‘सनातन’वर बंदीसाठी भाकपचे आज निवेदन

September 17, 2015, 11:43 am

≫ Next: सांगली पोलिसांबाबत चर्चा

≪ Previous: मास्टरमाइंड एकच?

$

0

0

म. टा. प्रतिनिधी, कोल्हापूर

सनातन व तत्सम प्रतिगामी विचार पसरवणाऱ्या संघटनांवर बंदी घालावी, अशी मागणी करणारे निवेदन भारतीय कम्युनिस्ट पक्षाच्या कार्यकर्त्यांतर्फे कोल्हापूरच्या जिल्हाधिकाऱ्यांना देण्यात येणार आहे.

शुक्रवारी (ता. १८सप्टेंबर) दुपारी १२ वाजता भाकपचे शिष्टमंडळ जिल्हाधिकाऱ्यांची भेट घेईल. त्याचप्रमाणे, या प्रकरणाच्या तपासाला आता वेग यावा आणि तपासादरम्यान पोलिसयंत्रणेला कोणत्याही राजकीय वा इतर अडथळ्यांचा सामना करावा लागू नये, यासाठी पक्ष आग्रही असल्याचे भाकपचे सहसचिव सुभाष वाणी यांनी सांगितले.

गोविंद पानसरे हत्याप्रकरणी कुटुंबियांनी, तसेच पक्षाने वारंवार सनातन संघटनेवर संशय व्यक्त केला होता. तथापि, पोलिसांनी सुरुवातीस त्या दिशेने तपास केला नाही. त्यामुळे तपासास विलंब झाला. आता अटक करण्यात आलेला संशयित हा सनातनचा पूर्णवेळ कार्यकर्ता असल्याचे स्पष्ट झाल्याने पक्षाचा संशय खरा ठरला आहे असे वाणी म्हणाले.

मोबाइल अॅप डाउनलोड करा आणि राहा अपडेट

---

सांगली पोलिसांबाबत चर्चा

September 17, 2015, 11:44 am

≫ Next: सायबर सेल बनले तपासकेंद्र

≪ Previous: ‘सनातन’वर बंदीसाठी भाकपचे आज निवेदन

$

0

0

म. टा. प्रतिनिधी, कोल्हापूर

एसआयटी पथकाने सांगलीच्या समीर गायकवाडला सांगलीतूनच अटक केल्यानंतर राज्यभर खळबळ उडाली. संबधित संशयीत सांगलीतला असताना सांगली पोलिसांना याची कुणकुण कशी लागली नाही?, असा सवाल उपस्थित होऊ लागला आहे.

दरम्यान, एटीएसच्या संबधित चौकशी पथकात सांगलीचे अप्पर पोलिस अधिक्षक लक्ष्मीकांत गायकवाड, गुंडाविरोधी पथकाचे पोलिस निरीक्षक बाजीराव पाटील यांच्यासह अन्य कर्मचारी या प्रकरणाच्या तपासात सक्रीय आहेत. शिवाय, एसआयटीचे केंद्र कोल्हापूर असल्याने एकाच प्रमुख वरिष्ठ अधिकाऱ्यांच्या नियंत्रणाखाली तपास व्हावा. त्यासाठी लागणारे सहकार्य वेळोवेळी करायची आमची भूमिका आहे, असे सांगली पोलिस आता सांगत आहेत. मात्र तपास यंत्रणेचा एक भाग असलेले पोलिस निरीक्षक बाजीराव पाटील यांना नाशिक येथील कुंभमेळ्याच्या बंदोबस्तासाठी रवाना केले होते. कॉम्रेड पानसरे यांच्या खुनासारख्या अतिसंवेदनशील प्रकरणाचा तपास करणाऱ्या अधिकाऱ्याला अचानक कुंभमेळ्याच्या बंदोबस्ताला पाठविल्याने मध्यंतरी काही दिवस चर्चा सुरू झाली होती.

गायकवाड याची आजपर्यंत सांगलीतील एकही संशयास्पद हालचाल समोर आली नाही. शिवाय तो सांगलीत काही मोजके दिवसच मुक्काम करायचा. गेल्या चार वर्षांपासून तो पनवेलच्या सनातन आश्रमात रहात होता. त्याच परिसरात त्याने मोबाइलचा व्यवसाय सुरू केला होता. त्यामुळे त्याची अधिक माहिती आमच्यापर्यंत येण्याचे कारणच नव्हते, असा पोलिसांचा दावा आहे. शिवाय जी काही माहिती आली होती, त्याबाबत गुप्तता पाळून ती चौकशी समितीला सहकार्य करणे, ही आमची भूमिका आहे. असा सांगली पोलिसांचा दावा आहे.

मोबाइल अॅप डाउनलोड करा आणि राहा अपडेट

सायबर सेल बनले तपासकेंद्र

September 17, 2015, 11:45 am

≫ Next: तपासावर राजकीय दबाव नको

≪ Previous: सांगली पोलिसांबाबत चर्चा

$

0

0

म. टा. प्रतिनिधी, कोल्हापूर

अटकेच्या कारवाईनंतर गुरुवारी ​सकाळपासून जिल्हा पोलिस अधीक्षक कार्यालयातील सायबर क्राईम सेल व संशयित असलेली रुम ही दोनच ठिकाणे 'हाय टेन्शन' ची बनली होती. त्यामुळे पोलिस अधिक्षकांपासून ते पोलिस​ निरीक्षक, सहायक पोलिस निरीक्षकांपर्यंत साऱ्यांच्या फेऱ्या या दोन रुम दरम्यानच होत होत्या. त्यांच्या चेहऱ्यावरील ताण या प्रकरणाचे 'हाय टेन्शन' दाखवून देत होता. या प्रकाराने कुणीही अधिकारी, कर्मचारी प्रसार माध्यमांशी सहजपणे बोलण्यासही तयार होत नव्हता व एकच उत्तर देत होता 'काही माहिती नाही हो.'

बुधवारी सकाळी अकराच्या सुमारास संशयिताला कोर्टात दाखल केल्यानंतर पोलिस अ​धीक्षक कार्यालय हेच तपासाचे केंद्र बनले होते. बुधवारी रात्री उशिरापर्यंत समीर गायकवाडची चौकशी केली जात होती. एसआयटी प्रमुख संजयकुमार आणि जिल्हा पोलिस अधीक्षक डॉ. मनोजकुमार शर्मा हे गुरुवारी सकाळपासून शर्मा यांच्या कार्यालयात ठाण मांडून बसले होते. या कार्यालयासमोरच सायबर क्राईम सेल विभाग आहे. संजयकुमार यांच्या केबिनमधून या सेलच्या कामकाजावर नियंत्रण सुरू होते. स्थानिक गुन्हा अन्वेषण शाखेचे पोलिस निरीक्षक डी. एन. मोहिते या सेलमधून मिळणारी माहिती संजयकुमार यांच्यापर्यंत पोहचवत होते. अनेकदा मोहिते व त्यांचे सहाय्यक लॅपटॉप घेऊन कार्यालयात जात होते. तर सहायक पोलिस निरीक्षक अभिजित देशमुख हे संशयित असलेल्या चौकशीच्या रुममधून संजयकुमार यांच्यापर्यंत माहिती पोहोचवत होते. कार्यालयात चहा देणारा कर्मचारी आणि संबंधित अधिकारी सोडल्यास तिथे इतरांना भेटण्यास सोडले जात नव्हते. दुपारी बारापासून अडीच वाजेपर्यंत सारी यंत्रणा धावपळ करत होती. दरम्यानच्या काळात डॉ. शर्मा एकदाच बाहेर आले. पण त्यांच्या चेहऱ्यावरील तणाव स्पष्ट दिसत होता. त्यावेळीही संशयिताचे वकिलपत्र घेण्यास आलेल्या वकिलांसोबत त्यांनी पॅसेजमध्ये थांबून चर्चा केली.

संशयित गायकवाडची चौकशी अतिरिक्त पोलिस अधीक्षक एस. चैतन्य करत होते. त्यांच्यासोबत पुण्याहून आलेले अधिकारीही होते. पहिल्या म​जल्यावर असलेल्या या रुममध्ये आवश्यक तितकाच स्टाफ होता. तेथील सर्वच यंत्रणेवर ताण असल्याचे जाणवत होते. प्रसार माध्यमांशी सहजपणे चर्चा करण्यासही धजावत नव्हते. बहुधा माध्यमांबरोबर कोण बोलते याकडेही लक्ष दिले जात होते. दुपारनंतर संजयकुमार थोडे निवांत झाले होते. पण तपासाच्या कागदांच्या गराड्यातच होते.

मोबाइल अॅप डाउनलोड करा आणि राहा अपडेट

तपासावर राजकीय दबाव नको

September 17, 2015, 11:46 am

≫ Next: सांगलीत झाडाझडती

≪ Previous: सायबर सेल बनले तपासकेंद्र

$

0

0

स्मिता पानसरे यांनी व्यक्त केली अपेक्षा

म. टा. प्रतिनिधी, कोल्हापूर

'गोविंदराव पानसरे यांच्या हत्येप्रकरणी पोलिसांनी अटक केलेला संशयित हा सनातन प्रभात संघटनेचा कार्यकर्ता आहे. मुख्यमंत्री देवेंद्र फडणवीस यांना मात्र सनातन संघटनेबाबत मत विचारता मौन बाळगणे पसंत केले. त्यामुळे या संघटनेच्या कृत्यांना मुख्यमंत्र्यांची मूक संमती आहे का?, अशी शंका घेण्यास जागा आहे. तसे असल्यास या प्रकरणातील पुढील तपासामध्ये पोलिसांवरही दबाव वाढण्याची शक्यता आहे. त्यामुळे पोलिसांनी कोणत्याही राजकीय दबावाला बळी न पडता या प्रकरणाच्या मुळापर्यंत जाऊन खऱ्या सूत्रधारांचा शोध घ्यावा', अशी अपेक्षा पानसरे यांच्या कन्या स्मिता पानसरे यांनी व्यक्त केली.

