनेक विषाणूजन्य आजरांत (व्हायरल डिसीजीस) वाढ होते. ताप, खोकला, सर्दी यांसह गोवर, वारेफोड्या अशा आजारांचे प्रमाण वाढते, असे सांगून ते म्हणाले, 'आजारांची सुरुवात होताच तत्काळ डॉक्टरांचा सल्ला घ्यावा. व्हायरल प्रकारचे हे आजार असल्याने शिंगणे, खोकणे, थुंकणे आदींच्या माध्यमातूनही आजार पसरतो. यामुळे अशा रुग्णांबरोबरच नागरिकांनीही गर्दीत जाणे टाळावे.'

मोबाइल अॅप डाउनलोड करा आणि राहा अपडेट

अंतिम मतदारयादी आज प्रसिद्ध होणार

October 3, 2015, 11:51 am

≫ Next: निवडणूक आयोगाकडून चौकशी

≪ Previous: ताप, सर्दी, खोकल्याची डोकेदुखी

$

0

0

म. टा. प्रतिनिधी, कोल्हापूर

कोल्हापूर महापालिकेच्या पंचवार्षिक निवडणुकीसाठी निवडणूक आयोगाकडून शनिवारी (ता.३) अंतिम मतदारयादी संकेतस्थळावर प्रसिद्ध करण्यात आली. रविवारी सुटीच्या दिवशीही सात क्षेत्रीय कार्यालयात मतदारयादी पाहण्यासाठी नागरिकांना उपलब्ध केली आहे. आचारसंहितेचे उल्लंघन होऊ नये, यासाठी २४ भरारी पथके स्थापन केली आहेत. मतदारयादी प्रसिद्ध झाल्याने रविवारपासून जाहीर प्रचाराला वेग येणार आहे.

महापालिका निवडणुकीसाठी चार विभागीय कार्यालयात १९ सप्टेंबरला प्रसिद्ध केलेल्या प्रारुप मतदारयादीत नाव नसणे, दुसऱ्याच प्रभागात नाव, अडनाव वेगळे, तर पती-पत्नीच्या नावात बदल अशा तक्रारी आल्या होत्या. त्यावर १३२६ हरकती व सूचना प्राप्त झाल्या होत्या.

मोबाइल अॅप डाउनलोड करा आणि राहा अपडेट

निवडणूक आयोगाकडून चौकशी

October 3, 2015, 11:49 am

≫ Next: लाचखोर संशयित मोकाटच

≪ Previous: अंतिम मतदारयादी आज प्रसिद्ध होणार

$

0

0

फतव्याबाबत चौकशीचे महापालिकेला आदेश

Gurubal.Mali@timesgroup.com

कोल्हापूरः मुस्लिम महिलांनी निवडणुकीच्या फंदात न पडण्याबाबतचा अजब फतवा काढल्याच्या प्रकरणाच्या चौकशीचे आदेश राज्य निवडणूक आयोगाने महापालिकेला दिले आहेत. यामुळे खडबडून जाग आलेल्या महापालिकेने चौकशी सुरू केली आहे. उपजिल्हाधिकारी स्वाती देशमुख यांची चौकशी अधिकारी म्हणून नियुक्ती करण्यात आली आहे.

महपालिका निवडणुकीच्या पार्श्वभूमीवर 'मज्लिसे शुरा उलेमा ए कोल्हापूर' या संघटनेने मुस्लिम महिलांनी निवडणुकीच्या फंदात पडू नये असा फतवा काढला होता. २३ सप्टेंबरला काढलेल्या या फतव्याच्या प्रती मशिदीसह काही ठिकाणी वाटल्या होत्या. काही पक्षाच्या नेत्यांपर्यंतही हा फतवा पोहचवण्यात आला. यामुळे पक्षाच्या नेत्यासह इच्छूक उमेदवारही अस्वस्थ झाले होते. याबाबतचे वृत्त 'मटा' मध्ये प्रकाशित होताच राज्यभर गदारोळ उडाला. संतप्त प्रतिक्रियानंतर मुस्लिम धर्मगुरूंनी तातडीने शुक्रवारी बैठक घेऊन फतवा मागे घेतल्याचे सांगितले. त्याचवेळी इस्लामनुसार महिलांनी आचरण करावे, असे आवाहन केले.

कोल्हापुरातील या वृत्ताची राज्य व देशातील अनेक भाषातील वृत्तवाहिन्यांनी दखल घेतली. यामुळे या विषयाचे पडसाद राज्यभर उमटले. याची दखल राज्य निवडणूक आयोगाने घेतली. आयोगाने तातडीने चौकशीचे आदेश दिले आहेत. या प्रकरणाची​ चौकशी करण्याचे आदेश निवडणूक आयोगाने जिल्हाधिकारी अमित सैनी यांना दिले आहेत. महापालिका निवडणूक अधिकारी म्हणून आयुक्त पी. शिवशंकर काम पाहत आहेत. जिल्हाधिकारी सैनी यांनी याबाबत आयुक्त पी. शिवशंकर यांना चौकशी करून अहवाल देण्याचे आदेश दिले आहेत. महापालिकेच्यावतीने तातडीने या प्रकरणाच्या चौकशीची प्रक्रिया सुरू केली आहे. यासाठी आयुक्तांनी चौकशी अधिकारी म्हणून उपजिल्हाधिकारी स्वाती देशमुख यांची नियुक्ती केली आहे. देशमुख यांच्याकडे सध्या महापालिका निवडणुकीची जबाबदारी आहे. देशमुख यांनी काही व्यक्ती, संस्थांना भेटून याची चौकशी सुरू केली आहे.

मुस्लिम महिलांना निवडणूक बंदी करण्याबाबतच्या फतव्याच्या चौकशीचे आदेश निवडणूक आयोगाकडून आले आहेत. स्वाती देशमुख यांची चौकशी अधिकारी नियुक्त करून त्याची तातडीने चौकशी सुरू केली आहे. लवकरात लवकर त्याचा अहवाल देण्यात येईल. त्यानंतर निवडणूक आयोग पुढील कार्यवाही करेल.

- पी. शिवशंकर, आयुक्त महापालिका

मोबाइल अॅप डाउनलोड करा आणि राहा अपडेट

लाचखोर संशयित मोकाटच

October 3, 2015, 11:41 am

≫ Next: कर्नाटक सीआयडीच्या तपासावर लक्ष

≪ Previous: निवडणूक आयोगाकडून चौकशी

$

0

0

सबळ पुराव्यांअभावी शिक्षेचे प्रमाण नगण्य

Maruti.Patil@timesgroup.com

कोल्हापूरः भ्रष्टाचारमुक्त समाजाची निर्मिती व्हावी आणि भ्रष्टाचाराचे समूळ उच्चाटन करण्यासाठी लाचलुचपत खात्याकडे अनेक तक्रारी दाखल होतात. अशा तक्रारींतून अनेक बडे मासे कायद्याच्या कचाट्यात अडकतात. संशयित आरोपी म्हणून ताब्यात घेतलेले हेच सरकारी बाबू सबळ पुराव्याअभावी निर्दोष सुटल्याचे समोर येत आहे. जानेवारी २०१० ते डिसेंबर २०१४ या चार वर्षांमध्ये दाखल झालेल्या ६२ खटल्यातील केवळ पाच आरोपींना शिक्षा झाली असल्याचे माहिती अधिकारात स्पष्ट झाले आहे. निकाली खटल्यातील आकडेवारीवरुन सरकारी वकिलांनी सादर केलेल्या पुरावे आणि प्रतिवादांवर शंका व्यक्त केली जात आहे.

