म. टा. प्रतिनिधी, कोल्हापूर
मुंबई हायकोर्टाचे सर्किट बेंच कोल्हापुरात स्थापन करण्याच्या मागणीसाठी गुरुवारी पुकारण्यात आलेल्या कोल्हापूर बंदला संमिश्र प्रतिसाद मिळाला. याप्रश्नी मावळते न्यायमूर्ती मोहित शहा यांनी कोणताच निर्णय न घेतल्याच्या प्रकाराचा यावेळी निषेध करण्यात आला. शहरातील बहुतांशी शाळा-महाविद्यालये बंद होती. सरकारी कार्यालयातील वर्दळ थंडावली होती. बंदच्या निमित्ताने वकिलांनी सर्किट बेंचच्या मागणीचा एल्गार पुन्हा पुकारला. बंदमुळे जनजीवन विस्कळीत झाले होते.
दरम्यान, खंडपीठ कृती समितीच्यावतीने काढलेल्या मोटारसायकल रॅलीत वकिलांसह राजकीय पक्ष, सामाजिक संस्था आणि संघटनांचे कार्यकर्ते व पदाधिकारी मोठ्या संख्येने सहभागी झाले होते.
सर्किट बेंचप्रश्नी कोल्हापूरच्या झालेल्या घोर निराशेमुळे कृती समितीने कोल्हापूर बंदची हाक दिली होती. गुरुवार सकाळपासूनच रस्त्यांवर तुरळक वाहतूक होती. विद्याथीं वाहतूक रिक्षा संघटेनेने आंदोलनाला पाठिंबा दिल्याने विद्यार्थ्यांच्या गैरहजेरीमुळे शाळा बंद ठेवण्यात आल्या होत्या. दुपारच्या सत्रातील शाळाही बंद होत्या. महापालिकेच्या शाळांत सर्किट बेंचची स्थापना तातडीने करण्याची मागणी करून प्रार्थनेनंतर शैक्षणिक कामकाज बंद ठेवण्यात आले.
जिल्हा न्यायालयाच्या आवारात सकाळपासूनच वकिलांनी गर्दी केली होती. सकाळी ११ वाजता मोटारसायकल रॅली काढण्यात आली. रॅलीत वकिलांची संख्या लक्षणीय होती. शिवसेनेचे आमदार राजेश क्षीरसागर, राष्ट्रवादीचे जिल्हाध्यक्ष ए.वाय. पाटील, शहराध्यक्ष नगरसेवक राजेश लाटकर, प्रदेश सदस्य माजी महापौर आर.के. पोवार, शिवसेना शहरप्रमुख दुर्गेश लिंग्रस, स्वाभिमानी शेतकरी संघटनेचे जिल्हाध्यक्ष भगवानराव काटे, उपमहापौर ज्योत्स्ना मेढे यांच्यासह राजकीय व सामाजिक संघटनांचे कार्यकर्ते सहभागी झाले होते.
बंदचे आवाहन करत रॅली प्रमुख मार्गावरुन काढण्यात आली. 'वुई वाँट जस्टीस, वुई वॉट सर्किट बेंच', 'सर्किट बेंच मिळाले पाहिजे,' 'मोहित शहांचा निषेध असो,' अशा घोषणा यावेळी देण्यात आल्या. स्टेशन रोड, महाव्दार रोड, राजारामपुरी, शाहूपुरी, पापाची तिकटी, शिवाजी पेठ, लक्ष्मी रोड परिसरातील दुकाने बंद होती. खंडपीठ कृती समितीचे निमंत्रक अॅड. राजेंद्र चव्हाण, बार असोसिएशनचे उपाध्यक्ष प्रशांत चिटणीस, माजी अध्यक्ष अजित मोहिते, शिवाजीराव राणे, विवेक घाटगे आदिंनी आंदोलनाचे नेतृत्व केले.
रविवारी बैठक
सर्किट बेंचप्रश्नी आंदोलनाची पुढील दिशा ठरवण्यासाठी खंडपीठ कृती समितीची रविवारी, (ता. १३) जिल्हा बार असोसिएशनच्या कार्यालयात बैठक होणार आहे, अशी माहिती अॅड. राजेंद्र चव्हाण यांनी दिली. कोल्हापूरसह सांगली, सातारा, सोलापूर, रत्नागिरी, सिंधुदुर्ग जिल्ह्यातील प्रतिनिधी बैठकीला उपस्थित राहणार आहे.
रॅलीतून लढ्याचा निर्धार
मुंबई हायकोर्टाच्या सर्किट बेंचची मागणी मान्य न केल्याच्या निषेधार्थ काढण्यात आलेल्या रॅलीत न्यायमूर्ती मोहित शहा यांच्या निषेधाच्या घोषणा देण्यात आल्या. रॅलीत राजकीय व सामाजिक क्षेत्रातील नेते, कार्यकर्ते, पक्षकार मोठ्या संख्येने सहभागी झाले होते. सर्किट बेंचच्या मागणीसाठी वकिलांच्या खांद्याला खांदा लावून पुन्हा लढा देण्याचा निर्धार यावेळी करण्यात आला.