पानसरे यांच्या हत्येप्रकरणी पोलिसांनी तब्बल सात महिन्यांनी बुधवारी पहिल्या संशयिताला अटक केली. त्यानंतर आयडियल सोसायटीत पानसरे यांच्या घराबाहेर पुन्हा पोलिस बंदोबस्त वाढवण्यात आला आहे. इलेक्ट्रॉनिक प्रसारमाध्यमांना पानसरे कुटुंबियांना भेटण्यास परवानगी नाकारण्यात आली आहे. घरातील इतर सदस्यांचे दैनंदिन व्यवहार सुरू असले, तरी उमा पानसरे यांना प्रसारमाध्यमांच्या प्रश्नांना सामोरे जावे लागणार नाही, याचीही काळजी घेतली जात आहे.

'मटा'शी बोलताना स्मिता पानसरे यांनी पोलिसांचे कारवाईबाबत अभिनंदन केले. 'केवळ पानसरे कुटुंबीय म्हणूनच नव्हे, तर लोकशाही राष्ट्रामध्ये विचारस्वातंत्र्य जपणाऱ्या प्रत्येकासाठी ही अटक आशादायी आहे', असे पानसरे म्हणाल्या. 'अद्याप हा तपास पूर्ण झालेला नाही. बुधवारी अटक केलेला संशयित हा सनातन संघटनेचा कार्यकर्ता आहे. ही संघटना कोणत्या विचारसरणीचा प्रसार करते, हे सर्वांना माहित आहे. सध्या राज्यात सत्तेवर असलेला भारतीय जनता पक्षही याच विचारसरणीचा पुरस्कर्ता आहे. मुख्यमंत्री फडणवीस यांनाही सनातन संघटनेविषयी त्यांचे मत विचारता त्यांनी मौन बाळगले. त्यामुळे, सनातनसारख्या संघटनेच्या कृत्यांना मुख्यमंत्र्यांचा मूक पाठिंबा आहे का?, अशी शंका येते. पानसरे हत्याप्रकरणामध्ये तपासयंत्रणांचे काम योग्य दिशेने सुरू असले, तरी हे प्रकरण तडीस नेण्याची राजकीय इच्छाशक्ती अद्याप दिसत नाही. त्यामुळे पोलिसांनी पुढील काळात कोणत्याही प्रकारचा राजकीय दबाव झुगारून या प्रकरणाचा छडा लावावा', असे मत पानसरे यांनी व्यक्त केले. 'या प्रकरणाचा तपास पूर्ण होईपर्यंत आम्ही कुटुंबीय स्वस्थ बसणार नाहीत. तपासाला वेग यावा, यासाठी आम्ही आमच्यापरीने प्रयत्न करतच राहू' असे त्यांनी नमुद केले.

मोबाइल अॅप डाउनलोड करा आणि राहा अपडेट

सांगलीत झाडाझडती

September 17, 2015, 11:47 am

≫ Next: ‘इंटरसेप्ट’मुळे गवसला मार्ग

≪ Previous: तपासावर राजकीय दबाव नको

$

0

0

गायकवाडच्या घरात सापडली प्रचारपत्रके

म. टा. वृत्तसेवा, कुपवाड

कॉम्रेड गोविंदराव पानसरे यांच्या खून प्रकरणी पोलिसांनी अटक केलेल्या समीर गायकवाड याच्या सांगलीतल्या वास्तव्याबाबतचे गुढ कायम आहे. अधून-मधून सांगलीतल्या घरात येणारा समीर घरी आल्यानंतरही जास्तीत जास्त काळ झोपूनच राहत होता. त्याचे 'सनातन'चे काम भावांपैकी कोणालाच मान्य नव्हते. त्यामुळेच तो घरच्यांशी मर्यादीत संपर्क ठेवत असावा, असा अंदाज व्यक्त होत आहे. सांगली पोलिसांनी त्याच्या घरातून बावीस मोबाइल, एक सुरा आणि 'सनातन'चे प्रचार साहित्य जप्त करून कोल्हापूरला नेले आहे.

समीरच्या सांगलीतील घरावर सशस्त्र पोलिसांचा पहारा तैनात असून त्याची आई शांता आणि भाऊ सचिन या दोघांना पोलिसांनी कोल्हापूरला नेले आहे. गुरुवारी समीरची वहिनी वनिता यांनी पत्रकारांशी संवाद साधला. त्या म्हणाली, 'समीर आणि त्याची आई हे दोघे सनातनच्या प्रचारकार्यात असायचे. त्यांचे ते काम आम्हाला पसंत नसल्याने आम्ही वारंवार त्यांना विरोध करत आलो आहे. समीरचे वास्तव्य सांगलीत फारसे नसायचे. परंतु गणपती उत्सवाच्यानिमित्ताने मात्र तो हमखास घरी येत होता. त्याप्रमाणेच तो सोमवारी घरी आला. त्यानंतर तो बराचकाळ झोपून राहिला. नंतर त्याने घराला रंग देणे आवश्यक असल्याचा विषय काढला. तो अगदी मोजकेच बोलत असल्याने आम्हीही त्याच्याशी जास्त बोलायचे टाळत होतो. मंगळवारी रात्री तो रंग घेऊन येतो, असे सांगून बाहेर पडल्यानंतर तो परतलाच नाही. त्याचा मोबाइलही बंद झाला होता. बुधवारी पोलिस घरी आल्यानंतरच समीरला अटक झाल्याचे समजले. तो धर्मिक कार्यात मग्न असायचा परंतु कोणाचा खून वगैरे करण्याचे धाडस त्याने केले असेल, असे वाटत नाही.'

सांगली आणि परिसरात समीर गायकवाडच्या अस्तित्वाबाबत ठोस अशी माहिती पुढे येताना दिसत नाही. ठराविक मित्रमंडळी, त्यांच्याबरोबर मोजक्याच लोकांशी घनिष्ट संबंध असणारा समीर मोबाइल दुरुस्ती, जुन्या मोबाइलची खरेदी-विक्री यातून आलेल्या पैशाचे नेमके काय करायचा याचे कोडेमात्र कधीच उलघडत नव्हते. त्याची आई शांता या सनातनच्या प्रचारात सक्रीय होत्या. शिवाय अनेक महिला बचत गटांशीही त्या जोडली गेली होती. बचत गटाच्या माध्यमातून कर्जरुपी घेतलेले पैसे ती समीरलाच पाठवित होती. घर सांभाळणारा भाऊ सचिन हा खासगी रखवालदार म्हणून काम करतो. त्यामुळे अर्थिक उत्पन्नावर मर्यादा आहेत. त्यामुळे घराला नेहमीच अर्थिक ओढाताणीला तोंड द्यावे लागायचे. अशा काळातही त्याची आई बचत गटांकडून घेतलेल्या कर्जाची रक्कम घरी खर्च करत नव्हती, अशीही माहिती बचत गटातील महिलांच्या चर्चेतून पुढे येत आहे. पोलिसही कुटुंबियांकडून माहिती घेत असल्याचे सांगण्यात आले.

मडगाव स्फोटाशी कनेक्शन

मडगाव स्फोटातील संशयीतांशी समीरचे घनिष्ट संबध असल्याची जोरदार चर्चा आहे. मडगाव स्फोटात ठार झालेला मलगोंड पाटील आणि संशयित म्हणून अद्यापही फरार असलेला रुद्र पाटील यांच्याशी समीर सतत संपर्कात असायचा. तपास यंत्रणेतील अधिकाऱ्यांच्या माहिती नुसार रुद्र पाटील हा मोबाइलचा वापरत नसल्याचे समोर येत आहे. समीर मोबाइल वापरत होता. पोलिसांनी त्याला ताब्यात घेईपर्यंत मोबाइल सुरू होता. व्हॉट्सअॅपचे अकाउंटही सुरु होते. विशेष पोलिस पथकाने केलेल्या चौकशीत मोबाइल सर्चच्या आधारेच तो जाळ्यात सापडल्याचे स्पष्ट झाले आहे. मालेगाव बाँबस्फोटात जळून राख झालेल्या संशयित मोटारसायकलच्या मालकाचा शोध घेताना तत्कालीन पोलिस यंत्रणेने गाडीचा मालक, त्याने ती किती वर्षापूर्वी कोणाला विकली? ती खरेदी करणारी व्यक्ती कोण? असा तपास केला. अखेर संबधित व्यक्तीला चौकशीसाठी बोलविले होते. तशाच पद्धतीने एसआयटीची यंत्रणा समीर गायकवाड पर्यंत पोहचल्याची चर्चा आहे.

मोबाइल अॅप डाउनलोड करा आणि राहा अपडेट

‘इंटरसेप्ट’मुळे गवसला मार्ग

September 17, 2015, 11:49 am

≫ Next: व्हॉइस रेकॉर्ड गुजरातला

≪ Previous: सांगलीत झाडाझडती

$

0

0

म. टा. प्रतिनिधी, कोल्हापूर

पानसरेंच्या हत्येच्या प्रकरणात सहभागी असल्याच्या संशयावरून ताब्यात घेतलेल्या समीर गायकवाड हा मोबाइलसारख्या आधुनिक पण सर्वांच्या हाती असलेल्या तंत्रज्ञानाने संशयाच्या जाळ्यात सापडला. मोबाइलचे लोकेशन ट्रेस करणे, संबंधित व्यक्तीपर्यंत पोहचणे हे प्रकार परिचित असले तरी इंटरसेप्ट प्रकारातून या प्रकरणाचा धागा मिळाल्याचे सूत्रांनी सांगितले.