एक जानेवारी ते ३१ डिसेंबर २०१४ अखेर लाचलुचपत प्रतिबंधक विभागाच्यावतीने ६२ खटले दाखल केले होते. यापैकी शहरातील ५६ दाव्यांचा समावेश होता. तर इचलकरंजी, जयसिंगपूर व गडहिंग्लज या ग्रामीण भागात सहा खटले दाखल केले होते. शहरातील दाखल केलेल्या ५६ दाव्यांपैकी केवळ दोन खटल्यांचा निकाल सरकार पक्षाकडून लागला तर तब्बल ५४ खटले विरोधात गेले आहेत. सरकारी पक्षाने मिळवलेले यश केवळ ३.५७ टक्के इतकेच आहे. तर ग्रामीण भागात दाखल केलेल्या सहा खटल्यांपैकी तीन दावे जिंकण्यात सरकारी पक्षाला यश आले आहे. एकूण जिल्ह्याचा विचार करता हेच प्रमाण केवळ आठ टक्के आहे. माहिती अधिकारात प्राप्त झालेल्या आकडेवारीवरुन सरकारी पक्षाला केवळ आठ टक्केच यश मिळाले आहे. यामुळे लाचलुचपतच्या जाळ्यात अडकल्यानंतर सरकार पक्षाकडून सबळ पुरावे सादर करण्यात अपयश येत असल्याचे दिसून येत आहे.

लाखोंचे मानधन

ठराविक जिल्हा सरकारी वकिलांच्या नियुक्तीनंतर ठराविक सहायक वकिलांच्या कामामध्ये वाढ झाल्याचे दिसून येत आहे. तर एका जिल्हा सरकारी वकिलांनी एकही दावा न चालवता लाखो रुपये मानधन घेतल्याची माहिती समोर आली आहे.

साक्षीदारांची अनुपस्थिती

राजारामपुरी पोलिस ठाण्यातील तत्कालीन पोलिस काँस्टेबलवर न्यायालयीन दावा सुरू होता. सलग दोन तीन तारखांना सरकारी पक्षाकडून साक्षीदारांना उपस्थित केले जात नव्हते. न्यायालयाचे अधिकार कोणीही चुकीच्या पद्धतीने वापरून किंवा ते रोखून प्रकरण लवकर निकाली काढता येत नाहीत, हे पुन्हा सांगण्याची आवश्यकता नसल्याचे ताशेरे जिल्हा न्यायाधिशांनी ओढले होते.

मोबाइल अॅप डाउनलोड करा आणि राहा अपडेट

कर्नाटक सीआयडीच्या तपासावर लक्ष

October 3, 2015, 11:47 am

≫ Next: २५० कोटींची उलाढाल थंड

≪ Previous: लाचखोर संशयित मोकाटच

$

0

0

समीरच्या ब्रेन मॅपिंगवर मंगळवारी निर्णय

म. टा. प्रतिनिधी, कोल्हापूर

ज्येष्ठ नेते कॉम्रेड गोविंद पानसरे आणि डॉ. एम.एम. कलबुर्गी यांच्या हत्येपूर्वी समीर गायकवाड व रूद्र पाटील यांच्या बैठका संकेश्वर येथे झाल्याची माहिती कर्नाटक सीआयडीच्या तपासात पुढे आली आहे. त्यामुळे कोल्हापूर पोलिसांकडून कर्नाटकच्या सीआयडीच्या तपासाकडे लक्ष केंद्रीत केले आहे. दरम्यान ज्येष्ठ नेते कॉम्रेड गोविंद पानसरे यांच्या हत्येप्रकरणी अटक केलेला संशयीत समीर गायकवाड याच्या ब्रेन मॅपिंगबाबतचा निर्णय मंगळवारी सहाला घेण्याचा निर्णय प्रथम वर्ग न्यायदंडाधिकारी आर.डी. डांगे यांनी निर्णय दिला. सरकारी वकिलांनी ब्रेन मॅपिंगची मागणी केली तर समीरच्या वकिलांनी ब्रेन मॅपिंगची मागणी मुलभूत हक्काचे उल्लंघन ठरेल, असा युक्तीवाद केला.

पानसरे हत्येचा कट संकेश्वर येथे रचला होता अशी माहिती यापूर्वीच एसआयटीला मिळाली आहे. एसआयटीच्या पथकाने दोन आठवडे संकेश्वरमध्ये गायकवाडला अटक करण्यापूर्वी मुक्काम करून माहिती घेतली होती. त्यानंतर त्यांनी समीरला अटक केली होती. कोल्हापूर पोलिसांना संकेश्वरातील भक्कम पुरावे मिळाल्यानंतर कर्नाटक सीआयडी पथकाने संकेश्वर व खानापूरवर लक्ष केंद्रित केले आहे. संकेश्वरजवळील गोटूरच्या सरकारी विश्रामगृहाचा वापर समीर व रूद्रगोंडा पाटील या दोघांनी केला होता, अशी माहिती पुढे आली आहे. कर्नाटक सीआयडीनेही कोल्हापुरात येऊन समीरची चौकशी केली होती. त्यामुळे कर्नाटक सीआयडीच्या तपासाकडेही कोल्हापूर पोलिस लक्ष ठेवून आहेत.

दरम्यान शनिवारी न्यायदंडाधिकारी डांगे यांच्यासमोर ब्रेन मॅपिंगप्रश्नी सुनावणी झाली. तपास अधिकारी अतिरिक्त पोलिस अधीक्षक एस. चैतन्य यांनी ब्रेन मॅपिंगची मागणी केली. विशेष सरकारी वकील चंद्रकांत बुधले यांनी तपासाच्यादृष्टीने तीन शास्त्रीय चाचण्याही घेतल्या आहेत, याकडे लक्ष वेधले. या चाचणीमुळे समीरला त्रास होणार नाही. चाचणीसाठी समीरची सहमती न्यायालयासमोर घ्यावी, अशी मागणी करण्यात आली.

समीरचे वकील एम.एम. सुहासे यांनी समीरची ब्रेन मॅपिंगची चाचणी घेऊ नये अशी मागणी केली. पानसरे कुटुंबियांतर्फे बोलताना अॅड. विवेक घाटगे यांनी पोलिसांनी यापूर्वी अनेक गुन्ह्याचा तपास करताना ब्रेन मॅपिंग केल्याचे सांगितले.

शमशुद्दीन मुश्रीफांच्या उल्लेखाला आक्षेप

आरोपीच्या वकिलांच्यावतीने न्यायालयात लेखी निवेदन दिले होते. त्यात माजी निवृत्त पोलिस अधिकारी शमशुद्दीन मुश्रीफ यांचा उल्लेख आहे. मुश्रीफ हे गोविंद पानसरे यांचे स्नेही होते असा उल्लेख आहे. तसेच सरकार पक्षाची भूमिका संशयास्पद असल्यामुळे व त्यामागील हेतू बहुजन समाजातील गोरगरीबांना भेदभावाने वागवणे आणि प्रस्थापितांची कड घेतल्याचे दिसून येत असल्याचा उल्लेख आहे. दोन्ही वक्तव्याला सरकारी वकील बुधले व अॅड. घाटगे यांनी आक्षेप घेतला. निवेदनात मालेगाव स्फोटांसंबधीत संशयित, हेमंत करकरे यांचे उल्लेख करण्यात आले आहेत.

मोबाइल अॅप डाउनलोड करा आणि राहा अपडेट

२५० कोटींची उलाढाल थंड

October 3, 2015, 11:52 am

≫ Next: दुर्गा दर्शन होणार सुखकर

≪ Previous: कर्नाटक सीआयडीच्या तपासावर लक्ष

$

0

0

सलग तीन दिवसांच्या संपामुळे जीवनावश्यक वस्तूंचा तुटवडा जाणवणार

म. टा. प्रतिनिधी, कोल्हापूर

ऑल इंडिया मोटर ट्रान्सपोर्ट काँग्रेसच्यावतीने पुकारण्यात आलेल्या आलेल्या देशव्यापी संपामुळे जिल्ह्यातील मालवाहतूक पूर्णपणे थांबली आहे. जिल्ह्यातून किराणा-भुसारी, कांदा-बटाटा आणि लसूण यांसह रवा, मैदा, आट्याची वाहतूक बंद झाल्यामुळे तीन दिवसांत सुमारे २५० कोटीची उलाढाल ठप्प झाली आहे.