सर्किट बेंचची स्थापना न केल्याने कोल्हापूर जिल्ह्यातील वकीलांमध्ये संतापाची लाट उसळली आहे. गुरूवारी कोल्हापूर बंदची हाक खंडपीठ कृती समितीने दिली होती. बंदला सर्व राजकीय व सामाजिक संघटनांनी पाठींबा दिला होता. वकिलांच्यावतीने मोटारसायकल रॅलीचे आयोजन करण्यात आले. गुरूवारी सकाळी दहा वाजल्यापासून न्यायालयाचा आवार वकीलांनी फुलला होता. सकाळी अकरा वाजता राष्ट्रवादी काँग्रेस पक्षाचे प्रदेश कार्यकारिणी सदस्य आर.के. पोवार यांच्या हस्ते रॅलीस प्रारंभ झाला.
ज्येष्ठ व कनिष्ठ वकील मोठ्या संख्येने रॅलीत सहभागी झाले. कनिष्ठ वकील खंडपीठ स्थापन करण्याचा निर्णय न घेणाऱ्या मोहित शहा यांच्या निषेधाच्या घोषणा देत होते. रॅली मार्गावर राजकीय व सामाजिक कार्यकर्ते सहभागी होत होते. सीपीआर चौक, दसरा चौक, व्हिनस टॉकीज चौकात रॅली मोठी होत गेली. 'वुई वाँट हायकोर्ट बेंच' च्या घोषणेने रॅली दुमदुमून गेली. रॅलीच्या मार्गावरील सर्व दुकाने बंद केली जात होती. स्टेशन रोडवर दुकाने बंद झाल्याने शुकशुकाट होता.
दाभोळकर चौकात शिवसेनेचे आमदार राजेश क्षीरसागर रॅलीत सहभागी झाले. चौकात आमदार क्षीरसागर, राष्ट्रवादी काँग्रेसचे जिल्हाध्यक्ष ए.वाय. पाटील, शहराध्यक्ष राजेश लाटकर, नगरसेवक शारंगधर देशमुख, जयकुमार शिंदे, पद्माकर कापसे, पक्षकार संघटनेचे प्रसाद जाधव, मनसेचे राजू जाधव यांनी शहा यांच्या निषेधाच्या घोषण दिल्या. ताराराणी चौकात उपमहापौर ज्योत्स्ना मेढे सहभागी झाल्या. त्यानंतर मोटारसायकल रॅली, टेंबलाई उड्डाण पूल, टाकाळा रोड, राजारामपुरी एकमार्गी रोड, राजारामपुरी मुख्य रस्ता, बागल चौक, पार्वती टॉकीज, उमा टॉकीज, आझाद चौक, दुर्गा हॉटेल, देवल क्लब, मिरजकर तिकटी, बिनखांबी गणेश मंदिर, महाव्दार रोड, पापाची तिकटी, माळकर तिकटी, शिवाजी चौकातून परत महानगरपालिका, जिल्हा न्यायालयाच्या आवारात विसर्जित झाली.
विसर्जन रॅलीचे नंतर छोट्या सभेत रूपांतर झाले. यावेळी बोलताना महापौर वैशाली डकरे म्हणाल्या, 'हायकोर्टाने कोल्हापूरवर अन्याय केला आहे. जनतेच्या मागणीकडे पूर्ण दुर्लक्ष झाले आहे. सर्किट बेंच स्थापन होण्यासाठी होणाऱ्या आंदोलनात करवीरकर जनता सहभागी होईल.' आमदार राजेश क्षीरसागर म्हणाले, 'कोल्हापूरला कोणतीही गोष्ट झगडल्याशिवाय मिळत नाही. आपण सातत्याने लढत आहोत. आज जरी आम्ही सत्ताधारी असलो तरी खंडपीठाच्या लढाईसाठी शिवसेना कायम रस्त्यावर उतरेल.' राष्ट्रवादीचे जिल्हाध्यक्ष ए.वाय. पाटील म्हणाले, 'आम्ही या आंदोलनात कायम अग्रभागी राहू.' शहराध्यक्ष राजेश लाटकर म्हणाले, 'सर्किट बेंचच्या स्थापनेपर्यंत शेवटच्या क्षणापर्यंत आम्ही लढा देऊ.' आंदोलनात माजी गृहराज्यमंत्री सतेज पाटील यांच्यावतीने प्रतिमा पाटील यांनी पाठींबा दिला. तर कॉ. दिलीप पवार म्हणाले, 'खंडपीठ स्थापन होईपर्यंत लढा चालूच ठेवायचा आहे.'
आंदोलनापासून भाजप अलिप्त
मंगळवारच्या सभेत भाजप महानगर अध्यक्ष महेश जाधव यांनी कोल्हापूर बंद आंदोलनात भाजपचे कार्यकर्ते सहभागी होतील अशी घोषणा केली होती. पण पालकमंत्री चंद्रकांत पाटील यांनी बंद पाळू नका, असे आवाहन केले होते. त्यामुळे बंदच्या आंदोलनात भाजपचा कोणताही पदाधिकारी सहभागी झाला नाही शिवाय कार्यकर्तेही रॅलीकडे फिरकले नाहीत.
खोटारडा माणूस.....
'अशिया खंडातील सर्वात खोटारडा माणूस' अशा आशयाचा न्यायमूर्ती मोहित शहा यांच्या प्रतिमेसह फलक लक्ष वेधून घेत होता. 'दार उघड, आता दार उघड, गणपती बाप्पा खंडपीठाचे दार उघड', 'कोल्हापुरातील खंडपीठ कोणासाठी? सर्वसामान्य जनतेसाठी' हे फलक लक्ष वेधून घेत होते.
मोबाइल अॅप डाउनलोड करा आणि राहा अपडेट