'इंटरसेप्ट' म्हणजे दोघांच्या संभाषणामध्ये घुसून ते संभाषण ऐकणे इतका साधा, सरळ अर्थ. पण, इतक्या सरळ पद्धतीने हा प्रकार करता येत नाही. त्यासाठी पोलिसांना गृह विभागाकडून परवानगी घेणे आवश्यक असते. ती परवानगीही कायमस्वरूपी नसते. काही कालावधीपुरती ​ती दिली जाते. काही दिवसांपासून काही आठवडे असा हा कालावधी असू शकतो. यामधून जे मोबाइल इंटरसेप्शनला लावलेले असतात, त्या मोबाइलवर जे काही कॉल येतात-होतात, त्यातील संभाषण तर ​रेकॉर्ड करता येते. पण त्याशिवाय कॉलची माहिती, लोकेशन आदी बाबींचीही माहिती मिळते. त्यातूनच गायकवाडचे संशयाचे संभाषण पोलिसांना मिळाले. यासाठी पोलिसांनी त्याचे आणि त्याच्याशी संबंधित अनेक कॉल्सची माहिती घेतली होती. त्यानंतर गायकवाड याच्या काही कॉलमधून संशयास्पद भाष्य आढळून आले.

कॉल डिटेल रेकॉर्डमधून (सीडीआर) एखाद्या मोबाइलचे कॉलचे रेकॉर्ड तसेच त्यांचे लोकेशन्स माहिती होऊ शकतात. या प्रकरणात पोलिसांनी गायकवाड तसेच जे काही संशयास्पद वाटत होते, त्या सर्वांचे सीडीआर जमवले होते. हा सर्व डाटा प्रचंड मोठ्या प्रमाणात असल्याने त्यातून छाननी करत करत काही ठराविक कॉलपर्यंत पोलिस पोहचले. याशिवायही डम्प डाटाही मिळवला. ठराविक लोकेशन्सवरील एका ठराविक कालावधीतील मोबाइल कॉल्सची माहिती घेतली गेली.

मोबाइल अॅप डाउनलोड करा आणि राहा अपडेट

व्हॉइस रेकॉर्ड गुजरातला

September 17, 2015, 11:50 am

≫ Next: ‘हसन मुश्रीफ यांचा भ्रष्टाचारात हातखंडा’

≪ Previous: ‘इंटरसेप्ट’मुळे गवसला मार्ग

$

0

0

म. टा. प्रतिनिधी, कोल्हापूर

सांगली, मुंबई, नवी मुंबई येथे वावरणाऱ्या समीर गायकवाडने गेल्या काही महिन्यांत केलेले मोबाइलवरील संभाषणच आता ठोस पुरावा असल्याने पोलिसांनी तोच पुरावा अधिक भक्कम करण्याच्यादृष्टीने पाऊले उचलली आहेत. इंटरसेप्शनच्या माध्यमातून मिळालेले त्याचे व्हाईस रेकॉर्ड, त्याचे लोकेशन्स अधिकाधिक स्पष्ट करण्यासाठी पुणे सायबर क्राइम टीम तर गुरुवारी सकाळपासून त्यावर काम करत आहे. 'गायकवाडचे मोबाइलवरून झालेले संभाषण अधिक स्पष्ट होण्यासाठी गुजरात येथील फॉरेन्सिक लॅबला व्हाईस सॅम्पल पाठवण्यात येणार आहे,' असे एसआयटीचे प्रमुख संजयकुमार यांनी गुरुवारी सांगितले.

गायकवाड याच्या अटकेनंतर गुरुवारी पुन्हा सांगलीतील घराची झडती घेण्यात आली. त्यामध्ये २३ मोबाइल सापडले आहेत. या सर्व मोबाइलवरून झालेला संपर्क शोधण्याचे काम कोल्हापूर पोलिसांची सायबर क्राइम टीम पुण्याच्या टीमबरोबर करत आहे. पुण्याच्या टीमने यापूर्वी दाभोलकर हत्याप्रकरणात अशाच प्रकारे जमवलेल्या ​​डेटामधून आरोपींपर्यंत पोहोचण्याचा प्रयत्न केला होता. सध्या त्या मोबाइलवरून झालेले कॉल ट्रॅक केले जात आहेत. यापूर्वी कॉल डिटेल रेकॉर्ड (सीडीआर), डम्प डाटा माध्यमातून घटनास्थळाच्या परिसरात त्या वेळेत झालेले मोबाइल कॉल, त्यांचे लोकेशन्स तसेच किती कालावधीचे संभाषण या सर्वांची माहिती जमवली होती. त्यातून छाननी करत गायकवाडच्या कॉलपर्यंत पोलिस पोहचले होते. पोलिसांनी गायकवाडचे व्हाइस सॅम्पल घेतले आहेत. तसेच तो गेल्या काही महिन्यांत कोठून कोठे फिरला?, वेगवेगळ्या मोबाइलवरून त्याने कुणाशी संपर्क साधला?, त्या मोबाइलचा सीडीआर डाटा, लोकेशन्स अशा साऱ्या माध्यमातून त्याचा या घटनेशी कसा अधिकाधिक संबंध आहे? हे दाखवण्यासाठी पोलिस प्रयत्न करत आहेत.

समीरने केलेले संभाषण पोलिसांकडे आहे. त्या संभाषणाची क्वॉलिटी अधिक स्पष्ट करण्यासाठी ते गुजरातमधील गांधीनगर येथे असलेल्या फॉरेन्सिक लॅबला पाठविण्यात येत आहे. यातून त्याने उच्चारलेले शब्द आणखी स्पष्ट होऊन त्यातून काही अर्थ शोधण्याचा पोलिसांचा प्रयत्न आहे. त्याचे भाऊ कर्नाटकातील संकेश्वरमधील असल्याने त्यांच्याशी झालेल्या संभाषणात काही वेगळ्या पद्धतीच्या शब्दांचा वापर केला असण्याचीही शक्यता आहे. यातून त्याचे संभाषण, त्यातून झालेला इतरांशी संपर्क हे फार महत्वाचे दुवे असून त्यादृष्टीनेच पोलिसांचा तपास सुरू असल्याचे सांगण्यात येते. त्यामुळे हेच पुरावे अधिक भक्कम करण्याचा प्रयत्न पोलिस करत आहेत.

मोबाइल अॅप डाउनलोड करा आणि राहा अपडेट

‘हसन मुश्रीफ यांचा भ्रष्टाचारात हातखंडा’

September 18, 2015, 1:48 pm

≫ Next: फटाक्यांमुळे बिथरला टस्कर

≪ Previous: व्हॉइस रेकॉर्ड गुजरातला

$

0

0

म. टा. वृत्तसेवा, कागल

लबाड, भ्रष्टाचारी मुश्रीफ लोकांचा आत्मसन्मान विकत घेत आहे. जिल्हा बँक, राज्य शिखर बँक, नगर पालिका, महानगरपालिका, एम.आय.डी.सी. अशा सर्वच ठिकाणी मुश्रीफांचा भ्रष्टाचारात हातखंडा आहे. लोकांचा आत्मसन्मान नष्ट करणाऱ्या मुश्रीफ यांना आमचा कायमचा वैचारिक विरोधच राहील, असे प्रतिपादन माजी आमदार संजय घाटगे यांनी केले.

व्हन्नाळी ता.(कागल) येथे कागल विधानसभा मतदार संघातील नूतन ग्रामपंचायत सदस्य व पदाधिकाऱ्यांच्या सत्कार समारंभ मेळाव्यात ते अध्यक्षस्थानावरुन बोलत होते.

घाटगे म्हणाले, 'राजकारणात विश्वासार्हतेला खूप महत्त्व आहे. म्हणूनच सोळा वर्षे कोणत्याही सत्तेत नसतांना तळमळीने माझ्या बरोबर राहणाऱ्या कार्यकर्त्यामुळेच लढत राहिलो. ज्या दिवशी विश्वासार्हतेला तडा जाईल तो दिवस माझ्या सार्वजनिक जीवनातील शेवटचा दिवस असेल. ग्रामपंचायतीमध्ये आपल्या गटाचे कार्यकर्ते निवडून आले हे गटाशी एकनिष्ठ असणाऱ्या कार्यकर्त्यांच्या त्यागाचे द्योतक आहे.'

गोकूळचे संचालक अंबरिश घाटगे म्हणाले, 'प्रामाणिक माणसे गटात आहेत त्यामुळेच पराभवाला न डगमगता कार्यकर्ते लढले.'

मेळाव्यास जिल्हा परिषद सदस्या सुयशा घाटगे, पंचायत समितीचे सदस्य ए. वाय. पाटील, निवृत्ती पाटील, शामराव पाटील, आप्पासाहेब पाटील आदी प्रमुख उपस्थित होते. स्वागत तानाजी पाटील (कासारी) यांनी केले.

मोबाइल अॅप डाउनलोड करा आणि राहा अपडेट

---

फटाक्यांमुळे बिथरला टस्कर

September 18, 2015, 1:49 pm

≫ Next: चांदोलीचा दरवाजा उघडेना

≪ Previous: ‘हसन मुश्रीफ यांचा भ्रष्टाचारात हातखंडा’

$

0

0

आजऱ्यातील पोळगाव, वाटंगी परिसरात घबराट

म. टा. वृत्तसेवा, आजरा

गणेश आगमनाच्या निमित्ताने जल्लोषासाठी वाजविण्यात आलेल्या फटाकड्या व बाँबच्या आवाजामुळे बिथरलेल्या टस्करने वाटंगी-पोळगाव परिसरात दहशत निर्माण केली आहे. काही ठिकाणी हा हत्ती‌ रस्त्यावर येऊन ग्रामस्थांवर धाऊन गेल्याने भीतीचे वातावरण पसरले आहे. गेल्या काही दिवसांपासून टस्करने शेतवडीत घुसून नुकसान सुरू केले.

गुरुवारी दिवसभर परिसरातच फिरणाऱ्या टस्करने रात्रीच्या सुमारास येथील जोतिबा खामकर, संभाजी टिकेकर, गणपत टिकेकर व पांडुरंग करंबळकर यांच्या शेतातील पिकांसह काजूची झाडे व मेसकाठींचे मोठे नुकसान केले. शुक्रवारी पहाटेपर्यंत या शिवारात ठिय्या दिलेला टस्कर विटे परिसराकडे निघून गेल्याचे काही ग्रामस्थांनी सांगितले. टस्करच्या या धुमाकुळामुळे कोणीही शेताकडे गेले नाही.