संपामुळे जीवनावश्यक वस्तूंचा तुटवडा भासण्याची शक्याता निर्माण झाली आहे. वाहतूकदारांच्या संपामुळे डिझेल विक्रीतही कमालीची घट झाली आहे. राष्ट्रीय महामार्गावरील ३७२ टोलनाक्यांवरुन वाहतूकदारांकडून वर्षाला सुमारे १४,५०० कोटीची टोलवसुली होते. वाहतूकदारांकडून वसुली होत असताना व्यावसायिकांची प्रचंड गळचेपी होते. टोलनाक्यावर वाहनांच्या रांगा लागत असल्याने इंधनाचा अपव्यव होत आहे. तसेच पर्यावरणाचाही प्रश्न ऐरणीवर आला आहे. यामुळे ऑल इंडिया मोटर ट्रान्सपोर्ट काँग्रेसच्यावतीने देशव्यापी बंदची हाक दिली होती.

तीन दिवसांपासून सुरू असलेल्या बंदमुळे जिल्ह्यातील वाहतूक होणारी साखर, गूळ, कांदा-बटाटा व लसूण, किराणा व भुसारी आदींची वाहतूक पूर्णपणे ठप्प झाली आहे. आंदोलनात जिल्ह्यातील १६ हजार ट्रक व्यावसायिकासह ९०० टँकर आणि १२ हजार टेम्पोचालक सहभागी झाले आहेत. यामुळे ही सर्व वाहने मार्केट यार्ड, शेंडा पार्क, शिरोली, गांधीनगर आदी भागात उभे असलेली दिसतात. तीन दिवसांत कोणत्याच मालाची वाहतूक न झाल्याने जीवनावश्यक वस्तूंचा तुटवडा भासण्याची शक्यता निर्माण झाली आहे. जिल्ह्यातील सुमारे २८ हजार मालवाहतूक करणारी वाहने एकाठिकाणी उभी असल्याने डिझेल विक्रीमध्ये निम्म्याने घट झाली आहे.

जिल्ह्यातील मालवाहतूक ठप्प झाली असली, तरी कोल्हापूर शेती उत्पन्न बाजार समितीमध्ये १७ ट्रक कांद्याची आवक झाली आहे. यामुळे येथील सौद्यावर परिणाम झालेला नाही. दरम्यान, लॉरी असोसिएशनच्या आवाहनाला प्रतिसाद न देता शिरोली, गोकुळ शिरगाव एमआयडीसी व मार्केट यार्ड येथे वाहतूक करणाऱ्या व्यावसायिकांच्या ट्रकची हवा सोडण्यात आली.

ऑल इंडिया मोटर ट्रान्सपोर्ट काँग्रेसच्यावतीने पुकारण्यात आलेल्या संपामुळे जिल्ह्यातील मालवाहूतक पूर्णपणे ठप्प झाली आहे. यामुळे वाहतूक व्यवसायातून २५० कोटीची उलाढाल ठप्प झाली आहे.

- सुभाष जाधव, अध्यक्ष, लॉरी असोसिएशन

मोबाइल अॅप डाउनलोड करा आणि राहा अपडेट

---

दुर्गा दर्शन होणार सुखकर

October 11, 2015, 11:45 am

≫ Next: आयुक्तालयाला जागेचे विघ्न

≪ Previous: २५० कोटींची उलाढाल थंड

$

0

0

म. टा. प्रतिनिधी, कोल्हापूर

नवरात्रोत्सवात भाविकांच्या सोयीसाठी महापालिकेच्या परिवहन उपक्रमामार्फत (केएमटी) 'श्री दुर्गादर्शन विशेष बस सेवा' सुरू करण्यात आली आहे. मंगळवार (ता.१३) ते २१ ऑक्टोबर या कालावधीत बससेवा उपलब्ध असणार आहे. या बससेवेच्या तिकीट विक्रीचा प्रारंभ झाला. नवरात्रउत्सव कालावधीत सकाळी आठ ते सायंकाळी चार या वेळेत एका तासाच्या अंतराने बससेवा असणार आहे. प्रवासाचा एकूण कालावधी चार तासांचा असून, या वेळेत १४ धार्मिक स्थळांचे (देवी) दर्शन घडणार आहे.

शाहू मैदान येथून दुर्गा दर्शनासाठी बसेस सुटणार आहेत. ग्रुप बुकिंगची सोय केली आहे. ग्रुप बुकिंगसाठी एका बसद्वारे सकाळी आठ, दुपारी बारा व सायंकाळी चार अशा तीन खेपांसाठी बसेस उपलब्ध आहेत. केएमटी बससेवेच्या आठ किलोमीटर क्षेत्रातील भाविकांच्या मागणीनुसार ४० एकत्रित प्रवाशांकिरता ३९०० रुपये आकारून बस सुविधा पुरविण्यात येणार आहे. शहर वाहतूक नियंत्रण शाखेचे पोलिस निरीक्षक बाजीराव सूर्यवंशी यांच्या हस्ते व सराफ व्यावसायिक प्रशांत उनाळकर यांच्या उपस्थितीत प्रवासी अर्चना शिंदे, ​शीतल पंदारे, अर्चना चाचे यांना विशेष बससेवा आरक्षण पास देण्यात आले. यावेळी बससेवेचे प्रमुख सुनील जाधव, सहायक वाहतूक निरीक्षक आर. एस. धुपकर प्रमुख उपस्थित होते. बससेवेचे आगाऊ आरक्षण पास वितरित करण्याची सुविधा आहे. अधिक माहितीसाठी २६४४५६६ ते ७१ या नंबरवर संपर्क साधावा.

मोबाइल अॅप डाउनलोड करा आणि राहा अपडेट

आयुक्तालयाला जागेचे विघ्न

October 11, 2015, 11:46 am

≫ Next: दोन हजार किलो सप्तरंगी आंब्यात जप्त

≪ Previous: दुर्गा दर्शन होणार सुखकर

$

0

0

प्रस्ताव पोलिस महानिरीक्षकांच्या कार्यालयात धूळ खात पडून

Satish.Ghatage@timesgroup.com

कोल्हापूर व इचलकरंजी शहरांमध्ये वाढत्या गुन्ह्यांची संख्या पाहता कोल्हापुरात पोलिस आयुक्तालयाची अत्यंत आवश्यकता आहे. मात्र, जागेची निवड न केल्याने पोलिस आयुक्तालय प्रस्तावाची फाइल विशेष पोलिस महानिरीक्षक कार्यालयात पडून आहे. जागेचा शोध घेतल्यानंतर परिपूर्ण प्रस्ताव दोन महिन्यांनंतर पाठविण्यात येणार असल्याचे संकेत दिले जात आहेत.

