श्रावण महिन्याची सुरुवात लवकरच होत असल्याने गटारीच्या तयारीला लागले आहेत. सोशल मीडियावर गटारीचे निमंत्रण देण्यास सुरुवात झाली आहे. महापालिकेच्या निवडणुकीमुळे या वर्षीच्या गटारीला वेगळाच रंग येणार आहे. इच्छुक उमेदवारांनी गटारी स्पॉन्सर केली आहे.
श्रावणाची सुरुवात स्वातंत्र्यदिनापासून होत आहे. आषाढातील शेवटचा दिवस शुक्रवारी आहे. शुक्रवारनंतर जोडून स्वातंत्र्यदिन आणि रविवारीच सुट्टी असल्याने अनेकांनी पर्यटनाचे आणि विविध खाद्यपदार्थांचे बेत आखले आहेत. खवय्यांना मटण, चिकन, मासे यांच्या आगाऊ ऑर्डर दिल्या आहेत. शहरात शुक्रवारी सुमारे पाचशेहून अधिक बकरी, कोंबड्यांची विक्री होण्याची शक्यता आहे. त्यासाठी मटण विक्रेत्यांनी बेळगांव, सांगोला, जत, पुणे आणि कर्नाटकातून बकरी आणली आहेत. गर्दी लक्षात घेता सकाळी सहा वाजल्यापासून मटण विक्रीची दुकाने खुली राहणार आहेत. शहर आणि ग्रामीण भागात मटण विक्रीच्या दरात सुमारे पन्नास ते साठ रुपयांचा फरक आहे. त्यामुळे खवय्याची गर्दी लक्षात घेता कळंबा, वाशी, पीरवाडी, वडणगे, उचगांव, कसबा बावडा परिसरातील मटण विक्रेत्यांची जय्यत तयारी केली आहे. सध्या व्हॉट्सअप, ट्वीटर आणि फेसबुकवरही गटारीबद्दलची वातावरण निर्मिती जोरात सुरू आहे. या तयारीचेच काही फोटो सोशल मीडियावर झळकले आहेत. महापालिकेच्या निवडणुकीमुळे गटारीनिमित्त प्रभागातील मतदारांशी संपर्क साधण्याची संधी इच्छुक उमेदवारांना मिळाली आहे.
मांसाहाराची उलाढाल
गटारीच्या तयारीसाठी कोंबडी बाजारात गर्दी फुलली. अनेकांनी मटण विक्रेत्यांच्याकडे शुक्रवारच्या मटणासाठी आगाऊ नोंदणी केली. चिकनसह मासेही मोठ्या प्रमाणात आयात करण्यात आले आहे. अंडी विक्रीतही मोठी वाढ होत आहे.
मोबाइल अॅप डाउनलोड करा आणि राहा अपडेट