नेसरी परिसरातून आजरा तालुक्याच्या हद्दीत आठवडाभरापूर्वी या टस्कर आला. चाळोबावाडीच्या जंगलपरिसरातून शिरसंगी, येमेकोंड, कोवाडे, बुरूडे आणि मलिग्रे परिसरात वावर असलेल्या टस्कराचा मेंढोली-येमेकोंड दरम्यानच्या जंगल टापूतील डोणीचे तळे नावाच्या जंगल परिसरात ठिय्या राहिला. शेतातून फिरणे व भात आणि ऊसाचे नुकसान करणे एवढाच टस्कराचा दिनक्रम होता. परवा सायंकाळच्या सुमारास हा टस्कर पोळगाव परिसरात उतरला. मात्र त्यावेळी त्याने फारसे नुकसान केले नाही. काल सकाळच्या सुमारास गणेशमूर्ती आणताना फोडलेल्या फटाके व सुतळी बाँबमुळे तो बिथरला. परिणामी दिवसभर शेतीवाडीत कामाच्या निमित्ताने गेलेल्या काहीजणांवर धाऊन जाण्याचा प्रयत्न केल्याने ग्रामस्थ शेताकडे फिरकलेच नाहीत.

पिकांचे नुकसान

गेल्या काही महिन्यानंतर चंदगड तालुक्यातबन परतलेल्या टस्कराने पुन्हा एकदा येथे नुकसानसत्र सुरूच ठेवले आहे. आजऱ्यापासून केवळ ६-७ किलोमीटर अंतरावरील येमेकोंड, शिरसंगी व मेंढोली परिसरातील भात व ऊसपिकाचा फडशा पाडत असल्याने शेतकरी हवालदील झाला आहे. आधीच पावसाअभावी बरेचसे पीक वाया जाण्याची भीती असताना उरले-सुरले पोटरीला आलेले भातपीक आणि उसावर टस्कराचे लक्ष केंद्र‌ित झाले आहे.

मोबाइल अॅप डाउनलोड करा आणि राहा अपडेट

चांदोलीचा दरवाजा उघडेना

September 18, 2015, 1:50 pm

≫ Next: मोर्चा काढूच; आम्हाला रोखून दाखवाच

≪ Previous: फटाक्यांमुळे बिथरला टस्कर

$

0

0

म. टा. वृत्तसेवा, शिराळा

शिराळा तालुक्यातील चांदोली धरण परिसरात पावसाचे प्रमाण गतवर्षीच्या तुलनेत ४० टक्क्याने कमी झाल्याने सप्टेंबर निम्मा संपत आला तरी चांदोली धरणाचे दरवाजे अजूनही उघडलेले नाहीत. गेल्या पंधरावर्षातील हा पहिलाच पावसाळा निमकोरडा गेल्याने धरणाचे दरवाजे अजूनही उघडलेले नाहीत. जुलै महिनाअखेर किंवा ऑगष्ट महिन्याच्या पहिल्या आठवड्यात धरणाचे दरवाजे उघडे केल्याची गेल्या १५ वर्षांत नोंद आहे. पावसाचे प्रमाण कमी असले तरी पाणलोट क्षेत्रात मे महिन्यात पडलेल्या पावसामुळे धरण ९२. ९९ टक्के भरले आहे. धरणाच्या सांडव्यातून विसर्ग बंद असल्यामुळे पाणीपातळी स्थिर आहे.

सध्या चांदोली धरणातून वीजनिर्मिती केंद्रातून ५९० क्युसेक्स पाणी वारणा नदीत सोडण्यात येत आहे. त्यामुळे वारणा नदीतही पाणी वाहत आहे. चांदोली धरण परिसर पावसाचे आगर समजले जाते मात्र यावर्षी राज्यात दुष्काळजन्य परिस्थिती असल्यामुळे या परिसरातही पावसाचे प्रमाण कमी आहे. ५ ते ६ हजार मी.मी. पावसाचे प्रमाण सरासरी या परिसरात प्रत्येक वर्षी असते. प्रत्येक वर्षी जुलै महिना अखेर किंवा ऑगष्ट महिन्याच्या पहिल्या आठवड्यात धरण हमखास १०० टक्के भरते. याच कालावधीत धरणाचे दरवाजे उघडून विसर्ग वारणा नदीत करण्यात येतो. यावर्षी पावसाचे प्रमाण कमी असले तरी धरणातील पाणीसाठा समाधान कारक आहे. आजअखेर धरण परिसरात एकूण १४६५ मी.मी. पावसाची नोंद आहे. धरणाची पाणीपातळी सांडव्या पर्यंत आहे.

गेल्या दोन दिवसापूर्वी पडलेल्या पावसामुळे शेतकऱ्यांच्या अशा पल्लवित झाल्या असल्या तरी पाऊस समाधानकारक नसल्यामुळे शेतकऱ्यांचे डोळे धरणाचे दरवाजे कधी उघडतात याकडे लागले आहेत. गेल्या पंधरा वर्षांत ८ जुलै, २००६ ला सर्वात आगोदर धरणाचे दरवाजे उघडले गेले होते. तर ८ ऑगष्ट, २००८ ला सर्वात उशिरा दरवाजे उघडल्याची नोंद आहे. धरणाचे दरवाजे सप्टेबर महिना सुरु होवून आठवडा उलटला तरी उघडले गेले नाहीत ही पंधरा वर्षातील पहिलीच वेळ आहे.

धरण ९२.९९ टक्के भरले असून ३१.९९ टीएमसी पाणी साठा आहे. वीजनिर्मिती केंद्रातून ५९० क्युसेक पाणी वारणा नदीत सोडण्यात येत आहे. पाणी सांडावा पातळी पर्यंत आल्यानंतर धरण व्यवस्थापनाने ५ ऑगष्ट, २०१५ ला परंपरे नुसार धरणाचे दरवाजे उघडे करून पाण्याचे पूजन करून ते बंद केले आहेत.

मोबाइल अॅप डाउनलोड करा आणि राहा अपडेट

मोर्चा काढूच; आम्हाला रोखून दाखवाच

September 18, 2015, 1:52 pm

≫ Next: ‘विखे पिता-पुत्रांना भाजपची सुपारी’

≪ Previous: चांदोलीचा दरवाजा उघडेना

$

0

0

एक ऑक्टोबरच्या मोर्चावरून मुश्रीफांचे आव्हान

म. टा. प्रतिनिधी, कोल्हापूर

भाजप सरकारने बांधकाम कामगार व घरेलू मोलकरणींच्या बंद केलेल्या विविध योजना पूर्ववत करण्याच्या मागणीसाठी राष्ट्रवादी काँग्रेसच्यावतीने १ ऑक्टोबरला मोर्चा काढण्यात येणार आहे. येथूनपुढे केवळ आंदोलनेच केली जाणार असून महानगरपालिका आचारसंहिता सुरु झाली तरी बंदी न जुमानता मोर्चा निघणारच. आम्हाला प्रशासनाने रोखू नये, असा इशाराच राष्ट्रवादी काँग्रेसचे नेते आमदार हसन मुश्रीफ यांनी दिला. पूर्वी हा मोर्चा २९ सप्टेंबर रोजी काढण्याचे नियोजन केले होते.

बांधकाम कामगार, घरेलू मोलकरणी, झोपडपट्टीधारक अशा विविध स्तरातील नागरिकांच्या मागण्यांबाबत सरकारला जाग आणण्यासाठी मोर्चा काढण्यात येणार होता. अनंत चतुदर्शीमुळे हा मोर्चा १ ऑक्टोबरला काढण्याची मागणी कार्यकर्त्यांकडून झाली. त्यानुसार शुक्रवारी जिल्हा कार्यालयात झालेल्या मेळाव्यात मुश्रीफ यांनी नवीन तारीख जाहीर केली. दसरा चौकातून सकाळी अकरा वाजता मोर्चाला प्रारंभ होणार असून जिल्हाधिकारी कार्यालयात निवेदन देऊन मोर्चा समाप्त करण्यात येईल.

यावेळी मुश्रीफ यांनी बांधकाम कामगार व त्यांच्या कुटुंबियांसाठी काँग्रेस, राष्ट्रवादी आघाडी सरकारने राबवलेल्या विविध योजना नव्या सरकारने बंद केल्या आहेत. ३८०० कोटी रुपये बांधकाम कामगार कल्याण मंडळामध्ये पडून आहेत. त्यावरील व्याजही खर्च होत नाही. त्यामुळे पूर्वीच्या योजना त्वरीत सुरु कराव्यात, अशा मागणींसाठी सरकारला जाग आणण्यासाठी मोर्चा काढण्याचे नियोजन केले असल्याचे सांगितले. खासदार धनंजय महाडिक म्हणाले, 'हे उद्योजकांचे, कार्पोरेटवाल्यांचे सरकार आहे. सामान्यांचे सरकार असल्याचा केवळ आव आणत आहेत.' जिल्हाध्यक्ष ए. वाय. पाटील यांनी सरकारचा निषेध करण्यासाठी या मोर्चाचे आयोजन केल्याचे सांगितले. यावेळी शहर अध्यक्ष राजेश लाटकर, प्रताप माने, कृष्णात पाटील यांची भाषणे झाली. सरचिटणीस अनिल साळोखे यांनी स्वागत व प्रास्ताविक केले. प्रदीप पाटील यांनी आभार मानले.

मोबाइल अॅप डाउनलोड करा आणि राहा अपडेट

‘विखे पिता-पुत्रांना भाजपची सुपारी’

September 18, 2015, 1:53 pm

≫ Next: काळम्मावाडी की दूधगंगा ?