कोल्हापूर व इचलकरंजी शहरांतील वाढती लोकसंख्या व पोलिस दलावर पडणारा ताण लक्षात घेता कोल्हापुरात पोलिस आयुक्तालय स्थापन करावे, यासाठी पोलिस प्रशासनाकडून प्रयत्न होत आहेत. वाढती गुन्हेगारी लक्षात घेऊन १९८५ मध्ये कोल्हापुरात पोलिस आयुक्तालय सुरू करावे, अशी मागणी पोलिस प्रशासनाने केली होती. त्यानंतर आलेल्या प्रत्येक पोलिस अधीक्षकांनी आयुक्तालयाची मागणी केली होती. २००७ मध्ये तत्कालीन पोलिस अधीक्षक डॉ. सुखविंदरसिंग यांनी कोल्हापुरात पोलिस आयुक्तालयाची गरज का आहे, याचा विस्तृत प्रस्ताव राज्य सरकारला पाठवला होता; पण तो धूळ खात पडून आहे. २०११ मध्ये तत्कालीन पोलिस अधीक्षक यशस्वी यादव यांनी आयुक्तालयाची गरज नसल्याचे सांगितल्याने या मागणीला 'खो' बसला. शहरांच्या विस्तारामुळे गुन्ह्यांची संख्या वाढू लागली आहे. चेन स्नॅचिंग, सायबर क्राइम, आर्थिक गुन्ह्यांच्या प्रमाणात वाढ होऊ लागली आहे. २००९ मध्ये इचलकरंजीत झालेली दंगल, दरवर्षी होणारे ऊसदर आंदोलन, टोलविरोधी आंदोलन हाताळताना पोलिस दलावर ताण पडत आहे. कोल्हापूर व इचलकरंजीसाठी पोलिस आयुक्तालय व अन्य दहा तालुक्यांतील पोलिस अधीक्षकांकडे कार्यभार दिल्यास कायदा व सुव्यवस्था हाताळण्यास मदत होऊ शकते.

महालक्ष्मी मंदिर दहशतवाद्यांच्या हिटलिस्टवर आहे. तसेच काश्मीरमध्ये अतिरेकी संघटनेत सहभागी झालेल्या एका स्थानिक युवकाचा सहभाग ही बाब पुढे आली आहे. पुणे व बेंगळुरू ही दोन शहरे दहशतवाद्यांच्या हिटलिस्टवर असल्याने या शहरांना जोडणारा मुंबई-बेंगळुरू महामार्ग शहराजवळून जातो. पुण्यातील फरासखाना बॉम्बस्फोटातील संशयित आरोपी काही काळ कोल्हापुरात असल्याने दहशतवाद्यांशी संबंधित स्लीपर सेल असण्याची भीती सातत्याने व्यक्त केली जाते या पार्श्वभूमीवर कोल्हापुरात पोलिस आयुक्तालय सुरू करण्याची गरज आहे.

मे महिन्यात भारतीय जनता पक्षाचे राज्य अधिवेशन कोल्हापुरात झाले. या अधिवेशनाला मुख्यमंत्री देवेंद्र फडणवीस यांच्यासह भाजपचे सर्व मंत्री उपस्थित होते. गृहराज्यमंत्री प्रा. राम शिंदे यांनी कोल्हापुरातील पोलिस आयुक्तालयाला हिरवा कंदील दाखवला. तसेच पावसाळी अधिवेशनात पोलिस आयुक्तालयाचा प्रस्ताव आल्यास निर्णय घेतला जाईल असे आश्वासन त्यांनी दिले. त्यानंतर जून महिन्यात पोलिस अधीक्षक मनोजकुमार शर्मा यांनी पोलिस आयुक्तालयाचा प्रस्ताव कोल्हापूर विभागाचे विशेष पोलिस महानिरीक्षकांकडे पाठवला. पण हा प्रस्ताव पावसाळी अधिवेशनात पोहोचला नाही. पोलिस आयुक्तालयाची स्थापना झाल्यावर आवश्यक इमारती उभारण्यासाठी जागा नसल्याने हा प्रस्ताव पोलिस महानिरीक्षकांच्या कार्यालयात थांबला आहे. परिपूर्ण प्रस्ताव झाल्यानंतर तो पाठविण्यात येणार असल्याचे संकेत विशेष पोलिस महानिरीक्षक संजीव वर्मा यांनी दिले आहेत.

मोबाइल अॅप डाउनलोड करा आणि राहा अपडेट

दोन हजार किलो सप्तरंगी आंब्यात जप्त

October 11, 2015, 11:47 am

≫ Next: भाजप नेत्यांना युती नकोच होती

≪ Previous: आयुक्तालयाला जागेचे विघ्न

$

0

0

म. टा. वृत्तसेवा, शाहूवाडी

आंबा विशाळगड जंगलादरम्यान असलेल्या वाघझरा परिसरात सप्तरंगी या औषधी वनस्पतीच्या ९३ पोती खोडांची तस्करी करत असलेला टेम्पोसह चौघांना ताब्यात घेतले. त्यांच्याकडून सुमारे २००० किलो असलेल्या या वनस्पतीची सुमारे सात लाखांची खोडे वनविभागाने जप्त केली. वसुंधरा निसर्ग मित्र मंडळ, वारणा व आंबा येथील मोनेरा फाउंडेशन इथल्या पर्यावरणप्रेमींनी शनिवारी रात्री एकच्या सुमारास तस्करी करणाऱ्यांना चौघाना रंगेहाथ पकडले. सप्तरंगी वनस्पतीचा उपयोग मधुमेहावर औषध तयार करण्यासाठी केला जातो.

याप्रकरणी टेंपो चालक आसिफ रजाक नदाफ, राजेंद्र गणपत सुतार, भागोजी विठ्ठल पावदाने व राहुल सासवडे (सर्वजण राहणार लक्षतीर्थ वसाहत, फुलेवाडी, जि.कोल्हापूर) या चौघांना वनविभागाच्या अधिकाऱ्यांनी ताब्यात घेतले. पर्यावरणप्रेमींनी मानोली धरणाच्या वरच्या बाजूस गणेश मंदिरानजीक संशयास्पद टेंपो अडवला. या दरम्यान एक इंडिका कार व एक दुचाकी गाडी त्यांना बाजू देवून पळून गेले. पर्यावरणप्रेमींनी टेंपोचालकाला याबाबत विचारणा केली असता त्यानेही उर्मटपणे प्रतिसवाल केला. त्यामुळे संशय बळावला. टेम्पोमध्ये सप्तरंगीच्या खोडांनी भरलेली ६९ पोती होती. तर जंगलामध्ये २४ पोती आढळली. या गुन्ह्यात वापरलेली गाडी ही फुलेवाडी येथील इब्राहीम इम्रान बागवान यांची आहे.

मोबाइल अॅप डाउनलोड करा आणि राहा अपडेट

भाजप नेत्यांना युती नकोच होती

October 11, 2015, 11:48 am

≫ Next: फॉरेन्सिक अहवाल प्रलंबित

≪ Previous: दोन हजार किलो सप्तरंगी आंब्यात जप्त

$

0

0

खासदार विनायक राऊत यांचा आरोप

म. टा. प्रतिनिधी, कोल्हापूर

'गरज सरो वैद्य मरो याप्रमाणे भारतीय जनता पक्षाने केवळ अवमानाचे निमित्त करत शिवसेनेबरोबरची युती टाळली. अवमानाबाबत पालकमंत्री चंद्रकांत पाटील कधी उद्धव ठाकरेंना भेटले की कोणत्या मंत्र्यांशी चर्चा केली ? त्यांना मुळात युतीच करायची नव्हती,' असा आरोप शिवसेनेचे खासदार विनायक राऊत यांनी येथे केला. त्याचवेळी ज्या कार्यकर्त्यांना उमेदवारी मिळाली नाही, ते नाराज होणार नाहीत. पण त्यांना 'स्वीकृत' नगरसेवक करण्याचा फंडाही शिवसेना वापरणार नाही, असा टोलाही प्र​स्थापितांना मारला.

शिवसेनेच्यावतीने उमेदवारांना ए, बी फॉर्म देण्यासाठी राऊत रविवारी दुपारी येथे आले होते. त्यानंतर जिल्हा संपर्कप्रमुख अरुण दुधवडकर, आमदार राजेश क्षीरसागर, जिल्हाप्रमुख संजय पवार, विजय देवणे अशा निवडक पदाधिकाऱ्यांची त्यांनी बैठक घेतली. त्यानंतर ते पत्रकारांशी बोलत होते. राऊत म्हणाले, 'युती व्हावी अशी आमच्या नेत्यांची इच्छा होती. पण पालकमंत्री पाटील यांनी अवमानाचा जो मुद्दा पुढे केला. त्याबाबत काहीच स्पष्टता होत नाही. अवमान होत असेल तर ते कधी उद्धव ठाकरेंशी बोलले का? फक्त निमित्त शोधून अवमानाचे खापर राजेश क्षीरसागर यांच्यावर फोडले.'