≪ Previous: मोर्चा काढूच; आम्हाला रोखून दाखवाच

$

0

0

म. टा. प्रतिनिधी, कोल्हापूर

'सध्या राज्यात अनेक प्रश्न असताना बाळासाहेब विखे पाटील व राधाकृष्ण विखे पाटील हे पिता-पुत्र शरद पवारांवर टीका करत आहेत. त्यासाठी त्यांना भाजपने सुपारीच नव्हे तर केंद्र व राज्यात मंत्रिपदाचे आमिषही दिले असावे. मुखदुर्बल असलेल्या राधाकृष्ण विखे पाटील यांनी विरोधी पक्ष नेतेपद सोडावे व दोघांनीही भाजपचे मंत्रिपद स्वीकारून आमच्यावर उपकार करावेत,' असा उपरोधिक टोला आमदार हसन मुश्रीफ यांनी केली.

विखे पिता-पुत्रांनी गेल्या काही दिवसांपासून पवारांवर टीका केली. त्या पार्श्वभूमीवर शुक्रवारी बांधकाम कामगारांच्या मागण्यांबाबत कार्यकर्त्यांच्या मेळाव्यात मुश्रीफ यांनी त्यांचा खरपूस समाचार घेतला.

राज्यात सध्या दुष्काळ, दाभोलकर व पानसरे हत्या, उसाची एफआरपी, कायदा सुव्यवस्था, वाढती महागाई असे अनेक सामान्यांचे प्रश्न शिगेला पोहचले असताना विखे पाटील पिता-पुत्रांची जीभ मात्र शरद पवारांवर बोलण्यासाठी वळवळत आहे, असे मुश्रीफ म्हणाले.

दादा बॅटरी घेऊन शोधताहेत

राष्ट्रवादीच्या ताब्यात असलेल्या जिल्हा बँकेतील चौकशीनंतर आता सहकार मंत्री चंद्रकांत पाटील यांनी राज्य बँकेची चौकशी चालवली आहे. पण मी तसा सापडणारा नाही. त्यामुळे चंद्रकांत पाटील हे आता बॅटरी घेऊन मी कोठे सापडतो का हे शोधत आहेत.

मोबाइल अॅप डाउनलोड करा आणि राहा अपडेट

काळम्मावाडी की दूधगंगा ?

September 18, 2015, 1:54 pm

≫ Next: फक्त सायलेन्स...अॅक्शन नाहीच

≪ Previous: ‘विखे पिता-पुत्रांना भाजपची सुपारी’

$

0

0

म. टा. वृत्तसेवा, इचलकरंजी

शहरासाठी काळम्मावाडी धरणातून थेटपाइप लाइनने पाणी आणायचे की दूधगंगा नदीतून यावरुन शुक्रवारी झालेल्या पालिकेच्या सभेत सुमारे तासभर वादळी चर्चा झाली. एकमेकांवर आरोप प्रत्यारोपाच्या फैरी झाडल्यानंतर अखेरी प्रभारी मुख्याधिकारी प्रज्ञा पोतदार यांनी काळम्मावाडीसाठी सरकारकडे पाठपुरावा सुरुच आहे. मात्र अमृत सिटी योजनेतून कमी खर्चाची पर्यायी म्हणून दूधगंगा नदीतून पाणी पुरवठा योजनेचा प्रस्ताव ठेवला आहे, असा खुलासा केला.

यावेळी पालिकेच्या दुसऱ्या मजल्यावरील नुतन सभागृहास विश्वरत्न डॉ. बाबासाहेब आंबेडकर यांचे नांव देण्याचा ठराव एकमताने मंजूर करण्यात आला. तर अन्य विषयांवर फारशी चर्चा न होता मंजूरी देण्यात आली. विविध २० विषयांवर चर्चा करुन निर्णय घेण्यासाठी नगराध्यक्षा शुभांगी बिरंजे यांनी शुक्रवारी सर्वसाधारण सभेचे आयोजन केले होते. आजच्या सभेत बहुतांशी नगरसेवकांनी प्रशासनावर आपला संताप व्यक्त केला. कामकाजाला प्रारंभ होताच काँग्रेसचे नगरसेवक शशांक बावचकर यांनी शहराला मुबलक आणि शुद्ध पाणी पुरवठ्यासाठी काळम्मावाडी योजना राबवण्याचा निर्णय सर्वानुमते झाला आहे. हा प्रस्ताव शासन दरबारी प्रलंबित असताना कोणाच्या सांगण्यावरुन दूधगंगा योजनेचा प्रस्ताव मांडण्याचा निर्णय घेण्यात आला असा सवाल उपस्थित करीत प्रभारी मुख्याधिकारी पोतदार यांना चांगलेच धारेवर धरले.

आमदार हाळवणकर यांच्या काळम्मावाडीच्या भीष्मप्रतिज्ञेचे काय झाले? असाही सवाल केला. त्यावर प्रभारी मुख्याधिकारी प्रज्ञा पोतदार यांनी काळम्मावाडी आणि दुधगंगा अशा दोन्ही योजनांचा प्रस्ताव तयार केला आहे. काळम्मावाडी योजना ही अत्यंत खर्चिक असल्याने अल्प खर्चाची पर्यायी योजना म्हणून दूधगंगा नदीचा प्रस्ताव सरकारसमोर मांडल्याचे सांगितले. याचवेळी शहर विकास आघाडीचे पक्षप्रतोद अजितमामा जाधव यांनी पाण्याच्या विषयात राजकारण नको असे वक्तव्य केल्याने काँग्रेस-राष्ट्रवादीच्या सदस्यांनी काळम्मावाडीचे पाणी मिळालेच पाहिजे, अशी घोषणाबाजी सुरू केली. त्यातूनच सत्ताधारी आणि विरोधकांत शाब्द‌िक वाद सुरू झाल्याने गोंधळ उडाला. सुमारे तासभराच्या चर्चेनंतर माजी आमदार अशोकराव जांभळे यांनी काळम्मावाडी योजनेचे पाणी शहरवासियांना मिळालेच पाहिजे. .

पालिकेच्या दुसऱ्या मजल्यावर बांधण्यात येत असलेल्या सभागृहाला विश्वरत्न डॉ. बाबासाहेब आंबेडकर असे नाव देण्याचा विषय होता. त्यामुळे पालिकेत आज विविध संघटनेच्या कार्यकर्त्यांनी चांगलीच गर्दी केली होती. यावेळी जोरदार घोषणाबाजी सुरु होती. त्यामुळे सभागृहाने सुरुवातीलाच हा विषय घेऊन त्याला सर्वानुमते मंजूरी दिली. हा निर्णय समजताच उपस्थित कार्यकर्त्यांनी फटाक्यांची आतषबाजी करून जल्लोष साजरा केला. सभागृहाचे नामकरण करण्याचा ठराव सर्वानुमते मंजूर झाल्यानंतर त्याला सर्वांनी केलेल्या सहकार्याबद्दल पाणी पुरवठा सभापती रवी रजपुते यांनी सर्वांचे आभार मानले. पालिकेच्या राजर्षी शाहू हायस्कूलकडील दोन्ही शिक्षकांना जिल्हा परिषदेकडे परत पाठविण्याचा निर्णय घेण्यात आला. ज्येष्ठ नगरसेवक भीमराव अतिग्रे यांनी सभागृहात वारंवार गोंधळ होत असल्याने सीसीटीव्ही बसवण्याची मागणी केली. तसेच स्वच्छतेच्या कामाचा वारंवार बोजवारा उडत असल्याने काम बंद करणाऱ्या मक्तेदारांची नावे ब्लॅकलिस्टमध्ये घालण्याच्या विषयावर चर्चा करून तीन दिवसात सुधारणा न झाल्यास कार्यवाही करण्याचा निर्णय घेण्यात आला. यावेळी चर्चेत काँग्रेसचे पक्षप्रतोद सुनिल पाटील, राष्ट्रवादीचे रवींद्र माने, नगरसेवक अशोकराव जांभळे, बाळासाहेब कलागते, संजय कांबळे, संभाजी काटकर, महादेव गौड, सयाजी चव्हाण, विठ्ठल चोपडे आदींनी सहभाग घेतला.

मोबाइल अॅप डाउनलोड करा आणि राहा अपडेट

फक्त सायलेन्स...अॅक्शन नाहीच

September 18, 2015, 1:56 pm

≫ Next: पाणी पुरवठा-ड्रेनेजसाठी ४०३ कोटींचा प्रस्ताव

≪ Previous: काळम्मावाडी की दूधगंगा ?

$

0

0

चित्रनगरीच्या बैठकीला मिळेना मुहूर्त

Anuradha.kadam@timesgroup.com

कोल्हापूर ः कोल्हापूर चित्रनगरी येत्या तीन वर्षांत उभी रहावी यासाठी राज्याच्या सांस्कृतिक मंत्रालयातर्फे पुढाकार घेण्याच्यादृष्टिने केलेल्या बैठकीच्या निर्णयाला अद्याप मुहूर्त मिळालेला नाही. ३ सप्टेंबर रोजी कोल्हापुरात अनंत माने चित्रपट महोत्सवाच्या व्यासपीठावर चित्रनगरीबाबत १० सप्टेंबर रोजी बैठक घेण्याचे जिल्ह्याचे पालकमंत्री चंद्रकांत पाटील यांनी घोषित केले होते. या वक्तव्याला राज्य सांस्कृतिक रंगभूमी साहित्य चित्रपट विकास महामंडळाचे व्यवस्थापकीय संचालक विलास पाटील आणि चित्रपट महामंडळाचे अध्यक्ष विजय पाटकर यांनीही दुजोरा दिला होता. मात्र १५ दिवसांनंतरही बैठकीबाबत शून्य ​नियोजन आहे.

तीन वर्षांनी कोल्हापूर चित्रपट व्यवसायाची शताब्दीपूर्ती आहे. दिग्दर्शक कै. अनंत माने, भालजी पेंढारकर, बाबुराव पेंटर, आनंदराव पेंटर या कलावंतांनी चित्रनगरीचे स्वप्न पाहिले. किमान या शताब्दीवर्षाच्या मुहूर्तावर तरी कोल्हापूर चित्रनगरीचे पांग फिटणार का? असा सवाल उपस्थित होत आहे. ७५ एकराच्या विस्तीर्ण जागेवर चित्रनगरीचा प्रस्ताव आहे. १७ कोटींचा निधी हातात आहे तर अन्य पाच कोटींची तरतूद झाली आहे. मात्र वीज, पाणी, सुरक्षा या मुलभूत सुविधांअभावी चित्रनगरीच्या अंतरंगाला मोठी अवकळा आली आहे.

चित्रनगरीची स्थापना झाली तेव्हा अवघ्या सहा महिन्यांत प्रकल्प पूर्ण करण्याची घोषणा झाली होती. मात्र तीन दशकांनंतरही चित्रनगरी जैसे थे आहे. प्रकल्प शासनस्तरावर राबवायचा की 'बांधा, वापरा आणि हस्तांतरीत करा' अशा तत्त्वावर उभारणीसाठी द्यायचा याबाबत 'कधी तळ्यात तर कधी मळ्यात' अशा भूमिकेने विकास रखडला गेला. या पार्श्वभूमीवर कोल्हापुरात १५ दिवसांपूर्वी अनंत माने चित्रपट महोत्सवाच्यानिमित्ताने चित्रनगरीच्या विषयाला वाचा फुटली होती.

सांस्कृतिक मंत्री विनोद तावडे यांच्यासोबत चित्रनगरी विकासाबाबत ठोस आराखडा निश्चित करण्यासाठी बैठक घेण्यात येणार असल्याचेही चंद्रकांत पाटील यांनी स्पष्ट केले होते.

३१ वर्षांची प्रतीक्षा

१९८४ साली कोल्हापूर चित्रनगरीची पहिली कुदळ मारली गेली. भूमीपूजनाने चित्रनगरीचा पाया रचला. मात्र गेल्या तीन दशकांत राजकीय इच्छाशक्तीच्या दुष्काळात चित्रनगरीचा माळ अधिकच ओसाड झाला आहे. गेल्या दहा वर्षांत सात मंत्र्यांनी कोल्हापूर दौऱ्यात चित्रनगरी उभी राहील, अशा घोषणांचे वारे सोडले. मात्र सिनेमानिर्मितीची वास्तू म्हणून आकाराला येण्याच्या प्रतीक्षेत असलेली चित्रनगरी दुर्लक्षपणाचा कळस ठरली आहे.

चित्रनगरीच्या जागेवर चित्रीकरणासाठी आवश्यक सुविधा उभारणे महत्त्वाचे आहे. त्यादृष्टिने या बैठकीचे नियोजन केले जाणार आहे. गेल्या १५ दिवसात बैठकीसाठी मंत्री, अधिकारी यांची वेळ जुळून न आल्याने बैठक पुढे ढकलावी लागली आहे. गणेशोत्सवानंतर चित्रनगरीबाबत बैठक होईल.

- विजय पाटकर, अध्यक्ष,अखिल भारतीय ​मराठी चित्रपट महामंडळ

मोबाइल अॅप डाउनलोड करा आणि राहा अपडेट

पाणी पुरवठा-ड्रेनेजसाठी ४०३ कोटींचा प्रस्ताव

September 18, 2015, 1:57 pm

≫ Next: व्हाईस रेकॉर्ड गुजरातबाहेर द्या

≪ Previous: फक्त सायलेन्स...अॅक्शन नाहीच

$

0

0

म. टा. प्रतिनिधी, कोल्हापूर

पाणीपुरवठा सुरळीत करण्यासाठी शहरांतर्गत जलवाहिन्या बदलणे आणि शहरातील विविध भागात ड्रेनेज लाइन टाकण्यासाठी महापालिकेने तब्बल ४०३ कोटी रुपयांचा प्रस्ताव केंद्र आणि राज्य सरकारकडे सादर केला. अमृत योजनेंतर्गत या कामासाठी निधी उपलब्ध होणार आहे. यामध्ये केंद्र सरकार ५० टक्के, राज्य सरकार २५ आणि महापालिकेचा २५ टक्केचा वाटा असणार आहे.

मुंबईत शुक्रवारी केंद्र आणि राज्याच्या नगर विकास विभागाच्या अधिकाऱ्यांच्या उपस्थितीत ही बैठक झाली. राज्यातील विविध महापालिका व नगरपालिकांतर्फे प्रस्ताव सादर करण्यात आले असून, या प्रस्तावांची तपासणी करून मंजुरीच्या प्रक्रियेसाठी केंद्राकडे पाठविले जाणार आहे. 'कोल्हापूर शहराचा विस्तार वाढत आहे. उपनगरे,कॉलन्यांची संख्या वाढली आहे. शहरातील अनेक भागात ड्रेनेज लाइन टाकली नाही. शहरातील बारा नाले थेट पंचगंगा नदीत मिसळतात.

त्यातील सांडपाण्यावर कसल्याही प्रकारची प्रक्रिया केली जात नाही. बारा नाले अडविणे आणि त्यातील सांडपाणी एसटीपी प्रकल्पाकडे वळवणे यासह शहरातील ज्या भागात ड्रेनेज लाइन नाही तेथे ड्रेनेज लाइन टाकण्याचे प्रस्तावित आहे. शहर आणि उपनगरातील विविध भागात मिळून ४०० किलोमीटर लांबीची ड्रेनेज लाइन टाकण्याचे प्रस्ताव आहे. या संदर्भातील २४० कोटींचा प्रस्ताव शुक्रवारी सादर केल्याची माहिती महापालिकेचे जल अभियंता मनीष पवार यांनी दिली.

पाइपलाइनसाठी १६३ कोटींचा प्रस्ताव

शहरातील पिण्याची पाइपलाइन बदलणे, शहरात पाच ठिकाणी पाण्याच्या टाकी बांधणे यासंदर्भात १६३ कोटी रुपयांचा प्रस्ताव यावेळी सादर करण्यात आला. पाणीपुरवठा सुरळीत करण्यासाठी २०० किलोमीटरची पाइपलाइन टाकली जाणार आहे. शहरातील पिण्याच्या पाइपलाइन खराब झाल्या आहेत. परिणामी गळतीचे प्रमाण वाढले आहे. त्याचा पाणीपुरवठ्यावर परिणाम होत आहे. अमृत योजनेंतर्गत निधी मिळवण्यासाठी महापालिका प्रयत्नशील आहे. मुंबईतील बैठकीला उपायुक्त विजय खोराटे, ड्रेनेज विभागाचे उप जल अभियंता सुरेश कुलकर्णी उपस्थित होते.

मोबाइल अॅप डाउनलोड करा आणि राहा अपडेट

---

व्हाईस रेकॉर्ड गुजरातबाहेर द्या

September 18, 2015, 1:59 pm

≫ Next: 'सनातन'ला देशद्रोही ठरवा

≪ Previous: पाणी पुरवठा-ड्रेनेजसाठी ४०३ कोटींचा प्रस्ताव

$

0

0

आमदार हसन मुश्रीफ यांची मागणी

म. टा. प्रतिनिधी, कोल्हापूर

'ज्येष्ठ कामगार नेते कॉ. गोविंद पानसरे यांचा संशयित मारेकरी सनातन संस्थेशी संबंधित असल्याने 'सनातन' संस्थेला दहशतवादी म्हणून घोषित करावे. तसेच अशा खटल्यांमध्ये गुजरात बदनाम असल्याने व्हाईस रेकॉर्ड गुजरातमधील फॉरेन्सिक लॅबऐवजी अन्य राज्यात तपासणीला पाठवावे,' अशी मागणी राष्ट्रवादीचे नेते आमदार हसन मुश्रीफ यांनी शुक्रवारी केली. राष्ट्रवादी काँग्रेसच्या जिल्हा कार्यालयात झालेल्या कार्यकर्त्यांच्या मेळाव्यात ते बोलत होते.

मुश्रीफ म्हणाले, 'गुजरातमधील फॉरेन्सिक लॅबला संशयिताचे व्हाईस रेकॉर्ड पाठवण्यात येणार आहे. पण गुजरात अशा प्रकरणांमध्ये बदनाम असून त्याऐवजी अन्य राज्यामध्ये तपासणीला पाठवण्यात यावा. तसेच संशयिताला अटक केल्यानंतर ज्या बातम्या येत आहेत, त्यातून संभ्रम निर्माण होत आहे. यातून या प्रकरणाचा तपास व्यवस्थित होईल का? मास्टरमाईंड सापडणार का? कोणाचा दबाव येईल का? अशी शंका येत आहे. २४ जुलैला आरोपी सापडले आहेत. पण नाव जाहीर करू देत नाहीत असे एसआयटीमधीलच एका अधिकाऱ्याने सांगितले असल्याचे मी सांगितले होते. त्यामुळे पुढील तपास निरपेक्ष पद्धतीने होऊन शंकांना वाव राहू नये यासाठी एसआयटीच्या तपासामध्ये पानसरे यांच्या कुटुंबियांचा एक विश्वासू अधिकारी सहभागी करुन घ्यावा.'

मुश्रीफ पुढे म्हणाले, 'मारेकरी सापडला असूनही केवळ मुख्यमंत्री जपानमध्ये आहेत म्हणून कारवाई थांबवली. मुख्यमंत्री म्हणतात म्हणून काहीही होणार का? मालेगाव प्रकरणापासून आतापर्यंत सनातन संस्थेवर बंदी घालण्याबाबतची मागणी होत असून त्यादृष्टीने केंद्र व राज्य सरकारने विचार करावा. पण तत्पूर्वी सनातन संस्थेला दहशतवादी म्हणून घोषित करावे.' राष्ट्रवादीचे जिल्हाध्यक्ष ए. वाय. पाटील यांनी संशयित आरोपी समीर गायकवाड हा सनातन प्रभात संस्थेशी संबंधित असल्याचे स्पष्ट झाल्यानंतर संस्थेवर बंदी घालावी अशी मागणी केली जात आहे. पण मुख्यमंत्री काही प्रतिक्रिया व्यक्त करत नाहीत. सरकारचे काम अशाच पद्धतीने सुरू असल्याचे सांगत सरकारचा निषेध केला. सरकारच्या दुर्लक्षामुळेच या प्रकरणाच्या तपासाला वेळ लागला आहे. आता तरी तपास गतीने व्हावा.