आमदार क्षीरसागर यांनीही यावेळी काही हजारांच्या मतांनी निवडून आलेल्या पालकमंत्र्यांनी स्वतःचा विचार करावा. जर प्रमुखांनी परवानगी दिली तर येथून पदवीधरचा आमदार शिवसेनेचा असेल, असे सांगितले.

मोबाइल अॅप डाउनलोड करा आणि राहा अपडेट

फॉरेन्सिक अहवाल प्रलंबित

October 11, 2015, 11:49 am

≫ Next: जनजागृती हाच आपत्तींपासून बचावाचा उपाय

≪ Previous: भाजप नेत्यांना युती नकोच होती

$

0

0

म. टा. प्रतिनिधी, कोल्हापूर

कॉ. गोविंद पानसरे हत्या प्रकरणातील संशयित आरोपी समीर गायकवाडचा फॉरेन्सिक अहवाल अजूनही कोल्हापूर पोलिसांना प्राप्त झालेला नाही. गांधीनगर (गुजरात) येथील फॉरेन्सिक लॅबमधील सॉफ्टवेअरच्या तांत्रिक अडचणीमुळे समीरच्या आवाजाची तपासणी होऊ शकलेली नाही, त्यामुळे समीर गायकवाडचा फॉरेन्सिक अहवाल कोल्हापूर पोलिसांच्या हाती मिळायला वेळ लागण्याची शक्यता आहे.

कॉ. पानसरे हत्येप्रकरणी मैत्रिणीशी मोबाइल फोनवरून बोलताना काही महत्त्वाची माहिती समोर आल्यानेच कोल्हापूर पोलिसांनी संशयित समीर गायकवाडला अटक केली होती. समीरचा मोबाइलवरील संभाषणाचा आवाज आणि त्याचा मूळचा आवाज यातील साम्य शोधण्यासाठी पोलिस फॉरेन्सिकची मदत घेत आहेत. समीरने मैत्रिणीशी बोलताना कॉ. पानसरेंच्या हत्येचा उल्लेख करीत, 'माझ्या हातून पाप घडले आहे. आता कुंभमेळ्यात जाऊन दोन डुबक्या मारून येतो,' असे वक्तव्य केले होते. याशिवाय मोबाइलवरून बोलताना एक-दोन वेळा पानसरेंना मीच मारले, असेही तो बोलला आहे. त्यामुळे मोबाइल फोनवरील आवाजाचे नमुने पोलिस तपासात महत्त्वाचे ठरत आहेत.

पोलिसांनी मिळवलेले मोबाइवरील संभाषण आणि प्रत्यक्षातील समीरचा आवाज यातील साम्य शोधण्यासाठी पोलिसांनी सुरुवातीला पुण्यातील फॉरेन्सिक लॅबकडे आवाजाचे नमुने पाठवले होते. पुण्यातील अहवालात समीरचा आवाज आणि मोबाइल संभाषणातील आवाजाचे साम्य निदर्शनास आल्यानंतर गुजरातमधील अत्याधुनिक साधनांच्या सहाय्याने समीरच्या आवाजाची तपासणी करण्याचा निर्णय पोलिस अधिकाऱ्यांनी घेतला होता.

इस्राइलच्या तंत्रज्ञानावर आधारीत असलेल्या तपासणी मशिनचे सॉफ्टवेअर अपडेट केल्यानंतर तातडीने समीरच्या आवाजाचे नमुने तपासले जाणार आहेत. यानंतरच समीरच्या आवाजाचा अहवाल कोल्हापूर पोलिसांना प्राप्त होईल. दरम्यान, पोलिसांनी समीरच्या संबंधातील आणखी एकाकडे चौकशी केली असून, समीरबाबत माहिती घेण्याचा प्रयत्न केला आहे. समीरच्या मैत्रिणींकडून माहिती घेण्याचे काम सुरू आहेच, त्याचबरोबर समीरचे इतर मित्रही पोलिसांच्या रडारवर आले आहेत. दिवसभरात एकाकडे चौकशी केल्याची माहिती सूत्रांनी दिली.

गुजरातच्या फॉरेन्सिक टीमने संशयित आरोपी समीरच्या आवाजाचे नमुने घेतले आहेत. फॉरेन्सिकचा अहवाल तातडीने मिळावा यासाठी आमचा पाठपुरावा सुरू आहे. याशिवाय समीरच्या मैत्रिणींकडून मिळत असलेल्या माहितीवरही तपास सुरू आहे.

- एस. चैतन्य, अप्पर पोलिस अधीक्षक

मोबाइल अॅप डाउनलोड करा आणि राहा अपडेट

जनजागृती हाच आपत्तींपासून बचावाचा उपाय

October 12, 2015, 12:57 pm

≫ Next: नवरात्र उत्सव मंडळांना डॉल्बीप्रकरणी नोटिसा

≪ Previous: फॉरेन्सिक अहवाल प्रलंबित

$

0

0

म. टा. प्रतिनिधी, कोल्हापूर

जगभरात नैसर्गिक आणि मानवनिर्मित आपत्तींचे प्रमाण दिवसेंदिवस वाढत असल्याने आपत्तींचे आव्हान वाढत आहे. या आव्हानांना सामोरे जाण्यासाठी प्रथम या आपत्ती कमी कशा करता येतील याची खबरदारीच फार महत्वाची बनली आहे. आपत्ती झाल्यानंतर यंत्रणा व खर्च करण्यापेक्षा, ती होऊच नये यासाठी जनजागृती आणि आपत्ती निवारणासाठी आवश्यक असलेल्या अत्याधुनिक साधनांची उपयुक्तता फार गरजेची ठरत आहे.

मंगळवारी (१३ ऑक्टोबर) आपत्ती न्यूनतम आंतरराष्ट्रीय दिवस आहे.यानिमित्ताने आपत्तींबाबत नागरिकांमध्ये जागरुकता वाढवणे व आपत्तींचा धोका कमी करण्याबाबत नागरिकांकडून कोणत्या खबरदारींची आवश्यकता आहे याबाबत नागरिकांनाच सजग होण्याची गरज आहे. जिल्ह्यात महापूर, भूस्खलन, रस्ते अपघात, आग आणि वन्यप्राण्यांचा मानवी वस्तीतील शिरकाव या प्रमुख आपत्ती आहेत. २००५ मधील महापुरानंतर खऱ्या अर्थाने आपत्ती व्यवस्थापन विभाग सजग झाला आणि आजच्या घडीला तर आपत्ती व्यवस्थापन विभाग काळाची गरज बनला आहे. सध्या कोल्हापूर जिल्हा प्रशासनाकडे केवळ एकाच अधिकाऱ्याची अधिकृत नियुक्ती या विभागाकडे असून, गरजेनुसार अग्निशमन, सार्वजनिक बांधकाम, वन विभाग, आरोग्य आदी विभागांसह स्वंयंसेवी संस्थांचीही मदत घेतली जाते. आपत्तींचा सामना करण्यासाठी सध्या आपत्ती व्यवस्थापन कक्षाकडे १० रबर बोट, २०० लाईफ जॅकेट्स, २०० लाईफ रिंग्स, दोरखंड, हेल्मेट, टॉर्च, ऑक्सिजन सिलिंडर असे साहित्य उपलब्ध आहे.