मोबाइल अॅप डाउनलोड करा आणि राहा अपडेट

'सनातन'ला देशद्रोही ठरवा

September 18, 2015, 2:00 pm

≫ Next: रंगला राजकीय आखाडा

≪ Previous: व्हाईस रेकॉर्ड गुजरातबाहेर द्या

$

0

0

कॉ. पानसरे संघर्ष समितीची मागणी

म. टा. प्रतिनिधी, कोल्हापूर

कॉम्रेड गोविंद पानसरे यांच्या हत्येमागे सनातन संस्थेचा हात असल्याचे पुरावे संशयित आरोपी समीर गायकवाडच्या निमित्ताने मिळत आहेत, त्यामुळे सनातन संस्थेला देशद्रोही जाहीर करून संस्थेवर बंदी घालण्याची आणि मोका लावण्याची मागणी शहीद कॉम्रेड गोविंद पानसरे समता संघर्ष समितीने केली आहे.

पानसरे हत्येमागे सनातनचा पूर्णवेळ कार्यकर्ता समीर गायकवाड प्रमुख संशयित असल्याने पोलिस अधिकारी त्याची कसून चौकशी करीत आहेत. त्याच्या चौकशीतून अनेक धक्कादायक खुलासे समोर येण्याची शक्यता पोलिसांकडून वर्तवली जात आहे, त्याचबरोबर या तपासात सनातन संस्थाही संशयाच्या केंद्रबिंदूवर असल्याने सनातनविरोधात पुरोगामी संघटनांनी आवाज उठवला आहे. यापूर्वी मुंबई, मालेगाव आणि गोव्यात झालेल्या बॉम्बस्फोटांमध्येही सनातच्या सहभागाची चर्चा होती. आता कॉम्रेड पानसरेंच्या हत्येतील प्रमुख संशयित थेट सनातनचा कार्यकर्ताच असल्याने सनातनवर कारवाई करावी, अशी मागणी जोर धरू लागली आहे.

समता संघर्ष समितीने जिल्हाधिकारी डॉ. अमित सैनी यांची भेट घेऊन आठ मागण्यांचे निवेदन दिले आहे. २० सप्टेंबरपासून जिल्हाभर सह्यांची मोहीम राबवण्यात येणार असल्याचे संघर्ष समितीच्या कार्यकर्त्यांनी सांगितले आहे. दरम्यान, गायकवाडचे वकीलपत्र घेणार नसल्याचे कोल्हापूर बार असोसिएशनने जाहीर केले आहे. जिल्हाधिकाऱ्यांना निवेदन देतेवेळी स्मिता पानसरे-सातपुते, रघुनाथ कांबळे, कॉ. चंद्रकांत यादव, सतीशचंद्र कांबळे, नामनदेव गावडे, आदी उपस्थित होते.

दरम्यान, आज विरोधी पक्षनेते राधाकृष्ण विखे-पाटील पानसरे कुटुंबियांची भेट घेणार आहेत. हिंदुत्ववादी संस्थांवर याआधीच अनेकांनी संशय व्यक्त केल्याने सनातन संस्थेवरील कारवाईची मागणी अधिकच जोर धरु लागली आहे.

'सनातन संस्थेवर व्यक्त केलेली शंका खरी ठरली आहे. मात्र, दुर्दैवाने पुढे येणाऱ्या संशयितांचे धड वेगळे आणि डोकी वेगळी आहेत. सनातनी डोक्यांची चौकशी झाली पाहिजे. सनातनींकडून बहुजनांचा वापर होत आहे. सनातन संस्थेची आणि सरकारची विचारधारा एकच असल्याने मुख्यमंत्र्यांच्या मौनाचे आश्चर्य वाटत नाही.'

- स्मिता पानसरे-सातपुते

मोबाइल अॅप डाउनलोड करा आणि राहा अपडेट

रंगला राजकीय आखाडा

September 18, 2015, 2:01 pm

≫ Next: साठ उमेदवारांची यादी तयार

≪ Previous: 'सनातन'ला देशद्रोही ठरवा

$

0

0

म. टा. प्रतिनिधी, कोल्हापूर

महापालिका निवडणुकीच्या तोंडावर काँग्रेस, राष्ट्रवादी, शिवसेना, भाजप, स्वाभिमानी शेतकरी संघटना या सर्वच पक्षांच्या नेत्यांनी राजकीय टोलेबाजी करत शिवाजी चौक महागणपतीसमोर राजकीय आखाडा रंगवला. महागणपतीसमोर आमचीच सत्ता येऊ दे असे साकडे घालत महागणपतीला धर्मसंकटात टाकले. तर पालकमंत्र्यांनी हसन मुश्रीफ यांच्यावर टीकेची झोड उठवताना आडवे येणाऱ्यांना आडवे करू, असा इशारा दिला.

शिवाजी चौक तरुण मंडळाचा महागणपती खुला होत असताना दरवर्षी राजकीय भाषणबाजी रंगत असते. यावर्षी तर महापालिका निवडणूक असल्याने विविध पक्षाचे नेते एका व्यासपीठावर काय बोलणार याची प्रचंड उत्सुकता होती. भाजपचे जिल्हाध्यक्ष महेश जाधव यांनी महापालिकेतील भ्रष्टाचार दूर व्हावा यासाठी योग्य नगरसेवक निवडून देण्यासाठी महागणपतीसमोर साकडे घातले. त्यानंतर आमदार नरके यांनी दुष्काळ दूर करण्याचे साकडे घातले. कोणाला यश द्यायचे हे गणपतीने ठरवले आहे असे म्हणत आमदार क्षीरसागर यांनी शहराची दुरवस्था दूर होईल अशा लोकांच्या हातात सत्ता दे, असे मांडले. खासदार महाडिक यांनी, या गणपतीमुळेच एका घरात दोन आमदार, एक खासदार असे घवघवीत यश मिळाले. महादेव व गणपती पाठीशी असल्याने मला चिंता नाही असे म्हणताना नंदकुमार वळंजू कुठूनही उभे राहू देत, त्यांना नगरसेवक कर असे साकडे घातले.

पालकमंत्री चंद्रकांत पाटील म्हणाले, काही नेत्यांनी मोदक पळवून नेले. मुंगी होऊन साखर खात बसण्यापेक्षा ते फारच फुरफुरत आहेत. त्यामुळे बँकेची थांबलेली चौकशी मी लावली. आता त्यांच्या पोटात गोळा आला आहे. आमच्या आडवे जे येतील त्याला आम्ही आडवे करु असा इशाराही मुश्रीफांना दिला. कोल्हापूरचा चेहरामोहरा बदलण्यासाठी आम्हाला यश दे असे साकडे घालताना ज्यांची ताटातील ओरबाडून खाण्याची वृत्ती आहे. त्यांना बाजूला ठेव, समाधानी माणसांनाच निवडून दे अशी मागणीही केली.

मंडळाचे अध्यक्ष नंदकुमार वळंजू यांनी स्वागत केले. दुष्काळग्रस्तांना एक लाख रुपये देण्याची घोषणा वळंजू यांनी केली. गणेश आगमनावेळी मोफत सेवा देणाऱ्या रिक्षाचालक आरिफखान पठाण याचा सत्कार करण्यात आला.

मी भोळा महादेव

आमदार महादेवराव महाडिक यांनी महागणपतीने मला बरेच दिले आहे. यापेक्षा काही जादा मागण्याची गरज नाही, असे सांगताना सतेज पाटील यांच्यावर टीका केली. त्यांचा शेवटचा ​तिसरा अंक आता सुरू झाला आहे. महाडिक जादूगार नाही. ज्योतिष्यीही नाही. पण बावड्यात आता भगवी वस्त्रे परिधान करून येणाऱ्यांची संख्या वाढली आहे. बावड्यात म्हणे आता खड्डाही खोदला आहे. पण मला खड्ड्यात घालणारा अजूनही जन्माला यायचा आहे. हा खड्डा ज्यांनी खोदला आहे, त्यांच्यासाठीच तो आहे, असा टोला मारत त्यांनी जनतेची माफी मागावी. मी भोळा महादेव आहे. अगरबत्तीने मी प्रसन्न होतो, असे सांगताच उपस्थितांमध्ये हशा पिकला.

भांडू नका, मोदक तिसरीकडे जाईल

आमदार क्षीरसागर यांनी महागणपतीची मूर्ती देण्याची घोषणा केली, तर नरके यांनी महागणपतीला सव्वा किलो चांदीचा हार अर्पण केला. या दोघांनीही आगामी मंत्रिमंडळ विस्तार डोळ्यासमोर ठेवून महागणपतीला साकडे घातल्याचे पालकमंत्री पाटील व आमदार महाडिक यांनी सांगताना दोघेही भांडू नका, मोदक तिसऱ्याकडे जाईल, असा टोला दिला.

मोबाइल अॅप डाउनलोड करा आणि राहा अपडेट

साठ उमेदवारांची यादी तयार

September 18, 2015, 2:02 pm

≫ Next: सोडला घराणेशाहीचा वसा

≪ Previous: रंगला राजकीय आखाडा

$

0

0

अनंत चतुर्दशीला यादी जाहीर होणार

म. टा. प्रतिनिधी, कोल्हापूर

महानगरपालिका निवडणुकीच्या उमेदवारीसाठी इच्छुकांकडून अर्ज मागवण्यापासून मुलाखती घेण्यापर्यंत सर्वच प्रक्रियेत आघाडी घेणाऱ्या राष्ट्रवादी काँग्रेस व जनसुराज्य शक्ती पक्षाने उमेदवारांची यादी तयार करण्यातही आघाडी घेतली आहे. ८१ पैकी ६० उमेदवारांची यादी तयार असून अनंत चतुदर्शीनंतर जाहीर करण्यात येईल, असे राष्ट्रवादीचे नेते आमदार हसन मुश्रीफ यांनी सांगितले.

राष्ट्रवादी काँग्रेसने ३ आणि ४ सप्टेंबरला इच्छुकांच्या मुलाखती घेतल्या होत्या. त्यासाठी विविध प्रभागातील ३५० हून अधिक इच्छुकांच्या मुलाखती घेण्यात आल्या. यामध्ये २५ नगरसेवक व त्यांचे कुटुंबिय तर दहा माजी नगरसेवकांचा समावेश होता. राष्ट्रवादीच्या २५ विद्यमान नगरसेवकांपैकी २३ जणांनी मुलाखती दिल्या आहेत. तर जनसुराज्य अपक्ष आघाडीच्या १० पैकी ७ नगरसेवक परत या आघाडीतून लढण्यास इच्छूक आहेत. तसेच १० माजी नगरसेवकांनी व त्यांच्या कुटुबियांनी मागणी केली आहेत. त्यानंतर मुश्रीफ यांनी गणेश चतुर्थीपूर्वी पक्षाच्या उमेदवारांची यादी जाहीर केली जाईल असे सांगितले होते. पण अन्य पक्षांनी मुलाखती घेतल्या तरी त्यांची उमेदवार यादी अजून जाहीर करण्याची काही चिन्हे नसल्याने राष्ट्रवादीनेही उमेदवार यादी जाहीर करण्याची वेळ पुढे ढकलण्यास सुरुवात केली आहे. शुक्रवारी याबाबत मुश्रीफ यांनाच छेडले असता सध्या ८१ प्रभागांपैकी ६० प्रभागातील उमेदवारांची नावे निश्चित करण्यात आली आहेत. त्यांची यादी अनंत चतुदर्शीनंतर जाहीर केली जाईल, असे सांगितले. उमेदवारांची नावे निश्चित असली तरी इतर पक्षांनी नावे जाहीर केलेली नाहीत. त्यामुळे राष्ट्रवादीची नावे जाहीर केल्यानंतर नाराज इतरांकडे जाऊ नयेत यासाठी ही दक्षता घेतली जात आहे. पण या गणेशोत्सवाच्या कालावधीत ज्या प्रभागात निवडलेल्या उमेदवाराव्यतिरिक्त इतर प्रबळ इच्छूक नसतील. तेथील ​उमेदवाराचे नाव त्याला सांगितले जाण्याची शक्यता आहे.

राष्ट्रवादी काँग्रेसने उत्सवाच्या निमित्ताने आपल्या उर्वरीत कार्यकर्त्यांनाही सक्रीय केले आहे. उत्सवाच्या माध्यमातून जेथे अडचणी आहेत, अशा प्रभागातील कार्यकर्त्यांतील उमेदवारी तपासली जात आहे. ज्या ठिकाणी वाद आहेत किंवा कोणाला उमेदवारी द्यायची याबाबतच्या अडचणी आहेत, अशा ठिकाणचा निर्णय येत्या काही दिवसांत घेतला जाईल. असे नियोजन राष्ट्रवादीने केल्याचे सूत्रांनी सांगितले.

मोबाइल अॅप डाउनलोड करा आणि राहा अपडेट

सोडला घराणेशाहीचा वसा

September 18, 2015, 2:03 pm

≫ Next: एक ऑगस्टची मतदार यादीच अंतिम

≪ Previous: साठ उमेदवारांची यादी तयार

$

0

0

Appasaheb.Mali@timesgroup.com

तिकीट नाकारले म्हणून दुसऱ्या पक्षाची वाट धरणारे कमी नाहीत. प्रभाग फेररचनेमुळे हक्काचा मतदारसंघ संपुष्टात आल्यामुळे दुसऱ्या प्रभागात शिरकाव करण्याचाही काही जणांचा प्रयत्नही दिसून येत आहे. आरक्षणामुळे स्वत:ची उमेदवारी हुकल्यामुळे पत्नी किंवा कुटुंबीयांतील अन्य सदस्यांच्या तिकिटासाठी अनेकांची धावपळ सुरू आहे. 'मी आणि माझ्यानंतर कुटुंब' एवढ्यापुरतेच सत्तेची गणित आखण्याचे खेळ जोरात सुरू असताना यंदाच्या निवडणुकीत काही नगरसेवकांनी माघार घेतली आहे. कुणी पक्षाचा आदेश मानून तर कुणी नेत्यांच्या शब्दाला मान ठेवत निवडणूक लढविणार नाहीत. यामध्ये महापौर, माजी उपमहापौर, नगरसेवकांचा माजी लोकप्रतिनिधींचा समावेश आहे.

महापौर वैशाली डकरे, परिवहन समिती सभापती अजित पोवार-धामोडकर, माजी उपमहापौर मोहन गोंजारे, नगरसेवक जहाँगीर पंडत, दिलीप भुर्के आदींचा यात समावेश आहे. हे सगळे नगरसेवक काँग्रेसचे आहेत. अपक्ष नगरसेवक निशिकांत मेथे यांनी प्रभागाचे आरक्षण बदलल्यामुळे इतरत्र शिरकाव न करता निवडणुकीपासून लांब राहणेच पसंत केले आहे. महापौर डकरे सध्या शाहू मार्केट यार्ड प्रभाग येथून प्रतिनिधीत्व करतात. प्रभाग रचनेत हा प्रभाग मार्केट यार्ड आणि महाडिक वसाहत प्रभागात विखुरला. हे दोन्ही प्रभाग सर्वसाधारण महिलासाठी असून डकरे यांना या भागातून लढण्याची संधी होती. मात्र त्यांनी यंदा निवडणूक नाही असे ठरविले आहे.

कॉमर्स कॉलेज प्रभागाचे नगरसेवक जहाँगीर पंडत गेल्या वेळेला अनुसूचित जाती प्रवर्गातून निवडून आले होते. यंदा हा प्रभाग सर्वसाधारण महिला प्रवर्गासाठी आहे. 'गेल्या निवडणुकीत ज्यांनी मदत केली, त्यांना यंदा निवडणुकीत मदत करणार आहे. प्रभाग सर्वसाधारण प्रवर्गासाठी असला तरी अन्य लोकांनाही संधी मिळाली पाहिजे. हा विचार करून निवडणूक न लढविण्याचा निर्णय घेतला आहे. यंदा निलोफर आजगेकर यांना पाठिंबा​ दिल्याचे पंडत यांनी सांगितले.

माजी उपमहापौर आणि नगरसेवक मोहन गोंजारे ​हे विक्रमनगर येथून निवडून आले आहेत. यंदा या प्रभागातील काही भाग शिवाजी विद्यापीठ प्रभागात समाविष्ट झाला आहे. शिवाजी विद्यापीठ प्रभाग सर्वसाधारण प्रवर्गासाठी असून येथून गोंजारे यांनी निवडणूक लढविण्याचे ठरविले होते. या प्रभागात काँग्रेस पक्षाकडून प्रविण केसरकर हा कार्यकर्ता निवडणूक लढविणार आहे. दुसऱ्या कार्यकर्त्यांना संधी देण्याचा निर्णय नेत्यांनी घेतला. नेत्यांच्या शब्दाला मान देत गोंजारे यांनी निवडणूक न लढविण्याचे ठरविले.

परिवहन समिती सभापती अजित पोवार-धामोडकर हे सध्या प्रतिनिधीत्व करत असलेला प्रभाग क्रमांक तीनवर ओबीसी महिला आरक्षण पडले. या मतदारसंघा शेजारील कसबा बावडा पॅव्हेलियन प्रभाग सर्वसाधारण महिला प्रवर्गासाठी आहे. या प्रभागात पोवार यांचा स्टुडिओ आहे. संपर्क आहे, पै-पाहुणे आहेत. पण दुसऱ्या कार्यकर्त्यांना संधी मिळाली पाहिजे आणि नेत्यांना अडचणीत आणणारी कृती करायची नाही या उद्देशाने आपण निवडणूक लढविणार नाही असे पोवार यांनी सां​गितले.

भोसलेवाडी-कदमवाडी प्रभागातील नगरसेविका स्मिता माळी यांना गेल्या वेळेला परिवर्तन ग्रुपने पाठिंबा दिला होता. यंदा हा प्रभाग सर्वसाधारण प्रवर्गासाठी आहे. या प्रभागातून ग्रुपचे अरविंद मेढे पवार हे शिवसेनेकडून इच्छुक आहेत. गेल्या निवडणुकीत ठरल्यानुसार माळी यंदा निवडणूक न लढविता मेढे यांना पाठिंबा दिला आहे. गेल्या वेळेला माळी या १४०० मताधिक्क्यांनी विजयी झाल्या होत्या.

यंदा हे नसणार

प्रभागरचना व प्रभागात अन्य प्रवर्गाचे आरक्षण पडल्यामुळे यंदा निशिकांत मेथे, महेश कदम, दिलीप भुर्के हे निवडणुकीपासून लढणार नाहीत. कळंबा फिल्टर हाऊस प्रभागातील माजी नगरसेवक अशोक रेडेकर यांनी गेल्या निवडणुकीत सतीश लोळगे यांना पाठिंबा दिला होता. यंदा रेडेकर यांनी निवडणुकची तयारी केली होती. मात्र हा प्रभाग पुन्हा एससी झाल्याने रेडेकर यांना पुन्हा थांबावे लागणार आहे.

डकरे कुटुंबींय गेली २५ वर्षे महापालिकेवर प्रतिनिधीत्व करत आहे. चुलत सासरे, नवरा यांनी नगरसेवक म्हणून काम केले आहे. यामुळे यंदा निवडणुकीत उभे राहण्याचा निर्णय आम्ही घेतला आहे. कार्यकर्त्यांना, अन्य लोकांना संधी मिळाली पाहिजे हा देखील या मागील उद्देश आहे. महापौर पद निवडी अगोदरच त्या संदर्भात घोषणा केली होती. घोषणा केल्यानुसार निवडणूक लढवणार नाही.

वैशाली डकरे, महापौर

मोबाइल अॅप डाउनलोड करा आणि राहा अपडेट