आपत्ती व्यवस्थापनाबाबत जनजागृती निर्माण व्हावी यासाठी जिल्हा प्रशासनाकडून शाळा, महाविद्यालयांमध्ये शिबिरे आयोजित केली जातात, त्याचबरोबर एनसीसी आणि राष्ट्रीय सेवा योजना विभागातील विद्यार्थ्यांना प्रथमोपचार आणि बचावाचे प्रशिक्षणही दिले जाते.

६५ इमारती धोकादायक

शहरामध्ये गल्ली, बोळांच्या साम्राज्याबरोबरच जुन्या इमारतीही आहेत. त्यातील काही इमारतींचे स्ट्रक्चर अजूनही चांगले असून त्याचा देखणेपणा अजूनही टिकून आहे. पण गेल्या काही वर्षांपासून वापरात नसलेल्या तसेच काही न्यायालयीन वाद असलेल्या काही इमारतींची देखभाल होत नाही. अशा काही इमारतींचे भाग पावसाळ्यामध्ये कोसळतातही. अशा इमारतींची पाहणी करुन महापालिका दरवर्षी धोकादायक इमारतींची यादी जाहीर करत असते. यंदा महापालिकेने ६५ इमारती धोकादायक असल्याचे घोषित केले आहे. गेल्या दोन वर्षांची तुलना करता हे प्रमाण कमी होत आले आहे. २०१३ मध्ये अशा इमारतींची संख्या १४१ होती. त्यामधील काही इमारती नागरिकांनी उतरवून घेतल्या. तर काहींनी त्याची दुरुस्ती केली. त्यामुळे २०१४ मध्ये ही संख्या ९१ वर आली होती. तीच संख्या यंदा ६५ पर्यंत खाली आहे.

अग्निशमन दलाला हवी अत्याधुनिक यंत्रसामग्री

शहराचा वाढता विस्तार, इमारतीची वाढती उंची विचारात घेत आपत्कालीन स्थितीला सामोरे जाण्यासाठी महापालिकेच्या अग्निशमन विभागाला अत्याधुनिक यंत्रसामग्रीची आवश्यकता आहे. शहरात ३५ मीटर उंचीपर्यंत (११ मजली) बांधकाम करण्यास राज्य सरकारने परवानगी दिली आहे. मोठ्या गृहप्रकल्पाच्या ठिकाणी आपत्कालीन स्थिती निर्माण झाल्यास मदत कार्यासाठी टर्न टेबल लॅडर वाहनाची गरज आहे. आठ कोटी रुपये किंमतीची टर्न टेबल लॅडर हे वाहन खरेदी करण्याचा प्रस्ताव तयार करण्यात आला. पण आवश्यक निधी अभावी टर्न टेबल लॅडर खरेदी बारगळली आहे. शहरात सहा फायर स्टेशन आहेत. ​अ​धिकारी, स्टेशन ऑफीसर, फायरमन, ड्रायव्हर मिळून १२० कर्मचारी आहेत. शहराच्या सध्याच्या लोकसंख्येचा विचार करता १८२ कर्मचाऱ्यांची आवश्यकता आहे. अग्निशमन विभागाकडे सध्या सहा फायर फायटर गाड्या, एक रेस्क्यू व्हॅन, एक रुग्णवाहिका, कृत्रिम श्वसन यंत्रे दहा, तीन बोटी, हायड्रोलिक कटर आणि ४० लाइफ जॅकेट आहेत.

मोबाइल अॅप डाउनलोड करा आणि राहा अपडेट

नवरात्र उत्सव मंडळांना डॉल्बीप्रकरणी नोटिसा

October 12, 2015, 12:58 pm

≫ Next: जिल्हा बँक सुरू करणार वाहन तारण कर्ज योजना

≪ Previous: जनजागृती हाच आपत्तींपासून बचावाचा उपाय

$

0

0

म. टा. प्रतिनिधी, कोल्हापूर

नवरात्र उत्सवात डॉल्बी लावू नये यासाठी शहरातील ७० नवरात्र उत्सव साजरा करणाऱ्या मंडळांना पोलिसांनी नोटिसा पाठवल्या आहेत. डॉल्बी लावून ध्वनी प्रदूषण करणाऱ्या मंडळांच्यावर पाच वर्षे शिक्षा व एक लाख रूपयाचा दंड ठोठावण्यात येईल असा इशारा दिला आहे. मंगळवारी नवरात्र उत्सवास सुरूवात होणार आहे. शहरात अनेक मंडळे देवीच्या मूर्तीची प्रतिष्ठापना करणार आहे. अशा मंडळांना पोलिसांच्यावतीने नोटीसा पाठवल्या आहेत. डॉल्बीव्दारे ध्वनीप्रदूषण करणाऱ्या मंडळांच्यावर कारवाई करावी असे आदेश मुंबई हायकोर्टाने दिले आहे. ध्वनी प्रदूषणाचे तोटे मंडळांचे अध्यक्ष व पदाधिकाऱ्यांना माहीत असल्याने कोणत्याही परिस्थितीत डॉल्बी लावू नये असा इशारा दिला आहे. सध्या महानगरपालिका निवडणुकीची आचारसंहिता सुरू आहे. नवरात्र उत्सव साजरा करणाऱ्या मंडळांनी आचारसंहिता भंग होऊ नये याची काळजी घ्यावी अशी सूचना केली आहे. आचारसंहितेचा भंग करणाऱ्या मंडळांच्यावर कारवाइ केली जाईल, असा इशाराही नोटीसीव्दारे दिला आहे.

मोबाइल अॅप डाउनलोड करा आणि राहा अपडेट

---

जिल्हा बँक सुरू करणार वाहन तारण कर्ज योजना

October 12, 2015, 1:03 pm

≫ Next: दुभाजकावर आदळून मोटारसायकलस्वार ठार

≪ Previous: नवरात्र उत्सव मंडळांना डॉल्बीप्रकरणी नोटिसा

$

0

0

म. टा. प्रतिनिधी, कोल्हापूर

शेती आणि अनुषंगिक पतपुरवठ्यामध्ये अग्रेसर असलेल्या कोल्हापूर जिल्हा मध्यवर्ती सहकारी बँकेच्यावतीने नोकरदार, पगारदारांसाठी वाहन तारण कर्ज योजना सुरू करण्याचा निर्णय बँकेच्या कार्यकारी समितीत घेण्यात आला. वाहन किमतीच्या नव्वद टक्के कर्ज पाच वर्षाच्या मुदतीत देण्यात येणार आहे. यामुळे बँकेच्या व्यावसायात वाढ होणार असून, कर्जपुरवठा करण्यासाठी बँकेच्या सर्व शाखांना परिपत्रकाद्वारे सूचना दिल्या आहेत.

जिल्हा बँकेने ७७ वर्षांच्या काळात शेती व शेती व्यवसायासाठी कर्जपुरवठा करुन जिल्ह्याच्या ग्रामीण अर्थव्यवस्थेत महत्त्वपूर्ण बदल घडवून आणले आहेत. बँक प्रशासनाने केवळ शेतकऱ्यांचीच सेवा केली नसून, जिल्ह्यातील पगारदारांच्या पगाराचे कामकाजही अत्यंत काटेकोरपणे केले आहे. बँकेमध्ये पगारदारांच्या ठेवींचा ओघ वाढत आहे. पगारदार, नोकरदारांनी बँक प्रशासनाकडे मोटारसायकल व चारचाकी वाहनांसाठी कर्जपुरवठ्याची मागणी केली होती. या मागणींचा विचार सोमवारच्या कार्यकारणी बैठकीत करण्यात आला. बैठकीत सर्वानुमते पगारदार, नोकरदारांना वाहन तारण कर्ज देण्याचा निर्णय घेण्यात आला. वाहन तारण योजनेमध्ये लाभधारकांना वाहन किमंतीच्या नव्वद टक्के पाच वर्षाच्या मुदतीने कर्जपुरवठा करण्यात येणार आहे. दसऱ्याच्या मुहूर्ताला योजनेचा अधिका-अधिक लाभ देण्यासाठी २२ ऑक्टोबरला सर्व शाखा सुरू ठेवण्याचा निर्णयही बैठकीत घेण्यात आला.

मोबाइल अॅप डाउनलोड करा आणि राहा अपडेट

दुभाजकावर आदळून मोटारसायकलस्वार ठार

October 12, 2015, 1:04 pm

≫ Next: दानोळीच्या दोघांना सक्तमजुरी

≪ Previous: जिल्हा बँक सुरू करणार वाहन तारण कर्ज योजना

$

0

0

एकजण गंभीर; इचलकरंजी येथील दुर्घटना

म. टा. वृत्तसेवा, इचलकरंजी

खड्डा चुकविण्याच्या प्रयत्नात मोटरसायकल रस्ता दुभाजकावर आदळून झालेल्या अपघातात एकजण जागीच ठार झाला. तर पाठीमागे बसलेला गंभीर जखमी झाला आहे. राहुल मनोहर कुराडे (वय २६, रा. संतोषीमाता मंदिरजवळ, जवाहरनगर) असे ठार झालेल्या युवकाचे नाव असून प्रकाश सदाशिव सौंदत्तीकर (वय २७, रा. रोशन मशिदजवळ) हा गंभीर जखमी आहे. रविवारी मध्यरात्री स्टेशन रोडवर आवाडे जनता बँकेनजीक हा अपघात झाला.

याबाबत पोलिसांतून मिळालेली माहिती अशी, जवाहरनगर परिसरात राहणारे राहुल कुराडे आणि प्रकाश सौंदत्तीकर हे काही कामानिमित्त गावात आले होते. काम आटोपून ते मोटारसायकलवरुन स्टेशन रोडकडून घरी निघाले होते. राहुल हा गाडी चालवत होता. आवाडे जनता बँकेसमोर ते आले असताना खड्डा चुकविण्याच्या प्रयत्नात गाडीवरील ताबा सुटून ते दोघेही गाडीसह रस्ता दुभाजकावर आदळले. यामध्ये राहुलच्या डोक्याला गंभीर इजा झाल्याने तो जागीच ठार झाला. तर पाठीमागे बसलेला प्रकाश हा उडून पडल्याने त्यालाही गंभीर दुखापत झाली. परिसरातील नागरिकांनी दोघांनाही तातडीने पालिकेच्या आयजीएम रुग्णालयात दाखल केले. पण उपचारापूर्वीत राहुल याचा मृत्यू झाल्याने वैद्यकीय अधिकाऱ्यांनी सांगितले. या अपघाताची नोंद शिवाजीनगर पोलिसांत झाली आहे.

राहुल हा वैद्यकीय प्रतिनिधी (एमआर) म्हणून काम करीत होता. सोमवारी दुपारी येथील पंचगंगा स्मशानभूमीत त्याच्या पार्थिवावर अंत्यसंस्कार करण्यात आले. राहुलच्या पश्चात आई, वडील, भाऊ, बहीण असा परिवार आहे.

मोबाइल अॅप डाउनलोड करा आणि राहा अपडेट

दानोळीच्या दोघांना सक्तमजुरी

October 12, 2015, 1:04 pm

≫ Next: शुद्ध पाणीसाठ्यांसाठी आराखडा हवा

≪ Previous: दुभाजकावर आदळून मोटारसायकलस्वार ठार

$

0

0

म. टा. वृत्तसेवा, जयसिंगपूर

दानोळी (ता.शिरोळ) येथील सौ.सरिसा बापू हराळे (वय ४३) यांना काठीने मारहाण करून जखमी केल्याप्रकरणी न्यायालयाने दोघाजणांना दोन वर्षे सक्तमजूरी व चार हजार रूपये दंडाची शिक्षा सुनावली. बाळू केरबा हराळे (वय ५०) व सुरेश केरबा हराळे (वय ४५, दोघे रा.दानोळी) अशी त्यांची नावे आहेत.

२४ मार्च, २००९ रोजी सकाळी १० वाजता फिर्यादी सौ.सरिता बापू हराळे या मुलगा अक्षय (वय २३) व सुनील (वय २५) यांना घेवून दीर बाळू केरबा हराळे व सुरेश केरबा हराळे यांच्याकडे शेतीच्या व घराची वाटणी मागण्यास गेल्या होत्या. यावेळी दोघांनी तिला शिवीगाळ करून काठीने मारहाण केली. यावेळी सोडविण्यासाठी सुनील व अक्षय गेले असता त्यांनाही मारहाण करण्यात आली. यानंतर परिसरातील नागरिकांनी सरिता हराळे व त्यांच्या मुलांची सुटका केली. यानंतर सरिता हराळे यांनी जयसिंगपूर पोलिस ठाण्यात फिर्याद दिली होती. हवालदार ए. एस. कांबळे यांनी तपास करून बापू हराळे व सुरेश हराळे यांच्यावर गुन्हा दाखल करून जयसिंगपूर येथील न्यायालयात दोषारोपपत्र दाखल केले होते.

मोबाइल अॅप डाउनलोड करा आणि राहा अपडेट

शुद्ध पाणीसाठ्यांसाठी आराखडा हवा

October 12, 2015, 1:09 pm

≫ Next: व्हीनस कॉर्नर प्रभागातून बिडकरांची बंडखोरी

≪ Previous: दानोळीच्या दोघांना सक्तमजुरी

$

0

0

म. टा. प्रतिनिधी, कोल्हापूर

पिण्याचे शुद्ध पाणी व प्रदूषणमुक्त पाणीसाठे ही शहरवासीयांच्यादृष्टीने महत्त्वाची गरज आहे. शुद्ध व मुबलक पाण्यासाठी शहरवासीय सातत्याने झगडत आले आहेत. त्याचवेळी उपलब्ध पाण्यातून निर्माण होणाऱ्या सांडपाण्याच्या निर्गतीकरणाचाही प्रश्न आहे. त्यामुळे पाण्याची उपलब्धता व प्रदूषणापासून मुक्तता हे स्मार्ट शहरासाठी प्राधान्याचे विषय आहेत.

पंचगंगा, रंकाळा प्रदूषणाबरोबर बारा नाल्यांचे एकत्रिकरण तसेच शहरातील दूषित झालेले तलाव, खणींची दुरवस्था यावर लक्षपूर्वक काम करण्याची गरज बनली आहे. महापालिकेकडून प्रयत्न केले जात असले तरी अपुरा निधी, कामातील सातत्य यामुळे गेल्या अनेक वर्षांपासून याबाबतची स्थिती फारशी बदलल्याचे जाणवत नाही. यासाठी कृती आराखडा आखून कामांचा निपटारा केल्यास शहराचा चेहरा स्मार्टपणे चमकण्यास मदत होणार आहे.

पंचगंगा नदीतील प्रदूषण कायम

पंचगंगा नदीत जयंती व दुधाळी नाल्यातून मिसळणारे सांडपाणी रोखण्यासाठी ७६ एमएलडी सांडपाणी प्रक्रिया प्रकल्प बांधण्यात आला. त्याच्या निधी उभारणीसाठी नागरिकांकडून जादा कर जमा करण्यात आला. पण या प्रकल्पातून अजूनही पूर्णक्षमतेने सांडपाण्यावर प्रक्रिया होत नाही. परिणामी या नाल्यातील मैलामिश्रित सांडपाणी नदीत मिसळतेच. शिवाय दुधाळी नाल्यावरील कामही अजून प्राथमिक टप्प्यावर असल्याने तेथील सांडपाणी थेट नदीमध्ये मिसळते. शहरातील जवळपास ९० एमएलडीपैकी ५० एमएलडी सांडपाण्यावर प्रक्रिया होते. उर्वरित पाणी थेट नदीतच मिसळते. यामुळे महापालिकेला कसबा बावडा येथील उपसा केंद्र बंद करावे लागले. यातून शहराच्या पाणीपुरवठ्यावर ताण येत आहे. अनेक भागात कमी दाबाने पाणी मिळत.

बारा नाल्यांसाठी गांभीर्यच नाही

जयंती व दुधाळी नाल्यांव्यतिरिक्त शहरातून सांडपाणी वाहून नेणारे आणखी बारा नाले आहेत. या नाल्यांमधून सांडपाणी थेट नदीच्या दिशेने​ मिसळत असते. यामध्ये धुण्याच्या घाटावरील नाला, राजहंस प्रिटिंग प्रेसजवळील नाला, कसबा बावड्यातील नाला, लाइन बाजार, बापट कॅम्प, रमण मळा या नाल्यांमधील सांडपाण्याचे प्रमाण जास्त आहे. यातील सांडपाणी अडवण्यासाठी महापालिकेने मध्यंतरी बंधारे घातले. तिथे ब्लिचिंग पावडर मिसळून प्रदूषणाची तीव्रता कमी करण्याचा प्रयत्न केला. मात्र, त्यानंतर या कामकाजात सातत्य राहिले नाही. आघाडी सरकारच्या काळात या नाल्यांतील सांडपाणी वळवण्यासाठी प्रस्ताव पाठवले, पण ताकद कमी पडल्याने हे प्रस्ताव गरजेचे असून मंजूर झाले नाहीत.

रंकाळ्याचा श्वास कोंडलेलाच

मध्यवस्तीत असलेला रंकाळा पर्यटकांचे आकर्षण आहे; पण या तलावाच्या पाणलोट क्षेत्रात जशी नागरी वस्ती वाढू लागली, तशी या तलावात स्वच्छ पाण्याऐवजी सांडपाणी मिसळू लागले. २५ वर्षांपासून रंकाळ्याचे प्रदूषण कमी करण्यासाठी पर्यावरणप्रेमी, सजग नागरिक प्रयत्न करत आहेत. पण ढिम्म प्रशासनाला त्यावेळी या कामाला फार महत्त्व द्यावे वाटले नाही. त्यामुळे आता प्रदूषणाचा कहर झाल्यानंतर व अधिकाऱ्यांपर्यंत प्रदूषणविषयक कायद्याची झळ पोहोचू लागल्याने प्रयत्न केले जात आहेत. सतत विविध प्रयत्न केले जात असून, त्यामध्येही फार सातत्य नसल्याने प्रयत्नांचे एकत्रित परिणाम दिसत नाहीत. सरकारच्या मदतीतून प्रदूषण रोखण्यासाठी पहिला टप्पा झाला. त्यातून फार मोठे अजूनही साध्य झालेले नाही. त्यासाठी ठोस उपाययोजनांची आवश्यकता आहे.

तलावांच्या शहरातील तलाव प्रदूषित

कळंबा तलाव हा शहराच्या पिण्याचा पाण्याचा स्रोत होता. सध्याही कळंबा, पाचगाव परिसरातील नागरिकांना पाणीपुरवठा होतो; पण त्याची आवश्यक ती देखभालच होत नाही. हीच अवस्था शहराच्या मध्यवस्तीत सध्या अस्तित्वात असलेल्या कोटीतीर्थ तलाव, लक्षतीर्थ तलावांमधील प्रदूषण टोकाला पोहोचले आहे. त्या पाण्यामध्ये पायही बुडवण्याचे धाडस होत नाही. याबाबत महापालिकेने काहीच उपाययोजना केलेल्या नाहीत. फक्त प्रदूषण वाढल्यानंतर निर्माण होणारी जलपर्णी काढण्याचे काम केले जाते. त्यातील सांडपाणी रोखण्यासाठी ठोस काहीही होत नाही. कसबा बावड्यातील हनुमान तलाव मध्यंतरी सुशोभित केला होता; पण त्यानंतर दुर्लक्षच झाले आहे. आपत्तीमध्ये हे तलाव पाण्याचे मोठे स्रोत म्हणून उपयोगी पडतील, त्यादृष्टीने उपाययोजना केल्या पाहिजेत.

खणींचा वापर डम्पिंगसाठी

शहरात जसे पूर्वी तलाव होते. तसेच पाण्याच्या जुन्या खणीही आहेत. रंकाळा तलावाजवळील पोहण्याच्या खणी तसेच इराणी खण, शहाजी वसाहतमधील कदम खण, बेलबाग परिसरातील गंजीवाली खण, टाकाळा खण, उचगावची खण अजूनही अस्तित्वात आहेत. गंजीवाली खणीचा त्या परिसरातील नागरिक, नगरसेवकांच्या सहकार्यामुळे विकास होऊन तिला बंदिस्तपणा आणला आहे; पण इतर खणी म्हणजे केवळ प्रदूषित पाणी, जलपर्णीने व्यापलेल्या अशाच आहेत. त्याकडे महापालिका प्रशासनाकडून दुर्लक्ष केले असून या खणी म्हणजे विविध कारणांसाठीचे डम्पिंग ठिकाण म्हणूनच महापालिका पाहत आहे. यातील काही खणींमध्ये महापालिकेने इनर्ट मटेरिअल टाकण्यासाठी लॅन्डफिल्ड साइट विकसित करण्यास सुरुवात केली आहे.

मोबाइल अॅप डाउनलोड करा आणि राहा अपडेट

व्हीनस कॉर्नर प्रभागातून बिडकरांची बंडखोरी

October 12, 2015, 1:10 pm

≫ Next: निवडणूक रिंगणात मातब्बर

≪ Previous: शुद्ध पाणीसाठ्यांसाठी आराखडा हवा

$

0

0

म. टा. प्रतिनिधी, कोल्हापूर

व्हीनस टॉकीज प्रभागातून उप शहरप्रमुख शशी बिडकर यांना डावलून शिवसेनेने राहुल चव्हाण यांना उमेदवारी दिली. बिडकर यांनी बंडाचा झेंडा फडकावला असून, अपक्ष उमेदवारी अर्ज दाखल केला. तटाकडील तालीम प्रभागात उमेदवारी डावललेल्या रिक्षा सेनेचे राजेंद्र जाधव यांनी अपक्ष उमेदवार म्हणून अर्ज दाखल केला. शेवटच्या दिवशी मंगळवारी शिवसेनेतील बंडखोरी किती प्रमाणात होणार हे स्पष्ट होणार आहे.

शिवसेनेने रविवारपर्यंत ८० प्रभागांतील उमेदवारांची यादी जाहीर केली होती. एकमेव व्हीनस टॉकीज प्रभागातील उमेदवारी सोमवारी दुपारी खासदार विनायक राऊत यांनी जाहीर केली. राहुल चव्हाण यांना उमेदवारी देताना बिडकर यांना उमेदवारी डावलण्यात आली. कनाननगर प्रभागातून निवडणूक लढवण्याचा प्रस्ताव बिडकरांनी धुडकावून लावला. त्यानंतर सायंकाळी त्यांनी पक्षाचा राजीनामा देत शिवसेनेचा जय महाराष्ट्र केला. इलेक्टिव्ह मेरिट नाही म्हणून सर्व पक्षांनी नाकारलेल्या उमेदवारांना शिवसेनेत इलेक्टिव्ह मेरिट लावले गेले. त्यामुळे सत्तेसाठी आमच्यासारख्या शिवसैनिकांचा बळी जाणे हे दुर्दैव आहे. ज्यांचा शिवसेनेशी काडीमात्र संबध नाही, अशा उपऱ्यांना उमेदवारी देण्यात आली आहे. माझ्यावर झालेल्या अन्यायामुळे पदाचा राजीनामा दिला आहे.

मोबाइल अॅप डाउनलोड करा आणि राहा अपडेट